यूहन्ना 1 - सिरमौरी नौवाँ नियम

आदि दा वचन थिया

¹ इयौं सारै दुनिया कै बाणणौ दै औगौड़ियौ ऐजौ थियु, जैसी वचन बौल़ै जांव, सैजा पौरमेशवर कै साथै थिया, औरौ सैजा पौरमेशवर थिया।

² सै शुरुआत शै ही पौरमेशवर कै साथै थिया।

³ पौरमेशवरे सौबै ठुँ तैसी लैई बाणौ, औरौ जू किछै बाणै राए, तिनुमुंजी शै कुणजै बै चीज़ तैसकै बिना ना बाणै रैई।

⁴ सै सौबी जिन्दगीयों का स्रोत औसौ, औरौ सै सैजाई औसौ, जू सौबी लोगौ कै पेयाशो दैंव।

⁵ औरौ पेयाशो इनारै दो चमको, औरौ इनारौ तिथु हिशोए ना सौकौ।

⁶ पौरमेशवरे ऐक यूहन्ना नांव कै आदमी कै भैजा।

⁷ सै पेयाशै कै बारै मुंजी बौताणौ कारिए ओऊवा, ताकि सौबै लोग तैसी पेयाशै दा बिशवाश कौरौ।

⁸ यूहन्ना आपी पेयाशो तौ थी नी, पौरौ सै तैसी पेयाशै कै बारै मुंजी गवाही दैंदा आए रौआ थिया।

⁹ सैजौ जू साचौ पेयाशो औसौ जू हरेक आदमी खै पेयाशो दैंव, सै दुनिया दो आणौवाल़ौ थियु।

¹⁰ सै दुनिया दा थिया, पौरौ दुनिया तैसकै दवारा बौणै औरौ दुनिया कै लोगै तैसीखै ना पोछैयाणी।

¹¹ सै आपणै लोगौ कै बीच मुंजी ओऊवा औरौ तैसीखै आपणै लोगै ठुकराए दिया।

¹² पौरौ जैतरै लोगै तैसी अपनोऊवा, तैणै तिनु पौरमेशवर कै सन्‍तान हौणौ का औधिकार दिया, यानी तिनु जू तैसी पांदी बिशवाश कौरौ।

¹³ सै ना तौ माँ-बापू शै, ना ही आदमी की इछा शै, ना ऐक आदमी कै संतान पाणौ कै इछा शै, पौरौ पौरमेशवर शै पौयदा हौए रौआ।

¹⁴ औरौ वचन ऐक आदमी बौणा, औरौ अनुग्रह औरौ सौचाई शै परिपूर्ण हौयौ अमारै बीच मुंजी डैरा कौरा, औरौ तैसकै महान दया ऐशणै थी, जैशैखै पौरमेशवर की ढौबौशै आएयौंदे इकलोतै बैटै कै महिमा।

¹⁵ यूहन्नाए तैसकै बारै दै गवाही दै, औरौ जोर सै बौल़ौ, “ऐजा सैजाई औसौ, जैसकै बारै दौ मोऐं बौताए राए थियु, कै जू मैरै बाद आए रौआ, सै मुं दा बै बौड़ैबा औसौ, जिथुकै सै मुं दा औगौड़ियौ बजूद दा थिया।”

¹⁶ जिथुखै तैसकै महान दया की परिपूर्णता शै आमु सौबी खै अनुग्रह पांदी अनुग्रह भैटी रौआ।

¹⁷ इथकारिए कै कानून तौ मूसा कै दवारा दैय राए, पौरौ महान दया औरौ सौचाई तौ यीशु मसीह कै दवारा आए।

¹⁸ पौरमेशवर कै कोसीए कौलोंई ना दैखै रैई, सिरफ तैसकै इकलोतै बैटै दैखी राए ‍‌जू सौथी कै पौरमेशवर औसौ, औरौ पिता पौरमेशवर कै सौबिदा नेड़िक औसौ, तैणै आमु दिखाए राए, कै पौरमेशवर कैशणा औसौ।

यूहन्ना बपतिस्मा दाता कै गवाही

¹⁹ जोबै यहूदी नेताए यरूशलेम शहर शै यहूदी पुरोहित औरौ लेवी मौरदो खै यूहन्ना कैंईदौ ऐजौ पूछणो कारिए भैजै, “तू कुण औसौ?” तौ यूहन्ना कै गवाही ऐजै थी,

²⁰ औरौ तैणै तिनु साफ औरौ सीधी बात बौल़ै दै, “कै हांव मसीह ना आथी।”

²¹ तोबै तिनुऐ यूहन्ना कैईंदु पूछु, “तौ तोबै तू कुण औसौ? का तू एलिय्याह पौरमेशवर कै बातौ बौताणौवाल़ा औसौ?” तैणै बौल़ौ, “हांव ना आथी।” “तौ का तू सैजा पौरमेशवर कै बातौ बौताणौवाल़ा औसौ?” तैणै जोवाब दिया, “ना।”

²² तोबै तिनुऐ यूहन्ना शै पूछु, “तोबै तू कुण औसौ? ताकि आमै आपणै भैजणौवाल़ै खै जोवाब दियु। तू आपणै बारै मुंजी का बौल़ै?”

²³ यूहन्नाए बौल़ौ, “जैशैखै यशायाह पौरमेशवर कै बातौ बौताणौवाल़ै बौल़ौ कै, ‘उजाड़ जौगैह दै ऐकी धाव दैणौवाल़ै कै धाव रौए शौणै, कै तुऐं प्रभु कै खातीरदारी कारिए आपणै मनो कै तैयार कौरौ, औरौ तैसकै आणौ कारिए आपी खै सुधारौ।’”

²⁴ किछै लोग फरीसी लोगौ कै गुटो मुंजीदै भेजेयोंदे थिए।

²⁵ तिनुऐ यूहन्ना कैईंदा ऐजा सवाल पूछा, “जै तू मसीह ना आथी, औरौ ना एलिय्याह, औरौ ना ही पौरमेशवर कै बातौ बौताणौवाल़ा औसौ, तौ तू तोबै किथुखै बपतिस्मा दैय।”

²⁶ यूहन्नाए तिनुखै जोवाब दिया, “हांव तौ पाणी लैई बपतिस्मा दियु, पौरौ तोंवारै बीच मुंजी ऐक ऐशणा आदमी खौड़ा औसौ जैसीखै तुऐं ना जाणौ।

²⁷ यानी जू मैरै बाद आणौवाल़ा औसौ, हांव तौ तैसकै जूते कै तशमै खौलणौ कै लायक बै ना आथी।”

²⁸ ऐजी बातौ यरदन नोंदी पार बैतनिय्‍याह गांव दी होई, जिथै यूहन्ना लोगौ खै बपतिस्मा दैंव थिया।

पौरमेशवर का मेम्‍ना

²⁹ ओकी दूसै यूहन्नाए यीशु खै आपणै ढौबौ आन्दै बैई दैखैयो बौल़ौ, “दैखौ, ऐजा पौरमेशवर का मेम्‍ना औसौ जू (आपी खै बलिदान कौरेयौ) दुनिया का पाप उठाणौ वाल़ा औसौ।

³⁰ ऐजा सैजाई औसौ जैसकै बारै मुंजी मोऐं बौल़ै राए थियु, ऐक आदमी मैरै पाछैदा आणौवाल़ा औसौ, जू मुं दा महान औसौ, जिथुकै सै मुं दा औगौड़ियौ बजूद दा थिया।

³¹ औरौ हांव तौ तैसीखै पौछेयाणु ना थिया कै सै मसीह थिया पौरौ इथकारिए हांव पाणी लैई बपतिस्मा दैंदा ओऊवा की इस्राएल देश कै लोगौ खै ऐजौ बौताए सौकु कै सै कुण औसौ।”

³² औरौ यूहन्नाए ऐजी गवाही दी, “मोऐं पवित्र आत्मा खै कबूतर कै जैशणा स्वर्ग शै उतरदै बैई दैखा, औरौ सै तैसी पांदी ठोरा।

³³ औरौ हांव तौ तैसीखै पौछेयाणु नै थिया कै सै मसीह औसौ, पौरौ जैणै मौखै पाणी लैई बपतिस्मा दैंदा भैजा, तैणै मौखै बौल़ौ, ‘जैसी पांदी तू पवित्र आत्मा खै उतरदै बैई औरौ ठोरदे बैई दैखला; सैजाई पवित्र आत्मा लैई बपतिस्मा दैणौवाल़ा औसौ।’

³⁴ मोऐं आपी दैखौ, औरौ हांव तुऔं कैई साचौ बुलू, की ऐजाई पौरमेशवर का बैटा औसौ।”

यीशु कै आगलै चैलै

³⁵ ओकी दूसै हौजौ यूहन्ना औरौ तैसकै चैलै मुंजीदै दो जोणे खौड़ै हौए रौवै थिए।

³⁶ औरौ तैणै यीशु कै जांदै बैई दैखा औरौ बौल़ौ, “ऐजा पौरमेशवर का मेम्‍ना औसौ।”

³⁷ तोबै सैजै दुईनै चैलै तैसी शौणैबा यीशु कै साथै हौटै गौवै।

³⁸ यीशुए फेरेबा औरौ तिनुखै पाछु आन्दै बैई दैखैयो तिनुखै बौल़ौ, “की तुऐं कोसके तलाश दै औसौ?” औरौ तिनुऐ तैसीखै बौल़ौ, “ओए रै गुरुजी, तू कुकै रौए?”

³⁹ यीशुए तिनुखै बौल़ौ, “चालौ, तौ दैखलै।” तोबै तिनुऐ आयौ तैसकै रौणौ का ठाँव दैखा, औरौ तैसी दूसै सैजै तैसीआरी रौवै; तैसी सौमय बैल़खै कै चार बोजे रौवै थिए।

⁴⁰ तिनु दु चैलै मुंजीदै, जू यूहन्ना कै बात शौणैबा यीशु कै साथै आए रौवै थिए, तिनुमुंजी ऐक शमौन पतरस का भाई अन्द्रियास थिया।

⁴¹ तैणै आगै आपणै सौरे भाई शमौन आरी भैटीबा तैसीखै बौल़ौ, “आमुखै मसीह यानी पौरमेशवर का अभिषिक्त भैटी गौआ।”

⁴² अन्द्रियासे शमौन खै यीशु कै धोरे लियोऊवा, यीशुए तैसीखै ध्यान शै दैखा औरौ बौल़ौ, “तू यूहन्ना का बैटा शमौन औसौ, तू कैफा यानी पतरस बौला जाला।”

फिलिप्‍पुस औरौ नतनएल कै बोईदणै

⁴³ ओकी दूसै यीशुए गलील जिले खै जाणौ चोऊ, औरौ फिलिप्‍पुसआरी भैटेयो बौल़ौ, “मुं साथी चाल।”

⁴⁴ फिलिप्‍पुस तौ अन्द्रियास औरौ पतरस कै बैतसैदा शहर का रौणौवाल़ा थिया।

⁴⁵ फिलिप्‍पुसे नतनएल आरी भैटेयो तैसीखै बौल़ौ, “आमु कै सैजा आदमी भैटी गौआ, जैसकै बारै मुंजी मूसा कै कानून दो औरौ पौरमेशवर कै बातौ बौताणौवाल़ै लैखै राए। सै यूसुफ का बैटा यीशु औसौ जू नासरत गांव शै औसौ।”

⁴⁶ नतनएले तैसीखै बौल़ौ, “का कुणजै आछी चीज़ौ बै नासरत गांव शी निकल़ै सौकौ?” फिलिप्‍पुसे तैसीखै बौल़ौ, “जाऐबा दैख कौर।”

⁴⁷ यीशुए नतनएल खै आपणै ढौबौ खै आन्दी बैई दैखैयो तैसकै बारै मुंजी बौल़ौ, “दैखौ ऐजा अमारै पुराणिया इस्राएल देश का ऐक साचा वंशज औसौ: जू पूरी तरह शै ईमानदार औसौ।”

⁴⁸ नतनएले तैसीखै बौल़ौ, “तू मुखै कैशैखै जाणै?” यीशुए तैसीखै जोवाब दिया, “इदा औगौड़ियौ फिलिप्‍पुसे ताखै बौईदा जौल़ौ तू अंजीरो कै डाल़ो तौड़ी थिया, तौलौ मोऐं ताखै दैखा थिया।”

⁴⁹ नतनएले तैसीखै जोवाब दिया, “ओए रै गुरुजी, तू पौरमेशवर का बैटा औसौ इस्राएल देश का महाराजा औसौ।”

⁵⁰ यीशुए तैसीखै जोवाब दिया, “मोऐं जू ताखै बौल़ै राए थियु की मोऐं ताखै अंजीरो कै डाल़ो तौड़ी दैखा, का तू इथकारिए बिशवाश कौरे? तू इदै बै बौड़ै-बौड़ै काम दैखला।”

⁵¹ हौजौ तैसीखै बौल़ौ, “हांव तुऔं खै साचौ-साचौ बुलू कै तुऐं स्वर्गो खै खुलू औरौ पौरमेशवर कै स्‍वर्गदूतौ कै ऊबै जांदै औरौ मुं आदमी कै बैटै कै उपरोशे उरतदै बैई दैखदै।”