इब्रानियों 6 - सिरमौरी नौवाँ नियम

भोटकणो का नतीजा

¹ इथकारिए आओ जू आमै आगली बैई मसीह खै बारै मुंजी शैखै राए, तिनु बुनियादी शिक्षाओं खै बार-बार नै बौल़ौ, आओ आमै मजबूत शिक्षाओं कै बारै मुंजी सलाह मोशौरा कौरु, बुनियादी शिक्षाओं कै नीयुं कै जैशणै नै बौणौ, यानी पाप कौरणै छोड़ दैणौ कै बारै मुंजी शिक्षाए, जू मौरणौ कै ढौबौ औरौ पौरमेशवर पांदी बिशवाश कौरणौ कै ढौबौ लोए जांव।

² औरौ आमु बपतिस्मा कै बारै मुंजी, औरौ कोसी पांदी हाथ राखैयौ आशीष दैणौ कै बारै मुंजी, औरौ मौरेयौंदे मुंजीदै जियुंदी हौणौ कै बारै मुंजी, औरौ आखरी न्यांव की शिक्षा कै नीयुं औटेयौ पाणौ कै जौरुरत ना आथी।

³ जै पौरमेशवर आमु मौका दैंव, तौ आमु परिपक्व शिक्षा कै ढौबौ आगै बौढ़णौ चैंई।

⁴ जिथुकै जू लोग आपणै बिशवाश कै छोड़ दैंव, तिनु औटेयौ पाप कौरणै छोड़ दैणौ कै ठाँव दै पाछु ना लाए सौकौ। तिनुऐ तियौं सौचाई कै पोछैयाणै जू पौरमेशवर कै ढौबौशै आंव, औरौ स्वर्ग शै वरदान पाए राए औरौ तिनु ओकीआरी मिलैयौ पवित्र आत्मा भैटी।

⁵ तिनुऐ महसूस कौरे राए थियु कै पौरमेशवर कै ढौबौशा आणौवाल़ा सौंदेश आछा औसौ औरौ तिनुऐ तैसी आणौवाल़ै सौमय कै शौकतै कै महसूस कौरे राए जू आणौवाल़ा औसौ।

⁶ तिनुखै औटेयौ पाछु लाणौ कै कुणजै बाट ना आथी जिथुकै सै पौरमेशवर कै बैटै खै औटेयौ क्रूसो पांदी चौढ़ांव औरौ ओकी कै मसीह का मजाक कौरणौ कै बौजैह बौणौ।

⁷ जिनु लोगौ खै आछी शिक्षा भैटौ, सैजै तियौं जोमीनो कै जैशणै औसौ जिथपांदी बार-बार बौरखा पौड़ौ। जै जोमीन आछी औसौ, तौ सै तिनु लोगौ कै खातिर फायदैमंद पौधे जौमांव, जिनु कारिए इथपांदी खेती कौरे लौए औरौ इथपांदी पौरमेशवर कै आशीष हौंव।

⁸ औकै लोग तियौं जोमीनो कै जैशणै औसौ जू कांडे औरौ झाड़ी जौमांव औरौ ऐजौ बैकार औसौ। ऐजै पौरमेशवर कै दवारा शरापित हौणौ कै खतरै दै औसौ औरौ ऐजै आगै लैई नाश हौए जांदै।

⁹ पौरौ ओए रै मैरै प्यारे बिशवाशी भाईयों! तुऐं आछा काम कौरे लौआ। जिथुकै पौरमेशवरे आगैई तुऔं बौचाए राए। इथकारिए ऐजी चैतावणी तुऔं कारिए औसौ।

¹⁰ पौरमेशवर धरमी औसौ; सै तिनु कामौ खै जू तुऐं कौरौए औरौ तैसी प्यार खै ना बिसरौ जू तुऐं ओकी बिशवाशी कै मौदद कौरेयौ तैसीआरी दिखाए राए। औरौ सै याद राखदा कै तुऐं ऐबै बै तिनकै मौदद कौरे लोए।

^11-12 आमै ना चोऊं कै तुऐं सुस्त बौणौ। पौरौ आमै चोऊं कै तुऐं कड़ी मैहनत कौरणौवाल़ै कै जैशणै प्यार कै कामौ खै कौरणा जारी राखौ, आखरी तौड़ी धीरज औरौ बिशवाश दै मोजबूत बौणैयौंदे रौव। औरौ मोजबूत आशा राखौ ताकि पौरमेशवर कै वादै खै पाए सौकौ।

पौरमेशवर का अटल वादा

¹³ औरौ पौरमेशवरे अब्राहम आरी वादा कौरदै बैई आपणै नांव कै शौं खाए; जिथुकै तैसदा बौड़ा कुणिए ना आथी, जैसकौ नांव लौयौ सै शौं खाए सौकौ थिया।

¹⁴ “हांव सौथी कै ताखै बैजाए आशीष दैन्‍दा, औरौ ताखै कैई संतान दैंदा।”

¹⁵ अब्राहमै सब्र राखैयौ लाम्बै सौमय तौड़ी इंतजार कौरा। तोबै तैसी सैजौ भैटौ जिथका वादा पौरमेशवरे कौरे राए थिया।

¹⁶ शौं खांदै बैई लोग सौदा आपणै दै बौड़ै कोसी आदमी कै नांव का इस्तैमाल कौरौ। शौं ऐजौ साबित कौरौ कै जू तिनुऐ बौल़ै लो सैजौ साचौ औसौ, औरौ ऐजौ हरेक बैहस खै खत्म कौरे दैंव।

¹⁷ इथकारिए पौरमेशवरे बै ऐक शौं खाए। इथकै दवारा सै तिनु लोगौ खै जिनु आरी वादा कौरे राए थिया ऐजौ दिखाणौ चांव थिया कै सै सैजौ पूरु कौरदा जिथका तैणै वादा कौरे राए थिया।

¹⁸ तौ तोबै ऐजी दौ बातौ औसौ तैसका वादा औरौ तैसकै शौं जू कौलोंई ना बौदलै सौकौ औरौ जिथकै बारै मुंजी पौरमेशवर कौलोंई झूठु ना बौल़ै सौकौ। इथकारिए आमै जू पौरमेशवर कै नेड़िक रक्षा पाणौ खै ओऊं औरौ जू आशा तैणै आमु दैय राए, तियौं थाम्बैयौ, बैजाए खुशी औसौ।

¹⁹ ऐजी आशा जू अमारै जिन्दगी दै औसौ ऐजी मोजबूत औसौ औरौ इयौं हिंजाल़ियौ ना। ऐजी आमु पौरमेशवर शै दूर जाणौ ना दैंव, पौरौ ऐजी आमु मंदिरो कै भीतरै महापवित्र ठाँव दै पौरमेशवर कै नेड़िक नियौ।

²⁰ यीशु आमुदा आगै औरौ अमारै खातिर स्वर्ग दा हौटा। सै महापुरोहित मलिकिसिदक कै जैशणा सौदा कारिए महायहूदी पुरोहित बौणै गौआ।