याकूब 2 - सिरमौरी नौवाँ नियमपक्षपात कै खिलाफ चैतावणी 1 ओए रै मैरै भाईटु, तुऐं अमारै महिमा दैणै वाल़ा प्रभु यीशु मसीह कै चैलै औसौ इथकारिए तुऔं मुंजी भैदभाव कै भावना नी हौंव। 2 जै ऐक आदमी सूनै खै छल्लै औरौ आछै लुस्कै बाम्बेयो तोंवारै कलीसिया कै गुट दा आंव औरौ ऐक गरीब बै मोल़ाएयोंदे लुस्कै बाम्बेयो आंव। 3 औरौ तुऐं तैसी सुन्दर लुस्कै बाम्बणौ वाल़ै कै जादा आदर दैयौ बौल़ौ, “तू इथै आछी जौगैह बौठौ।” औरौ गरीब खै बौल़ौ, “तू तिथै खौड़ा रौव।” या “मैरै लातो खै धोरे बौठ।” 4 तौ का तुऐं आपी मुंजी भैदभाव ना कौरी? औरौ का तुऐं बुरै विचार शै न्याय कौरणौवाल़ै ना हुवे? 5 ओए रै मैरै प्यारे बिशवाशी भाईटु शुणौ। पौरमेशवरे इयौं दुनिया कै गरीब खै चोणे राए कै सै बिशवाश दै धनी हौए जांव, औरौ तैसी राज्य कै औधिकारी बौणै जांव, जैसी दैणौ का वादा तैणै तिनु आरी कौरे राए कै जू तैसीआरी प्यार कौरौ। 6 पौरौ तुऐं तैसी गरीब कै बैज्जती कौरे राए। तुऐं जाणौए कै ऐजै सैठ लोग ही औसौ जू तुऔं पांदी अत्याचार कौरौ। सैजैई औसौ जू तुऔं कै जबरदस्तै अदालत दा लौए जांव। 7 सै सैजैई औसौ जू यीशु मसीह कै आदर दैणौ कै लायक नांव कै खिलाफ बुरी बातौ बौल़ौ, जिनुआरी तुऐं सौमबंध राखौ। 8 जै तुऐं पवित्र शास्त्र कै खास नियम कै मानौए, जू बौल़ौए, “आपणै पड़ोसी आरी तैशणा प्यार कौरेया,” तौ तुऐं सोही कौरौ। 9 पौरौ जै तुऐं भैदभाव कौरौ तौ पाप कौरौ, औरौ नियम तुऔं दोषी ठोहरांव। 10 जिथुकै जू कुणिए सौबी कानून का पालन कौरौ, पौरौ ऐकी आज्ञा दा बै चौकी जांव तौ सै सौबी बातौ दा दोषी ठौहरौ। 11 इथकारिए कै पौरमेशवरे ऐजौ बौल़ौ, “तू गौलत सौमबंध नै बाणैया” तैणै ऐजौ बै बौल़ौ, “तू हत्या नै कौरेया।” इथकारिए जै तुऐं गौलत सौमबंध ना बाणी, पौरौ हत्या कौरे राए, तौ तुऐं बै कानून कै तौड़णौ वाल़ै ठौरौ। 12 तुऐं तिनु लोगौ साए बौल़ौ औरौ बर्ताव बै कौरौ, जिनका न्याय कानून कै हिसाब शै हौंदा जू आमु आज़ाद कौरौ। 13 जिथुकै जैणै दया ना कौरी, तैसका न्याय बै बिना दया का हौंदा दया न्यांव पांदी जीतै जांव। बिशवाश औरौ काम 14 ओए रै मैरै भाईटु, जै कुणिए आदमी ऐजौ बौल़ौए कै हांव प्रभु यीशु पांदी बिशवाश कौरु, पौरौ सै ओकीआरी भले काम ना कौरौ, तौ इथलैई का फायदा? का ऐशणा बिशवाश कौलोंई तैसका बौचाव कौरे सौकौ? ना बिल्कुल नी। 15 जै कोसी भाई या बोईणियागै लुस्कै कै जौरुरत औसौ औरौ तिनु रौज खाणौ कै कमी हौंव। 16 औरौ तुऔं मुंजी कुणिए तिनुखै बौल़ौ, “शान्तै शै जाव, तुऐं गरम रौव औरौ छोखेयो रौव!” पौरौ जू चीज़ौ शोरीरो कारिए जौरुरी औसौ, तौ तिनु शब्दो का, का फायदा औसौ? किछै ना आथी। 17 ऐशैखैई बिशवाश बै जै भले कामौ कै साथै ना हौंव तौ बैकार औसौ। 18 जै कुणिए बौल़ौए, “मुखै बिशवाश औसौ, औरौ हांव भले काम कौरु।” पौरौ हांव बुलू तू आपणा बिशवाश मुखै भले काम कै बिना साबित कौर; औरौ हांव आपणा बिशवाश ताखै आपणै भले कामौ कै दवारा साबित कौरदा। 19 ताखै बिशवाश औसौ कै ऐकैई पौरमेशवर औसौ; तू आछौ कौरे, दुष्टआत्मा बै ऐशणा बिशवाश राखौ, औरौ कामणैयौ डौरौए। 20 पौरौ ओए रै निकम्मा आदमी का तू ऐजौ बै जाणै ना, कै भले कामौ कै बिना बिशवाश बैकार औसौ? 21 जोबै अमारै पुराणिया अब्राहमै आपणै बैटै इसहाक कै बैदी पांदी चौढ़ौऊवा, तौ तैणै जू भला काम कौरा तिथकै दवारा ही सै पौरमेशवर कै धोरे धरमी ठोरा। 22 तुऐं दैख राए कै बिशवाशै तैसकै भले कामौ कै साथै मिलैयौ काम कौरा औरौ बिशवाश तैसकै कामौ कै दवारा सिध्द हौआ। 23 औरौ पवित्र शास्त्र का ऐजा वचन पूरा हौआ, “अब्राहमै पौरमेशवर पांदी बिशवाश कौरा, औरौ तैसीकै बिशवाश कै दवारा पौरमेशवरे तैसी धरमी आदमी माना।” औरौ सै पौरमेशवर का दोस्त माना गौआ। 24 इथकारिए तुऐं दैख पोऊ कै आदमी सिरफ बिशवाश शै नी पौरौ आपणै कामौ कै दवारा ऐक धरमी आदमी कै रुप दा अपनाया जांव। 25 ऐशैखैई राहाब वेश्या बै, जोबै तियैं सौंदेश दैणौवाल़ै कै आपणै घोरे राखै औरौ औकी बाटौ बाटी छाड़ै, तौ सै बै आपणै भले कामौ कै दवारा ऐक धरमी आदमी कै रुप दै अपनाए गौए। 26 जैशै शोरीर साँस बिना मौरेयौंदा औसौ, ऐशैखैई बिशवाश बै भले कामौ कै बिना बैकार औसौ। |
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
Beyond Translation