लूका 17 - सिरमौरी नौवाँ नियम

चोकशाणा

¹ यीशुए आपणै चैलै कै बौल़ौ, “ऐजै बात पाकै औसौ कै परीक्षाएँ आदमी कै सामणै जौरुर आन्दी, जू तिनकै पाप कौरणौ कै बौजैह बोणदी पौरौ हाय तैसी पांदी जैसकी बौजैह शै परीक्षा आंव!

² जू इनु नानड़ै मुंजी कोसी ऐकी कै बै पाप कौरवाणौ कै बौजैह बौणौ, तैसी कारिए आछौ हौल़ौ कै ऐक बौड़ै चाकी का पाथर तैसकै टाटु दा टांगै दैंव, औरौ तैसी समुन्द्र दा पाए दैंव जिथुकै तैसीकै ऐजै बुरै सौजा हौंदै। पौरौ पौरमेशवर तैसीखै इदै बै बुरै सौजा दैन्दा।

³ चौकश रौया; कै तुऐं का कौरौ, जै तैरा बिशवाशी भाए पाप कौरौ तौ तैसी डांट, औरौ जै सै आपणै पाप कौरणौ शै पोछतांव तौ तैसी माफ कौर।

⁴ जै दूस भोरै सै सात बैई तैरै खिलाफ पाप कौरौ, औरौ सात बैई तैरै धोरे होटेयो आयौ बौल़ौ, कै हांव आपणै पाप शै पोछतौऊं, तौ तैसी माफ कौरेया।”

तोंवारा बिशवाश कैतरा बौड़ा औसौ?

⁵ तोबै चोणेयौंदे चैलै प्रभु यीशु कै बौल़ौ, “अमारै बिशवाश कै हौजौ मजबूत कौर।”

⁶ प्रभुए बौल़ौ, “जै तुऔं खै राई कै दाणै कै बोराबर बै बिशवाश हौंदा, तौ तुऐं ऐसी तुन्तौ कै डाल़ो खै बौलदै कै जोड़ो शा ओकशैयो समुन्द्रो दा लागै जा, तौ सै तुंआरी मान पांदा।”

आछा नोकर

⁷ “पौरौ तुऔं मुंजी ऐशणा कुण औसौ, जै तोंवारा नोकर हौल़ौ लैई बौयौ या भेड़ो कै दैख-रैख कौरेयौ घोरे आंव, तौ तुऐं का बौलल़ै, तावल़ा आयौ खाणौ खांदा बौठ?

⁸ ना पौरौ सै बौलदा, मैरौ खाणौ तैयार कौर, औरौ जौल़ौ तौड़ी हांव खोऊं-पियुं तौलौ तौड़ी मैरै सेवा कौरणौ कारिए तैयार रौंव; इथकै बाद तू बै खाए पैया कौरेया।

⁹ तुऐं आपणै नोकरो खै तैसी टोल सांडणौ कारिए धन्यवाद ना कौरदै, जू तुऐं तैसी कौरणौ कारिए बौल़ै राए थियु?

¹⁰ ऐशैखैई तुऐं बै, जोबै तुऐं बै ऐजौ सौबै ठुँ कौरे पांव जू तुऔं कौरणौ बौल़ै राए थियु, तौ तुऔं ऐजौ बौलणौ चैंई कै, ‘आमुए निकम्मे नोकर औसौ; जू आमु कौरणौ चैंई थियु आमु सिरफ सैजौई कौरे राए।’”

ऐकी कोढ़ी का सान मानणा

¹¹ जोबै यीशु औरौ तैसकै चैलै यरूशलेम शहर जांदै बैई सामरिया प्रदेश औरौ गलील जिले कै सैयानै बाटी जांदै लागै रौवै थिए।

¹² औरौ जोबै सै कोसी गांव दै पोहुचणौ वाल़ै थिए तौ तैसीकै दस कोढ़ी भैटी।

¹³ तिनुऐ दूरकै खौड़ै हौयौ जोर सै लैरौ मारेयों बौल़ौ, “ओए रै यीशु, ओए रै मालिक, आमु पांदी दया कौर!”

¹⁴ यीशुए तिनु दैखैयो बौल़ौ, यरूशलेम शहर कै मन्दिरो दै, “जाव; औरौ आपी खै यहूदी पुरोहितो खै दिखाव।” ताकि सै दैख सौकौ कै तुऐं ठीक हौए गौवै। औरौ जोबै सै जांदै लाग रौवै थिए तोबै सै बाटो पुंडे ठीक हौए गौवै थिए।

¹⁵ तोबै तिनुमुंजी ऐकीए ऐजौ दैखैयो, कै हांव ठीक हौए गौआ, जोर शै पौरमेशवर कै बौड़ाए कौरदै बैई यीशु कै धोरे पाछु ओऊवा।

¹⁶ औरौ सै यीशु कै लातो पांदी मुँह नियुड़ाएयो तैसका धन्यवाद कौरदा लागा, औरौ सैजा आदमी सामरिया इलाके का रौणौवाल़ा थिया।

¹⁷ इथपांदी यीशुए बौल़ौ, “का सैजै दस आदमी ठीक ना होई, तौ तोबै सैजै नौ आदमी कुकै औसौ?

¹⁸ का ऐसी बैगानै यहूदी खै छोडे़बा कुणजाई पाछु ना ऐई, जू पौरमेशवर कै बौड़ाए कौरदा?”

¹⁹ तोबै यीशुए तैसी बौल़ौ, “बीजयो आगु जा; जिथुकै तुऐं बिशवाश कौरा इथकारिए तू ठीक हौए गौआ।”

पौरमेशवर कै राज्य का प्रगट हौणा

²⁰ ऐक दूस फरीसी लोगै यीशु कैईंदु पूछु, कै पौरमेशवर का राज्य कोलो आन्दा, तौ यीशुए तिनु जोवाब दिया, “पौरमेशवर का राज्य ऐशणा ना आथी, जैसी तुऐं दैखै ना सौकौ।

²¹ औरौ लोग ऐजौ ना बौलदै, कै दैखौ, इथै औसौ, या तिथै औसौ। जिथुकै पौरमेशवर का राज्य तोंवारै बीचो दा औसौ।”

²² औरौ यीशुए चैलै खै बौल़ौ, “सैजै दूस आन्दै, जौल़ौ तुऐं तिनु दूसौ खै देखणा चांव जैसी दूसै हांव आदमी का बैटा पाछु आन्दा, पौरौ तुऐं ऐजौ ना दैख सौकदै।

²³ लोग तुऔं कै बौलदै, ‘दैखौ, मसीह तिथै औसौ!’ या ‘दैखौ मसीह इथै औसौ!’ ऐजौ शोणेयो तुऐं आगु नी जाया औरौ ना ही तिनकै पौछौड़ियौ दौड़ैया।

²⁴ जिथुकै जैशै बिजली गौयणै कै ऐकी कुणै पौरैशी निकल़ैयो गौयणै कै ओकी कुणै तौड़ी चौमकौ, ऐशैखैई हांव आदमी का बैटा बै पाछु ओऊंबा, औरौ सौबै लोग मुखै आन्दै बैई दैखदै।

²⁵ पौरौ औगौड़ियौ जौरुरी औसौ, कै हांव बौहुत जादा दुख झैलदा औरौ ऐसी जमाने कै लोग मुखै बैकार सौमझौ।

²⁶ जैशै अमारै पुराणिया नूह कै दूसौ दो हौं थियु, तैशैखैई मुं आदमी कै बैटै कै दूसौ दो बै हौल़ौ।

²⁷ जैसी दूसौ तौड़ी नूह जहाजो पांदी ना बुठी, तैसी दूसौ तौड़ी लोग खांव पियौं थिए, औरौ तिनुमुंजी बैयाव हौंव थिए। तोबै जल-प्रलय आयौ तिनु सौबी कै नाश कौरे दिए।

²⁸ ऐशैखैई जैशैकै अमारै पुराणिया लूत, जू सदोम शहर दा रौंव थिया, तिनु दूसौ दो ऐशै हौं कै लोग खांव पीयों थिए, लैण-दैण कौरौ थिए, डाल़ लांव औरौ घोर बाणौ थिए;

²⁹ पौरौ जैसी दूसै लूत सदोम शहर शै निकल़ा, तैसी दूसै आग औरौ गन्‍धक स्वर्ग पौरैशौ बोरशो औरौ शहर कै सौबी लोगौ कै नाश कौर दिए।

³⁰ औरौ तैसी दूस बै ऐशैखैई हौंदौ, जौल़ौ हांव आदमी का बैटा एकदम शै होटेयो पाछु आन्दा।”

³¹ “तैसी दूसै जू छोतौ पांदी हौलै औरौ तैसकौ समान घोरे हौंव, तौ सै तिथु लाणौ कारिए घोरे पाछु नी आया, औरौ तैशैखैई जू बागड़ी दै हौलै सै बै पाछु घोरे नी आया।

³² अमारै पुराणिया लूत कै घोरवाल़ी खै याद राखौ कै तियौंकै साथै का हौं।

³³ जू कुणिए इयौं धोरती पांदी आपणै जिन्दगी बौचाणौ कै कौचिश कौरला, सै सौदा कै जिन्दगी गवांए दैला, औरौ जू कुणिए तियौं गौआल़ा सै तियौं बौचांदा।

³⁴ हांव तुऔं बुलू, तैसी रातै दो आदमी ऐकी बिछाणै पांदी हौलै; ऐक आगु निंदै औरौ ओका छोड़े दैंदै।

³⁵ दो बैटमाणिशौ ऐकी साथै चाकी पिशदी लागै रौंदी, ऐक आगु निंदै औरौ औकै छोड़े दैंदै।

³⁶ दो आदमी बागड़ी दै काम कौरदै हौंदै; ऐक आगु निंदै औरौ ओका छोड़ दैंदै।”

³⁷ ऐजौ शोणेयो चैलै तैसीयांदो पूछु, “ओए रै प्रभु ऐजी सौबै चीज़ौ कुकै हौंदी?” तैणै तिनु बौल़ौ, “सौबी खै ऐजा पौता चालै जांदा कै ऐजौ कुकै हौंदौ लागै रौं, जिथुकै सौबै जाणौ कै जिथै लाश औसौ, तिथै घिईजौ कौठै हौं।”