यूहन्ना 13 - सिरमौरी नौवाँ नियम

प्रभु कै बोइदोउत

¹ ऐजौ ऐबै फसह कै तैयारो शै आगै को दूस थियु। औरौ यीशु जाणौ थिया, कै मैरा सैजा सौमय आए गौआ कै दुनिया छोड़ेयौ पिता पौरमेशवर कै धोरे पाछु जोऊं। पौरौ सै आपणै चैलै आरी प्यार कौरौ थिया जू दुनिया पांदी थिए। सै तिनु शै हद शै जादा प्यार कौरौ थिया औरौ आखरी तौड़ी यीशुए तिनुआरी ऐशणाई प्यार कौरा।

² यीशुए औरौ तैसकै चैलै बेयाल़ी खाए लोए थै। शैतानै आगैई यीशु कै धौखा दैणौ कारिए शमौन कै बैटै यहूदा इस्‍करियोती कै मनो कै उकसाए राए थिया।

³ यीशु ऐजौ जाणौ थिया कै पिता पौरमेशवरे तैसी सारी चीज़ौ पांदी औधिकार दैय राए औरौ हांव पौरमेशवर कै धोरे दा आए रौआ, औरौ पौरमेश्‍वर कै धोरे पाछु जांदा लागै रौआ।

⁴ इथकारिए यीशु खाणौ पौरैशा बिज़यो आपणा लोइया खोले दिया, औरौ तौलिया लोयो आपणै कमर बानै।

यीशुए चैलै कै लात धूएँ

⁵ तोबै बासणौ दौ पाणी भोरेयो चैलै कै लात धोंदा लागा औरौ जैसी तौलिऐ लैई तैणै कमर बानै राए थै तिथी लैई घुशदा लागा।

⁶ जोबै सै शमौन पतरस कै धोरे ओऊवा तोबै तैणै तैसी बौल़ौ, “ओए रै प्रभु, का तू मैरै लात धोंदा?”

⁷ यीशुए तैसीखै जोवाब दिया, “जू हांव कौरु, तू इबी इथका मतलब ना सौमझै, पौरौ तिथकै बाद सोमझदा।”

⁸ पतरसे तैसीखै बौल़ौ, “तू मैरै लात कौलोंई ना धोए पांदा!” ऐजौ शोणेयो यीशुए तैसी बौल़ौ, “जै हांव तैरै लात ना धुं, तौ मैरा तैरै साथै कुणजाई रिशता ना हौंदा।”

⁹ शमौन पतरसे तैसीखै बौल़ौ, “ओए रै प्रभु तौ तू मैरै लात ही नी पौरौ हाथ बै औरौ मुंड बै धोए दै।”

¹⁰ यीशुए तैसीखै बौल़ौ, “ऐक आदमी जू नाहै गौआ तैसी सिरफ आपणै लातो कै धोणो कै जौरुरत औसौ; तैसका पूरा शोरीर साफ औसौ। औरौ तुऐं सौबै शुध्द औसौ, सिरफ ऐकी कै छोड़ेयौ।”

¹¹ यीशु आपणै थोमाणोवाल़ै कै जाणौ थिया इथकारिए तैणै बौल़ौ, “कै तुऐं सौबै शुध्द औसौ, सिरफ ऐकी कै छोड़ेयौ।”

लात धोणो का मतलब

¹² जोबै यीशुए आपणै चैलै कै लात धोए पाए औरौ आपणै लोइया बाम्बेबा बौठै गौआ, औरौ तिनुकै बौलदा लागा, “का तुऐं सौमझै गौवै कै मोऐं तोंवारै साथै का कौरौ?

¹³ तुऐं मुखै गुरु, औरौ प्रभु बौल़ौ, ठीक ही बौल़ौ, जिथुकै हांव तोंवारा गुरु औरौ प्रभु औसौ।

¹⁴ जै मोऐं प्रभु औरौ गुरु जाणैयौ तोंवारै लात धोवे, तौ तुऔं बै आपी कै शरीफ बाणैयौ ऐकी दूजै कै लात धोणे चैंई।

¹⁵ जिथुकै मोऐं तुऔं उदारण दिखाए दिया, कै जैशै मोऐं तोंवारै साथै कियु, तुऐं बै ऐशैखैई कौरौ।

¹⁶ हांव तुऔं कै साचौ-साचौ बुलू, नोकर आपणै मालिक दा बौड़ा ना आथी; औरौ ना सौंदेश लोयो भेजेयोंदा चैला आपणै भेजणोवाल़ो शै बौड़ा ना हौंव।

¹⁷ तुऐं ऐबै इनु बातौ कै जाणौए, औरौ जै तुऐं तिनु पांदी चालौ, तौ धन्‍य औसौ।

¹⁸ हांव तोंवारै बारै मुंजी किछै ना बुलू: जिनु मोऐं चोणे राए, तिनु हांव जाणुए। पौरौ ऐजौ इथकारिए हौंव ताकि पवित्र शास्त्र दो जू लैखै राए सैजौ पूरु हौंव, ‘जियौं थाली दो खाणौ खोऊ तियौं थाली कै बीनै।’

¹⁹ ऐबै हांव तुऔं खै तिथकै हौणौ दै औगौड़ियौई तुऔं बौताए दियु कै जोबै ऐजौ हौए जालो तौ तुऐं बिशवाश कौरलै कै हांव मसीहा औसौ।

²⁰ हांव तुऔं कैंई साचौ-साचौ बुलू, जू कुणिए बै मैरै छाड़ैयोंदे कै औपनांव, सै मुखै औपनांव; औरौ जू कुणिए मुखै औपनांव, सै मैरै भैजणौवाल़ै पौरमेशवर कै अपनांव।”

धोकैबाज कै ढौबौ इशारा

²¹ ऐजी बातौ बौलणौ कै बाद, यीशु बैजाए घबराए गौआ औरौ आपणै चैलै कै बौल़ौ, “हांव तुऔं कैंई साचौ-साचौ बुलू कै तुऔं मुंजीदा ऐक मुखै थोम्बाला।”

²² चैलै ऐजा शक कौरेयौ, कै यीशुए ऐबै कोसके बारै मुंजी बौल़ौ, ऐकी दूजै कै दैखदै लागै।

²³ तैसकै चैलै मुंजीदा ऐक जैसीआरी यीशु बैजाए प्यार राखौ थिया, यीशु कै पोशो दा बौठै रौआ थिया।

²⁴ शमौन पतरसे तैसकै चैलै कै ढौबौ इशारे कौरेयौ पूछु, “बौता, ऐणै कोसके बारै मुंजी बौल़ै लो?”

²⁵ तोबै तैणै तैशैकैई यीशु कै नेड़िक जाएयो पूछु, “ओए रै प्रभु सैजा कुण औसौ?” यीशुए जवाब दिया, “जैसी हांव रोटी का टुकड़ा तरी मुंजी डुबोयो दियु, सैजाई औसौ।”

²⁶ औरौ यीशुए रोटी का टुकड़ा तरी मुंजी डुबोयो शमौन कै बैटै यहूदा इस्‍करियोती कै दिया।

²⁷ यहूदाए रोटी का टुकड़ा लोणो कै बाद, यीशुए तैसीकै बौल़ौ, “जू तू कौरणौवाल़ा औसौ, सैजौ तावल़ो कौर।” तैसी सौमय शैतान तैसीदा सोमाए गौआ।

²⁸ पौरौ बौठणौवाल़ै मुंजीदै कुणिए ना जाणी कै यीशुए ऐजै बात तैसकै ऐशैखै किथु बौल़ै।

²⁹ यहूदा इस्‍करियोती कैंई पौयसै कै थोली रौंव थी, इथकारिए कुणिए-कुणिए ऐजौ सौमझौ, कै यीशुए तैसीकै बौल़ै लो, कै जू किछै आमु तैयारो कारिए चैंई सैजौ मोलै लो या ऐजौ कै कंगालो कै किछै दै।

³⁰ रोटी का टुकड़ा खाणौ कै बाद यहूदा तौलोंई बायरै हौटै गौआ औरौ ऐजा राती का सौमय थिया।

ऐक नोऐं आज्ञा

³¹ जोबै यहूदा बायरै हौटै गौआ तोबै यीशुए बौल़ौ, “ऐबै मुं आदमी कै बैटै की महिमा तैसकै हौंव, औरौ ऐजौ प्रगट हौंव कै पौरमेशवर कैतरा महान औसौ।

³² औरौ पौरमेशवर आपणै बैटै कै महिमा कौरदा, औरौ सै तावल़ै कौरदा।

³³ ओए रै साथियो, हांव हौजौ दैणिक देर तौड़ी तोंवारै धोरे औसौ: हौजौ तुऐं मुखै जौले औरौ जैशै मोऐं यहूदी नेताओं कै बौल़ौ, ‘जिथै हांव जोऊं तिथै तुऐं ना आए सौकौ,’ तैशैकैई ऐबै हांव तुऔं खै बुलू।

³⁴ हांव तुऔं ऐक बौड़ै आज्ञा दियु, कै ऐकी दुजैआरी प्यार राखैया। ऐशैखैई जैशै मोऐं तुऔं आरी प्यार राखा, तैशैकैई तुऐं बै ऐकी दुजैआरी प्यार कौरेया।

³⁵ जै तुऐं ऐकी दुजैआरी प्यार राखलै तौ सौबै लोग जाणदै कै तुऐं मैरै चैलै औसौ।”

यीशुए पतरस कै भाजणौ कै हौणौवाल़ी बात बौताए

³⁶ शमौन पतरसे तैसी बौल़ौ, “ओए रै प्रभु तू कुकै चालै रौआ?” यीशुए बौल़ौ, “जिथै हांव जोऊं तिथै तू मैरै पौछौड़ियौ कौलोंई ना आए सौकै; पौरौ इथकै बाद मैरै पौछौड़ियौ आईला।”

³⁷ पतरसे तैसीखै बौल़ौ, “ओए रै प्रभु, इबी हांव तैरै पौछौड़ियौ काए ना आए सौकु? हांव तौ तांव कारिए मौरणौ कै बै तैयार औसौ।”

³⁸ यीशुए जोवाब दिया, “का तू मुं कारिए मौरदा? हांव तुऔं कै साचौ-साचौ बुलू, कै ऐलोई रातै कै कुकड़ै कै बांक दैणौ दै औगौड़ियौ तू तीन बैई मुखै भाजै जाला, कै तू मुखै ना जाणै!”