याकूब 1 - सिरमौरी नौवाँ नियमशुभकामनाएँ 1 मोऐं याकूबे ऐजै चिट्ठी लैखै लोए। हांव पौरमेशवर औरौ प्रभु यीशु मसीह का सेवक औसौ। मोऐं ऐजै चिट्ठी इस्राएल देश कै बारौ गोत्रो कै लोगौ कारिए लैखै लोए, जू दुनिया दै बिखरे रौवै, तुऔं सौबी लोगौ कै मैरा नमशकार। बिशवाश औरौ बुध्दिमानी 2 ओए रै मैरै बिशवाशी भाईटु, जोबै तुऔं सांत भान्त की पौरैशानी आंव, तौ इथुकै खुशी कै बात सौमझौ। 3 जिथुकै तुऐं जाणौए कै जोबै तोंवारा बिशवाश पोरखा जांव तोबै तुऐं साबित कौरौ कै तुऐं ऐबै बै पौरमेशवर पांदी भोरोशा राखौ, तौ तुऐं सब्र शै मुसीबतौ कै सैहन कौरे सौकौ। 4 हरेक परीक्षा दा सब्र राखणा शिखौ, कै तुऐं आत्मिक रुप शै सियाणै हौए जांव, औरौ तुऔं दै कोसी बै आछै गुण कै कमी नै हौंव। 5 पौरौ जै तुऔं मुंजी दै कोसी कै बुध्दि की कमी हौंव, तौ पौरमेशवर कैईंदी मांगो, जू आमु दी बिना गौलती जौए सौबी कै बौड़ी दया शै दैंव; औरौ पौरमेशवर तुऔं कै बै दैला। 6 पौरौ जोबै तुऐं पौरमेशवर शै मांगोए, तौ तुऔं बिशवाश कौरणा चैंई, शक ना कौरणा चैंई, जिथुकै जू शक कौरौ सै बिशवाश ना कौरौ, सै समुन्द्र कै फालो कै जैशणा बोदलदा रौंव जू हावा लैई बौं औरौ छिड़ौए। 7 ऐशणा आदमी ऐजौ नै सौमझौ कै तैसी प्रभु शै किछै भैटदौए, 8 जिथुकै सैजा आदमै दौगल़ा औसौ, औरौ कोसी बातौ दा भोरोशे कै लायक ना आथी। अमीर औरौ गरीब 9 सैजै बिशवाशी भाईटु जू गरीब औसौ, तिनु खुश हौणौ चैंई कै पौरमेशवरे तिनका आदर कौरे राए। 10 औरौ सैजै बिशवाशी जू सैठ औसौ तिनु खुश हौणौ चैंई कै पौरमेशवरे तिनु नम्र कौरे राए; जिथुकै सै औरौ तिनकी अमीरी घासो कै फूलो कै जैशणी मिटै जांदै। 11 सुरज निकल़दै बैई, बौहितौ घाम पौड़ौ, औरौ घासो खै शुकोए दैंव, औरौ तिथका फूल झोड़ै जांव, औरौ तिथकै शोभा मिट जांव; तैशैखैई सैठ बिशवाशी बै मौरे जांदा जोबै सै आपणै कामौ दा लागैयौंदा रौंदा। पौरमेशवर परीक्षा ना लोंव 12 धन्य औसौ सैजा आदमै, जू परीक्षा दा टिकैयौंदा रौंव, जोबै सै खरा साबित हौंव तौ तैसी सौदा कै जिन्दगी का मुकुट भैटदा, जिथका वादा पौरमेशवरे आपणै प्यार कौरणौवाल़ै आरी कौरे राए। 13 जोबै कोसी कै परीक्षा हौंव, तौ सै ऐशै ना बौल़ौ, कै मैरी परीक्षा पौरमेशवर खै ढौबौशै हौंव; जिथुकै पौरमेशवर कौलोंई बै गौलत कौरणौ कारिए परीक्षा ना कौरौ, औरौ ना ही सै कोसी कै परीक्षा आपी कौरौ। 14 पौरौ हर आदमी आपणै ही बुरी इछाओं कै बौजैह शै गौलत कौरणा चांव, औरौ पाप मुंजी फोशैयो परीक्षा दै पौड़ै जांव। 15 इथकै बाद जोबै सै पाप कौरणौ का फोयसला कौरौ जिथकै सै इछा राखौ, तोबै सै पाप वाल़ै काम कै कौरौ औरौ जोबै पाप बौढ़ै जांव तौ इथका नतीजा सौदा कै मौत औसौ। 16 ओए रै मैरै प्यारे भाईटु धौखा ना खांव। 17 हरेक आछै वरदान औरौ हरेक बढ़िया दान पौरमेशवर ही शै औसौ, जैणै गौयण दै सौबै पेयाशो सुरज, चांद औरौ तारै बाणै। पौरमेशवर हमैशा ऐक जैशणा औसौ औरौ सै कौलोंई ना बौदलौ। 18 पौरमेशवरे आपणै इछा शै आमु साची वचन कै दवारा आमु आपणै संतान बाणै राए, ताकि आमै बिशवाशी सौबी तियौं चीज़ौ का सौबिदा खास हिस्सा होऊं, जू तैसकै दवारा बाणै राए। शुणणौ औरौ मानणौ 19 ओए रै मैरै प्यारे भाईटु, ऐजै बात तुऐं जाणै पाव, हरेक आदमै शुणणौ कारिए तैयार, औरौ बौल़ाणौ दा सब्र राखणौ वाल़ा, औरौ गुस्सा कम कौरणौवाल़ा हौंव। 20 जिथुकै जोबै ऐक आदमै गुस्से दा हौंव तौ सै तिनु धार्मिक कामौ कै ना कौरे सौकौ जू पौरमेशवर चांव कै सै कौरौ। 21 इथकारिए सारै गंदगी औरौ बैरभाव कि बोढ़ोतरी खै दूर कौरेयौ पौरमेशवरे कै वचन कै नम्रता शै मानै पाव, जैसी तुऐं दिल दा राखै राए थिया, औरौ जू तोंवारै जिन्दगी कै बौचाए सौकौ। 22 सिरफ तैसकै वचन कै शोणेयो आपी खै धौखा ना दैव; तुऔं सैजौई कौरणौ चैंई जू सै बौल़ौए। 23 जिथुकै जू कुणिए पौरमेशवर कै वचन कै शुणणैवाल़ा हौंव औरौ तिथु मानणै वाल़ा नी हौंव, तौ सै तैसी आदमी कै जैशणा औसौ जू आपणौ मुँह शीशै दौ दैखौ। 24 सै आपी कै शीशै दा दैखैयो आगु जांव, औरौ तौलोंई बैसरै जांव कै सै कैशणा थिया। 25 पौरौ जू आदमी पौरमेशवर कै सिध्द कानून कै ध्यान शै पालन कौरौ, जू लोगौ कै पाप शै आज़ाद कौरौ; सै आपणै काम दा इथकारिए आशीष पांदा कै सै कानून कै शोणेयो बिसरो ना पौरौ जू सै शिखौ तैशैखैई तिथका अभ्यास कौरौ। भोकताई का साचा रास्ता 26 जै कुणिए आपी खै भोक्त सौमझौ, पौरौ बुरी बातौ बौलणौ पांदी काबू ना राखौ तौ सै आपी खै धौखा दैंव औरौ तैसकै भोक्ती बैकार औसौ। 27 अमारै पौरमेशवर पिता खै नेड़िक साफ औरौ निर्मल भोक्ती ऐजै औसौ कै, अनाथो औरौ विधवा कै कौल़ेश दा तिनका ख्याल राखौ औरौ आपी कै दुनिया की बुरी बातौ शै बौचाए राखौ। |
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
Beyond Translation