यहूदा 1 - सिरमौरी नौवाँ नियमशुभकामनाएँ 1 हांव, यहूदा तुऔं ऐजी चिट्ठी लिखु। हांव यीशु मसीह का सेवक औरौ याकूब का नानड़ा भाए औसौ। मोऐं तुऔं लोगौ खै लिख लौ, जिनु पौरमेशवरे आपी पांदी बिशवाश कौरणौ कारिए बौएदै राए। अमारा पौरमेशवर पिता तुऔंआरी प्यार कौरौ औरौ तुऐं यीशु मसीह दै ठीक ठाक औसौ। बिशवाश कारिए संघर्ष 2 हांव प्रार्थना कौरु कै पौरमेशवर तुऔं दया, शान्तै औरौ प्यार जादा शै जादा दैया कौरौ। 3 ओए रै मैरै साथी बिशवाशियौं, भलैई हांव तुऔं पौरमेशवर कै मोक्ति कै बारै मुंजी बैजाए लिखणु चोऊं थिया, जिथमुंजी आमै सौबै शामिल औसौ, हांव जरुरत महसूस कौरु कै हांव तुऔं कै हिम्मत दैणौ कारिए लिखु कै जैसी सौचाई पांदी आमै बिशवाश कौरु। पौरमेशवरे आपणै पवित्र लोगौ खै ऐजै सौचाई ऐक बैई हमैशा कारिए दैय राए जू कौलोंई ना बौदलौ। 4 हांव तुऔं कै लिखु जिथुकै किछै लोग जू यीशु मसीह पांदी बिशवाश कौरणौ कारिए दिखावा कौरौ, सैजै तोंवारै बीच शामिल हौए गौवै। सैजै पौरमेशवर कै इज्जत ना कौरौ औरौ सै गौलत शिक्षा दैंव सै बौल़ौ जिथुकै पौरमेशवर आपणै अनुग्रह लैई अमारै पापौ खै माफ कौरे दैंव, इथकारिए आमै बुरा जीवन जी सौकु। सैजै यीशु मसीह का इन्कार कौरौ, जू अमारा एकमात्र मालिक औरौ अमारा प्रभु औसौ। बैजाए सौमय औगौड़ियौ, पवित्र शास्त्र बौल़ौ कै पौरमेशवर ऐशणै लोगौ खै सौजा दैंदा। 5 जोबै कि तुऐं ऐजी सौबै बातौ जाणौए, तौ बै हांव तुऔं इयौं बातौ खै याद दियांदा, कै पौरमेशवरे इस्राएलियों खै गुलामी शै आज़ाद कौराए औरौ तिनु मिस्र देश शै बायरै लियोऊवे, पौरौ बाद मै तिनु सौबी खै मारै दियै, जिनुवै रेगिस्थान दा तैसी पांदी भोरोशा ना कौरी। 6 याद कौरौ कै प्रभुए तिनु स्वर्गदूतौ खै कैशै सौजा दै, जिनुवै आपणै औधिकार कै ना निभैई, पौरौ तिनुऐ आपणै ठाँव कै छोड़े दियै। प्रभुए इनु स्वर्गदूतौ खै इनारै कै ठाँव पांदी राखै राए, औरौ ऐशणी शांगुल़ी लैई बानै राए जियौं कुणिए ना तौड़ै सौकौ ताकि महान दूसौ पांदी तिनका न्याय हौए सौकौ। 7 इनु इस्राएली लोगौ औरौ स्वर्गदूतौ कै जैशणै, तिनु लोगौ खै याद राखौ जू सदोम औरौ अमोरा औरौ तिनकै आंडे-पांडे कै शहरो दै रौंव थिए कै तिनकै साथै का हौए रौ थियु। सैजै लोग गौलत सौमबंध बाणणौवाल़ै हौए रौवै थिए औरौ कैई भान्त कै गौलत काम लैई भोरै रौवै थिए। इथकारिए पौरमेशवरे तिनु आग शै नाश कौरे राए। तिनकै साथै जू हौ सैजौ झूठै शिक्षको कारिए ऐक चैतावणी बौणै गौए कै तिनु बै सौदा कै आग शै सौजा भैटदै। 8 तैशैखैई, ऐजै अधरमी लोग दावा कौरौ कै पौरमेशवरे तिनु दर्शन दिखाए राए कै सै निकारै तरीकै शै जियौं आपणै खुद कै शोरीरो खै नाश कौरौ, तिनु कोसी खै आपी पांदी औधिकार राखणौ कै जौरुरत ना आथी औरौ सै महिमामय स्वर्गदूतौ कै बारै मुंजी बुरु बौल़ौ। 9 इथै तौड़ी कै मीकाईलै बै जू पौरमेशवर कै खास स्वर्गदूतौ मुंजीदा ऐक औसौ, बैज्जती ना कौरी। जिथुकै जोबै तैणै शैतान कै साथै बैहस कौरे औरौ पौरमेशवर कै बातौ बौताणौवाल़ै मूसा कै शोरीरो खै लोणो कारिए आपणै औधिकार कै चैतावणी दै, तोबै बै तैणै शैतान शै बुरी बातौ ना कौरी औरौ तैसी पांदी दोष ना लैई। पौरौ तैणै सिरफ ऐतरो बौल़ौ, “प्रभु तांवआरी सख्ताई शै बात कौरौ।” 10 सैजै लोग जू पौरमेशवर कै आराधना ना कौरौ औरौ तिनु बातौ कै खिलाफ बुरै शब्दो का इस्तैमाल कौरौ जू तिनकै सौमझ दी ना आंव; औरौ जोबै सै जोंगली जानवरो कै जैशणै बर्ताव कौरौ औरौ जिनु कामौ खै सै जाणौए तिनु सै बिना सौंचै-सौमझै कौरौ, तौ सै पौरमेशवर कै ढौबौशै सौजा भुकतदै। 11 तिनु पांदी हाय! तिनुऐ आदम कै बैटै कैन कै जैशणै दुष्टता शै बर्ताव कौरा, जैणै आपणै भाई खै मारै दिया। तिनुऐ काल़ैयौ सैजै गौलती कौरे जू बिलामै ओकी लोगौ खै पाप कै ढौबौ लोए जाणौ शै कौरे राए थै ताकि पौयसै पाए सौकौ। जैशैखै मूसा कै खिलाफ आपणै लौड़ाई की बौजैह शै कौरह का नाश हौए गौआ, तैशैखैई ऐजै लोग बै नाश हौए जांदै जिथुकै ऐजै बै प्रभु कै खिलाफ लौड़ाए कौरौ। 12 जोबै ऐजै लोग प्रभु कै प्यार खै याद कौरदै बैई तोंवारै साथै खाणौ खांव, तौ ऐजै तिनु खतरनाक चट्टानो कै जैशणै औसौ जू समुन्द्रो तौड़ी छिपैयौंदे हौं जू तोंवारै डूबणो कै बौजैह बौणै सौकौ। सै तिनु चौराईया कै जैशणै औसौ जू सिरफ आपणै ही फिकर कौरौ। सै तिनु बादल़ो कै जैशणै औसौ जू धोरती पांदी बिना बौरखा कै गुड़कौ। सै ठंड कै मौसम कै डाल़ो कै जैशणै औसौ जिनुपांदी कुणजाई फोल़ ना लागौ औरौ जिनु बैगाए दैंव। जिथुकै सै कुणजाई फोल़ ना दैंव औरौ जड़ शै औखड़े जांव। 13 जैशै समुन्द्र की खतरनाक लैहरो जू गौंदै झाक बाणौ, तैशैखैई ऐजै लोग शर्मनाक काम कौरौ। ऐजै किछै तारै कै जैशणै औसौ जू ऐकी सीधै बाटौ पुंडे ना हांडो, सैजै सोही बाट ना दिखांव। प्रभुए तिनु कारिए ऐक ठाँव राखै राए जू पूरी तरह शै इनारौ औसौ जिथै तिनु हमैशा कारिए रौणौ पौड़दौ। 14 हनोकै जू आदम शै सातवें पीढ़ी दा पौयदा हौए रौआ थिया, इनु अधरमी लोगौ कै बारै मुंजी हौणौवाल़ी बातौ बौताए रैई थी। तैणै बौल़ौ, “शुणौ! पौरमेशवर निशोंक हौयौ आपणै अणगिणत पवित्र स्वर्गदूतौ खै साथै आन्दा। 15 सौबी लोगौ कै न्याय कौरणौ कारिए, औरौ तिनु सौबै बुरै कामौ कारिए जू लोगै कोरी राए औरौ तिनु पांदी दोष लाणौ कारिए जू तिनुऐ पौरमेशवर कै खिलाफ कौरे राए औरौ तिनु सौबी गौंदी बातौ कारिए जू तिनुऐ तैसकै खिलाफ बौल़ै रैई।” 16 ऐजै लोग हमैशा पौरमेशवर कै खिलाफ बौल़ौ औरौ ओकी लोगौ दी गौलती जूओं। सैजै लगातार तिनु बुरै कामौ खै कौरौ जू तिनका दिल कौरणा चांव। सै आपणै बारै मुंजी घमण्ड शै दावा कौरौ औरौ आपी कारिए फायदा कमाणौ कारिए ओकी लोगौ की हैरा-फेरी कौरौ। कौचिश कौरणौवाल़ै बौणौ 17 पौरौ ओए रै मैरै साथी बिशवाशी, तुऐं तिनु बातौ खै याद राखौ; जू अमारै प्रभु यीशु मसीह खै चोणेयौंदे चैलै बैजाए औगौड़ियौ बौताए रैई जू बाद मै हौंदी। 18 सै तुऔं बौलेया कौरौ थिए, “अमारै प्रभु यीशु मसीह कै आणौ दै आगै, ऐशणै लोग हौंदै जू प्रभु औरौ तैसकै लोगौ का मजाक कौरदै। ऐजैई सैजै लोग औसौ जिनकै जीवन बुरी इछाओं कै काबू दै औसौ।” 19 ऐजैई सैजै लोग औसौ, जू तुऔं एकजुट ना हौणौ दैंव; सै आपणी खुद की इछाओं कै हिसाब शै बर्ताव कौरौ, औरौ तिनुमुंजी पवित्र आत्मा ना आथी। 20 पौरौ ओए रै मैरै साथी बिशवाशियौं तुऔं ऐकी-दूजै कै मौदद कौरणै औरौ पवित्र शिक्षाओं पांदी मोजबूती शै भोरोशा राखणा चैंई, जिथपांदी तुऐं बिशवाश कौरौ औरौ पवित्र आत्मा कै मौदद लैई प्रार्थना कौरणै चैंई। 21 आपी दा पौरमेशवर कै प्यार खै महसूस कौरौ; जोबै कै तुऐं अमारै प्रभु यीशु मसीह का उमीद कै साथै इंतजार कौरे लौआ कै तुऔं सौदा कै जिन्दगी भैटदै। सै तुऔं कै सौदा कै जिन्दगी दैंदा जिथुकै सै तुऔंआरी प्यार कौरौ। 22 तिनु लोगौ कै खातिर दयालु बौणौ जू ना जाणौ कै कोस पांदी बिशवाश कौरणा चैंई। 23 किछै औकै लोग जिनु तुऐं जाणौए, सैजै नरक कै ढौबौ जांदै लागै रौवै। तिनु तिथु सौदा कै आग शै तावल़ै छुड़ाए पाव औरौ ओकी कै खातिर दया दिखाव। दया दिखांव पौरौ चौकश रौव, तिनु साए पाप नी कौरौ। इथै तौड़ी कै तिनु खोटणो शै बै नफरत कौरौ जिथपांदी तिनुऐ आपणै पाप वाल़ै कामौ शै दाग लाए राए। पौरमेशवर कै बौड़ाए 24 पौरमेशवर तोंवारै रक्षा कौरणौ कै लायक औसौ, ताकि तुऐं सौबै पाप वाल़ै जीवन की बौजैह शै धौखा नै खांव। सै तुऔं महिमा वाल़ै पौरमेशवर यानी आपणै धोरे लाणौ दै औरौ तुऔं निर्दोष औरौ आनन्द शै भरपूर बाणणौ कै लायक औसौ। 25 सै एकमात्र पौरमेशवर औसौ औरौ अमारै प्रभु यीशु मसीहे अमारै खातिर जू कौरे राए, तैसकै दवारा आमु बौचाए राए। अमारा प्रभु यीशु मसीह लोगौ कै दवारा पौरमेशवर कै इज्जत कौरणौ औरौ तैसकै तारीफ कौरणौ कै बौजैह बौणौ। ताकि लोग जाणी पांव कै तैसीकैईं सौमय कै शुरुआत शै लोयो आणौवाल़ै सौमय तौड़ी औरौ हमैशा-हमैशा कारिए शौकतै औरौ औधिकार औसौ। आमीन। |
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
Beyond Translation