इब्रानियों 9 - सिरमौरी नौवाँ नियम

सांसारिक तोम्बू

¹ औरौ पौरमेशवर कै तियौं कौरार कै बारै मुंजी जू बैजाए सौमय आगै मूसा कै दवारा इस्राएल देश कै लोगौ खै दैय राए थै, तिनुकैईं नियम थिए कै तिनु आराधना कैशै कौरणी चैंई औरौ तिनुकैईं आराधना का ऐक तोम्बू थिया जू आदमियों कै दवारा बाणै राए थिया।

² ऐजा मिलाप वाल़ा तोम्बू जानवरो कै खोलड़ै लैई बाणै राए थिया। तैसी तोम्बू कै बीच मुंजी, तिनुऐ ऐक पर्दा लोटकाए दिया औरौ दौ कोमरै बाणै दियै। आगलै कोमरै दा धूपदान थिया, जिथकी सात डाल़ी थी। तिथै ऐक मैज़ थै जिथपांदी पौरमेशवर खै रोटी चौढ़ाए जांव थी। ऐसी कोमरै खै पवित्र ठाँव बौल़ौ थिए।

³ औरौ दूजा कोमरा जू पर्दे कै पौछौड़ियौ थिया, तैसी सौबिदा जादा पवित्र ठाँव बौल़ौ थिए।

⁴ ऐसी कोमरै दै, ऐक सूनै कै वेदी थै, जिथका इस्तैमाल धूप जौल़ाणौ कारिए कौरौ थिए औरौ तिथपांदी ऐक सन्‍दूक बै थिया जू भीतरै-बायरै सूनै लैई मौढ़ेयौंदा थिया। तैसी सन्दूक खै कौरार कै सन्दूक बौल़ौ थिए। सन्दूक कै भीतरै तीन चीज़ौ थी। सौबीदु आगै, ऐक सूनै कौ ऐक बासण थियु जिथु दौ ऐक खास खाणौ थियु जिथु मन्ना बौल़ौ थिए। मन्ना ऐक नानड़ै, गोल़ धणिये कै बिज़ कै जैशणै ऐक चीज़ थै जिथका स्वाद मौं जैशणा थिया। इथु पिशै सौकौ थिए औरौ इथुकै पौकाए या सैकै सौकौ थिए। औरौ ऐजौ जोंगलो दौ इस्राएल लोगौ कौ खाणौ हौंव थियु औरौ सन्दूको भीतरा हारून का डैंगा बै थिया, जिंदै पात जामी रौवै थिए। आखिर दी इंदी पाथरो की दौ तौकती थी, जिथपांदी पौरमेशवरे सैजी दस आज्ञा लैखै रैई थी, जू तैणै मूसा खै दैय रैई थी।

⁵ तैसी सन्दूको कै उपले हिस्से खै पापौ खै माफ कौरणौ का ठाँव बौल़ै जांव थिया। तिथपांदी करूब जू स्‍वर्गदूतौ कै जैशणै औसौ जू पौरमेशवर कै महिमा खै दिखांव, सै तैसी ठाँव कै आपणै पाखौ लैई दबायो राखौ थिए। ऐबै इनु सौबी बातौ कै बारै मुंजी पूरै तरह शै बौताणौ का सौमय ना आथी।

सांसारिक सेवा कै सीमाएँ

⁶ ऐशैखैई तोम्बू खै लाए राए थिया। तोबै हर सौमय जोबै बै पुरोहित आपणा काम कौरणौ कारिए आंव थिए तौ सै सिरफ आगलै कोमरै दै आंव थिए।

⁷ पौरौ ओकी कोमरै दा सिरफ महायहूदी पुरोहित पूरै सालो दा सिरफ ऐकै बैई तैसी महापवित्र ठाँव दा जांव थिया। सै हमैशा तिनु जानवरो कौ लोऊ लैयौ जांव थिया जू बल़ि कारिए चौढ़ाए जांव थियु। ऐजौ लोऊ सै आपणै पापौ औरौ लोगौ कै दवारा कौरेयौंदे पापौ की बौजैह शै पौरमेशवर कै चौढ़ांव थिया, जू पाप तिनुऐ अणजाणै दै कौरे राए थिए।

⁸ इनु नियमौ लैई पवित्र आत्मा आमु ऐजौ सौमझांव कै जांव तौड़ी इयौं धोरती पांदी मिलाप वाल़ा तोम्बू औरौ इथकै नियमौ कै मानै जांव, तांव तौड़ी स्वर्ग दा पौरमेशवर कै सौबीदै पवित्र ठाँव दै जाणौ कै बाट इबी तौड़ी ना खोले रैई।

⁹ ऐजी सौबै चीज़ौ सिरफ इनु बातौ का उदारण थी जू कै ऐबै मसीह कै बौजैह शै पूरी हौए रैई। जिथुकै सैजी सौबै भैंट औरौ बलिदान जू तिनु लोगौ कै दवारा पौरमेशवर खै चौढ़ाए जांव थिए जू तैसकै आराधना कौरौ थिए, सैजै लोगौ कै मनो औरौ दिलो खै शुध्द कौरणौ कै लायक ना थी।

¹⁰ जिथुकै सैजै नियम सिरफ लोगौ कै खाणौ-पिणौ औरौ शोरीरो खै ठीक ढंग शै धौणौ कै बारै मुंजी बौतांव जिथकै दवारा लोग बायरी तौर शै साफ हौए जांव। इनु नियमौ खै तांव तौड़ी मानणै पौड़ौ थिए जांव तौड़ी कै पौरमेशवरे आपणा नौवाँ सौमझौता शुरु नी कौरा।

स्वर्गीय तोम्बू

¹¹ पौरौ ऐबै मसीह महायहूदी पुरोहित बौणै गौआ, जू नौवें कौरार कै सौबै आछै अनुभव दैंव, जू आमुकैंई आगै शै औसौ। यीशु मसीह स्वर्ग दा हौजौ बै महान, औरौ बैजाए सिद्ध मिलाप कै तोम्बू दा हौटा, जू आदमियों कै हाथौ लैई ना बाणै रैई थी औरौ ऐसी दुनिया की बाणैयौंदी चीज़ौ का हिस्सा नै आथी।

¹² औरौ यीशु मसीह सौबी दै पवित्र ठाँव दा सिरफ ऐकै बैई औरौ हमैशा कारिए हौटा। सै आपणै साथै बाकरी कौ लोऊ लैयौ ना हौटै रैई थी। तैसका बलिदान तैसकौ आपणौ लोऊ औसौ, इथलैई तैणै आमु पापौ शै हमैशा कारिए आज़ाद कौरे दियै।

¹³ मूसा कै कानून कै हिसाब शै, सैजै लोग जू नियम कै हिसाब शै अशुध्द हौंव, सैजै पौरमेशवर कै आराधना कौरणौ कै लायक ना हौंव। तोबै बै तिनु साफ सौमझै जांदै, जै तिनु पांदी बाकरियौ कौ लोऊ औरौ ऐक बल़ि कौ खैऊड़ छिड़कै जांव।

¹⁴ पौरौ मसीह दा कुणजाई पाप ना थी, औरौ तैणै आपी खै पौरमेशवर कै खातिर सौदा औरौ आत्मिक बल़ि कै रुप दा भैंट चौढ़ाए दिया। इथ बौजैह शै तैसकौ लोऊ कौथी जादा शौकतीशाली औसौ औरौ अमारै विवेक खै शुध्द कौरौ। ऐबै आमु जियुंदी पौरमेशवर कै सेवा कौरु औरौ तिनु चीज़ौ खै ना कौरु जू मौत कै ढौबौ लैयौ जांव।

¹⁵ इथ बौजैह शै मसीह पौरमेशवर कै ढौबौशा आपणै लोगौ कारिए ऐक नोऐं कौरार लाणौ वाल़ा बिचोलिया औसौ। ताकि सैजै लोग जिनुखै पौरमेशवरे बौएदै राए तिनु आशीषौ खै पाए सौकौ जिथका वादा पौरमेशवरे कौरे राए थिया। ऐशै इथकारिए हौए सौकौ जिथुकै मसीह तिनु तिनकै पापौ कै सौजा शै आज़ाद कौरवाणौ कारिए मौरे गौआ जू तिनुऐ आगलै कौरार कै अधीन रौयौ कौरे राए थिए।

¹⁶ आमै जाणुए जै कुणिए आदमी आपणै मौत कै बाद आपणी जायदात कै बांटणौ कै बारै मुंजी आखरी नियमौ खै लिखांव, तौ ऐजौ जौरुरी औसौ कै आगै तैसकै मौत हौं ताकि तैसकै नियमौ खै पूरै कौरेयौ।

¹⁷ तोबै वारिस सैजौ सौबै पाए सौकौ जू तैसीकै वसीयत दो दैय राए पौरौ जै वसीयत लिखाणौ वाल़ा इबी जियुंदी औसौ तौ ऐशै हौए ना सौकौ कै तैसकै दैययौंदी सलाह कै मानै जांव।

¹⁸ ऐजै बौजैह औसौ कै मौत कै दिखाणौ कारिए आगलै कौरार बै बिना लोऊ कै शुरु ना हौए सौकौ।

¹⁹ सौबीदै आगै, मूसाए सौबी लोगौ खै कानून कै हर आज्ञा कै बारै मुंजी बौतौऊ। इथकै बाद तैणै बाकरै कौ लोऊ कौरौ औरौ तिथु पाणी मुंजी मिलोऊं। तोबै तैणै इथु कानून कै किताब औरौ सौबी लोगौ पांदी छिड़कौणौ कारिए लाल ऊन औरौ जुफा नांव कै पौधे कै शांव का इस्तैमाल कौरा।

²⁰ मूसाए लोगौ खै बौल़ौ, ऐबै पौरमेशवरे तिनु आज्ञाओं कै बारै मुंजी तोंवारै साथै ऐक कौरार कौरे राए जू तुऔं मानणै चैंई। इथै ऐजौ लोऊ तियौं कौरार खै पूरा कौरौ।

²¹ औरौ ऐशैखैई मूसाए तोम्बू औरौ आराधना कै सारै समान पांदी लोऊ छिड़कु।

²² मूसा कै कानून कै हिसाब शै, लमसम सौबै चीज़ौ नियम कै हिसाब शै लोऊ लैई साफ कौरणी चैंई। लोऊ बौवाए बिना, पौरमेशवर लोगौ खै तिनकै पापौ कारिए माफ ना कौरे सौकौ।

मसीह कै बलिदान दवारा पाप कै माफी

²³ इथकारिए ऐजौ जौरुरी थियु कै मिलापवाल़ै तोम्बू औरौ तिथमुंजी कै सौबै चीज़ौ खै नियम कै हिसाब शै शुध्द कौरणौ कारिए बल़ि दैंव थिए औरौ ऐजौ स्वर्ग की चीज़ौ कि नकल औसौ। पौरौ स्वर्ग कै तिनु चीज़ौ खै नियम कै हिसाब शै साफ कौरणौ कारिए जानवरो कै लोऊ शै जादा आछै बलिदान कै जौरुरत थै।

²⁴ इयौं बौजैह शै, मसीह तैसी पवित्र ठाँव दा ना हुटी जू लोगै बाणै राए, जू कै साची पवित्र ठाँव का सिरफ ऐक नमूना औसौ। पौरौ सै अमारै खातिर पौरमेशवर कै सामणै हाजिर रौणौ कारिए सीधा स्वर्ग दा हौटा।

^25-26 महायहूदी पुरोहित खै हर साल ऐक बल़ि कौरेयौंदो जानवर का लोऊ लैयौ तोम्बू कै दूजै कोमरै दो जाणौ पौड़ौ थियु। पौरौ यीशु मसीहे ऐशै ना कौरी। जै ऐशै हौंदौ, तौ शुरुआत कै सौमय शै तैसीखै लगातार कैई बार बलिदान हौणौ पौड़दौ। पौरौ ऐबै इयौं दुनिया कै आखिर दा सै सौबी कारिए ऐकै बैई ओऊवा, ताकि आपी खै बलिदान कौरेयौ, सै अमारै पापौ खै दूर कौरे सौकौ।

²⁷ हरेक आदमी कै ऐक बैई मौरणौ तय औसौ। मौत कै बाद, पौरमेशवर हरेक आदमी का न्याय कौरदा।

²⁸ तैशैखैई, मसीह बै सिरफ ऐकै बैई बलिदान हौए गौआ ताकि सै सौबी लोगौ कै पापौ खै दूर कौरे दैंव। जोबै सै औटेयौ आन्दा तौ सै पाप कै बलिदान हौणौ कारिए ना आन्दा पौरौ तिनुखै बौचाणौ कारिए आन्दा जू तैसकी ठोल़नाए कौरौ।