यूहन्ना 7 - सिरमौरी नौवाँ नियम

यीशु औरौ तैसकै भाई

¹ इनु बातौ कै बाद यीशु गलील जिले दा जांदा रौआ जिथुखै यहूदी नेता तैसीखै मार दैणौ कै कौचिश कौरे लोए थी, इथकारिए सै यहूदिया प्रदेश दो जाणौ नी चांव थिया।

² औरौ यहूदी लोगौ का झोपड़ियों कौ तैयार नेड़िक थियु। ऐजौ तैयार तिनु याद दिलांव थियु कै तिनकै पुराणिया चाल़ीश सालो तौड़ी तोम्बू दै रौंव थिए।

³ यीशु कै भाईए तैसीखै बौल़ौ, “इथैदा यहूदिया प्रदेश कै आगु जा कै जू काम तू कौरे, सैजै तैरै चैलै बै दैखौ।

⁴ जिथुखै जू कुणिए बै मोशुर हौणौ चांव सै छिपीयो काम ना कौरौ, जै तू चौमत्कार कै काम कौरे, तौ आपी खै दुनिया पांदी प्रगट कौर।”

⁵ जिथुखै यीशु कै भाई बै यीशु पांदी बिशवाश ना कौरौ थिए।

⁶ तोबै यीशुए तिनुखै बौल़ौ, “मैरै जाणौ का सोही सौमय इबी ना आए रैई; पौरौ तुऔं कारिए सौबै सौमय औसौ।

⁷ दुनिया कै लोग तुऔं शै बैर ना कौरे सौकौ पौरौ सै मुं आरी बैर कौरौ, जिथुखै हांव तिनकै खिलाफ दो ऐजौ बुलू, कै तिनकै काम बुरै औसौ।

⁸ तुऐं तैयारो मुंजी जाव, हांव इबी ऐसी तैयारो मुंजी ना जांदा, जिथुखै इबी तौड़ी मैरा सोही सौमय ना आए रैई।”

⁹ यीशु तिनुआरी ऐजी बातौ बौलियो कै गलील जिले दा रौए गौआ।

झोपड़ी कै तैयार दा यीशु

¹⁰ पौरौ जोबै यीशु कै भाई झोपड़ी कै तैयारो मुंजी हौटै गौवै, तोबै यीशु बै लोगौ शै मेसो तिथै हौटै गौआ।

¹¹ यहूदी नेता तैयारो मुंजी लोगौ शै पुछयो यीशु कै जौंदै लागै कै सै “कुकै औसौ?”

¹² औरौ तिथै भीड़ौ कै लोग तैसकै बारै मुंजी चुपी-चुपी बौरिशी बातौ बौल़ै लोई थी। किछै लोग बौल़ौ थिए कै, “सै भला आदमी औसौ।” औरौ किछै लोगै बौल़ै लो थियु, “ना, सै लोगौ खै भरमांव।”

¹³ तोबै यहूदी नेताओं कै डौरौ कै मारै कुणजैई आदमी बै यीशु कै बारै मुंजी खौलेयौ बातौ नै बौल़ौ थिए।

तैयार दा यीशु का उपदैश

¹⁴ औरौ जोबै तैयारो कै आधै दूस बितै गौवै; तोबै यीशु मन्दिरो दै जायौ खै उपदैश दैन्दा लागा।

¹⁵ तोबै यहूदी नेताए हैरान हौयौ खै बौल़ौ, “ऐसी बिना पवित्र शास्त्र कै पौढ़ै ऐजी शिक्षा कैशैखै आए गोई?”

¹⁶ यीशुए तिनु जवाब दिया, “मैरा उपदैश मैरा आपणा ना आथी, पौरौ ऐजौ पौरमेशवर कै ढौबौशौ औसौ जैणै मुखै छाड़ै राए।

¹⁷ जै कुणिए पौरमेशवर कै इछा पूरी कौरणौ का प्रण लोंव, तौ सै जाणै पांदा कै मैरै शिक्षा पौरमेशवर कै ढौबौशै आंव या हांव आपणै औरौ शी बुलू।

¹⁸ जू आपणै ढौबौ शो किछै बौल़ौ, सै आपणै तारीफ चांव, पौरौ जू आपणै भैजणौवाल़ै खै तारीफ चांव सैजाई भोरोशे कै लायक औसौ। औरौ तैसदी कुणजी बैईमानी ना आथी।

¹⁹ मूसा पौरमेशवर कै बातौ बौताणौवाल़ै तुऔं खै कानून दैय राए, तौ बै तुऔं मुंजीदा कुणिए कानून पांदी ना हांडो। तुऐं किथु मुखै मारणा चांव?”

²⁰ भीड़ौ मुंजीदा ऐकीए जवाब दिया; “तांव दै दुष्टआत्मा औसौ! ताखै कुण मारणा चांव?”

²¹ यीशुए जवाब दिया, “मोऐं विशांव कै दूसै चौमत्कार का काम कौरा, पौरौ तुऐं सौबै हैरान हौए गौवै।

²² मूसाए तुऔं खै खतना कौरणौ कै आज्ञा दै, ऐशै नै कै सै मूसा कै औरौ शै औसौ, पौरौ पुराणियो शै हौंदै आए रौवै, औरौ तुऐं विशांव कै दूसै आदमी का खतना कौरौ।

²³ तुऐं विशांव कै दूसै आदमी का खतना कौरौ, ताकि मूसा कै कानून कै आज्ञा टोल़े नै जांव, तौ तुऐं मुं पांदी किथु गुस्सा कौरौ कै मोऐं विशांव कै दूसै ऐक आदमी कै पूरी तरह शै ठीक कौरा।

²⁴ मुँह दैखा न्याय नी कौरौ, पौरौ सौचाई शै न्याय कौरौ।”

का यीशु ही मसीह औसौ?

²⁵ यरूशलेम शहर दै रौणौवाल़ै किछै लोग बौलदै लागै, “का ऐजा सैजाई ना आथी, जैसीखै अमारै नेताए मारणौ कै कौचिश कौरे लोए?

²⁶ पौरौ दैखौ, सै तौ खुलैआम बातौ कौरौ औरौ कुणिए तैसीखै किछै ना बौल़ौ; कोदी ऐशै तौ नी कै तिनुऐ साचौ जाणै पोऊ; कै ऐजाई मसीह औसौ?

²⁷ ऐसीखै तौ आमुए जाणुए, कै ऐजा कुकै का औसौ; पौरौ मसीह जौल़ौ आला तौलौ कुणिए ना जांदै कै सै कुकै का औसौ।”

²⁸ तोबै यीशुए मन्दिरो दै उपदैश दैयौ जोर शै बौल़ौ, “तुऐं मुखै जाणौए औरौ ऐजौ बै जाणौए कै हांव कुकै का औसौ। हांव तौ आपी शा ना ऐई पौरौ मैरा भैजणौवाल़ा पौरमेशवर भोरोशे लायक औसौ, तैसीखै तुऐं ना जाणौ।

²⁹ पौरौ हांव तैसीखै जाणुए; जिथुखै हांव तैसकै औरौ शा औसौ औरौ तैणै मुखै भैज राए।”

³⁰ इथपांदी नेताए तैसीखै थामणा चोऊवा तौ बै कोसीए तैसी गिरफ्तार ना कौरी, जिथु तैसखै मौरणौ का सोही सौमय इबी तौड़ी ना आए रैई थी।

³¹ औरौ भीड़ौ मुंजीदै बौहितै लोगै तैसी पांदी बिशवाश कौरा, औरौ बौलदै लागै, “मसीह जौल़ौ आला, तोलो का इदै जादा निशान खै दिखांदा जू ऐणै दिखाए राए?”

यीशु कै थामणो कै कौचिश

³² फरीसी लोगै भीड़ कै लोगौ खै तैसकै बारै मुंजी ऐजी बातौ चुप्पी-चुप्पी कौरदै बैई शुणी औरौ मुख्य यहूदी पुरोहित औरौ फरीसीए तैसी थामणो कै मन्दिर कै रोखवाल़ै छाड़ै।

³³ इथपांदी यीशुए बौल़ौ, “हांव दैणिक देर तौड़ी औरौ तोंवारै साथै औसौ तिथकै बाद हांव आपणै भैजणैवाल़ै पौरमेशवर कै धोरे पाछु हौटै जांदा।

³⁴ तुऐं मुखै जौले पौरौ ना पांदै औरौ जिथै हांव रोऊं तिथै तुऐं ना आए सौकौ।”

³⁵ इथपांदी यहूदी नेताए आपी मुंजी चौर्चा कौरेयौ बौल़ौ, “ऐजा कुकै जांदा कै आमै ऐसी जौए ना सौकदै? शायद सै तिनु यहूदी लोगौ कै धोरे जाला जू यूनानी शहरो दै इस्राएल देश शै बायरै बिखरेयोंदे रौंव, औरौ तिनुकै शिक्षा दैणा चांव।

³⁶ इयौं बात का का मतलब औसौ, जू तैणै बुली कै ‘तुऐं मुखै जौले पौरौ ना पांदै, जिथुकै जिथै हांव जांदा लागै रौवा: तिथै तुऐं ना आए सौकौ?’”

जीवन-पाणी कै नोंदी

³⁷ हौजौ तैयारो कै आखरी दूस, जू मुख्य दूस औसौ यीशु खौड़ा हौआ औरौ जोर शै बौल़ौ, “जै कुणिए तिशा औसौ तौ मैरै धोरे आव औरौ पियौ।

³⁸ जू मुं पांदी बिशवाश कौरला जैशैकै पवित्र शास्त्रो दो लैखै राए, ‘तैसकै दिल शै पाणी की नोंदी बोहली, जू जीवन दैंव।’”

³⁹ यीशुए ऐजै बात बौल़ै, तौ सै पवित्र आत्मा कै बारै मुंजी बौल़ै लोए थी, जू तैसी पांदी बिशवाश कौरौ सै पवित्र आत्मा कै पाणौ वाल़ै थिए; पवित्र आत्मा इबी तौड़ी ना उतरे रैई थी। जिथुखै पौरमेशवरे इबी तौड़ी यीशु कै महिमा कै प्रकट ना कौरे रैई थी।

⁴⁰ तोबै भीड़ कै लोगौ मुंजीदै कुणिए ऐजी बातौ शोणेयो बौल़ौ, “सौथी कै ऐजा पौरमेशवर कै बातौ बौताणौवाल़ा औसौ, जैसकै आणौ का आमुए इंतजार कौरे लौआ थिया।”

⁴¹ ओकी लोगै बौल़ौ, “ऐजा मसीह औसौ।” पौरौ कुणिए ओकी लोगै बौल़ौ, “का मसीह गलील जिले शै आन्‍दा?

⁴² पवित्र शास्त्र दो लैखै राए कै मसीह राजा दाऊद कै वंशो पौरैशा औरौ बैतलहम गांव शै आन्‍दा, जिथै दाऊद रौंव थिया।”

⁴³ ऐशैखैई यीशु की बौजैह शै लोगौ मुंजी फूट पौड़ै।

⁴⁴ तिनुमुंजी किछै लोग तैसीखै थामणा चांव थिए, पौरौ कुणिए बै तैसी गिरफ्तार ना कौरी।

⁴⁵ तोबै मन्दिर कै रोखवाल़ै मुख्य यहूदी पुरोहितो औरौ फरीसी लोगौ कै धोरे आए, औरौ तिनुऐ तिनुखै पूछै, “तुऐं तैसी गिरफ्तार कौरेयौ काए ना लैई?”

यहूदी नेताओं का बिशवाश ना कौरणा

⁴⁶ मन्दिर कै रोखवाल़ै जोवाब दिया, “कोसी आदमीए कौलोंई ऐशणी बातौ ना कौरी।”

⁴⁷ फरीसी लोगै तिनु जवाब दिया, “का तुऔं बै बैहकाए राए?

⁴⁸ ना तौ अमारै औधिकारियो मुंजीदै कोसीए बै औरौ ना ही फरीसी लोगै तैसी पांदी बिशवाश कौरा।

⁴⁹ पौरौ ऐजै लोग जू मूसा कै कानून ना जाणौ, पौरमेशवर का शराप तिनु पांदी औसौ।”

⁵⁰ नीकुदेमुसे, (जू औगौड़ियौ ही राती मुंजी यीशु कै धोरे भैटिंदा आए रौआ थिया, औरौ यहूदी नेता मुंजीदा ऐक थिया) तिनुखै बौल़ौ,

⁵¹ “का अमारै मूसा कै कानून कोसी आदमी कै जांव तौड़ी आगै तैसकै बात शोणेयो जाणै ना पांव, कै सै का कौरौ, सौजा दैंव?”

⁵² तिनुऐ तैसी कैईंदु मजाक मुंजी पूछु, “तू बै गलील जिले पौरैशा औसौ? पवित्र शास्त्र दो जू औरौ पौता कौरा, कै गलील जिले शै कुणजाई पौरमेशवर कै बातौ बौताणौवाल़ा प्रगट ना हौंदा।”

⁵³ इथकै बाद सौबै आपणै-आपणै घोरो कै हौटै गौवै।