इब्रानियों 5 - सिरमौरी नौवाँ नियम

महायहूदी पुरोहित कारिए योग्यता

¹ हरेक महायहूदी पुरोहित इस्राएल देश कै लोगौ मुंजीदा चुणा जांव, औरौ आदमियों कै ही खातिर पौरमेशवर कै सेवा कौरणौ कारिए चुणा जांव ताकि सै भैंट चौढ़ाया कौरौ औरौ लोगौ कै पापौ कारिए बल़ि चौढ़ाया कौरौ।

² जिथुकै ऐक आदमी हौणौ कै नातै सै आपी बै कमजोरियों खै अधीन औसौ। इथ बौजैह शै सै नासमझ औरौ भोटकैयोंदै लोगौआरी प्यार शै बर्ताव कौरे सौकौ।

³ औरौ जिथुकै सै आपी कमजोर औसौ, तैसी कारिए ऐजौ जौरुरी औसौ कै ना सिरफ सै लोगौ कै पापौ कारिए बल्कि आपणै पापौ कारिए बै बलिदान चौढ़ांव।

⁴ औरौ कुणिए बै आदमी महायहूदी पुरोहित हौणौ का पद आपी ना लौए सौकौ। जैशैखै पौरमेशवरे हारून खै औगौड़ियौ महायहूदी पुरोहित कै रुप दा बौईदा औरौ चुणा, तैशैखैई सै ओकी महायहूदी पुरोहितो खै बौईदो औरौ चुणौए।

हमैशा कारिए महायहूदी पुरोहित

⁵ तैशैखैई, मसीहे बै आपी खै महायहूदी पुरोहित बौणैयौं आपी खै आदर दैणौ का फोयसला ना कौरी। पौरौ पौरमेशवरे मसीह का ऐजौ बौलेयौ आदर कौरा कै, “तू मैरा बैटा औसौ, ऐलो हांव ऐजौ साबित कौरु कै हांव ही तैरा पिता औसौ।”

⁶ तैशैखैई ओकी ठाँव पांदी पौरमेशवरे तैसी औटेयौ बौल़ौ, “तू तैशैखैई जैशैकै मलिकिसिदक ऐक पुरोहित थिया हमैशा पुरोहित बौणेयौंदा रौंदा।”

⁷ जोबै यीशुए इयौं धोरती पांदी कै पूरै जीवन दी पौरमेशवर शै जोर-जोर शै लैलियायो औरौ रुंदै बैई, प्रार्थनाए औरौ बिन्ती कौरी जू तैसीखै मौत शै बौचाए सौकौ थिया, तौ पौरमेशवरे तैसकै प्रार्थना शौणै जिथुकै सै नम्र औरौ जिमैदार थिया।

⁸ जौबेकै, यीशु पौरमेशवर का बैटा थिया, तैणै तिनु दुखो कै दवारा जू तैणै सैय, पौरमेशवर कै आज्ञाओं का पालन कौरणा शिखा।

^9-10 पौरमेशवरे मलिकिसिदक कै जैशणा तैसी महायहूदी पुरोहित का आदर दिया औरौ तैसी सिध्द बाणा औरौ सै तिनु सौबी लोगौ कै खातिर मोक्ति कै शुरुआत बौणै गौआ जू तैसकी आज्ञा मानौ।

आत्मिक जीवन दै कमजोर

¹¹ इथकै बारै मुंजी बौताणौ कारिए बैजाए औसौ पौरौ तिथकै बारै मुंजी खौलेयौ बौताणौ चैईथु औसौ। जिथुकै तुऐं पौरमेशवर कै वचन कै बारै मुंजी शिखणौ दै सुस्त हौए गौवै।

¹² तुऐं लाम्बै सौमय शै बिशवाश कौरदै आए रौवै। इबी तौड़ी तौ तुऔं खै शिखाणै वाल़ै हौए जाणौ चैंई थियु। इथकै बजाय, तुऔं इबी बै कोसी कै जौरुरत औसौ जू तुऔं पौरमेशवर कै वचनो की बुनियादी शिक्षा औटेयौ शिखांव। तुऐं तौ ऐशणै हौए गौवै, मानौ नानड़िया ही हौलै। काठौ खाणौं खाणौ कै बजाय, तुऔं खै इबी बै दूध ही चैंई।

¹³ जिथुकै दूध पिणौ वाल़ै तौ धरम कै काम कौरणौ कै बारै मुंजी पवित्र शास्त्र की शिक्षाओं औरौ पौरमेशवर कै सौंदेश खै ना जाणौ जिथुकै सै नानड़िया औसौ।

¹⁴ बढ़िया नाज़ सिरफ तिनु लोगौ कै खातिर औसौ जू मोजबूत औसौ, औरौ पौरमेशवर कै नज़र दै सोही जीवन जियौं औरौ शिक्षा कै दवारा शैखै गौवै कै का आछौ औसौ औरौ का बुरु औसौ।