यूहन्ना 8 - सिरमौरी नौवाँ नियम

गौलत सौमबंध राखणौ वाल़ी कै माफ कौरणा

¹ यीशु आपणै चैलै कै साथै जैतून नांव कि धारो पांदी हौटा।

² औरौ दूजै का झीशो ही यीशु मन्दिर कै आँगणो दा हौटा, औरौ बौहितै सारै लोग तैसकै धोरे आए; सै बौठै गौआ औरौ तिनु शिक्षा दैन्‍दा लागा।

³ जोबै सै बौलदा लागै रौआ थिया, तोबै यहूदी शास्त्री औरौ फरीसी लोगै ऐकी बैटमाणिश कै लाए जू गौलत सौमबंध बाणदै बैई पाकड़ै गौए थी; औरौ तिनुऐ तियौं भीड़ौ कै सामणै खौड़ै कौरे दी।

⁴ औरौ तिनुऐ यीशु खै बौल़ौ, “ओए रै गुरुजी, ऐजी बैटमाणिश गौलत सौमबंध कौरदै बैई पाकड़ै गौए।

⁵ मूसा कै कानून दै मूसाए आमु आज्ञा दैय राए कै ऐशणी बैटमाणिशौ मारै दैणौ कारिए तियौं पाथरो लैई मारो; तौ तू का बौल़ै कै आमु इयौं बैटमाणिशौ आरी का कौरणौ चैंई।”

⁶ तिनुऐ यीशु खै पौरखणौ कारिए ऐजै बात बौल़ै ताकि तैसी पांदी दोष लाणौ कारिए कुणजै ना कुणजै बात तिनु भैटी जांव, पौरौ यीशु झौकै गौआ औरौ आपणी गुठियों लैई जोमीनो पांदी लिखदा लागा।

⁷ जोबै सै तैसीयांदो पूछदै लागै, तोबै तैणै सीधै खौड़ै हौयौ खै तिनुखै बौल़ौ, “तुऔं मुंजीदै जिनुवै कौलोंई बै पाप ना कौरे रैई, सैजाई इयौंकै आगला पाथर मारो।”

⁸ औरौ हौजौ झोकैयौ खै जोमीनो पांदी गुठियों लैई लिखदा लागा।

⁹ पौरौ तिनु लोगै यीशु कै बात शोणेयो ऐजौ जाणै पोऊ कै आमु सौबै पापी औसौ औरौ सौब लोग नानड़ै शै बौड़ै तौड़ी ऐक-ऐक कौरेयौ आगु हौटै औरौ यीशु तियौं बैटमाणिशौ आरी इकली रौए गौआ जू इबी बै तिथैशै खौड़ै थी,

¹⁰ यीशुए सीधै खौड़ै हौयौ कै तियौंकै बौल़ौ, “ओए रै नारी, सैजै सौबै जोणे कुकै हौटै? का कोसीए तांव पांदी सौजा कै आज्ञा ना दी?”

¹¹ तियैं बौल़ौ, “ओए रै प्रभु, कोसीए बै सौजा ना दी।” यीशुए बौल़ौ, “हांव बै ताखै सौजा कै आज्ञा ना दैन्दा; ऐबै घोरो खै जा, औरौ आगै कै पाप दै जिन्दगी नी बिताया।”

यीशु दुनिया कौ पेयाशो

¹² तोबै यीशुए हौजौ लोगौ खै बौल़ौ, “दुनिया को पेयाशो हांव औसौ; जू कुणिए मैरै पाछैदा हांडला, सै इनारै दा ना हांडदा, पौरौ तिथु पेयाशै कै पाला जू सौदा कै जिन्दगी दैंव।”

¹³ फरीसी लोगै तैसीखै बौल़ौ, “तू आपणै गवाही आपी दैय; औरौ तैरै गवाही साची ना आथी।”

¹⁴ यीशुए जवाब दिया, “भले ही हांव आपणै गवाही आपी दियु, तोबै बै मैरी गवाही ठीक औसौ, जिथुखै हांव जाणुए कै हांव कुकै दा आए रौआ, औरौ कुकै जाणौ, पौरौ तुऐं ना जाणौ कै हांव कुकै दा ओऊं या कुकै जोऊं।

¹⁵ तुऐं लोगौ का न्याय आदमी कै सोंच कै हिसाब शै कौरौ, हांव कोसी का न्याय ना कौरु।

¹⁶ औरौ जै हांव न्याय कौरुबै तौ मैरा न्याय साचा औसौ, जिथु हांव इकली ना आथी, पौरौ हांव पिता पौरमेशवर कै साथै औसौ, जैणै मुखै भैजै राए।

¹⁷ औरौ तोंवारै मूसा कै कानून दो बै लैखै राए कै दो जोणे कै गवाही मिलैयौ ठीक हौंव।

¹⁸ ऐक तौ हांव आपणै गवाही आपी दियु, औरौ ओका पिता पौरमेशवर मैरी गवाही दैंव, जैणै मुखै भैजै राए।”

¹⁹ तिनुऐ तैसीखै बौल़ौ, “तैरा पिता कुकै औसौ?” यीशुए जवाब दिया, “ना तौ तुऐं मुखै जाणौ औरौ ना मैरै पिता खै जाणौ, जै तुऐं मुखै जाणदै तौ मैरै पिता खै बै जाणदै।”

²⁰ ऐजी बातौ तैणै मन्दिरो कै आँगणो दी उपदैश दैंदै बैई भण्डार घोरो दी बुली, औरौ कोसीए तैसीखै ना पाकड़ी जिथु तैसका दुख सोणो का सौमय इबी तौड़ी ना आए रैई थी।

यीशुए आपणै बारै मुंजी बौतौऊं

²¹ यीशुए हौजौ तिनुकै बौल़ौ, “हांव जोऊं, औरौ तुऐं मुखै जौले औरौ लगातार पाप कौरदै बैई मौरे जांदै; जिथै हांव जोऊं तिथै तुऐं ना आए सौकौ।”

²² इयौं बातौ पांदी यहूदी नेताए बौल़ौ, “का सै आपी खै मारै दैंदा जू बौल़ौए, ‘जिथै हांव जोऊं, तिथै तुऐं ना आए सौकौ?’”

²³ तैणै तिनुखै बौल़ौ, “तुऐं इयौं दुनिया दै पौयदा हौए रौवै थिए, पौरौ हांव स्वर्ग पौरैशा आए रौआ। तुऐं दुनिया कै औसौ, हांव दुनिया का ना आथी।

²⁴ इथकारिए मोऐं तुऔं खै बौल़ौ, कै तुऐं लगातार पाप कौरदै बैई मौरे जांदै, जै तुऐं मुं पांदी बिशवाश नै कौरलै कै हांव सैजाई औसौ, तौ तुऐं लगातार पाप कौरदै बैई मौरे जांदै।”

²⁵ यहूदी नेताए तैसीखै बौल़ौ, “तू कुण औसौ?” यीशुए तिनुखै बौल़ौ, “हांव सैजाई औसौ, जू आगै दा उंडा तुऔं उपदैश दैन्‍दा औरौ बौलदा आए रौआ कै हांव औसौ।”

²⁶ तोंवारै बारै मुंजी मुखै बौहितु किछै बौलणौ औरौ तोंवारा न्याय कौरणा; पौरौ मैरा भैजणौवाल़ा पौरमेशवर साचा औसौ; औरौ जू मोऐं तैसीयांदो शौणै राए, सैजौई दुनिया कै लोगौ खै बुलूए।

²⁷ पौरौ सै ऐजौ ना सौमझी कै यीशु तिनुवा पिता पौरमेशवर कै बारै मुंजी बौल़ौ थिया।

²⁸ तोबै यीशुए बौल़ौ, “जोबै तुऐं मुखै आदमी कै बैटै खै क्रूसो पांदी चौढ़ाल़ै, तोबै तुऐं जाणदै कै हांव सैजाई औसौ जू शुरु शै तुऔं उपदैश दैंदा औरौ बौतांदा आए रौआ कै हांव ही औसौ, औरौ आपी शै किछै ना कौरु। पौरौ जैशै मैरै पिता पौरमेशवरे मुखै शिखाए राए ऐशैखैई हांव ऐजी सौबै बातौ बुलू।

²⁹ मैरा भैजणौवाल़ा मैरै साथै औसौ, तैणै मुखै इकली ना छोड़े रैई जिथुखै हांव हमैशा सैजाई काम कौरु, जिथलैई सै खुश हौंव।”

³⁰ यीशुए ऐजी सौबै बातौ बौल़ै लोई थी तौ बौहितै लोगै तैसी पांदी बिशवाश कौरा।

सौचाई तुऔं आज़ाद कौरलै

³¹ बाद मै यीशुए तिनु यहूदी नेताओं शै जिनुवै तैसी पांदी बिशवाश कौरे राए थिया, तिनुखै बौल़ौ, “जै तुऐं मैरै शिक्षा दै बौणैयौंदे रौलै, तौ सौथी कै मैरै चैलै ठोहरलै।

³² तुऐं सौचाई जाणलै, औरौ सौचाई तुऔं खै आज़ाद कौरलै।”

³³ तिनुऐ तैसीखै जवाब दिया, “आमै तौ अब्राहम कै वंशो कै औसौ, औरौ कौलोंई कोसी कै गुलाम ना होई, तोबै तू किथु बौल़ै, कै तुऐं आज़ाद हौए जांदै।”

³⁴ यीशुए तिनुखै जवाब दिया, “हांव तुऔं कै साचौ-साचौ बुलू, कै जू कुणिए पाप कौरौ, सै पापौ कै वश दा औसौ।

³⁵ औरौ ऐक गुलाम सौदा अमारै कुड़बे का हिस्सेदार ना हौंव; पौरौ बैटा सौदा कुड़बे का हिस्सेदार हौंव।

³⁶ जै हांव पौरमेशवर का बैटा तुऔं आज़ाद कौरु, तौ तुऐं सौथी कै आज़ाद हौए जालै।

³⁷ हांव जाणुए कै तुऐं अब्राहमो कै वंशो कै औसौ, तौ बै तुऐं मैरी शिक्षाओं कै ना मानौ, इथकारिए तुऐं मुखै मार दैणा चांव।

³⁸ मोऐं तुऔं खै तिनु चीज़ौ खै बौताए लोई जू मोऐं आपणै पिता पौरमेशवर धोरे दैखी रैई; औरौ तुऐं सैजौई कौरदै रौंव, जू तुऐं आपणै पिता शै शौणै राए।”

³⁹ तिनुऐ यीशु खै जवाब दिया, “अमारा पुराणिया तौ अब्राहम औसौ।” यीशु तिनुखै बौल़ौ, “जै तुऐं अब्राहम कै वंश हौन्दै, तौ अब्राहम साए टोल सांडदै।

⁴⁰ अब्राहमै जू कियु, सैजौ कौरणौ कै बजाय तुऐं मुखै मारणा चांव, जिथुकै मोऐं तुंवागै साचौ बौल़ै राए जू पौरमेशवर कैईंदु शौणै राए। पौरौ अब्राहमै कौलोंई ऐशणी चीज़ौ ना कौरी।

⁴¹ तुऐं आपणै पिता पौरमेशवर कै साए टोल कौरौ।” तिनुऐ यीशु खै बौल़ौ, “आमै गौलत सौमबंध बाणैयौ पौयदा ना हौए रैई, अमारा सिरफ ऐकै पिता पौरमेशवर औसौ औरौ सै पौरमेशवर औसौ।”

⁴² यीशुए तिनुकै बौल़ौ, “जै पौरमेशवर तोंवारा पिता पौरमेशवर हौंदा, तौ तुऐं मुं आरी प्यार राखदै, जिथुकै हांव पौरमेशवर कै ढौबौशा आए रौआ, हांव खुद शै ना आए रैई पौरौ तैणै ही मुखै भैजै राए।

⁴³ जू बातौ हांव बुलू तुऐं किथु ना सौमझौ? इथकारिए कै तुऐं मैरी शिक्षा खै मानणौ शै मोना कौरौ।

⁴⁴ तुऐं आपणै बापू शैतान शै औसौ औरौ आपणै बापू कै इछा खै पूरै कौरणै चांव। सै तौ आगै दा उंडा हथियारा औसौ, औरौ सै कौलोंई साचा ना थी, जिथुखै सौचाई तैसदै आथी ना, जौल़ौ सै झूठु बौल़ौ, तौ सै आपणै स्‍वभाव शै बौल़ौ, जिथुखै सै झूठा औसौ, औरौ झूठै का बापू औसौ।

⁴⁵ हांव साचौ बुलू, इथकारिए तुऐं मुं पांदी बिशवाश ना कौरौ।

⁴⁶ तुऔं मुंजीदा मुखै कुण मुं पांदी पाप कौरणौ का दोष लाए सौकौ? तौ जौल़ौ हांव साचौ बुलू, तोबै तुऐं मैरा बिशवाश काए ना कौरौ?

⁴⁷ जू कुणिए पौरमेशवर शै सौमबंध राखौ, सै पौरमेशवर कै बातौ शुणौ, औरौ तुऐं इथकारिए ना शुणौ कै तुऐं पौरमेशवर शै सौमबंध ना राखौ।”

यीशु औरौ अब्राहम

⁴⁸ ऐजौ शोणेयो यहूदी नेताए तैसीखै बौल़ौ, “आमै ठीक लो बौल़ै, कै तू सामरिया प्रदेश का रौणौवाल़ा औसौ, औरौ तांव दै दुष्टआत्मा औसौ।”

⁴⁹ यीशुए जवाब दिया, “मुं दै दुष्टआत्मा ना आथी; पौरौ हांव आपणै पिता पौरमेशवर का आदर कौरु, औरौ तुऐं मैरा आदर ना कौरौ।

⁵⁰ पौरौ हांव आपणा आदर ना चोऊ पौरौ ऐक औसौ जू चांव कै मुखै आदर भैटौ औरौ सै सैजाई औसौ जू न्याय बै कौरौ।

⁵¹ हांव तुऔं कै साचौ-साचौ बुलू, कै जै कुणिए आदमी मैरी शिक्षा पांदी चाल़ला, तौ सै सौदा तौड़ी ना मौरदा।”

⁵² यहूदी नेताए तैसीकै बौल़ौ, “ऐबै आमुए जाणै पोऊँ कै तांव दै दुष्टआत्मा औसौ। अब्राहम मौरे गौआ, औरौ पौरमेशवर कै बातौ बौताणौवाल़ा बै मौरे गौवै औरौ तू बौल़ै, ‘जै कुणिए मैरी शिक्षा पांदी हांडला तौ सै हमैशा तौड़ी ना मौरदा।’

⁵³ अमारा पुराणिया अब्राहम तौ मौरे गौआ, का तू तैसदा बौड़ा औसौ? औरौ पौरमेशवर कै बातौ बौताणौवाल़ै बै मौरे गौवै, तू आपी खै का सौमझै।”

⁵⁴ यीशुए जवाब दिया, “जै हांव आपी आपणै तारीफ कौरु, तौ मैरी किछै तारीफ ना आथी, जू मैरै तारीफ कौरौ, सै मैरा पिता औसौ, औरौ तुऐं बौल़ौ, कै सै तोंवारा पौरमेशवर औसौ।

⁵⁵ तुऐं तौ तैसी ना जाणौ: पौरौ हांव तैसी जाणुए। जै हांव तैसी बुलू, कै हांव ताखै ना जाणु, तौ हांव तुऔं साए झूठा ठोरदा। पौरौ हांव तैसी जाणुए औरौ तैसकै आज्ञा मानुए।

⁵⁶ तोंवारा पुराणिया अब्राहम मैरै दूस दैखणौ कै आशा शै बौहिता खुशी थिया, औरौ तैणै दैखौ, औरौ खुशी मौनाए।”

⁵⁷ यहूदी नेताए तैसीखै बौल़ौ, “इबी तौड़ी तैरै उमर पचाश सालो कै बै ना हौए रैई औरौ तू बौल़ै कै तुऐं अब्राहम कै दैखै राए।”

⁵⁸ यीशुए तिनुखै बौल़ौ, “हांव तुऔं खै साचौ-साचौ बुलू, कै अब्राहम कै पौयदा हौणौ दा आगै, हांव औसौ।”

⁵⁹ तोबै तिनुऐ यीशु कै मारणौ कारिए पाथर टिपै, पौरौ सै चुपकै शै मन्दिरो कै आँगणो पौरैशा निकल़ै गौआ।