लूका 18 - सिरमौरी नौवाँ नियम

विधवा औरौ अधरमी न्यायाधीश

¹ यीशुए आपणै चैलै शै इथकै बारै मुंजी बौल़ौ, कै तिनु रौज प्रार्थना कौरणी चैंई औरौ हिम्मत नी छोड़णे चैंई। तैणै तिनु ऐजा उदारण दिया:

² “कोसी नोगरो दा ऐक न्यायाधीश रौंव थिया, जू ना ही पौरमेशवर दा डौरौ थिया, औरौ ना ही कोसी आदमी की परवाह कौरौ थिया।

³ तैसी नगर दै ऐक विधवा बै रौंव थै, जू तैसकै धोरे आयौ खै बौलेया कौरौ थै, ‘मैरा न्याय कौरेयौ मुखै दुशमन शै बौचा।’

⁴ बौहुत दूसौ तौड़ी सै ना मानी पौरौ बाद मै आपणै मन दो सुचयो बौल़ौ, ‘जै हांव ना पौरमेशवर दा डौरु औरौ ना ही आदमी कै परवाह कौरु।

⁵ तोबै बै ऐजी विधवा आयौ खै मुखै पौरैशान कौरौ, इथकारिए हांव इयौं का न्याय चुकाए दियु, कोदी ऐशै ना हौंव कै सै बार-बार आयौ बाद मै मैरै नाको दा दम कौरौ।’”

⁶ प्रभु यीशुए बौल़ौ, “शुणौ, ऐसी न्याय ना कौरणौवाल़ै न्यायाधीश शै सबक शिखौ।

⁷ तौ इथकारिए पौरमेशवर आपणै चोणेयौंदे लोगौ कारिए जू राती दूसै तैसकै धोरे रुओं तिनका न्याय कौरदा, औरौ सै तिनकै मौदद कौरणौ दै देर ना कौरदा?

⁸ हांव तुऔं खै बुलू, सै तावल़ा तिनका न्याय चुकांदा; पौरौ जौल़ौ हांव आदमी का बैटा पाछु ओऊंबा, तौ मुखै धोरती पांदी कैतरै लोग भैटदै जिनुदा बिशवाश हौला?”

धरमी कुण औसौ

⁹ तोबै यीशुए तिनु लोगौ खै जू आपणै बारै मुंजी सुंचौ थिए, कै आमु धरमी औसौ, औरौ ओकी खै बैकार जाणौ थिए, तिनुकै ऐजा उदारण दिया:

¹⁰ “दो आदमी मन्दिर दै प्रार्थना कौरदै हौटै, ऐक फरीसी आदमी थिया औरौ ओका मामला लोणो वाल़ा।

¹¹ फरीसी आदमी खौड़ा हौयौ आपणै मन दै ऐजै प्रार्थना कौरदा लागा, ‘ओए रै पौरमेशवर, हांव तैरा धन्यवाद कौरु, कै हांव ओकी आदमी कै जैशणा दुष्टता कौरणौवाल़ा न्याय ना कौरणौवाल़ा औरौ ना गौलत सौमबंध बौणाणौवाल़ा, औरौ ना ही ऐसी मामला लोणो वाल़ै कै जैशणा आथी।

¹² हांव हफते दा दो बैई उपवास राखु; हांव आपणी कमाई का देशवाँ भाग बै ताखै दियु।’ ”

¹³ “पौरौ मामला लोणो वाल़ै दूर ही खौड़ा हौयौ औरौ तैणै स्वर्ग कै ढौबौ दैखणौ बै ना चोऊ, पौरौ दुख कै साथै छाती पीटैयो बौल़ौ, ‘ओए रै पौरमेशवर मुं पापी पांदी दया कौर।’

¹⁴ यीशुए बौल़ौ हांव तुऔं खै बुलू, कै फरीसी आदमी ना, पौरौ मामला लोणो वाल़ा आदमी पौरमेशवर कै नज़र दा धरमी हौयौ आपणै घोरे हौटै गौआ; जिथुकै जू कुणिए आपी खै बौड़ा सौमझला सै नानड़ा हौंदा; औरौ जू आपी खै नानड़ा सौमझला, सै बौड़ा बौणाए जांदा।”

पौरमेशवर का राज्य नानड़िया साए औसौ

¹⁵ तोबै लोग आपणै नानड़िया कै तैसकै धोरे लान्दै लागै, कै सै तिनु पांदी हाथ राखौ औरौ चैलै दैखैयो तिनुकै झिड़कै।

¹⁶ यीशुए नानड़िया कै नेड़िक बौएदैयौ बौल़ौ, “नानड़िया खै मैरै धोरे आणौ दैव, औरौ इनुखै मोना नी कौरौ: जू कुणिए नानड़िया कै जैशणा भोरोशा कौरौ सैजैई लोग पौरमेशवर कै राज्य दै रोन्दै।

¹⁷ हांव तुऔं खै साचौ बुलू, कै जू कुणिए पौरमेशवर कै राज्य खै नानड़िया कै जैशणा मानलै, सैजै तिंदै जाए सौकौ।”

ऐक सैठ आदमी का यीशु कैईंदा सवाल

¹⁸ कोसी ऐकी ठोगड़े तैसी कैईंदु पूछु, “ओए रै आछै गुरु, हांव ऐशणा का काम कौरु, कै पौरमेशवर मुखै सौदा कै जिन्दगी दैला?”

¹⁹ यीशुए तैसीखै बौल़ौ, “तू मुखै आछा गुरु किथुखै मानै? कुणिए आछा ना आथी, सिरफ पौरमेशवर ही आछा औसौ।

²⁰ तू पौरमेशवर की आज्ञाओं खै तौ जाणैए: ‘खून नी कौरेया, गौलत सौमबंध नी बाणैया, चोरी ना कौरेया, झूठी गवाही ना दैया, औरौ माँ-बापू कै इज्जत कौरेया।’ ”

²¹ तैणै बौल़ौ, “हांव तौ इनु बातौ कै बचपन शै ही मानदा आए रौआ।”

²² ऐजौ शोणेयो, “यीशुए तैसी बौल़ौ, ऐबै बै तांव दै ऐकी बातौ की कमी औसौ, आपणौ सौबै ठुँ बिकैयो गोरीबो कै बांडै दै, तौ ताखै स्वर्गो दा धन भैटला, औरौ आयौ मैरा चैला बौणै जा।”

²³ सै ऐजौ शोणेयो बैजाए उदास हौए गौआ, जिथुकै सै बैजाए सैठ थिया।

²⁴ यीशुए तैसी दैखैयो बौल़ौ, “सैठ का पौरमेशवर कै राज्य दौ जाणौ केतरो मुशकिल औसौ।

²⁵ ऊँट कै सिओणी कै पाशी पौरैशौ निकल़णौ आसान हौए सौकौ, पौरौ सैठ लोगौ कै पौरमेशवर कै राज्य दो जाणौ बैजाए चैईथु औसौ!”

²⁶ इथपांदी शुणणौवाल़ै पूछदै लागै, तौ इथका मतलब औसौ कै कुणिए बै आपणै पापौ कै सौजा भैटणौ शै ना बौचै सौकौ, औरौ ना ही सै पौरमेशवर कै राज्य दा जाए सौकौ।

²⁷ तैणै बौल़ौ, “जू आदमी लैई ना हौए सौकौ, सै पौरमेशवर शै हौए सौकौ।”

²⁸ पतरसे बौल़ौ, “आमै तौ घोरबार तांव कारिए छोड़े दियु कै तैरै चैलै बौणु।”

²⁹ तैणै तिनु बौल़ौ, “हांव तुऔं साचौ बुलू, कै जिनु कुणिए पौरमेशवर कै राज्य कारिए घोर या घोरवाल़ी या भाई, या माँ-बापू, या बाल-बोच्‍चे कै छोड़े राए।

³⁰ औरौ तिनुकै इयौं सौमय दी बौरिशी चीज़ौ भैटदी, औरौ आणौवाल़ै जुगो दै सौदा कै जिन्दगी भैटदै।”

मौरेयौ जियुंदी हौणौ कै बारै मुंजी बौताणौ

³¹ तोबै तैणै बारौ चैलै कै साथै नियौ तिनु बौल़ौ, “आमु यरूशलेम शहर खै जांदै लागै रौवै, औरौ जिशैक बातौ मुं आदमी कै बैटै कै बारै मुंजी पौरमेशवर कै बातौ बौताणौवाल़ै लैखै रैई, सै सौबै पूरी हौंदी।

³² जिथुकै सै मुखै बैगानै यहूदियों कै हाथौ दा सौंपदै, औरौ सैजै मैरा मोजाक उड़ांदै, औरौ मैरी बैज्जती कौरदै, औरौ मुं पांदी थुकदै।

³³ औरौ कोढ़े मारदै, औरौ मुखै मारै दैंदै, औरौ हांव ती ‌‌‌दूसौ दा जियुंदा हौए जांदा।”

³⁴ पौरौ तिनुऐ इनु बातौ मुंजी दी ऐक बै बात नी सौमझी औरौ ऐजै बात तिनुवांदै छिपैयौंदे रौए, औरौ जू बौल राए थियु, सै तिनकै सौमझ मै ना ऐई।

आन्धै भिखारी की आखी ठीक कौरणी

³⁵ जोबै सै यरीहो शहर कै नेड़िक पोऊंचा, तौ ऐकी आन्धै शोड़कै कै किनारे बौठेयौ भीख मांगै लोए थै।

³⁶ सै भीड़ौ कै धाव शोणेयो पूछदा लागा, “ऐजौ का हौंदौ लागै रौ?”

³⁷ तिनुऐ तैसी बौतौऊं, “नासरत गांव का यीशु जांदा लागै रौआ।”

³⁸ तोबै तैणै जोर सै बौल़ौ, “ओए रै यीशु, दाऊद कै वंश, मुं पांदी दया कौर।”

³⁹ जू औगौड़ियौ-औगौड़ियौ चाल रौवै थिए, सै तैसी डांटदै लागै कै चुपी रौ पौरौ सै हौजौ बै लैरौ मारदा लागा, “ओए रै यीशु राजा दाऊद कै वंश मुं पांदी दया कौर।”

⁴⁰ तोबै यीशुए खौड़ै हौयौ आदैश दिया कै ऐसी मैरै धोरे लाव, औरौ जोबै सै नेड़िक ओऊवा, तौ तैणै तैसीयांदो पूछु,

⁴¹ “तू का चांए कै हांव तांव कारिए कौरु?” तैणै बौल़ौ, “ओए रै प्रभु, ऐजौ चोऊं कै हांव दैखदा लागू।”

⁴² यीशुए तैसीकै बौल़ौ, “दैखदा लाग; जिथुकै तुऐं मुं पांदी बिशवाश कौरे राए।” इथकारिए ऐबै तू ठीक हौए गौआ।

⁴³ औरौ सै तौलोंई दैखदा लागा औरौ पौरमेशवर कै बौड़ाए कौरदा रौआ, औरौ तैसकै साथी हौटै गौआ, औरौ सौबै लोग दैखैयो पौरमेशवर कै बौड़ाए कौरदै लागै।