लूका 12 - सिरमौरी नौवाँ नियम

यहूदी शास्त्रीयों औरौ फरीसी लोगौ कै जैशणै नी बौणौ

¹ तैतियोड़ै जोबै हज़ारो लोगौ कै भीड़ लागै गौए, इथै तौड़ी कै सैजै लोग ऐकी दूजै पांदी उदे रिड़ो थिए, तौ तैणै सौबी दौ औगौड़ियौ आपणै चैलै कै बौल़ौ, “फरीसी लोगौ कै ढोंग शै भोरेयोंदे खमीर शै चौकश रौया।

² सैजा सौमय आए गौआ, जोबै सौबै ठुँ खोटैयौंदो सामणै आए जांदो, औरौ जू किछै छिपैयौंदो औसौ, सैजौ सौबै लोग जाणै पांदै।

³ इथकारिए जू किछै तुऐं इनारै दो बौल़ै राए, सैजौ पेयाशै दो शुणदै; औरौ जू तुऐं कोठारो कै भीतरै चुपचाप बौल़ै राए, सै छोतौ पौरैशौ प्रचार कौरदै।”

पौरमेशवर दै डौरौ

⁴ “पौरौ ओए रै दोस्तो हांव तुऔं बुलू, कै जू शोरीरो कै मारै सौकौ पौरौ तैसकौ जादा किछै ना कौरे सौकौ, तिनुदै ना डौरेया।

⁵ पौरौ हांव तुऔं बौतौऊं कै तुऔं कोसी दो डौरणो चैंई, तुऔं पौरमेशवर दौ डौरणो चैंई, जैसी तुऔं मारणौ कै बाद नरको दै पाणौ का औधिकार औसौ, तैसदैई डौरेया।

⁶ का पाँच चिड़िया बैजाए सोसती ना बिको? तोबै बै पौरमेशवर तिनुमुंजी दै कोसी ऐकी कै बै बिसरो ना।

⁷ पौरौ पौरमेशवर तुंआरी जिन्दगी की सौबी बातौ कै परवाह कौरौ, औरौ सै ऐजौ बै जाणौ कै तोंवारै मुंडो दै कैतरै बाल़ औसौ। इथकारिए डौरेया नै, तुऐं चिड़ियो दै बै जादा कीमती औसौ।”

यीशु खै मोना कौरणौ का मतलब

⁸ “हांव तुऔं बुलू: जू कुणिए आदमी कै सामणै बौल़ौ, कै सै मैरै चैलै औसौ, तौ तैसीकै हांव आदमी का बैटा बै पौरमेशवर कै स्‍वर्गदूतौ कै सामणै बुलूबा कै ऐजै मैरै चैलै औसौ।”

⁹ पौरौ जू आदमियों कै सामणै ऐजौ बौलणौ शै डौरले, कै हांव तैसका चैला औसौ तैसीकै हांव बै पौरमेशवर कै स्‍वर्गदूतौ कै सामणै बौलदा कै ऐजा मैरा चैला ना आथी।

¹⁰ “जू कुणिए मुं आदमी कै बैटै कै खिलाफ कुणजै बात बौल़ौ, तैसका सैजा अपराध माफ हौंदा, पौरौ जू पवित्र आत्मा कै नेंदैया कौरौ, तैसका ऐजा अपराध कौलोंई बै माफ ना हौंदा।

¹¹ जोबै लोग तुऔं यहूदी सभा-घोरो औरौ राज्यपाल औरौ औधिकारियो कै सामणै लौए जांदै, तौ फिकर नी कौरेया, कै आमुए कैशैखै का जोवाब दैणा या का बौलदै।

¹² जिथु पवित्र आत्मा तैसी सौमय तुऔं शिखाए दैंदा कै तोंवारै का बौलणौ।”

ऐक सैठ आदमी का उदारण

¹³ तोबै भीड़ौ मुंजीदौ ऐकीए यीशु कै बौल़ौ, “ओए रै गुरुजी, मैरै भाई कै बौल, कै मैरै साथै बापू कै जायदात का बंटवारा कौरे दै।”

¹⁴ तोबै यीशुए तैसी बौल़ौ, “ओए रै दौड़ै, कुणै मुखै तोंवारा न्याय कौरणौवाल़ा या जायदात बांटणौवाल़ा ठोहराए राए?”

¹⁵ औरौ तैणै तैसीकै बौल़ौ, “चौकश रौया, औरौ सान्त-भान्तै लालच शै आपी कै बौचाए राख; जिथुकै कोसी कै जिन्दगी तैसकै बौहितै जायदात हौणौ की बौजैह शै ना हौंदी।”

¹⁶ यीशुए तैसीकै हौजौ ऐक उदारण दिया, “कोसी सैठ आदमी कै जोमीनो दै बौड़ै फसल होए।

¹⁷ तोबै सै आपणै मनो दो सुंचदा लागा हांव का कौरु? जिथुकै मैरै इथै ठाँव ना आथी, जिथै आपणै फसल राख सौकु।

¹⁸ औरौ तैणै बौल़ौ, ‘मुखै पौता औसौ कै मैरै का कौरणौ; हांव आपणौ कोठार तौड़ेयो तिथदै बौड़ै बाणदा; औरौ तिथै आपणौ सौबै नाज़ पाणी औरौ फसल राखदा।

¹⁹ इथकै बाद, हांव आपी खै बुलूबा, मुंआगै भौरिशै सालो कारिए बैजाए फसल कौठै औसौ, औरौ ऐबै आराम कौर, खा, पी, सुख शै रौ।’

²⁰ पौरौ पौरमेशवरे तैसी बौल़ौ, ‘ओए रै मूर्ख! जै तू इयौंई रातै मौरे जैईला; तोबै तुऐं जू चीज़ौ कौठी कौरे रैई, सैजी कुण कौरदा?’

²¹ ऐशैखैई तैसी आदमी कै साथै हौंदौ जू सौबै ठुँ आपी कारिए कौठौ कौरौ, पौरौ पौरमेशवर कै सेवा कौरणौ कारिए आपणै धन का इस्तैमाल ना कौरौ।”

कियौंई बातौ कै चिन्‍ता नी कौरौ

²² तोबै यीशुए आपणै चैलै खै बौल़ौ, “इथकारिए हांव तुऔं खै बुलू, आपणै जिन्दगी कारिए चिन्‍ता नै कौरेया, कै आमु का खांदै; ना आपणै शोरीर कै, की का बाम्बदै।

²³ जिथुकै जिन्दगी खाणौ शै, औरौ शोरीर खोटणो दा बौढ़ेयौ औसौ।

²⁴ कौऊवौ पांदी ध्यान दैव, सै ना तौ बौंव, ना ही काटो, ना तिनकै कोठार औरौ ना ही कोएलाण हौंव, तोबै बै तिनु पौरमेशवर खियांव, तोंवारै कीमत चुड़कुल़ै दै बै बौढ़ेयौ औसौ।

²⁵ तुऔं मुंजीदा ऐशणा कुण औसौ, जू चिन्‍ता कौरेयौ दैणिक लाम्बै सौमय तौड़ी जियुंदी रौए सौकौ?

²⁶ इथकारिए जै तुऐं सौबिदा नानड़ा काम बै कौरे ना सौकौ, तौ जिन्दगी कि औरौ चीज़ौ कै बारै मुंजी काए चिन्‍ता कौरौ?

²⁷ मैदानो कै फूलो पांदी ध्यान कौरौ कै सै कैशैखै बौढ़ौ, सै ना तौ मैहनत कौरौ, औरौ ना ही खोटणो बाणौ। तोबै बै हांव तुऔं खै बुलू कै राजा सुलैमान बै आपणै सौबै ठाट-बाट दा तिनुमुंजी कोसी ऐक कै साए खोटणो बाम्बेयोंदा ना थी।

²⁸ इथकारिए जै पौरमेशवर मैदानो कै घासो खै, जू ऐलो औसौए औरौ दोतियो आगी मुंजी पाए दैंदै, तिनकी चिन्‍ता कौरौ, तौ ओए रै कम बिशवाश कौरणौवाल़ै लोगौ पौरमेशवर तोंवारै दैखभाल इदै बै बौढ़ेयौ कौरदा।

²⁹ इथकारिए तुऐं इयौं बातौ की खोज़ दै ना रौया कै का खांदै औरौ का पींदै औरौ इथकै बारै मुंजी चिन्‍ता नी कौरेया।

³⁰ जिथुकै जू लोग पौरमेशवर कै ना जाणौ, सैजै लोग इनु सौबी चीज़ौ की खोज़ दै रौंव, पौरौ तोंवारा पौरमेशवर पिता जाणौए, कै तुऔं इनु चीज़ौ की जौरुरत औसौ।

³¹ पौरौ तुऐं पौरमेशवर कै राज्य कै खोज़ दै रौव, तौ ऐजी सौबै चीज़ौ बै तुऔं भैटी जांदी।”

धन कै कुकै कौठौ कौरणौ?

³² “तुऐं मैरै दैखभाल कारिए भेड़ो कै झुंड कै जैशणै औसौ, इथकारिए कोसी बै बातौ कै बारै मुंजी नै डौरेया, जिथुकै तोंवारै पिता पौरमेशवर कै ऐजै बात भाय रौए, कै तुऔं आपणा राज्य दैंव।

³³ आपणी जायदात बिकैयो दान कौरे दैव; औरौ आपी कारिए ऐशणै बोटुए बाणौ जू पुराणै ना हौंव, औरौ स्वर्ग दो ऐशणौ धन कौठौ कौरौ जू कम ना हौंव, औरौ जिथै ना तौ चोर जाए सौकौ, औरौ ना ही कीड़ा तिथुखै नाश कौरे सौकौ।

³⁴ जिथुकै तोंवारा मन सौदा तिथी लागैयौंदा रौंदा, जिथै तोंवारै धन-दौलत औसौ।”

सौदा तैयार रौया

³⁵ “हमैशा सेवा कौरणौ कारिए तैयार रौया, औरौ रात भोरै आपणा दिवा बाल़ेयो राखैया औरौ मैरै पाछु आणौ कारिए तैयार रौया।

³⁶ औरौ तुऐं तिनु आदमी कै जैशणै बौणौ जू आपणै मालिक का इंतजार कौरौ, कै जौल़ौ सै बैयाव भोज दा पाछु आयौ दवार खटखटांव तौ तुऐं तौलोंई तैसी कारिए दवार खोले दैंव।

³⁷ धन्‍य औसौ सैजै नोकर जू आपणै मालिक कै पाछु आणौ की ठोल़नाए कौरौ औरौ तैयार रौंव कै सै इनाम पांदै; हांव तुऔं साचौ बुलू कै मालिक ही नोकरो कै खोटणो बोम्बाएबा तिनुकै खाणौ खांदा बोठाल़दा औरौ आपी तिनु खाणौ बांडला।

³⁸ जै सै आधी राती औरौ झीशीं कै सौमय कै बीच आयौ तिनु बिजेयोंदे दैखला, तौ सै तैसी नोकर कै इनाम दैला जू तैयार औसौ।

³⁹ पौरौ तुऐं ऐजौ जाणौ, कै जै घोरो का मालिक जाणदा कै चोर ठीक कोसी सौमय आन्दा तौ बिजैयोंदा रौंदा, औरौ सै आपणै घोरो कै लुटणौ ना दैंदा।

⁴⁰ तुऐं मैरै पाछु आणौ कारिए तैयार रौया, जिथुकै हांव आदमी का बैटा ऐशणै सौमय दा स्वर्ग शै आन्दा जौल़ौ तुऐं मैरै आणौ कै आश बै ना कौरे रैली।”

बिशवाश लायक सेवक कुण औसौ?

⁴¹ तोबै पतरसे बौल़ौ, “ओए रै प्रभु, का ऐजा उदारण तू आमुकैंई सौबी खै बौल़ै?”

⁴² प्रभु यीशुए बौल़ौ, “भोरोशे लायक औरौ ईमानदार भण्‍डारी सैजा औसौ, जैसका मालिक तैसीकै ओकी नोकरो कै दैखभाल कौरणौ औरौ तिनुकै खियाणौ कै जुमैवारै दैंव।

⁴³ धन्‍य औसौ सैजा नोकर, जैसी जैसका मालिक आयौ ऐशैखैई ही कौरदै पाला।

⁴⁴ हांव तुऔं खै साचौ बुलू; सै तैसी आपणै सारी धन जायदात पांदी औधिकारी बौणादा।

⁴⁵ पौरौ जै सैजा नोकर सुंचदा लागौ, कै मैरै मालिकै आणौ दै देर कौरे लोए, औरौ सै नोकर-नोकराणियों खै पीटौ औरौ खाए-पियौं औरौ पिणौ वाल़ै आरी पींदै लागौ।

⁴⁶ तौ तैसी नोकरो का मालिक ऐशणै दूसै आला, जौल़ौ तैणै तैसीखै ठोल़े नै रैली। औरौ ऐकी ऐशणै सौमय दा, जैसी सौमय कै बारै मुंजी सै ना जाणौ, तोबै तैसका मालिक आए जाला औरौ तैसी सख्त सौजा दैला। औरौ तैसी नोकर कै तैसी जौगैह राखदा जिथै अबिशवाशी लोग रौंव।

⁴⁷ औरौ सैजा नोकर जू आपणै मालिक की इछा जाणौ थिया, पौरौ तैयार ना रौई, औरौ ना ही तैसकै मोरजी कै हिसाब शै काम कौरी, सै बौहितै सख्त सौजा पाला।

⁴⁸ पौरौ जू नोकर आपणै मालिक कै इछा कै ना जाणौ औरौ सख्त सौजा पाणौ का काम कौरे राए, तैसी दैणिक सौजा भैटदै। इथकारिए जैसी बौहितु दैय राए तैसीयांदो बौहितु मांगदै; औरौ जैसी बौहितु सौंपै राए तैसीयांदो बौहितु कौरदै।”

शान्तै ना रौंदै

⁴⁹ “हांव धोरती पांदी आग लांदा आए रौआ; औरौ का चोऊं सिरफ ऐजौ कै ऐजै आग इबी सिलकै जांव।

⁵⁰ मुखै तावल़ी खतरनाक पीड़ो सैहन कौरणी पौड़दी, औरौ जौल़ौ तौड़ी सैजी पीड़ो ना हौंव, तौलौ तौड़ी हांव बौहुता बैचैन हौंदा।

⁵¹ का तुऐं सौमझौ कै हांव धोरती पांदी लोगौ मुंजी शान्तै लांदा आए रौआ? हांव तुऔं बुलू; ना, पौरौ लोगौ खै ऐकी दूजै शै जौई कौरदा आए रौआ।

⁵² जै ऐकी घोरो दै पाँच लोग हौंव, तौ सै आपी मुंजी बांडै जालै। औरौ तीन लोग जू मुं पांदी बिशवाश ना कौरौ, सै तिनु दो लोगौ का विरोध कौरौ जू मुं पांदी बिशवाश कौरौ।

⁵³ बापू बैटै कै औरौ बैटा बापू कै खिलाफ हौए जांदा; माँ बैटी कै, औरौ बैटी माँ कै, शाशु बहू कै, औरौ बहू शाशु कै खिलाफ हौए जांदै।”

सौमय की पौछेयाण

⁵⁴ औरौ यीशुए भीड़ौ खै बै बुलो, “जौल़ौ तुऐं बादल़ो कै पश्‍चिम दिशा दो उठदे बैई दैखौ तौ तावल़ो बुलो कै बौरखा हौंदी औरौ ऐशैखैई हौं।

⁵⁵ औरौ जोबै दक्षिण दिशा शै हावा चालदै दैखलै तौ बौल़ौए कै लू बौंदै औरौ ऐशैखैई हौंव।

⁵⁶ ओए रै कपटियो तुऐं धोरती औरौ गौयणै कै रंग रुप कै बारै मुंजी बौल़ै सौकौ, पौरौ ऐसी जमाने दो पौरमेशवरे का बौल़ै लौ, इथका बखान कौरणा ना जाणौ?

आपणी समस्या कै सुलझाव

⁵⁷ तुऐं आपी ही तय कौरणौ चैंई कै तुऔं कारिए का कौरणौ ठीक औसौ?

⁵⁸ जौल़ौ तू आपणै बौयरी कै साथै न्यायाधीश कै धोरे चालै रौआ, तौ बाटौ ही पुंडे तैसीयादै बौचणौ की कौचिश कौरेया कोदी ऐशै नै हौंव कै सै ताखै न्यायाधीश कै धोरे खिंचैयौ नै लौए जांव, औरौ न्यायाधीश ताखै सिपाही कै धोरे लौए जांव, औरौ सिपाही ताखै ज़ेलो पुंडा खोटे दैंव।

⁵⁹ हांव ताखै बुलू, जांव तौड़ी तू पाई-पाई नी भोरै दैला, तांव तौड़ी ज़ेलो पौरैशा ना छौटे सौकै।”