यूहन्ना 5 - सिरमौरी नौवाँ नियम

अड़तीश साल कै बीमार कै ठीक कौरणा

¹ इनु बातौ कै बाद यहूदी लोगौ का ऐक तैयार हौआ, औरौ यीशु यरूशलेम शहर खै हौटा।

² ऐबै यरूशलेम शहर दै, भेड़-कोवाड़ कै धोरे ऐक कुण्ड थिया, जिथुकै इब्रानी भाषा दो बैतसैदा बौल़ौ, औरौ तिथकै चोऊ ढौबौ पाँच ओसारे औसौ।

³ इनु मुंजी भौरिशै बीमार लोग तिथै पौड़ेयौंदे रौंव थिए। किछै आन्धै थिए, किछै लोंगड़े थिए, औरौ किछै ओधरंगी थिए। जू (पाणी कै हिजाल़णौ कै आश मुंजी) पौड़ेयौंदे रौंव थिए।

⁴ जिथुकै सोही सौमय पांदी पौरमेशवर कै स्‍वर्गदूत कुण्डो उदे ओतरेयो पाणी खै हिंजाल़ौ थिए, औरौ पाणी हिजाल़णौ कै बाद जू कुणिए बै औगौड़ियौ कुण्डोऊंदा जांव थिया सै ठीक हौए जांव थिया, चाए तैसकै कैशणै बै बीमारै काए नी हौंव।

⁵ तिथै ऐक आदमी थिया, जू अड़तीश सालो शै बीमार थिया।

⁶ यीशुए तैसी हाल मुंजी पौड़ेयौंदा दैखैबा औरौ ऐजौ जाणैबा की बौहितै दूसौ दा उंडा, ऐसी हालत दा पौड़ै रौआ, तैसी कैईंदु पूछु, “का तू ठीक हौणौ चांए?”

⁷ तैसी बीमार आदमीए यीशु खै जोवाब दिया, “ओए रै प्रभु मुंकैई कुणिए बै आदमी ना आथी, कै जोबै पाणी हिंजाल़ौ, तौ मुखै कुण्डो उदा उतरणो कारिए मैरी मौदद कौरौ, हांव कुण्डो उदा जाणौ कै कौचिश कौरु पौरौ कुणिए ना कुणिए हमैशा मुं दा औगौड़ियौ तिथै हौटै जांव।”

⁸ यीशुए तैसीखै बौल़ौ, “ऊबा बिज़ औरौ आपणै कुटड़ै टिपयौ आपणै घोरो खै आगु जा।”

⁹ सैजा आदमी तौलोंई ठीक हौए गौआ, औरौ आपणै कुटड़ै टेपेयो हांडदा फिरदा लागा।

¹⁰ जैसी दूसै ऐजौ सौबै ठुँ हौ सैजौ दूसै विशांव कौ दूस थियु। इथकारिए यहूदी नेता तैसी ठीक हौएयौंदै आदमी कै बौलदै लागै, “मूसा कै कानून कै हिसाब शै ऐलो तौ विशांव कौ दूस औसौ, इथकारिए तैरौ कुटड़ौ टिपणौ ठीक ना आथी।”

¹¹ तैणै तिनुखै जोवाब दिया, “जैणै मुखै ठीक कौरे राए, तैणै मुखै बौल़ै राए, आपणै कुटड़ै टिपेबा आगु हांड।”

¹² तिनुऐ तैसी कैईंदु पूछु, “सैजा कुणजा आदमी औसौ जैणै ताखै बौल़ौ, ‘कुटड़ौ टीप औरौ आगु हांड?’”

¹³ पौरौ जू बीमार आदमी ठीक हौए गौआ थिया, सै ना जाणौ थिया कै सैजा आदमी कुण औसौ; जिथुकै तैसी जौगैह दै बैजाए भीड़ हौणौ की बौजैह शै यीशु तिथैदा गायब हौए गौआ थिया।

¹⁴ इनु बातौ कै बाद सै यीशु खै मन्दिरो कै आँगणो दा भैटा, तोबै तैणै तैसीखै बौल़ौ, “दैख, तू तौ ठीक हौए गौआ, औरौ हौजौ कौलोंई पाप नै कौरेया ऐशैखै नै हौंव कै तैरा हाल इथैदा बै जादा बुरा हौए जांव।”

¹⁵ तैसी आदमीए जाऐबा यहूदी नेता कै बौल़ै दियु, की जैणै मुखै ठीक कौरे राए सैजा यीशु औसौ।

¹⁶ इथकारिए यहूदी नेता यीशु खै सतांदै लागै, जिथुकै सै ऐशणै-ऐशणै काम विशांव कै दूसै कौरौ थिया।

¹⁷ इथपांदी यीशुए तिनुखै बौल़ौ, “मैरा पौरमेशवर जू मैरा पिता औसौ हमैशा काम कौरौ, औरौ मुखै बै काम कौरणा चैंई।”

¹⁸ यीशु कै ऐशै बौलणौ कै बौजैह शै यहूदी नेता यीशु खै मारणौ कै कौचिश कौरदै लागै, कै सै ना सिरफ विशांव कै दूसौ कै नियम खै तौड़ौ, पौरौ पौरमेशवर खै आपणा पिता बौलेबा, आपी खै पौरमेशवर जैशणा बौणौ।

बैटै का औधिकार

¹⁹ इथपांदी यीशुए तिनुखै बौल़ौ, हांव तुऔं खै साचौ-साचौ बुलू, “हांव यानी पौरमेशवर का बैटा आपी किछै ना कौरे सौकु, सिरफ सैजौई जू पिता पौरमेशवर कै कौरदै बैई दैखु, जिथुकै जिनु-जिनु काम कै सै कौरौ, तिनुखै हांव बै तैशैखैई कौरु।

²⁰ इथकारिए कै पिता पौरमेशवर जू प्यार मुं आरी कौरौ, औरौ जू-जू काम सै आपी कौरौ, सै सौबै मुखै दिखांव, औरौ हांव इनु दै बै बौड़ै काम तिनु दिखांदा, ताकि तुऔं हैरानी हौंव।

²¹ जिथुकै जैशै पिता पौरमेशवर मौरेयौंदे लोगौ कै औटेयौ जियुंदै कौरौ, तैशैखैई हांव बै जिनुखै चोऊं, तिनुखै जिन्दगी दियु।

²² पिता पौरमेशवर कोसी का बै न्याय ना कौरौ, पौरौ न्याय कौरणौ का सौबै काम मुखै सौंपै राए।

²³ जिथुकै जैशैखै सौबै लोग पिता पौरमेशवर कै आदर दैंव, तैशैखैई मुखै बै आदर दैंव; जै कुणिए मुखै आदर ना दैंव तौ सै पिता पौरमेशवर कै बै आदर ना दैंव जैणै मुखै छाड़ै राए।

²⁴ हांव तुऔं खै साचौ-साचौ बुलू, जू मैरा वचन शौणैबा मैरै भैजणैवाल़ै पांदी बिशवाश कौरौ कै पिता पौरमेशवरे मुखै छाड़ै राए, सै सौदा कै जिन्दगी पांव, औरौ तिनुखै सौजा ना भैटदै, पौरौ सै सौदा कै मौत शै बौचै गौवै औरौ आगैई नौवें जिन्दगी दा प्रवेश कौरे पाए।”

²⁵ “हांव तुऔं कै साचौ-साचौ बुलू, सैजा सौमय आन्‍दा लागै रौआ, औरौ आए ही गौआ, जिथमुंजी मौरेयौंदे लोग मैरी यानी पौरमेशवर कै बैटै की आवाज़ शुणदै, औरौ जू शुणदै सैजै हमैशा कारिए जिन्‍दै।

²⁶ जिथुकै जैशैकै पिता पौरमेशवर आपणै आपी दा जीवन राखौ तैशैकैई तैणै मुखै बै जू तैसका बैटा औसौ ऐजा औधिकार दैय राए कै आपी दा जीवन राखु।

²⁷ जिथुकै हांव आदमी का बैटा औसौ, इथकारिए पिता पौरमेशवरे मुखै सौबी लोगौ का न्याय कौरणौ का औधिकार दैय राए।

²⁸ ऐजौ सौबै शौणैबा हैरान ना हौ, जिथुकै सैजा सौमय आन्दा लाग रौआ, जोबै सौबै मौरेयौंदे लोग मैरै आवाज़ शुणल़ै तोबै सैजै जियुंदी हौए जांदै।

²⁹ जिनुवै आपणै जीवन दै भोलाए कौरे राए सै सौदा कै जिन्दगी पाणौ कारिए मौरेयौंदे मुंजीदै जियुंदी हौंदै औरौ जिनुवै बुराई मुंजी जीवन बिताए राए, सै सौजा पाए जाणौ कारिए जियुंदी हौन्दै।”

यीशु कै बारै दै गवाही

³⁰ “हांव आपी शै किछै ना कौरे सौकु; हांव लोगौ का न्याय तैशैकैई कौरु जैशैखै पिता पौरमेशवर मुखै तिनका न्याय कौरणौ कै बौल़ौ। औरौ मैरा न्याय सोही औसौ; जिथुकै हांव आपणै इछा नी, पौरौ आपणै भैजणैवाल़ै कै इछा चोऊं।

³¹ जै हांव आपी ही आपणै गवाही दियु; तौ मैरी गवाही साची नै आथी।

³² ऐक ओका औसौ जू मैरा पिता पौरमेशवर औसौ, सै बै मैरै बारै मुंजी गवाही दैंव, औरौ हांव जाणुए कै जू मैरै बारै मुंजी सै गवाही दैंव, सैजै साची औसौ।

³³ तुऐं यूहन्ना बपतिस्मा दाता कै धोरे सौंदेश दैणैवाल़ै छाड़ै औरौ तुऐं यूहन्ना शै पूछौऊ औरौ तैणै सौचाई कै गवाही दी।

³⁴ पौरौ हांव आपणै बारै मुंजी आदमी खै गवाही ना चोऊं, हौजौ बै मोऐं तुऔं तियौं गवाही कै बारै मुंजी बौताए राए जू यूहन्नाए दैय राए थै ताकि तुऐं उध्दार पाए सौकौ।

³⁵ यूहन्ना तौ जोल़दै औरौ चोमकैयौंदे दिवे कै साए थिया, औरौ तुऔं कै किछै सौमय तौड़ी तैसकै पेयाशै दो मगन हौणौ आछौ लागौ।

³⁶ मुंआगै यूहन्ना दै बौड़ी गवाही औसौ। सैजी टोल जू पिता पौरमेशवरे मुखै पूरै कौरणौ खै दैय राए, सैजी टोल मैरै बारै मुंजी गवाही दैंव जू टोल मोऐं कौरे लोए, सैजी टोल गवाही दैंव कै पिता पौरमेशवरे मुखै भैज राए।

³⁷ औरौ पिता पौरमेशवर जैणै मुखै भैज राए, तैणै मैरी गवाही दैय तुऐं ना कौलोंई तैसकी धाव शुणी औरौ ना तैसी आमणै-सामणै दैखी।

³⁸ औरौ तैसकै उपदैश खै आपणै मन दै बौठणौ ना दैंव, जिथुकै तुऐं मुं पांदी बिशवाश ना कौरौ, जैसी पौरमेशवरे भैजै राए।

³⁹ तुऐं पवित्र शास्त्र कै ध्यान शै पोढ़ो, जिथुकै तुऐं सुंचौ कै तिंदी तुऔं कै सौदा कै जिन्दगी भैटौए, औरौ ऐजा सैजाई औसौ, जू मैरी गवाही दैंव।

⁴⁰ तोबै बै तुऐं सौदा कै जिन्दगी पाणौ कारिए मैरै धोरे आणौ ना चांव।

⁴¹ हांव आदमी कै तारीफ कै आश ना राखु।

⁴² पौरौ तुऐं आपणै दिल शै पौरमेशवर आरी प्यार ना कौरौ।

⁴³ हांव आपणै पिता पौरमेशवर कै औधिकार शै आए रौआ, औरौ तुऐं मुखै ना अपनांव, जै कुणिए ओका आपणै औधिकार शै आंव, तौ तुऐं तैसी अपनाए पांव।

⁴⁴ तुऐं मुं पांदी बिशवाश ना कौरे सौकौ, जिथुकै तुऐं ऐकी दूजै शै तारीफ पाणै चांव, औरौ तुऐं तियौं तारीफ कै पाणौ कै कौचिश ना कौरौ जू सिरफ ऐकैई पौरमेशवर दैंव।

⁴⁵ ऐजौ नै सौमझौ कै हांव पिता पौरमेशवर खै सामणै तुऔं पांदी दोष लान्दा, मूसा जैसी पांदी तुऐं आपणी आश राखी राए, सैजाई तुऔं पांदी दोष लान्दा।

⁴⁶ जिथुकै जै तुऐं मूसा कै कानून पांदी बिशवाश कौरदै, तौ मुं पांदी बै बिशवाश कौरदै, इथकारिए कै तैणै मैरै बारै मुंजी लैख राए।

⁴⁷ पौरौ तुऐं तैसकी लिखयोंदी बातौ पांदी बिशवाश नै कौरदै, तौ तुऐं जौरुर इनु बातौ पांदी बै बिशवाश ना कौरदै कै हांव का बुलू।”