लूका 2 - सिरमौरी नौवाँ नियमबैतलहम नोगरो दा यीशु का जन्म ( मत्ती 1:18-25 ) 1 तिनु दूसौ दै रोम देश कै सम्राट औगुस्तुसे आपणै पूरै साम्राज्य कै गिनतै कौरणौ कै आज्ञा दै कै सारै रोमी साम्राज्य कै आदमियों कै नांव लिखै जांव। 2 ऐजै आगलै नांव लिखाए तैसी सौमय हौए, जोबै क्विरिनियुस सीरिया प्रदेश का राज्यपाल थिया। 3 औरौ सौबै लोग नांव लिखवाणो कारिए आपणै-आपणै नोगरो हौटै जिथै तिनकै पुराणिया रौंव थिए। 4 इथकारिए कै यूसुफ बै राजा दाऊद कै घोराणे औरौ वंशो का थिया गलील जिले कै नासरत गांव शै यहूदिया प्रदेश दा दाऊद कै बैतलहम गांव दा हौटा। 5 सै आपणी मंगेतर मरियम कै साथै जू सुजणौ पांदी थी नांव लिखवाणो कारिए हौटा। 6-7 जोबै सै बैतलहम नगर दै थिए, तौ तिनकै तिथै रौणौ कारिए कुणजै जौगैह ना भैटी, इथकारिए सै ऐकी शाल़ो पुंडे रौवै। जोबै मरियम का सुजणौ का सौमय ओऊवा, तौ तियैं तिथै आपणै पौयलै बैटै कै जन्म दिया। तियैं तैसी खोटणो दा लोपेटै दिया औरौ तैसी खुरल़ी दा राखा। चौराणौवाल़ौ खै स्वर्गदूत का सौंदेश 8 औरौ तैसी देशो कै किछै चौराईया थिए, जू राती कै मैदानो पुंडे रौंव थिए औरौ आपणै झुंडो का पोएरा दैंव थिए। 9 औरौ एकदम प्रभु का ऐक स्वर्गदूत तिनकै धोरे आयौ खौड़ा हौआ; औरौ प्रभु कौ झमाकैदार पेयाशो तिनु पांदी चौमकौ, औरौ सै बौहितै डौरे गौवै। 10 तोबै स्वर्गदूतै तिनु बौल़ौ, “डौरेया नै; जिथुकै हांव तुऔं ऐक बौड़ै खुशी का सुसमाचार प्रचार कौरदा, जू सौबी लोगौ कारिए औसौ। 11 कै ऐलो राजा दाऊद कै बैतलहम शहर दा तुऔं कारिए ऐक उध्दार कौरणौवाल़ा जन्मे रौआ, औरौ ऐजाई मसीह प्रभु औसौ। 12 सै भेइया कुण औसौ ऐजौ तुऔं ऐसी निशान शै पौता चालदा कै तुऐं तैसी भेइया कै खोटणो दा लोपेटेयोंदा औरौ खुरल़ी दा पौड़ेयौंदा दैखदै।” 13 तोबै एकदम तैसी स्वर्गदूत कै साथै बौहितै स्वर्गदूतौ का गुट पौरमेशवर कै स्तुति कौरदै औरौ ऐजौ बौलदै दैखियै, 14 “स्वर्ग दै पौरमेशवर कै महिमा औरौ धोरती पांदी तिनु आदमी कै शान्तै भैटौ, जिनु लोगौ दा सै खुश औसौ।” चोराइयो कौ बैतलहम नोगरो कै जाणौ 15 जोबै सौबै स्वर्गदूत तिनकै धोरे दै स्वर्ग कै हौटै तौ चौराईयाए आपी मुंजी बौल़ौ, “आव, आमै बैतलहम गांव जायौ ऐजै बात जू हौए रौए, औरौ जू प्रभुए आमुखै बौताए राए दैखुबै।” 16 औरौ तिनुऐ तौलोंई बैतलहम नगर दै जाऐबा मरियम औरौ यूसुफ खै औरौ खुरल़ी दा तैसी भेइया खै पौड़ेयौंदा दैखा। 17 ऐसी भेइया कै दैखणौ कै बाद जू बात स्वर्गदूतै तैसी भेइया कै बारै मुंजी बौल़ै राए थियु सौबी जौगैह बोतांदै लागै। 18 सौबै शुणणौवाल़ै लोग चोराइयो की बातौ शुणैबा हैरान हौए गौवै। 19 पौरौ मरियम ऐजी बातौ आपणै मनो दी राखैयौ सुंचदै रौए। 20 औरौ चोराइयो कै जैशै स्वर्गदूतै तिनु बौल़ै राए थियु तैशैकैई सौबै शोणेयो औरौ दैखैबा पौरमेशवर की महिमा औरौ स्तुति कौरेयौ पाछु हौटै गौवै। यीशु का नामकरण 21 जोबै भेइया कै आठ दूस पूरै हुवे, औरौ तैसकै खतने का सौमय ओऊवा, तौ तैसकौ नांव यीशु राखौ, ऐजौ नांव स्वर्गदूतै तियौंकै पेटो दै आणौ शै आगै दैय राए थियु। 22-24 जोबै मूसा कै कानून कै हिसाब शै मरियम कै शुध्द हौणौ कै दूस पूरै होवे, तोबै सै यरूशलेम शहर कै मंदिर दै हौटै, ऐजै प्रभु कै नियम कै मानणौ कारिए सै घुगती कै ऐक जोड़ी नी तौ कबूतर कै दो बोच्चै नियौ तिनका बलिदान चौढ़ांदै हौटै, सै यीशु खै बै यरूशलेम शहर लौए गौवै कै तैसीखै प्रभु कै सामणै राखौ, जिथुकै जैशै प्रभु कै नियम शास्त्र दो लैख राए तैशै, “हरेक आगला जन्मेयौंदा बैटा प्रभु कारिए पवित्र हौणौ कारिए जौई कौरणा पौड़दा।” शमौन दवारा पौरमेशवर की बातौ बौताणी 25 तैसी सौमय यरूशलेम शहर दा शमौन नांव का ऐक आदमी थिया औरौ सैजा आदमी धरमी औरौ भकत थिया, औरौ बैसब्री शै मसीह कै आणौ का इंतजार कौरे लौआ थिया कै सै इस्राएल देश कै शान्तै दैंव, औरौ पवित्र आत्मा तैसी पांदी थै। 26 पवित्र आत्माए तैसीखै बौल़ौ, कै तू मौरणौ दै औगौड़ियौ प्रभु कै मसीह खै दैखदा। 27 औरौ तैसी दूस पवित्र आत्मा कै अगुवाई शै शमौन मन्दिर दा ओऊवा औरौ जोबै माँ बापू तैसी भेइया यीशु खै भीतरै लियोऊवा, कै तैसी कारिए मूसा कै कानून कै भोवार कै हिसाब शै कौरौ। 28 तोबै तैणै भेइया यीशु कै आपणै हौंगटै दा कौरा औरौ पौरमेशवर का धन्यवाद दैयौ बौल़ौ, 29 “ओए रै गुरु, तू मुखै, आपणै दास कै आपणै वचन कै हिसाब शै शान्तै शै मौरणौ दै; 30 जिथु मोऐं तैसी उध्दार कौरणौवाल़ै कै दैख पाए, जैसी तुऐं सौबी लोगौ कै बौचाणौ कारिए छाड़ै राए। 31 जैसी तुऐं सौबी देशो कै लोगौ कै सामणै तैयार कौरे राए। 32 कै सै बैगानै यहूदी कै सोचाई बौताणौ कारिए पौरमेशवर को ऐक पेयाशो औसौ, औरौ इस्राएल देश कै लोगौ कै महिमा हौंव जू तैरै आपणै औसौ।” 33 औरौ यीशु कै माँ-बापू इनु बातौ शै जू तैसकै बारै मुंजी शमौने बौल़ै रैई थी, हैरान हौए गौवै। 34 तोबै शमौने तिनुकै आर्शीवाद देएबा, तैसकै माँ मरियम खै बौल़ौ, “दैख सै इस्राएल देश दा कैई लोगौ कै नाश औरौ उध्दार कारिए, ऐक चिताणो कै निशान कै जैशणा हौंदा, जैसकै खिलाफ दी लोग बातौ कौरदै। 35 तैसका विरोध कौरेयौ, सै आपणै भीतरै कै विचारो खै प्रगट कौरदै। औरौ बौड़ा दुख, तलवार कै जैशणा आपणी आत्मा शै बै निकल़दा।” हनाह दवारा गवाही 36 हनाह नांव की पौरमेशवर कै बातौ बौताणौवाल़ी थी, औरौ आशेर कै गोत्र मुंजीदै फनूएल नांव कै आदमी की बैटी थी। सै बौहितै बूढ़ी थी, औरौ बैयाव हौणौ कै बाद सै सात सालो तौड़ी आपणै घोरवाल़ै आरी रोए रोई थी। 37 औरौ सै चौरासी सालो शै विधवा थै। औरौ मन्दिरो कै ना छोड़ो थी पौरौ उपवास औरौ प्रार्थना कौरेयौ रात दूस आराधना कौरौ थी। 38 औरौ सै तैसी सौमय आयौ पौरमेशवर का धन्यवाद कौरदै लागै, औरौ तिनु सौबी शै जू यरूशलेम शहर कै लोगौ कै छुड़ाणो कारिए मसीह कै भैजणौ का इंतजार कौरे लौआ थिया, तैसकै बारै मुंजी बातौ कौरदै लागै। यूसुफ औरौ मरियम कौ घोरे पाछु आणौ 39 औरौ जोबै यूसुफ औरौ मरियम प्रभु कै कानून कै हिसाब शै सौबै ठुँ पूरु कौरे पोऊँ तौ गलील जिले दा आपणै नोगरो कै नासरत गांव कै दुजाल़ियो हौटै गौवै। 40 औरौ भेइया बौढ़दा औरौ मोजबूत हौआ, औरौ बुधि शै भोरदा गौआ; औरौ पौरमेशवर का अनुग्रह तैसी पांदी थिया। भेइया यीशु मंदिर दा 41 यीशु कै माँ-बापू हर साल फसह कै तैयारो मुंजी यरूशलेम शहर जाया कौरौ थिए। 42 जोबै यीशु बारह सालो का हौआ, तौ सैजै तैयारो कै भोवार कै हिसाब शै यरूशलेम शहर कै हौटै। 43 औरौ जोबै तैसकै माँ-बापू तिनु दूसौ कै पूरै कौरेयौ पाछु आन्दै लागै, तौ भेइया यीशु यरूशलेम शहर दा रोए गौआ; औरौ ऐजै बात तैसकै माँ बापू ना जाणौ थिए। 44 सै ऐजौ सौमझेयौ कै सै ओकी लोगौ कै साथै हौंदा ऐक दूस निकल़ी गौ, औरौ सै तैसकै आपणै कुड़बे औरौ जाण पोहचाण वाल़ौ मुंजी जौंदै लागै। 45 पौरौ जोबै सै ना भैटी, तौ जूंदै-जूंदै यरूशलेम शहर कै पाछु हौटै गौवै। 46 औरौ तीन दूसौ कै बाद तिनुऐ तैसीखै मन्दिर कै आँगणो दा उपदैशको कै बीच मुंजी बौठेयौंदा तिनकै शुणदै बैई औरौ तिनुवांदा सवाल पूछदै बैई दैखा। 47 औरौ जिशैक लोगै तैसी शौणै लौआ थिया, सैजै सौबै तैसकै सौमझ औरौ तैसकै जवाबो शै डौरे गौवै। 48 तोबै तैसकै माँ बापू तैसीखै दैखैयो हैरान हौए गौवै औरौ तैसकी माँए तैसी बौल़ौ, “बैटा तुऐं आमुआरी ऐशैखै काए कियु? दैख तैरा बापू औरौ मोऐं ताखै बेचेनी शै जौए लौआ थिया।” 49 तैणै तिनु बौल़ौ, “तुऐं मुखै काए जौए लोआ थिया? का तुऐं जाणौ ना कै मुखै आपणै बापू कै घोरे हौणौ जौरुरी औसौ?” 50 पौरौ जू बात यीशुए तिनु बौल़ै, तिनुऐ तियौं सौमझी नी। 51 तोबै सै तिनकै साथै हौटा औरौ नासरत गांव दा ओऊवा, औरौ तिनकै आज्ञा मानदा रौआ औरौ तैसकै माँए ऐजी सौबै बातौ आपणै मनो दी राखी। 52 औरौ यीशु बुध्दि, शोरीरो दा, औरौ पौरमेशवर औरौ आदमी कै अनुग्रह दा बौढ़दा रौआ। |
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
Beyond Translation