यूहन्ना 3 - सिरमौरी नौवाँ नियम

यीशु औरौ नीकुदेमुस

¹ फरीसी लोगौ मुंजीदा नीकुदेमुस नांव का ऐक आदमी थिया, जू यहूदी धरम का नेता थिया।

² तैणै रातै यीशु कै धोरे आयौ बौल़ौ, “ओए रै गुरुजी, आमै जाणुए कै पौरमेशवरे ताखै आमु शिखाणौ कारिए छाड़ै राए, जिथुकै कुणिए बै इनु निशान या चौमत्कारो खै जू तू दिखाए, जै पौरमेशवर तैसकै साथै नी हौंव, तौ दिखाए ना सौकौ।”

³ यीशुए तैसीखै जोवाब दिया कै, “हांव ताखै साचौ-साचौ बुलू, जै कुणिए नोऐं सिरै शै ना जन्मो तौ पौरमेशवर कै राज्य ना दैखै सौकौ।”

⁴ नीकुदेमुसे तैसीखै बौल़ौ, “आदमी जोबै बूढ़ा हौए जांव, तौ कैशैखै सै आपणी माँ कै पेटोऊदा पाछु जाऐबा जन्म लोए सौकौ? का सै औटेयौ आपणी माँ कै पेटोऊदा दुजाल़ियो जन्म लोए सौकौ।”

⁵ यीशुए जोवाब दिया, “हांव ताखै साचौ-साचौ बुलू, जांव तौड़ी कुणिए आदमी पाणी औरौ पवित्र आत्मा शै ना जन्मो तौ सै पौरमेशवर कै राज्य दै जाए ना सौकौ।

⁶ आदमी आपणै नानड़िया कै जिन्दगी दैंव। तोबै बै सिरफ पौरमेशवर कै आत्मा तुऔं पौरमेशवर कै संतान कै भैषो दा बौदलै सौकौ।

⁷ हैरान नी हौया, कै मोऐं तांव कैई बौल़ौ, ‘ताखै नोऐं सिरै सै जन्म लोणा जौरुरी औसौ।’

⁸ हावा जैतौ कै चांव तैतौ कै ही फिरो, औरौ तू तिथकै शब्द शुणै, पौरौ ना जाणै कै कुकै दै आए औरौ कुकै जांव; जू कुणिए पवित्र आत्मा लैई जन्मे रौआ सै ऐशणाई औसौ।”

⁹ नीकुदेमुसे तैसीखै जोवाब दिया, “ऐजी बातौ कैशैखै हौए सौकौ?”

¹⁰ इथु शौणैबा यीशुए तैसीखै जोवाब दिया, “तू इस्राएल देश कै लोगौ का गुरु औसौ, औरौ ताखै इनु बातौ खै सौमझणी चैंई।

¹¹ हांव ताखै साचौ-साचौ बुलू, कै आमै जू जाणुए, सैजौ बुलू, औरौ जैसी आमै दैखी राए तैसकी गवाही दियु, औरौ तुऐं अमारै बौलेयौंदी बातौ पांदी बिशवाश ना कौरदै।

¹² जोबै मोऐं तुऔं धरती पांदी हौणौवाल़ी बातौ कै बारै मुंजी बौतौऊं, औरौ तुऐं तोबै बै बिशवाश नै कौरदै, तौ जै हांव तुऔं खै स्वर्गो दी हौणौवाल़ी बातौ बुलू तौ तुऐं कैशैखै बिशवाश कौरदै?

¹³ कुणिए स्वर्गो दा ना हौटै रैई, सिरफ हांव आदमी का बैटा स्वर्ग शै धैनै आए रौआ।

¹⁴ औरौ जैशैखै मूसाए शुनशान जौगैह दा पितलो कै शोंगोऊं कै खोम्बे पांदी चौढ़ौऊवा, तैशैखैई जौरुरी औसौ कै हांव आदमी का बैटा बै क्रूसो पांदी चौढ़ाया जोऊं।

¹⁵ ताकि जू कुणिए मुं पांदी बिशवाश कौरौ सै सौदा कै जिन्दगी पांव।”

¹⁶ “जिथुकै पौरमेशवरे दुनिया कै लोगौ शै ऐशणा प्यार कौरा, की तैणै आपणा इकलौता बैटा बै दैय दिया, ताकि जू कुणिए तैसी पांदी बिशवाश कौरौ सै नाश नी हौंव पौरौ सौदा कै जिन्दगी पांव।

¹⁷ जिथुकै पौरमेशवरे दुनिया कै लोगौ खै सौजा दैणौ कारिए आपणै बैटै कै दुनिया दा ना छाड़ी, पौरौ इथकारिए कै दुनिया कै लोग तैसकै दवारा मोक्ति पांव।

¹⁸ जू पौरमेशवर कै बैटै पांदी बिशवाश कौरौ, तैसी पांदी कौलोंई दोष ना लाया जांव, पौरौ जू तैसी पांदी बिशवाश नै कौरला सै दोषी बौणै गौआ, इथकारिए की तैणै पौरमेशवर कै इकलोतै बैटै पांदी बिशवाश नै कौरी।

¹⁹ औरौ सौजा कै बौजैह ऐजी औसौ, कै पेयाशो दुनिया दो ओऊं, औरौ आदमीए इनारै खै पेयाशै शै जादा प्यार कौरा, जिथुकै तिनकै काम बुरै थिए।

²⁰ जिथुकै जू कुणिए बुराए कौरौ, सै पेयाशै शै बैर राखौ, औरौ पेयाशै कै नेड़िक ना आंव, ताकि तैसकै पाप सामणै नी आंव।

²¹ पौरौ जू सौचाई पांदी चालौ, सै पेयाशो कै नेड़िक आंव, ताकि तैसकै काम प्रगट हौए जांव कै जू पौरमेशवर चांव सैजौ कौरौ।”

यीशु कै बारै मुंजी यूहन्ना की गवाही

²² तोबै यीशु औरौ तैसकै चैलै यरूशलेम शहर कै छोडे़बा यहूदिया प्रदेश कै हौटै गौवै, औरौ यीशु तिथै तिनकै साथै रौयौ लोगौ कै बपतिस्मा दैंदा लागा।

²³ औरौ यूहन्ना बै ऐनोन गांव दा जू सामरिया जिले दो सालेम नगर कै धोरे औसौ बपतिस्मा दैंव थिया। जिथुकै तिथै बैजाए पाणी थियु, औरौ लोग आयौ तेसीयांदा बपतिस्मा लोंव थिए।

²⁴ जिथुकै यूहन्ना इबी तौड़ी कोयदखाने दा ना पाए रैई थी।

²⁵ तिथै यूहन्ना कै चैलै औरौ ऐक यहूदी आदमी कै बीच मुंजी आपणै भोवार कै हिसाब शै हाथ धोणो कै बारै मुंजी बैहस हौए।

²⁶ औरौ यूहन्ना कै चैलै यूहन्ना कै धोरे आयौ बौल़ौ, “ओए रै गुरुजी, जू आदमी यरदन नोंदी कै पूरब दिशा दा तैरै साथै थिया, औरौ जैसकै बारै मुंजी तुऐं आमु बौताए राए थियु कै सै कुण औसौ; दैख सै बपतिस्मा दैंव औरौ सौबै लोग तैसकै धोरे जांदै लाग रौवै।”

²⁷ यूहन्नाए जोवाब दिया, “कुणजाई बै आदमी तांव तौड़ी किछै ना पाए सौकौ, जांव तौड़ी पौरमेशवर तैसी स्वर्ग शै ना दैंव।

²⁸ तुऐं मुखै खुद ऐजौ बौलदै बैई शुणौ कै, ‘हांव मसीह ना आथी, पौरौ तैसकै आगै भैजै राए।’

²⁹ दूल्हा दु‌‌ल्हन शै बैयाव कौरे पांव, पौरौ दुल्है का दोस्त खौड़ा हौंव, औरौ तैसकी शुणौ, औरौ दुल्है कै शब्द लैई बैजाए खुश हौंव, इथकारिए मैरा दिल बै खुशी शै भोरै गौआ।

³⁰ जौरुरी औसौ कै सै जादा खास हौए जांव औरौ हांव कम खास हौए जोऊं।”

³¹ “जू स्वर्ग शा आंव सै सौबिदा बौड़ा औसौ, जू धरती पौरैशौ आंव सै धरती का औसौ, औरौ सै धरती कै बातौ बौल़ौ, जू स्वर्गो पौरैशौ आंव, सै सौबिदा ऊबा औसौ।

³² औरौ जू किछै तैणै दैखौ, औरौ शौणै राए, तिथकै गवाही दैंव पौरौ बौहुत कम लोग यीशु कै गवाही कै औपनांव।

³³ पौरौ जैणै तैसकै गवाही ग्रहण कौरे पाए, तैणै इयौं बातौ पांदी छाप लाए दै कै पौरमेशवर साचा औसौ।

³⁴ जैसी पौरमेशवरे छाड़ै राए, सै पौरमेशवर की बातौ बौलदा: जिथुकै पौरमेशवरे तैसी पवित्र आत्मा भरपूरी शै दैय राए।

³⁵ पिता पौरमेशवर बैटै आरी प्यार कौरौ, औरौ तैणै सौबै चीज़ौ तैसकै हाथौ दी दैय दी।

³⁶ जू पौरमेशवर कै बैटै पांदी बिशवाश कौरौ, सै सौदा कै जिन्दगी पांव; पौरौ जू बैटै कै ना मानौ, तैसी सौदा कै जिन्दगी ना भैटदी, पौरौ पौरमेशवर कै सौजा तैसी पांदी रौंदै।”