यूहन्ना 2 - सिरमौरी नौवाँ नियम

गलील कै काना नगर दा जाजड़ा

¹ तिजै दूसै गलील जिले कै काना नगर दा कोसी का जाजड़ा थिया औरौ यीशु कै माँ बै तिथै थी।

² यीशु औरौ तैसकै चैलै बै तैसी जाजड़ै मुंजी बौएदै राए थिए।

³ जोबै पोऊंणै सौबै अंगूर का रस पी पाया तौ यीशु कै माँए तैसीखै बौल़ौ, “कै इनुकैंई अंगूर का रस खत्म हौए गौआ।”

⁴ यीशुए तियौंखै बौल़ौ, “ओए रै माँ तुऐं मुखै काए बौताए लो? मसीह कै रुप दा पोछैयाणै जाणौ का मैरा सौमय इबी ना आए रैई।”

⁵ पौरौ तैसकी माँए सेवको खै बौल़ौ, “जू किछै सै तुऔं खै बौल़ौ सैजौई कौरेया।”

⁶ यहूदी लोगौ का आपणै नियम कै हिसाब शै हाथ धोणो का भोवार थिया। ऐशै कौरणौ कारिए तिनुऐ तिथै पाथरो कै छौ माट धोरे राए थिए, जिनुदा दो-दो औरौ तीन-तीन मण समांव थियु।

⁷ यीशुए तिनुखै बौल़ौ, “माटो दो पाणी भोरै दैव।” तोबै तिनुऐ माटो कै मुंआमुं भोरै दिए।

⁸ तोबै यीशुए सेवको कै बौल़ौ, “ऐबै पाणी गाड़ेयो टोलुआ कै मुखिया कै धोरे लोए जाव।” औरौ सेवके तैशैकैई कौरौ जैशैखै तैणै बौल़ै राए थियु।

⁹ जोबै टोलुआ कै मुख्याए पाणी चाखो जू अंगूर का रस बौणै गौ थियु औरौ सै जाणौ नै थिया कै ऐजौ कुकै दो ओऊं। पौरौ जिनु सेवके पाणी गाड़ै राए थियु सै जाणौ थिए, तोबै टोलुआ कै मुख्याए दूल्हा कै बोयदयो तैसीखै बौल़ौ,

¹⁰ “ओए रै बरखुरदार! हरेक आदमी औगौड़ियौ बड़िया अंगूर का रस दैंव, औरौ जोबै लोग पियौं कै छौकै जांव, तोबै सै बैकार अंगूर का रस दैंव, पौरौ तुऐं बड़िया अंगूर का रस इबी तौड़ी राखै राए।”

¹¹ यीशुए गलील जिले कै काना नगर दा आपणा ऐजा आगला चौमत्कार का काम देखाएबा आपणै महिमा प्रगट कौरे औरौ तैसकै चैलै तैसी पांदी बिशवाश कौरा कै सै मसीह औसौ।

¹² इथकै बाद सै औरौ तैसकै माँ औरौ तैसकै भाए औरौ तैसकै चैलै कफरनहूम नगर खै हौटै औरौ तिथै किछैक दूस रौवै।

मन्दिर पौरैशै व्यापारियों कै आगु घाड़णै

¹³ यहूदी नेताओं का फसह का तैयार नेड़िक थिया औरौ यीशु यरूशलेम शहर खै हौटा।

¹⁴ औरौ तैणै मन्दिरो दै बौल़ोद औरौ भेड़ औरौ कबूतर बिकणौवाल़ै औरौ पौयसै बौदल़णौ वाल़ै लोगौ कै बौठैयौंदे दैखै।

¹⁵ तोबै तैणै पागोई का कोड़ा बाणैयो, सौबी भेड़ो औरौ बौल़ोद खै मन्दिरो पौरैशै निकाल़ै दियै, औरौ तैणै पौयसै बौदल़णौ वाल़ै लोगौ कै पौयसै, बिखराए दिए औरौ मैज़ पोल़टी दी,

¹⁶ औरौ कबूतर बिकणौवाल़ै खै बौल़ौ, “इनु इथदै लोए जाव मैरै पिता पौरमेशवर कै घोरो खै व्यापार का घोर नी बाणौ।”

¹⁷ तोबै तैसकै चैलै खै याद ओऊ की पवित्र शास्त्र दो लैखै राए कै, “तैरै घोरो कै भोक्‍ती मैरै भीतरै आगी साए जौल़ौ।”

¹⁸ इथपांदी यहूदी नेताए तैसीखै बौल़ौ, “जै तुंवागै पौरमेशवर कैईंदा ऐजा औधिकार औसौ, तौ आमुखै इथु साबित कौरणौ कारिए ऐक निशान दिखा?”

¹⁹ यीशुए तिनुकै जोवाब दिया, “ऐसी मन्दिरो खै ढाल़ै दैंव, औरौ हांव ऐसीखै ती दूसौ दा दुजाल़ियो बाणै दोऊंबा।”

²⁰ औरौ यहूदी नेताए बौल़ौ, “ऐसी मन्दिरो कै बौणाणौ खै छियालीस सालो लागै रौई, औरौ का तू ऐजौ ती दूसौ दा दुजाल़ियो बाणै दैंदा?”

²¹ पौरौ यीशु जैसी मन्दिरो कै बारै मुंजी बौल़ै लौ थियु सै तैसकै शोरीर कै बारै मुंजी थियु।

²² हौजौ जोबै सै मौरणौ कै बाद जियुंदा हौआ, तौ तैसकै चैलै खै याद ओऊं कै तैणै ऐजौ बौल़ै राए थियु, औरौ तिनुऐ पवित्र शास्त्र पांदी जू मसीह कै मौरेयौंदे मुंजीदै जियुंदी हौणौ कै बारै मुंजी बौतांव, औरौ जू यीशुए बौल़ै राए थियु, तिथ पांदी बिशवाश कौरा।

यीशु आदमी कै मनो खै जाणौए

²³ फसह कै तैयारो कै सौमय मुंजी जोबै यीशु यरूशलेम शहर दा थिया, तौ बौहितै लोगै तिनु निशान कै जू यीशु दिखांव थिया तिनुकै दैखैयो तैसी पांदी बिशवाश कौरा।

²⁴ पौरौ यीशुए बिशवाश ना कौरी कै तिनुऐ तैसी पांदी भोरोशा कौरे राए, जिथुकै सै आदमी कै स्‍वभाव कै जाणौ थिया।

²⁵ औरौ तैसीखै कोसी कै जौरुरत ना थी, जू तैसीकै लोगौ कै बारै मुंजी बौतांव जिथुकै सै जाणौ थिया तिनकै दिलो औरौ इरादै दो का थियु।