याकूब 5 - सिरमौरी नौवाँ नियमअमीर लोगौ खै चैतावणी 1 ओए रै सैठ लोगौ शुणी तौ पाव; तुऐं आपणै आणौवाल़ै कौल़ेशौ पांदी लैरौ मारै मारेयों रुओं। 2 तोंवारा धन नाश हौए जांदा, औरौ तोंवारै लुस्कै कीड़ै खांदै। 3 तोंवारै सूनै-चांदी दा जर लागै गौआ, औरौ जोबै पौरमेशवर तोंवारा न्याय कौरदा, तोबै ऐजा जर तोंवारै खिलाफ ऐक गवाह कै जैशणा हौंदा, औरौ ऐजा जर तोंवारै शोरीर कै आग कै जैशणा जोल़ाए दैंदा। ऐजा आखरी जुग का अन्त औसौ औरौ तुऐं लोगै धन का ढैर लाए राए। 4 दैखौ, जिनु मजदूरै तोंवारै बागड़ी काटै राए, तिनकी धियाड़ी कै तुऐं धौखा दैयौ राखै राए सैजै मजदूरी पौरमेशवर कै सामणै तोंवारै खिलाफ लैलियाए रौंव, औरौ शाख कौठै कौरणौवाल़ै कौ रुणु, सैनाओं कै प्रभुए शौणै राए। 5 तुऐं धोरती पांदी ऐशौ आराम दै लागैयौंदे रौंव, औरौ बौड़ा ही सुख भोगे राए, ऐशै कौरेयौ तुऐं तिनु गोरु कै जैशणै आपी कै मोटा-ताजा कौरे राए जिनुखै बाद दै मारैयौ खाए दैंव, तिनु साए तुऐं बै ऐजौ ना जाणौ कै तोंवारा नाश हौणौवाल़ा औसौ। 6 तुऐं धरमी आदमी कै दोषी ठहरायो कै मारै दिया, औरौ तैणै तोंवारा कुणजाई विरोध ना कौरी। दुख दा सब्र राखणा 7 इथकारिए ओए रै भाईटु, प्रभु कै आणौ तौड़ी धीरज धोरो, जैशै किसान बागड़ी कै कीमती फसल कै आशा राखौ औरौ आगली औरौ पाछल़ी बारिश हौणौ तौड़ी धीरज शै ठोल़नाए कौरौ, ताकि फसल बौढ़ौ औरौ काटणौ कारिए तैयार हौंव। 8 तैशैखैई तुऐं बै धीरज राखौ औरौ आशा कै ना छोड़ो, जिथुकै प्रभु तावल़ा आणौवाल़ा औसौ। 9 ओए रै भाईटु, ऐकी दूजै पांदी आपणै पौरैशानी कै बौजैह शै दोष ना लाव, ताकि तुऐं दोषी ना ठौहरौ, दैखौ, न्याय कौरणौवाल़ा आणौ कारिए तैयार औसौ। 10 ओए रै भाईटु, जिनुऐ पौरमेशवर कै बातौ बौताणौवाल़ै प्रभु कै नांव शै बातौ कौरी, तिनुखै दुख उठाणै औरौ धीरज धोरणो का ऐक आर्दश सौमझौ। 11 आमु दुखो दै धीरज धोरणो वाल़ौ खै धन्य बुलू। तुऐं अय्यूब नांव कै ऐक आदमी कै धीरज राखणौ कै बारै मुंजी तौ शौणै राए, औरौ तुऐं ऐजौ बै जाणौए कै पौरमेशवरे आखरी दी तैसकै कैशै मौदद कौरे, जिथलैई प्रभु कै बैजाए करूणा औरौ दया प्रगट हौंव। 12 पौरौ ओए रै मैरै भाईटु, सौबी दी बौड़ी बात ऐजी औसौ, कै शौं नै खाया ना स्वर्ग कि, ना धोरती कि, ना कोसी ओकी चीज़ौ कि, पौरौ तुंआरी बात हां कै हां औरौ ना कै ना हौंव, ताकि तुऐं पौरमेशवर कै दवारा दोषी ना ठोहराए जांव। बिशवाश वाल़ी प्रार्थना की शौकतै 13 जै तुऔं मुंजी कुणिए दुखी हौंव तौ सै प्रार्थना कौरौ; जै खुशी औसौ, तौ सै स्तुति खै भजन गांव। 14 जै तुऔं मुंजी कुणिए बीमार औसौ, तौ कलीसिया कै अगुवो खै बौईदो, औरौ सै प्रभु कै नांव लैई तैसी पांदी तेल लांव कै तैसी कारिए प्रार्थना कौरौ। 15 औरौ बिशवाश कै प्रार्थना लैई बीमार बौचै जांदा औरौ प्रभु तैसीखै औटेयौ खै ठीक कौरदा औरौ जै तैणै पाप बै कौरे रालै तौ पौरमेशवर तैसीखै माफ कौरदा। 16 इथकारिए तुऐं आपी मुंजी ऐकी दूजै कै सामणै आपणै-आपणै पापौ खै मानै पाव, औरौ ऐकी दूजै कारिए प्रार्थना कौरौ, जिथलैई तुऐं ठीक हौए जांव, औरौ धरमी आदमी कै प्रार्थना जादा शौकतीशाली हौंव औरौ तिथकै अनौखै नतीजै भैटौ। 17 पौरमेशवर कै बातौ बौताणौवाल़ा एलिय्याह बै तौ अमारै जैशणा दुख सुख भोगी आदमी थिया; औरौ तैणै पूरै मन शै गिड़गिड़ायो प्रार्थना कौरे, कै बोरखा ना लागौ औरौ साढ़े तीन सालो तौड़ी धोरती पांदी बोरखा ना लागी। 18 औरौ बाद दी जोबै तैणै बौरखा हौणौ कै प्रार्थना कौरे तौ गौयण पौरैशै बौरखा लागै, औरौ धोरती फोल़दै लागै। 19 ओए रै मैरै भाईटु, जै तुऔं मुंजी कुणिए बिशवाशी पौरमेशवर कै साची शिक्षाओं शै भोटके जांव, औरौ जै कुणिए तैसकै पापौ कै छौड़णौ दै मौदद कौरौ 20 तौ तुऔं ऐजौ पौता हौणौ चैंई कै जू कुणिए आदमी सौचाई शै भोटकैयोंदै पापी कै फैर लांव, तौ सै तैसी पापी कै जिन्दगी कै मौत शै बौचांदा औरौ पौरमेशवर तैसकै सौबै पापौ कै माफ कौरे दैंदा। |
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
Beyond Translation