यूहन्ना 11 - सिरमौरी नौवाँ नियम

लाजर कै मौत

¹ बैतनिय्‍याह गांव दा लाजर नांव का ऐक आदमी बीमार थिया। मरियम औरौ मार्था तैसकै दीदी थै।

² ऐजै सैजै मरियम थी जियैं बाद मै प्रभु कै लातो पांदी इत्र रितायौ खै तैसकै लातो खै आपणै बाल़ो लैई गौशै राए थिए, तियौंका भाई लाजर बीमार थिया।

³ तोबै तैसकै दीदीए तैसीकै बैवरा दिया, “ओए रै प्रभु दैख जैसीखै तू प्यार कौरे सै बीमार औसौ।”

⁴ ऐजौ शोणेयो खै यीशुए बौल़ौ, “इयौं बीमारी का अन्त मौत ना आथी पौरौ पौरमेशवर कै महिमा कारिए औसौ, कै ऐसकै दवारा मुं पौरमेशवर कै बैटै कै महिमा हौंव।”

⁵ यीशु मार्था औरौ तियौंकै बोईणी आरी औरौ लाजर आरी प्यार राखौ थिया।

⁶ पौरौ जोबै तैणै शुणौ कै लाजर बीमार औसौ, तौ जैसी जौगैह पांदी सै थिया, तिथै दो दूस हौजौ रौकै गौआ।

⁷ दु दूसौ कै बाद यीशुए आपणै चैलै खै बौल़ौ, “आव, आमै यहूदिया प्रदेश कै ऐकी बैतनिय्‍याह गांव कै जोऊंबे।”

⁸ चैलै तैसीखै बौल़ौ, “ओए रै गुरुजी, इबी तौ यहूदी नेता ताखै पाथरो लैई मार दैणा चांव थिए, औरौ का तू हौजौ बै तिथै जाणौ चांए?”

⁹ यीशुए जवाब दिया, “का दूसौ कै बारौ घांटे ना हौंव? जै कुणिए दूसौ कै हांडो तौ ठोकर ना खांव, जिथुखै इयौं दुनिया कौ पेयाशो मतलब सुरज कै दैखौए।

¹⁰ पौरौ जै कुणिए रातै हांडो तौ ठोकर खांव, जिथुखै तैसीकैईं पेयाशो ना आथी।”

¹¹ तैणै ऐजी बातौ बुली, औरौ तिथकै बाद तिनुखै बौलदा लागा, “अमारा दोस्त लाजर सोतै गौआ, पौरौ हांव तैसी बिजाल़दा जांदा लागै रौआ।”

¹² तोबै चैलै तैसीखै बौल़ौ, “ओए रै प्रभु, जै सै सोतै गौआ तौ सै ठीक हौए जांदा।”

¹³ यीशुए ऐजै बात तैसकै मौत कै बारै मुंजी बौल़ै लोऐ थै। पौरौ तिनुऐ सौमझौ कै तैणै नींदो मुंजी सोतै जाणौ कै बारै मुंजी बौल़ै लो।

¹⁴ तोबै यीशुए तिनुखै साफ बौल़ै दियु, “लाजर मौरे गौआ।

¹⁵ औरौ मुखै खुशी औसौ कै हांव तैसकै साथै नी थी। ऐजौ तोंवारै फायदै कारिए थियु। जिथलैई तुऐं बिशवाश कौरौ। पौरौ ऐबै आव, आमै तैसकै धोरे जोऊंबे।”

¹⁶ तोबै थोमाऐ जैसी दिदुमुस बै बौल़ौए, आपणै साथौ कै चैलै कै बौल़ौ, “आव आमै बै तैसकै साथै मौरणौ कै जोऊंबे।”

यीशु ही मौरेयो जियुंदा हौणा औरौ जिन्दगी औसौ

¹⁷ जोबै यीशु बैतनिय्‍याह गांव दा ओऊवा, औरौ तैसीकै पौता चाला कै चार दूस आगै ही लाजर कै दबाए राए थिया।

¹⁸ बैतनिय्‍याह गांव यरूशलेम शहर कै नेड़िक किछै तीन किलोमीटर शै कम की दूरी पांदी थिया।

¹⁹ औरौ भौरिशै यहूदी लोग मार्था औरौ मरियम खै धोरे तियौंखै भाई कै मौत कै बारै मुंजी ढेट दैणौ कारिए आए रौवै थिए।

²⁰ जोबै मार्थाए यीशु कै आणौ का समाचार शुणा तौ तैसीखै भैटिणौ कारिए हौटै गौए, पौरौ मरियम घोरी बोठेयोंदै रौए।

²¹ मार्थाए यीशु खै बौल़ौ, “ओए रै, प्रभु जै तू इथै हौंदा तौ मैरै भाई कै मौत नी हौंदी।

²² पौरौ ऐबै बै हांव जाणुए, कै जू किछै तू पौरमेशवर कैईंदु मांगल़ा पौरमेशवर ताखै दैन्दाए।”

²³ यीशुए तियौंखै बौल़ौ, “तैरा भाई हौजौ जियुंदी हौंदा।”

²⁴ मार्थाए तैसी बौल़ौ, “हांव जाणुए, कै न्याय कै दूसै जोबै सौबवे मौरेयौंदे मुंजीदै जियुंदी हौए जालै, तैसी दूसै लाजर बै होटेयो जियुंदी हौए जांदा।”

²⁵ यीशुए तियौंखै बौल़ौ, “हांव सैजा औसौ जू मौरेयौंदे लोगौ कै जिन्दगी दै पाछु लोऊ, औरौ हांव जीवन औसौ। इथकारिए जू कुणिए मुं पांदी बिशवाश कौरौ, जै सै मौरे बै जाला, तौ बै जियुंदी रौंदा।

²⁶ औरौ जू मुं पांदी बिशवाश कौरेयौ जियुंदै औसौ, सै सौदा काल़ तौड़ी ना मौरदै। का तू इयौं बातौ पांदी बिशवाश कौरे?”

²⁷ मार्थाए तैसीखै बौल़ौ, “हां ओए रै प्रभु, हांव बिशवाश कौरु, कै पौरमेशवर का बैटा मसीह जू दुनिया पांदी आणौवाल़ा थिया, सै तू ही औसौ।”

लाजर कै जिंदा कौरणा

²⁸ ऐजौ बौलेयौ खै मार्था आपणै घोरे हौटै गौए, औरौ आपणै बोईण मरियम खै चुपकै शै बौएदैयौ बौल़ौ, “गुरु इथी औसौ, औरौ ताखै बौएदै लोए।”

²⁹ ऐजौ शोणेयो मरियम तावल़ी बिज़यो यीशु कै धोरे हौटै।

³⁰ यीशु इबी गांव दा बायरै थिया, औरौ तियौं जौगैह पांदी थिया जिथै मार्था तैसी भैटी रौए थै।

³¹ तोबै जू यहूदी लोग मरियम कै साथै घोरे थिए, औरौ तियौं ढेट दैय लोए थी। जोबै तिनुऐ ऐजौ दैखौ कै मरियम तावल़ै ऊबै बिज़यो बायरै जांदै लागै रौए तौ तिनुऐ ऐजौ जाणौ कै सै कब्रो पांदी रुंदै हौटै, औरौ तियौंकै पाछैदै हौटै गौवै।

³² जोबै मरियम तिथै पौंचै जिथै यीशु थिया तौ तैसी दैखैयो कै ही सै यीशु कै लातो पांदी पौड़ेयौ कै बौलदै लागै, “ओए रै प्रभु, जै तू इथै हौंदा तौ मैरा भाई नी मौरदा।”

³³ जोबै यीशुए मरियम कै औरौ तिनु यहूदी लोगौ खै जू तियौंकै साथै आए रौवै थिए दैखै। तैणै शुशकार भोरै, औरौ बौड़ै दुख कै साथै तिनुवांदो पूछु,

³⁴ “तुऐं तैसी कुकै दबाए राए?” तिनुऐ तैसी बौल़ौ, “ओए रै प्रभु, चालैयौ खै दैख पा।”

³⁵ यीशु आशु बोवायो रुवा।

³⁶ तोबै यहूदी लोग बौलदै लागै, “दैखौ यीशु लाजर खै कैतरा प्यार कौरौ थिया।”

³⁷ पौरौ तिनुमुंजी दै किछै लोगै बौल़ौ, “ऐणै तौ तैसी आन्धै आदमी की आखी ठीक कौरी, ऐजा लाजर कै मौरणौ शै बौचाए सौकौ थिया?”

³⁸ यीशुए हौजौ शुशकार भोरै, औरौ बौड़ै दुख कै साथै कब्र पांदी ओऊवा, सैजै क्रब ऐक औड़ार थियु, औरौ जिथकै दवारो पांदी ऐक पाथर राखै राए थिया।

³⁹ यीशुए बौल़ौ, “पाथर कै ऊबा टिपो।” लाजर कै बोईण मार्था यीशु खै बौलदै लागै, “ओए रै प्रभु, ऐसी पौरैशै ऐबै तौ बुरै बांस आए रौए, जिथुखै ऐसी मोरयों खै चार दूस हौए गौवै।”

⁴⁰ यीशुए तियौंखै बौल़ौ, “का मोऐं ताखै ना बुली थी कै जै तू बिशवाश कौरलै तौ तू पौरमेशवर कै महिमा कै दैखली।”

⁴¹ तोबै तिनुऐ सैजा पाथर होटोऊवा, यीशुए स्वर्ग कै ढौबौ दैखैयो बौल़ौ, “ओए रै पिता, हांव तैरा धन्यवाद कौरु कै तू मैरै शौणै पाए।

⁴² औरौ हांव जाणुए कै तू सौदा मैरी शुणैए, पौरौ जू भीड़ आंडे-पांढे मैरै धोरे खौड़ै औसौ, तिनकी बौजैह शै मोऐं ऐजौ बौल़ौ, जिथलैई सै बिशवाश कौरौ, कै तुऐं मुखै भैजै राए।”

⁴³ ऐजौ बौलेयौ खै तैणै बौड़ै जोर शै धाव दै, “ओए रै लाजर, बांईडा आ!”

⁴⁴ लाजर जू मौरे गौआ थिया, सै कोफनी लैई हाथ लात बानेयोंदे बायरै आया औरौ तैसकौ मुँह खोटणो लैई लोपेटियोंदो थियु। यीशुए तिनुखै बौल़ौ, “ऐसकै कोफनी कै खोटणो खोले दैव औरौ ऐसी जाणौ दैव।”

यीशु कै खिलाफ साजिश

⁴⁵ तोबै जू यहूदी लोग मरियम कै साथै आए रौवै थिए, औरौ तिनुऐ यीशु का ऐजा काम दैखा, औरौ तिनुमुंजी बौहितै लोगै यीशु पांदी बिशवाश कौरा।

⁴⁶ पौरौ तिनुमुंजी दै किछै यहूदी लोगै फरीसी लोगौ कै धोरे जायौ खै यीशु कै ऐसी काम कै बारै मुंजी बौतौऊ।

⁴⁷ इयौं बातौ पांदी मुख्य यहूदी पुरोहिते औरौ फरीसी लोगै महासभा कै लोगौ कै कौठै कौरेयौ बौल़ौ, “आमै का कौरु? ऐजा आदमी तौ बौहितै चौमत्कार कै काम दिखांव।

⁴⁸ जै आमै ऐसी इबी नी रुकु, तौ सौबवे आदमी ऐसी पांदी बिशवाश कौरदै कै सै मसीह औसौ औरौ रोम देश की सैना आयौ खै अमारै मन्दिर औरौ अमारै लोगौ कै नाश कौरे दैंदै।”

⁴⁹ तोबै तिनु मुंजीदा कैफा नांव का ऐक आदमी जू यहूदी सभा कै सदस्य मुंजीदा ऐक थिया, औरौ तियौं सालो का महायहूदी पुरोहित थिया, तिनुखै बौल़ौ, “तुऐं किछै बै ना जाणौ।

⁵⁰ औरौ ऐजौ बै ना सौमझौ, कै तुऔं कारिए ऐजौ ठीक औसौ कै सारै लोगौ कारिए सिरफ ऐक आदमी मोरो औरौ अमारै सौबै लोग नाश नी हौंव।”

⁵¹ ऐजै बात तैणै आपी खै ना बुली, पौरौ तियौं सालो का महायहूदी पुरोहित कै भैषो दै तैणै ऐजै पौरमेशवर कै ढौबौशै बातौ बौतैई, कै यीशु पूरै इस्राएल देश कारिए मौरदा।

⁵² पौरौ सिरफ तिनु कारिए ना मौरदा। सै पौरमेशवर कै ओकी संतान कारिए बै मौरदा जू इयौं दुनिया पांदी बिखरेयोंदे औसौ, ताकि तिनु कौठै कौरे सौकौ।

⁵³ इथकारिए तैसी दूसौ दै ऊबै यहूदी नेता यीशु खै मारणौ कै चाल चालदै लागै।

⁵⁴ इथकारिए यीशु तैसी सौमय शै यहूदी लोगौ मुंजी सौबी कै सामणै ना घूमी, पौरौ तिथैदा शुनशान जौगैह कै नेड़िक कै प्रदेश कै एप्रैम नांव कै ऐकी नोगरो कै हौटै गौआ, औरौ आपणै चैलै कै साथै तिथी रौंदा लागा।

⁵⁵ औरौ यहूदी लोगौ का फसह का तैयार नेड़िक थिया औरौ बौहितै सारै लोग फसह दै औगौड़ियौ गांव पौरैशै यरूशलेम शहर कै हौटै कै आपी खै शुध्द कौरौ।

⁵⁶ औरौ सैजै यीशु खै जौंदै लागै औरौ मन्दिरो दै खौड़ै हौयौ खै आपी मुंजी बौलदै लागै, “तुऐं का सुंचौ? का सै तैयारो मुंजी ना आन्‍दा?”

⁵⁷ मुख्य यहूदी पुरोहिते औरौ फरीसी लोगै ऐजा आदैश दैय राए थिया, कै जै कुणिए ऐजौ जाणौए कै यीशु कुकै औसौ तौ बौताए दैया कै आमै तैसीखै गिरफ्तार कौरे सौकु।