यूहन्ना 12 - सिरमौरी नौवाँ नियम

बैतनिय्‍याह गांव दा यीशु का आदर

¹ हौजौ यीशु फसह कै तैयार दा छौ दूस औगौड़ियौ बैतनिय्‍याह गांव दा ओऊवा; जिथै तैणै लाजर खै मौरेयौंदे मुंजीदा जियुंदी कौरे राए थिया।

² तिथै तिनुऐ तैसी कारिए दावत तैयार कौरे; औरौ यीशु का आदर कौरणौ कारिए मार्थाए सेवा कौरे लोए थै, औरौ लाजर यीशु कै साथै दावत खाणौ वाल़ौ मुंजीदा ऐक थिया।

³ तोबै मरियमे जटामांसी कौ आधै लीटर कै लमसम मोहगौं इत्र लोयो खै यीशु कै लातो पांदी मौल़ौ, औरौ आपणै बाल़ो लैई तैसकै लातो कै गुशै; औरौ इत्र कै खुशबू लैई घोर खुशबूदार हौए गौ।

⁴ पौरौ तैसकै चैलै मुंजीदा यहूदा इस्‍करियोती नांव का ऐक चैला जू तैसीखै थोमाणौवाल़ा थिया, बौलदा लागा,

⁵ “ऐजौ इत्र तीन सौ दूसौ कै धियाड़ी कै दाम कै बोराबर औसौ, इथु बिकैयो कंगालो खै बांडै जाए सौकौ थियु?”

⁶ तैणै ऐजै बात इथकारिए ना बुली कै तैसीखै कंगालो कै परवाह थी, पौरौ इथकारिए कै सै चोर थिया, औरौ तैसीकैईं तिनकी पौयसै की थोली थी औरौ तिंदु जू किछै पांव थिए, सै तिथु उंडु घाड़ो थिया।

⁷ यीशुए बौल़ौ, “इयैं सौमय शै आगैई मैरै दफनाणो की तैयारी कारिए कौरे लो।”

⁸ जिथुकै कंगाल तौ तोंवारै साथै सौदा रौंदै, पौरौ हांव तोंवारै साथै सौदा ना रौंदा।

लाजर कै मारै दैणौ का फोयसला

⁹ जोबै यहूदी लोगै शुणु कै यीशु तिथै औसौ, तोबै लोगौ कै बौड़ी भीड़ तिथै आए। सै सिरफ यीशु कै दैखणौ कारिए ना आए रैई थी, पौरौ लाजर कै बै दैखदै आए रौवै थिए, जैसी तैणै मौरेयौंदे मुंजीदा जियुंदी कौरे राए थिया।

¹⁰ तोबै मुख्य यहूदी पुरोहिते लाजर कै मारणौ का षडयंत्र रौचा।

¹¹ जिथुकै लाजर की बौजैह शै बौहितै लोग तिनुकै भाजदे लागै, औरौ तिनुऐ यीशु पांदी बिशवाश कौरा।

यीशु का यरूशलेम शहर दा जौरदार स्वागत

¹² ओकी दूसै बौहितै लोगै जू फसह कै तैयारो मुंजी आए रौवै थिए, ऐजौ शुणु, कै यीशु यरूशलेम शहर दा आन्दा लागै रौआ।

¹³ तिनुऐ खजूरो की डाल़ी कौरी, औरौ तैसी भैटिंदै हौटै, औरौ जोर शै लैरौ मारेयों बौल़ौ, “पौरमेशवर कै बौड़ाए हौंव! धन्‍य औसौ इस्राएल देश का राजा, जू प्रभु कै औधिकार शै आंव।”

¹⁴ जैशैकैई यीशु यरूशलेम शहर दा ओऊवा, तिथै तैसी ऐक गाधडू भैटा, औरौ सै तिथपांदी बौठै गौआ। जैशै पवित्र शास्त्र दो लैखै राए,

¹⁵ “ओए रै यरूशलेम शहर कै लोगौ, डौरेया नै; दैख, तैरा राजा गाधडू पांदी बोठेयो आन्‍दा लागै रौआ।”

¹⁶ यीशु कै चैलै ऐजी बातौ आगै ना सौमझै रैई थी; पौरौ जोबै यीशु की महिमा प्रकट हौए, तौ तिनकै याद ओऊ कै जू किछै बै यीशु कै साथै हौंव सैजौ ठीक तैशैकैई ही थियु जू पवित्र शास्त्र दो लैखै राए थियु।

¹⁷ तोबै भीड़ कै लोगै जू तैसी सौमय तैसीआरी थिए, ओकी लोगौ कै बौलदै लागै कै तैणै लाजर कै कब्र पौरैशा बौएदैयौ मौरेयौंदे मुंजीदा जियुंदी कौरे राए थिया।

¹⁸ इयौं बौजैह शै बौहितै लोग यीशु शै भैटिंदै ओऊवे, जिथुकै तिनुऐ ऐसी चौमत्कार कै बारै मुंजी शौणै राए थियु।

¹⁹ तोबै फरीसी लोगै आपी मुंजी बौल़ौ, “दैखौ आमै किछै ना कौरे सौकु, औरौ पूरी दुनिया कै लोग ऐसकै पौछौड़ियौ चालै रौवै।”

यीशु औरौ यूनानी

²⁰ तिथै कुणिए यूनानी देश कै लोग थिए, जू फसह कै तैयारो कै सौमय आराधना कौरणौ कारिए यरूशलेम शहर दै आए रौवै थिए।

²¹ तिनुऐ गलील जिले कै बैतसैदा शहर कै रौणौवाल़ै फिलिप्‍पुस कै धोरे आयौ खै बिन्ती कौरे, “साहब जी आमुए यीशु आरी भैटिणौ चोऊं।”

²² फिलिप्पुसे आयौ खै अन्द्रियास खै बौल़ौ, तोबै अन्द्रियास औरौ फिलिप्‍पुस जायौ खै यीशु कै बौल़ौ।

²³ इथपांदी यीशुए तिनुखै बौल़ौ, “कै सैजा सौमय आए गौआ, कै मुं आदमी कै बैटै कै महिमा हौंव।”

²⁴ हांव तुऔं कैंई साचौ-साचौ बुलू, कै जांव तौड़ी गियुँ का गुलटा माटियो मुंजी पौड़ेयौ मौरे ना जांव तांव तौड़ी सै इकली रौंव पौरौ जोबै मौरे जांव तोबै बौहिता फोल़ लांव।

²⁵ जू आपणी जिन्दगी कै प्यारे जाणौ, सैजै तियौं गवांए दैंदै, जू इयौं धोरती पांदी आपणै जिन्दगी कै प्यार नै कौरला सै आपणी जिन्दगी कै सौदा कै जिन्दगी तौड़ी बौचायौ राखदा।

²⁶ जै कुणिए मैरी सेवा कौरणै चांव, तौ आगै तैसी मैरा चैला बौणणौ चैंई, औरौ जिथै हांव औसौ तिथै मैरा सेवक बै हौला; औरौ जू कुणिए मैरी सेवा कौरला तौ पिता पौरमेशवर बै तैसकै इज्जत कौरदा।

आपणै मौत कै बारै मुंजी भविष्यवाणी

²⁷ “ऐबै मैरा जी घबराए रौआ कै ऐबै हांव का बुलू ‘ओए रै पिता मुखै इयौं पीड़ो कै सौमय दा बौचा?’ पौरौ ना, जिथुकै दुख सैहणौ औरौ मौरणौ कारिए हांव इयौं दुनिया दा आए रौआ।

²⁸ ओए रै पिता, प्रगट कौर कै तू कैतरा महान औसौ।” तोबै स्वर्ग पौरैशी ऐक ऐशणी आवाज़ आए कै, “मोऐं प्रकट कौरे राए कै हांव कैतरा महान औसौ, औरौ हांव इयौं बातौ कै होटेयो प्रकट कौरदा।”

²⁹ तोबै जू लोग खौड़ै हौयौ खै धाव शुणदै लागै रौवै थिए, तिनुऐ बौल़ौ; कै ऐजौ बादल़ौ कौ गुड़कौणो थियु। ओकी लोगै बौल़ौ, “कुणजाई स्‍वर्गदूत तैसीआरी बौल़ौऊवा।”

³⁰ इथपांदी यीशुए बौल़ौ, “ऐजै धाव तोंवारै फायदै कारिए थी, मुं कारिए नै।

³¹ दुनिया दै लोगौ का न्याय कौरणौ कारिए पौरमेशवर का सौमय ऐबै आए रौआ, औरौ इयौं दुनिया का ठोगड़ा शैतान गाड़ै दिया जांदा।

³² औरौ हांव इयौं धरती पांदी दा ऊंचे पांदी चौढ़ाए जांदा, औरौ सौबी खै आपणै धोरे लांदा।”

³³ ऐशै बौलेयौ तैणै ऐजौ प्रकट कौर दियु, कै सै कैशैकै मौरणौवाल़ा थिया।

³⁴ तिथपांदी लोग बौलदै लागै, “कै आमुए पवित्र शास्त्र दै ऐजी बातौ शुणी, कै मसीह सौदा जियुंदी रौंदा, तौ तुऐं काए बौल़ौ, कै आदमी कै बैटै कै ऊंचे पांदी चौढ़ाए जाणा जौरुरी औसौ? ऐ‍‍‍‍‍जा आदमी का बैटा कुण औसौ।

³⁵ यीशुए बौल़ौ, कै पेयाशो (यीशु) ऐबै दैणिक ही सौमय तौड़ी तोंवारै बीच मुंजी औसौ, जांव तौड़ी पेयाशो तोंवारै साथै औसौ तांव तौड़ी हांडदै रौव; ऐशै नी हौंव कै इनारौ तुऔं खै हिशोए दैंव; जू इनारै दा हांडो सै ना जाणौ कै कुकै हांडै रौआ।

³⁶ जांव तौड़ी पेयाशो तोंवारै साथै औसौ, पेयाशै पांदी भोरोशा राखौ कै तुऐं पेयाशै कै सन्‍तान बौणौ।” ऐजी बातौ बौलेयौ कै यीशु तिथैदा आगु हौटा औरौ तिनुवांदा दूर रौआ।

हौणौवाल़ी बातौ कौ पूरु हौणौ

³⁷ तोबै यीशुए तिनकै सामणै ऐतरै चौमत्कार कै काम दिखाए, तोबै बै तिनुऐ तैसी पांदी बिशवाश ना कौरी;

³⁸ ऐजौ इथकारिए हौं ताकि यशायाह पौरमेशवर कै बातौ बौताणौवाल़ै जू बौल़ै राए थियु सैजौ साचौ हौए जांव। तैणै बौल़ौ: “ओए रै प्रभु, ओए रै प्रभु, कोसीए बै अमारै सौंदेश पांदी बिशवाश ना कौरी, औरौ कुणिए ना सौमझौ कै ऐजै तैरै शौकतीशाली ताकत थी।”

³⁹ इयौं बौजैह शै सैजै बिशवाश ना कौर सौकी, जिथुकै यशायाहै दुजाल़ियो ऐजौ बै बौल़ौ:

⁴⁰ “तैणै तिनकी आखी आन्धी कौरी दी ताकि सै दैखै नी सौकौ, औरौ तिनकै दिमाक बंद कौरे दिए ताकि सै सौमझी नी सौकौ। नही तौ सै मैरी ढौबौ फिरी जांदै औरौ हांव तिनु ठीक कौरे दैंदा।”

⁴¹ यशायाहै ऐजी बातौ इथकारिए बुली, कै तैणै यीशु कै महिमा सौमय दी आगै दैखै; औरौ तैसकै बारै मुंजी बातौ कौरी।

⁴² तोबै बै यहूदी नेताओं मुंजीदै बौहितै तैसी पांदी बिशवाश कौरा, पौरौ फरीसी लोगौ की बौजैह शै सै खौलेयौ तैसी नी मानौ थिए, तिनु इयौं बातौ का डौर थिया कै तिनु यहूदी सभा-घोरो शै बायरै ना गाड़ै दैंव।

⁴³ जिथुकै तिनुकै पौरमेशवर कै तारीफ शै आदमी कै तारीफ जादा प्यारे लागै।

पेयाशै दौ हांडणौ

⁴⁴ यीशुए भीड़ कै लोगौआरी जोर शै बौल़ौ, “जू मुं पांदी भोरोशा कौरौ, सै मुं पांदी नै पौरौ मैरै भैजणौवाल़ै पौरमेशवर पांदी बिशवाश कौरौ।

⁴⁵ औरौ जू कुणिए मुखै दैखौ, सै मैरै भैजणौवाल़ै पौरमेशवर कै दैखौ।

⁴⁶ हांव दुनिया कै लोगौ कारिए पेयाशै कै जैशणा आए रौआ, ताकि जू कुणिए मुं पांदी बिशवाश कौरौ, सै इनारै दै नी रौंव।

⁴⁷ जै कुणिए मैरी बातौ शोणेयो खै तिनुकै ना मानौ, तौ हांव तैसी दोषी ना ठैहरोऊं। जिथुकै हांव दुनिया कै लोगौ कै दोषी ठोहराणो कारिए ना ऐई, पौरौ तिनु बौचांदा आए रौआ।

⁴⁸ जू मुखै बैकार सौमझौ, औरौ मैरी बातौ ना शुणौ तैसका न्याय कौरणौवाल़ा ऐक औसौ: यानी जू बातौ मोऐं बौल़ै रैई, सै तैसीकै न्याय कै दूसै दोषी ठोहरांदी।

⁴⁹ जिथुकै मोऐं खुद आपणै औधिकार शै आपणी औरौ शी बातौ ना कौरी, पौरौ पिता पौरमेशवरे जैणै मुखै भैजै राए तैणैई मुखै आज्ञा दैय राए, कै का-का बौतौऊं, औरौ का-का सौमझौऊं।

⁵⁰ औरौ हांव जाणुए कै तैसकै आज्ञा कै मानणै सौदा कै जिन्दगी कै ढौबौ लोए जांव इथकारिए हांव तुऔं सैजौई बौतौऊं, जू पिता पौरमेशवर मुंकैई बौल़ौ।”