लूका 16 - सिरमौरी नौवाँ नियम

सौमझदार भण्‍डारी

¹ तोबै यीशुए आपणै चैलै खै ऐक उदारण दिया, कोसी सेठो का ऐक भण्‍डारी थिया, औरौ लोगै तैसकै सामणै तैसी पांदी ऐजा दोष लौआ कै सै तैरै सौबै जायदात उड़ाए दैंव।

² इथकारिए सैठ आदमीए तैसी बौएदैयौ बौल़ौ, ऐजौ का औसौ जू मोऐं तैरै बारै मुंजी शौणै लो? तुऐं मैरै पौयसै शै का कौरौ तिथका हिसाब मुखै दै, आपणै भण्‍डारीपन का लैखा दै, जिथुकै तू औगौड़ियौ मैरा भण्‍डारी ना रौए सौकदा।

³ तोबै भण्‍डारी सुंचदा लागा, “ऐबै हांव का कौरु? जिथुकै मैरै मालिकै ऐबै भण्‍डारी का काम मुंआदा आगु कौरे लौआ। जोमीन खुणणौ का काम मैरै शै ना हौंव; औरौ भीख मांगणौ दै मुखै शर्म आंव।

⁴ ऐबै हांव सौमझी गौआ, कै का कौरु: जोबै हांव भण्‍डारी कै कामौ पौरैशा छुड़ाए जोऊं तौ लोग मैरै मौदद कौरलै।”

⁵ तोबै तैणै आपणै मालिक कै देणदारो कै ऐक-ऐक कौरेयौ बौएदैयौ आगलैयादो पूछु, कै तांव पांदी मैरै मालिक का किशैक कर्जा औसौ?

⁶ तैणै बौल़ौ, “शौ कनसतर जैतून का तेल, तोबै तैणै तैसी बौल़ौ, आपणा खाता-बही लो औरौ बौठैबा तावल़ो पचाश मोण लैखै दै।”

⁷ हौजौ तैणै दूजेयादो पूछु, तांव पांदी किशैक कर्जा औसौ? तैणै बौल़ौ, शौ कनसतर गियुँ, तोबै तैणै तैसी बौल़ौ, “आपणा खाता-बही लिख औरौ बोठेयो तावल़ो आस्सी कनसतर लिख दै।”

⁸ “मालिकै तैसी अधरमी भण्‍डारी कै तारीफ कौरे, कै तैणै चलाकी शै काम कौरे राए; जिथुकै ऐशैखैई दुनिया कै लोग आपणै सौमय कै लोगौ कै साथै बर्ताव कै मामलै दै पेयाशै कै लोगौ शै जादा चालाक औसौ।

⁹ औरौ हांव तुऔं बुलू, कै दुनिया कै पौयसै लैई आपी कारिए दोस्त बाणै दैव, जिथुकै तोंवारै मौरणौ कै बाद ऐजौ गायब हौए जालो तौ सै तोंवारा सौदा कै घोरो दा स्वागत कौरलै।

¹⁰ जू नानड़ी शै नानड़ी बातौ दै ईमानदार औसौ सै बौड़ी शै बौड़ी बातौ दै बै ईमानदार औसौ। जू नानड़ी शै नानड़ी बातौ दै बेईमान औसौ सै बौड़ी शै बौड़ी बातौ दै बै बेईमान औसौ।

¹¹ इथकारिए जोबै तुऐं दुनिया कै धन कारिए ईमानदार ना ठोहरी, तौ स्वर्ग कै धन कारिए कुण तुऔं पांदी भोरोशा कौरला?

¹² औरौ जै तुऐं पोराये धन दै बै ईमानदार ना ठोहरी, तौ जू तोंवारो औसौ, सैजौ तुऔं कुण दैंदा?”

¹³ “कुणिए बै आदमी दौ स्‍वामियो कै सेवा ना कौर सौकौ, जिथुकै सै ऐकी आरी दुशमनी औरौ ओकी आरी प्यार कौरदा या ऐकी का आदर कौरला औरौ दूजै कै सै बैकार जाणदा: ऐशैखैई तुऐं ऐकी सौमय पांदी पौरमेशवर औरौ धन दु कै सेवा ना कौर सौकौ।”

पौरमेशवर कै राज्य का मोल

¹⁴ जोबै फरीसी लोगै ऐजौ सौबै शुणौ, तौ सै यीशु कै ठाटै पाड़दै लागै, जिथुकै सै पोएसै आरी प्यार कौरौ थिए।

¹⁵ यीशुए तिनु बौल़ौ, “तुऐं तौ आपी खै लोगौ कै सामणै सोही दिखांव, पौरौ पौरमेशवर तोंवारै मनो कै जाणौए, जिथुकै जू बुरी चीज़ौ आदमी कै नोजरी दी खास औसौ, सैजी पौरमेशवर कै सामणै बैकार औसौ।”

¹⁶ जांव तौड़ी यूहन्ना बपतिस्मा दाता ना ओऊवा, तांव तौड़ी मूसा कै कानून औरौ पौरमेशवर कै बातौ बौताणौवाल़ै का सौंदेश तुऔं बाट दिखांव थिया, पौरौ ऐबै पौरमेशवर कै राज्य का सुसमाचार प्रचार कौरा जांव, औरौ सौबवे भीतरै जाणौ चांव।

¹⁷ गौयण औरौ धोरती कौ टोल़ जाणौ आसान औसौ, पौरौ पौरमेशवर कै कानून शै ऐक बिन्दु ना मिट सौकौ।

¹⁸ उदारण कारिए जू कुणिए आपणी घोरवाल़ी कै खित दैयौ ओकीआरी बैयाव बाणल़ा, सै तियौं आरी गौलत सौमबंध बाणौ, औरौ जू कुणिए इयौं छोड़ेयौंदी बैटमाणिशौ आरी बैयाव कौरला सै बै गौलत सौमबंध बौणांव।

सैठ आदमी औरौ गरीब लाजर

¹⁹ यीशुए ऐक उदारण शुणौऊवा, “ऐक सैठ आदमी थिया जू बैजाए मौंगै खोटणो बांबो थिया, औरौ रौज सौबीदु आछौ खाणौ की दावत लांव थिया।

²⁰ औरौ तैसकै गैटौ धोरे लाजर नांव का ऐक गरीब आदमी पौड़ेयौंदा रौंव थिया, औरौ तैसकै शोरीर दै गुमड़ै हौए रौवै थिए।

²¹ औरौ सै चांव थिया, कै सैठ आदमी कै मेजो पांदी दु खाणौ कै बाद फेरकाएयोंदे टुकड़ै लैई आपणौ पेट भौरु; इथै तौड़ी कै कुते बै आयौ तैसकै घाव कै चाटो थिए।

²² ऐक दूस ऐशैकै हौं कै सैजा गरीब बै मौरे गौआ, औरौ स्‍वर्गदूतै तैसी नियौ अमारै पुराणिया अब्राहम कै धोरे आदर कै ठाँव दा पोऊंचोऊवा। औरौ सैजा सैठ बै मौरा औरौ तैसी जोमीनो दा दाबी दिया।

²³ औरौ नरक दौ तैणै पीड़ो दो पौड़ेयौ आपणी आखी लैई ऊबै दैखौ, औरौ दूरकै शा अब्राहम कै नेड़िक दा लाजर खै दैखा।

²⁴ तोबै तैणै तैसीकै जोर शै बौल़ौ, ‘ओए रै बापू अब्राहम, मुं पांदी दया कौरेयौ लाजर कै छाड़ै दै, कै सै आपणी गुठी कै पाणी मुंजी बिजोयो मैरै जीभो कै शैल़ै कौरौ, जिथुकै हांव ऐसी आगी कै पीड़ो दा तौड़पे रौआ।’

²⁵ पौरौ अब्राहमै बौल़ौ, ओए रै बैटा याद कौर, कै तुऐं आपणै जिन्दगी दी आछी चीज़ौ पैई, औरौ तैशैकैई लाजरे बै बुरी चीज़ौ पाए रैई, पौरौ ऐबै इथै शान्तै पाए लोऐ, औरौ तू पीड़ो दा तौड़पे रौआ।

²⁶ ‘इनु सौबी बातौ छोड़ेयौ अमारै औरौ तोंवारै बीच ऐक बौड़ा गढा औसौ, कै जू इथैदा तिथैदा पार तोंवारै धोरे जाणौ चांव, सै ना जाए सौकौ; औरौ ना कुणिए तिथैदै अमारै धोरे आए सौकौ।’

²⁷ तैसी सैठ आदमीए बौल़ौ, ‘तौ ओए रै बापू हांव तांव शै बिन्ती कौरु कै तू लाजर खै मैरै बापू कै घोरे छाड़ै दै,

²⁸ जिथुकै मैरै पाँच भाए औसौ; औरौ हांव चोऊं कै सै जांव औरौ मैरै भाई खै चिताए दैंव, कोदी ऐशै नी हौंव कै सै बै इयौं पीड़ो कै ठाँव दै आंव।’

²⁹ अब्राहमै तैसी बौल़ौ, ‘तिनकै धोरे चिताए दैणौ कारिए मूसा कै कानून औरौ पौरमेशवर कै बातौ बौताणौवाल़ै की किताबो औसौ, तिनु तिनकौ शुणणौ चैंई औरौ तिनुकै मानेबा पाप कौरणै छोड़णे चैंई।’

³⁰ तैणै बौल़ौ, ‘ओए रै बापू अब्राहम; ना, पौरौ जै कुणिए मौरेयौंदे मुंजीदै तिनु ऐजौ चिताए दैंव, तौ सै आपणै पाप कौरणा छोड़े दैलै।’

³¹ तैणै तैसी बौल़ौ, जोबै सै मूसा कै कानून औरौ पौरमेशवर कै बातौ बौताणौवाल़ै कै आज्ञा ना मानौ, तौ जै कुणिए मौरेयौंदे मुंजीदा कुणिए बै जियुंदी हौला, तौ बै सै तैसका बिशवाश ना कौरदै।”