याकूब 3 - सिरमौरी नौवाँ नियमजीभ पांदी काबू 1 ओए रै मैरै भाईटु, तुऔं मुंजीदै बौहितै लोग कलीसिया कै उपदैशक ना बौणौ, जिथुकै तुऐं जाणौए कै ओकी कै तुलना दा अमारा न्याय हौजौ बै जादा सख्ती शै हौंदा। 2 आमै सौबै बौहितै बैई चौकी जोऊं पौरौ जै कुणिए आदमै जू सै बौल़ौए तिथमुंजी कौलोंई गौलती ना कौरौ सैजाई तौ सिध्द आदमै औसौ, औरौ सै आपणै सौबी कामौ दा आपी खै काबू कौरे सौकौ। 3 जोबै आमै काबू दै कौरणौ कारिए घोड़े खै मुँह पांदी लगाम लोऊँ, तौ आमै तिनका पूरा शोरीर बै घुमाए सौकु। 4 औरौ जहाज बै, ऐशणै बौड़ै हौंव औरौ तैज हवा शै चौलाए जांव, तौ बै ऐक नानड़ै शै पतवार कै दवारा माझी कै इछा कै हिसाब शै घुमाए जांव। 5 तैशैखैई जीभ बै ऐक नानड़ा शा अंग औसौ औरौ बौड़ी-बौड़ी डींग मारो; दैखौ कैशै; दैणिक आगै लैई कैतरै बौड़ै जोंगलो दै आग लागै जांव। 6 जीभ बै ऐक आग कै जैशणै औसौ; औरौ ऐजा शोरीर का सैजा हिस्सा औसौ जू बैजाए दुष्ट औसौ औरौ सारै शोरीर पांदी कलंक लांव, औरौ जीवन कै नाश कौरे सौकौ। ऐजै ऐक ऐशणै आग औसौ जू नरक शै आंव। 7 हर भान्त कै जोंगली जानवर, चुड़कुल़ै, औरौ रेंगणोवाल़ै जीव, औरौ पाणी मुंजी तिरणौ वाल़ै जलचर ऐजै तौ आदमी लैई काबू दै हौए सौकौ औरौ हौए बै गौवै। 8 पौरौ जीभ कै कुणिए बै आदमै काबू दै ना कौर सौकौ; ऐजै ऐक ऐशणै बुराए औसौ, जू कौलोंई रूको ना, ऐजै ऐक शोंगोऊं कै ज़ौयर कै जैशणै बैजाए खतरनाक औसौ। 9 जीभ शै ही आमै प्रभु औरौ पिता पौरमेशवर कै बौड़ाए कौरो, औरौ इथलैई आदमी कै जू पौरमेशवर कै रुप दै बाणै राए शराप दियु। 10 ऐकी मुँह लैई धन्यवाद औरौ शराप दुईनै निकल़ौ। ओए रै मैरै बिशवाशी भाईटु, ऐशै नै हौणौ चैंई। 11 का सोतै कै ऐकी मुँह पौरैशौ मीठु औरौ नुणाटौ पाणी दुईनै निकल़ौ? ना, 12 ओए रै मैरै बिशवाशी भाईटु, का अंजीर खै डाल़ो दा जैतून, या दाख कै बाली दा अंजीर लागै सौकौ? ना, तैशैखैई नुणाटै फटवाणी पौरैशौ मीठु पाणी ना निकल़ै सौकौ। साचा ज्ञान 13 तुऔं मुंजी ज्ञानी औरौ सौमझदार कुण औसौ? जै तुऐं औसौ तौ तुऔं ऐक आछा जीवन जिणौ कै दवारा औरौ तियौं नम्रता कै साथै जू तोंवारै ज्ञान शै आंव आछै काम कौरेयौ दिखाणै चैंई। 14 पौरौ जै तुऐं आपणै-आपणै मन दै बैजाए ज़लन औरौ स्वार्थ राखौ, तुऐं ऐजा घमण्ड नी कौरणा चैंई कै तुऐं ऐक बुध्दिमान आदमै औसौ। जै तुऐं ऐशै कौरौ तौ तुऐं सौचाई खै झूठ दो बौदलै दैंव। 15 ऐजा ज्ञान सैजा ना आथी जू पौरमेशवर शै आंव पौरौ दुनिया कै तरफ शै औरौ शारीरिक, औरौ शैतानी औसौ। 16 इथकारिए कै जिथै जादा ज़लन औरौ स्वार्थ हौंव, तिथै बखेड़ा औरौ हर भान्त कै बुरै काम बै हौंव। 17 पौरौ जू ज्ञान पौरमेशवर दैंव, सै आगै तौ पवित्र हौंव, तेई शान्तै दैणौवाल़ा, कोमल, औरौ सै ओकी कै अधीन रौणौवाल़ा हौंव, ऐजा दया औरौ आछै कामौ शै भौरेयौंदा औरौ ईमानदार औरौ बिना कपट वाल़ा हौंव। 18 औरौ जू मिलाप कौराणौ वाल़ै औसौ सै शान्तै का बिज़ बौंदै औरौ धार्मिक कामौ कै फसल काटदै। |
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
Beyond Translation