याकूब 4 - सिरमौरी नौवाँ नियमदुनिया आरी दोस्ती 1 तुऔं मुंजी लौड़ाए औरौ झोगड़े कुकै दै आए गौवै? ऐजै तिनु बुरी इछावं शै आंव जू तोंवारै भीतरै लोड़ोए। 2 तुऐं लालसा तौ राखौ, पौरौ तुऔं भैटौ ना, इथकारिए तुऐं हत्या कौरणौ कारिए तैयार रौंव। औरौ तिनु चीज़ौ का लालच कौरौ जू ओकीयांगो औसौ, औरौ तुऔं किछै ना भैटौ। तुऐं हुड़ियौ औरौ झोगड़ियौंए, तुऔं इथकारिए ना भैटौ जिथुकै तुऐं इथु पौरमेशवर शै ना मांगो। 3 तुऐं मांगोए पौरौ तुऔं ना भैटौ, जिथुकै तुऐं बुरी इछा लैई मांगो, ताकि आपणै मोजै कारिए उड़ाए सौकौ। 4 ओए रै धौखै बाज लोगौ, का तुऐं ना जाणौ कै दुनिया कै चीज़ौ आरी दोस्ते कौरणै पौरमेशवर सै बैर कौरणा औसौ? इथकारिए जू कुणिए दुनिया कै चीज़ौ आरी दोस्ती राखणा चांव, सै आपी खै पौरमेशवर का बैरी बौणांव। 5 कोदी तुऐं ऐजौ तौ नी सोंचै लो कै पवित्र शास्त्र कै ऐजै बात बैकार औसौ: सैजै आत्मा, जियौं तैणै अमारै भीतरै बोसाए राए, बौड़ै लालसा शै अमारै खातिर कामना कौरौ? 6 पौरौ पौरमेशवर जू अनुग्रह दैंव सै बैजाए शौकतीशाली औसौ इथकारिए पवित्र शास्त्र दो लैखै राए, “पौरमेशवर घमण्डी लोगौ का विरोध कौरौ, पौरौ दीन लोगौ पांदी अनुग्रह कौरौ।” 7 इथकारिए पौरमेशवर कै अधीन हौए जाव औरौ शैतान का सामणा कौरौ, तौ सै तोंवारै धोरे दा भागै जांदा। 8 पौरमेशवर कै नेड़िक आव, तौ सै बै तोंवारै नेड़िक आन्दा। ओए रै पापियों आपणै जीवन शै पाप कै दूर कौरौ, औरौ ओए रै दुगल़ै लोगौ आपणै मन खै पवित्र कौरौ। 9 आपणै पापौ की बौजैह शै दुखी हौंव औरौ शोक कौरौ, औरौ रुओं, तुंआरौ हौसणौ शोक दौ औरौ तुंआरी खुशी दुख दै बौदलै जांव। 10 प्रभु कै धोरे दीन बौणौ, तौ सै बै तुऔं आदर दैंदा। भाईयों पांदी दोष लाणै 11 ओए रै भाईटु ऐकी दूजै कै बोदनामी नै कौरौ, जू आपणै भाई कै बोदनामी कौरौ या तैसी पांदी दोष लांव, सै व्यवस्था खै बोदनामी कौरौ औरौ कानून पांदी दोष लांव; औरौ जै तू कानून पांदी दोष लांए, तौ तू कानून कै मानणौ वाल़ा ना आथी पौरौ तिथपांदी न्याय कौरणौवाल़ा बौण जाए। 12 कानून दैणौवाल़ै औरौ न्याय कौरणौवाल़ा ऐकैई औसौ जू पौरमेशवर औसौ जैसयांगै बौचाणौ औरौ नाश कौरणौ कै शौकतै औसौ, पौरौ तू कुण औसौ, जू आपणै पड़ोसी पांदी दोष लांए? घमण्ड कै खिलाफ चैतावणी 13 तुऐं जू ऐजौ बौल़ौ, “ऐलो या दोतियो आमु कोसी ओकी नगर दै जायौ खै तिथै ऐक साल बितांदै, औरौ व्यापार कौरेयौ कै फायदा कमोऊगै।” 14 पौरौ तुऐं ऐजौ ना जाणौ कै दोतियो का हौन्दौ, शुणौ, तोंवारा जीवन औसौ ही का? तुऐं तौ धुंध कै जैशणै औसौ, जू किछै देर तौड़ी दैखियौं, तेथियोड़े घायब हौए जांव। 15 इथकारिए तुऐं ऐजौ बौलणौ चैंई, “जै प्रभु चांव तौ आमै जियुंदी रौंदै, औरौ ऐजै या सैजै काम बै कौरदै।” 16 पौरौ ऐबै तुऐं आपणी योजनाओ कै बारै मुंजी घमण्ड कौरौ ऐशणा घमण्ड बुरा हौंव। 17 इथकारिए जू भोलाए कौरणा जाणौए औरौ ना कौरौ, तैसी कारिए ऐजा पाप औसौ। |
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
Beyond Translation