इब्रानियों 8 - सिरमौरी नौवाँ नियम

स्वर्गीय महायहूदी पुरोहित

¹ ऐबै जू बातौ आमै बौल़ै रैई, तिनुमुंजी दै सौबी दी बौड़ै बात ऐजै औसौ, कै आमुकैंई निशोंक हौयौ ऐशणा महायहूदी पुरोहित औसौ, जू ऐबै बै स्वर्ग पांदी सौबीदै बौड़ै पौरमेशवर कै सिंहासन कै सोऐं ढौबौ बौठेयौंदा औसौ।

² औरौ अमारा महायहूदी पुरोहित पवित्र ठाँव दै सेवा कौरौ, यानी स्वर्ग दै साची मिलाप कै तोम्बू दै, जू आदमी कै दवारा नी पौरौ पौरमेशवर कै दवारा बाणै राए।

³ जिथुकै हरेक महायहूदी पुरोहित खै भैंट चौढ़ाणौ कारिए औरौ पापौ कै माफी कारिए बलिदान चौढ़ाणौ कारिए चुणो। इथकारिए जौरुरी औसौ कै अमारै महापुरोहित यीशु कैई बै किछै चौढ़ाणौ कारिए हौंव।

⁴ औरौ जै मसीह दुनिया पांदी हौंदा तौ कौलोंई बै पुरोहित ना हौंदा, जिथुकै मूसा कै कानून कै हिसाब शै भैंट चौढ़ाणौ कारिए औगौड़ियौ दा ही पुरोहित मौजूद औसौ।

⁵ सैजै जू पुरोहित कै रुप दै काम कौरौ, सै सौथीखै स्वर्ग दै औसौ सिरफ तैसकै ऐक नकल औरौ ऐक छांव औसौ। ऐजा सैजाई औसौ जू मूसा कै साथै थिया। जिथुकै जोबै मूसा मिलापवाल़ै तोम्बू खै बाणणौ कारिए तैयार हौए रौआ थिया, तोबै पौरमेशवरे तैसी चैतावणी दै, “दैख जू नमूना ताखै धारो पांदी दिखाए राए थिया, तिथकै हिसाब शै सौबै ठुँ बाणैया।”

⁶ पौरौ जू पुरोहित का काम यीशु मसीह खै भैटा, सै तैसी काम दा कौथी बौढ़ेयौ औसौ जू ओकी पुरोहितो खै दैय राए थिया। जिथुकै सै सैजाई औसौ जू महान वादो कै आधार पांदी, पौरमेशवर कै सामणै अमारै खातिर ऐक बैजाए महान वादै कै बीचवैई कौरौ।

नोऐं कौरार

⁷ जिथुकै जै सैजै आगलै कौरार निर्दोष हौंदै, तौ दूजी कौरार कारिए मौकै कै जौरुरत ही ना पौड़दै।

⁸ पौरौ पौरमेशवर लोगौ पांदी दोष लायौ बौल़ौ, “प्रभु बौल़ौ, दैखौ सैजै दूस आन्दै, कै हांव इस्राएल देश कै लोगौ कै साथै, औरौ यहूदा कै लोगौ कै साथै ऐक नौवें कौरार बाणदा।

⁹ ऐजै कौरार तैशै ना हौंदै जैशै मोऐं तिनकै पुराणिया कै साथै तैसी सौमय कौरे राए थै, जोबै मोऐं तिनका हाथ पाकड़ेयौ तिनु मिस्र देश शै बायरै निकाल़ैयो लाए। जिथुकै प्रभु बौल़ौ, तिनुऐ मैरी कौरार का पालन ना कौरी। इथकारिए मोऐं तिनकै फिकर कौरणै बंद कौरे दै।

¹⁰ तोबै प्रभु बौल़ौ, कै जू कौरार हांव आणौवाल़ै दूसौ दै इस्राएल देश खै लोगौ कै साथै कौरदा, सैजै ऐजै औसौ, कै हांव तिनु मैरै नियम कै बारै मुंजी सुंचणौ दैंदा, औरौ सै तिनु आपणै मन दै राखदै, औरौ हांव तिनका पौरमेशवर बौणदा, औरौ सै मैरै लोग हौंदै।

¹¹ औरौ सौबै जोणे आपणै देश कै रौणौवाल़ै खै औरौ रिशतेदारौ खै ऐजी शिक्षा ना दैन्‍दै, कै तुऐं प्रभु खै पौछेयाणौ जिथुकै नानड़ै लोगौ शै लैयौ बौड़ै लोगौ तौड़ी सौबवे जोणे जाणै पांदै कै हांव तिनका पौरमेशवर औसौ।

¹² हांव तिनकै दुष्ट कामौ कै प्रति दया दिखांदा, औरौ तिनकै पापौ खै औटेयौ याद ना कौरदा।”

¹³ पौरमेशवरे इथु ऐक नोऐं कौरार बौल़ै, इथकारिए तैणै आगलै कौरार खै पुराणी कौरे दी। औरौ जू किछै बै पुराणौ औसौ औरौ घिसै-पिटीयौंदौ औसौ तिथका नामोनिशान ना रौंदा।