यूहन्ना 16 - सिरमौरी नौवाँ नियम

¹ “मोऐं ऐजी बातौ तुऔं कै इथकारिए बुली कै तुऐं कोसी पांदी बिशवाश कौरेयौ धौखा नै खांव।

² सै तुऔं यहूदी सभा-घोरो पौरैशै बायरै निकाल़ै दैंदै, औरौ सैजा सौमय आए गौआ, कै जू कुणिए तुऔं मारणौ शै ऐजौ सौमझला कै जू पौरमेशवर चांव सैजौ हांव कौरु।

³ ऐजौ सैजै इथकारिए कौरदै कै तिनुऐ पिता पौरमेशवर कै ना जाणी औरौ ना मुखै जाणौ।

⁴ पौरौ मोऐं तुऔं ऐजी बातौ इथकारिए बुली, कै जोबै इनु बातौ का पूरै हौणौ का सौमय आला, तौ तुऔं याद आए जांदो, कै मोऐं तुऔं आगैई बौताए दियु थियु। मोऐं शुरुआत शै ऐजी बातौ इथकारिए ना बुली जिथुकै हांव तोंवारै साथै ही थिया।”

पवित्र आत्मा कै काम

⁵ “पौरौ ऐबै हांव आपणै भैजणौवाल़ै पौरमेशवर कै धोरे चालै रौआ औरौ ऐबै तुऔं मुंजीदै कुणिए मुं कैईंदु ना पूछौ, ‘तू कुकै चालै रौआ?’

⁶ पौरौ मोऐं जू ऐजी बातौ तुऔं बुली, इथकारिए तोंवारा मन उदास हौए गौआ।

⁷ हौजौ बै हांव तुऔं साचौ बुलू, कै मैरौ जाणौ तुऔं कारिए आछौ औसौ, जिथुकै जै हांव ना जोऊं, तौ सैजा हौंसला दैणौवाल़ा, तोंवारै धोरे ना आन्दा, पौरौ जै हांव जोऊं, तौ तैसी तोंवारै धोरे भैजै दैंदा।

⁸ औरौ सै आयौ खै दुनिया कै लोगौ कै पाप औरौ धार्मिकता औरौ न्याय कै बारै मुंजी यकीन दिलांदा।

⁹ सै पाप कै बारै मुंजी यकीन दिलांदा कै सै मुं पांदी बिशवाश कौरणौ शै इन्कार कौरौ।

¹⁰ औरौ धार्मिकता कै बारै मुंजी यकीन दिलांदा कै हांव पिता पौरमेशवर कै धोरे चालै रौआ, औरौ तुऐं मुखै हौजौ ना दैखदै।

¹¹ औरौ न्याय कै बारै मुंजी यकीन दिलांदा कै इयौं दुनिया का ठोगड़ा शैतान दोषी ठोहराए गौआ।”

¹² “मैरै तुऔं हौजौ बै बौरिशी बातौ बोताणी, पौरौ इबी तुऐं तिथु बरदाश ना कौरे सौकौ।

¹³ पौरौ जोबै सैजा सत्‍य का आत्मा आला, तौ तुऔं पौरमेशवर कै बारै मुंजी जू बै साचौ औसौ बौतांदा। जिथुकै सै आपणै औधिकार शै ना बौलदा, पौरौ जू किछै पौरमेशवर कै ढौबौशौ शुणल़ा, सैजौई बौलदा, औरौ आणौवाल़ी बातौ तुऔं बौतांदा।

¹⁴ सै मैरै महिमा कौरदा, जिथुकै तैसी जू मैरै ढौबौशौ जू भैटी रौं, सैजौई तुऔं बोताला।

¹⁵ जू किछै पिता पौरमेशवर कौ औसौ, सैजौ सौबै मैरौ औसौ; इथकारिए मोऐं बौल़ौ, कै तैसी मैरी ढौबौशौ जू भैट रौं, सैजाई तुऔं बोताला।”

दुख खुशी दा बौदलै जाला

¹⁶ “तैतियोड़ै तुऐं मुखै ना दैखदै, औरौ हौजौ बिस्तौड़ी मुखै दैखलै।”

¹⁷ तोबै यीशु कै किछै चैलै आपी मुंजी बौल़ौ, “ऐजौ का औसौ कै सै आमुखै बौल़ौ, ‘तैतियोड़ै तुऐं मुखै ना दैखदै, औरौ हौजौ बिस्तौड़ी मुखै दैखलै? औरौ ऐजौ इथकारिए कै हांव पिता पौरमेशवर कै धोरे जोऊं?’”

¹⁸ तोबै तिनुऐ बौल़ौ, “ऐजौ तैतियोड़ै, जू सै बौल़ौए, ऐजै का बात औसौ? आमुए ना जाणु, कै सै का बौल़ौ।”

¹⁹ यीशुए ऐजौ जाणैयौ कै सैजै मुंआदा इनु बातौ का मतलब पूछणा चांव, तिनुखै बौल़ौ, “का तुऐं आपी मुंजी इनु बातौ कै बारै मुंजी शाह पूछ कौरौ, ‘तैतियोड़ै तुऐं मुखै ना दैखदै औरौ बिस्तौड़ी तुऐं मुखै दैखदै?’

²⁰ हांव तुऔं साचौ-साचौ बुलू; तुऐं मैरै मौरणौ कै बाद रुलै, औरौ दुख दै रौलै पौरौ दुनिया कै लोग खुशी मनांदे, तुऔं शोग हौंदा, पौरौ जोबै तुऐं मुखै होटेयो जियुंदा दैखलै तौ तोंवारा शोग खुशी मुंजी बौदलै जांदा।

²¹ जोबै बैटमाणिशौ कै सुजणौ का सौमय आंव तौ सै बौहितै पीड़ो दै हौंव। जिथुकै तियौंकै दुखो का सौमय आए गौआ, पौरौ जोबै नानड़िया कै जन्म दैय दैंव तौ इयौं खुशी लैई दुनिया पांदी ऐक आदमी पौयदा हौए जांव, तिनु पीड़ो कै सै औटेयौ याद ना कौरौ।

²² ऐशैखैई तुऔं इबी शोग औसौ, पौरौ जोबै हांव होटेयो तुऔं आरी भैटिंयुबा तोबै तुऐं खुशी हौंदै; औरौ तोंवारै खोशे कुणिए तुऔं कैईंदै ना छीनदा।

²³ तैसी सौमय जोबै हांव तुऔं हौजौ दैखुबा तुऐं मुं कैईंदु किछै ना पूछदै। हांव तुऔं कैंई साचौ-साचौ बुलू, जै तुऐं पिता पौरमेशवर कैईंदु किछै मांगलै, तौ सै मैरै चैलै हौणौ की बौजैह शै तुऔं दैन्दा।

²⁴ इबी तौड़ी तुऐं मैरै चैलै हौणौ की बौजैह शै पिता पौरमेशवर शै किछै ना मांगै रैई, मांगलै तौ सै तुऔं दैला, ताकि तुऔं पूरै खोशे भैटौ।”

दुनिया पांदी जीत

²⁵ “मोऐं ऐजी बातौ तुऔं उदारणो दी बौल़ै रैई, पौरौ सैजा सौमय आए गौआ, कै हांव तुऔं खै उदारणो दौ हौजौ ना बौलदा, पौरौ खौलेयौ तुऔं पिता पौरमेशवर कै बारै मुंजी बोताऊंबा।

²⁶ तैसी सौमय तुऐं मैरै चैलै हौणौ की बौजैह शै मांगलै, तौ मुखै तुऔं कारिए पिता पौरमेशवर शै बिन्ती ना कौरणी पौड़दै।

²⁷ जिथुकै पिता पौरमेशवर तौ आपी बै तुऔं आरी प्यार राखौ, इथकारिए कै तुऐं मुंआरी प्यार राख राए औरौ ऐजा बै बिशवाश कौरे राए कै हांव पिता पौरमेशवर की ढौबौशा आए रौआ।

²⁸ हांव पिता पौरमेशवर कै ढौबौशा दुनिया दा आए रौआ, हौजौ दुनिया कै छोड़ेयौ पिता पौरमेशवर कै धोरे पाछु जांदा लागै रौआ।”

²⁹ यीशु कै चैलै बौल़ौ, “दैख, ऐबै तौ तू खौलेयौ कै बौल़ैए, औरौ कुणजैई उदारणो दौ ना बौल़ै।

³⁰ ऐबै आमै जाणै गौवै, कै तू सौबै ठुँ जाणै, औरौ ताखै कोसी कै जौरुरत ना आथी कै कुणिए तुंआदै सवाल पूछौ, इथकारिए आमुए बिशवाश कौरु, कै तू पौरमेशवर की ढौबौशा आए रौआ।”

³¹ ऐजौ शोणेयो यीशुए तिनुखै बौल़ौ, “का तुऐं ऐबै बिशवाश कौरौ?

³² दैखौ, सैजा सौमय आए रौआ बल्कि आए बै गौआ जोबै तुऐं सौबै तितर बितर हौयौ कै आपणा आपणा रास्ता लौन्दै, औरौ मुखै इकली छोड़े दैन्‍दै, तोबै बै हांव इकली ना आथी जिथुकै पिता पौरमेशवर मैरै साथै औसौ।

³³ मोऐं ऐजी बातौ तुऔं इथकारिए बुली, कै तुऐं मैरै चैलै औसौ औरौ तुऔं शान्तै भैटौ; दुनिया पांदी तुऔं कौल़ेश हौंव, पौरौ हिम्मत राखौ, मोऐं इयौं दुनिया कै ठोगड़े यानी शैतान कै हराए दिया।”