इब्रानियों 4 - सिरमौरी नौवाँ नियम

पौरमेशवर कै लोगौ कौ विशांव कै ठाँव दो जाणौ

¹ इथकारिए, जोबै कै विशांव कै ठाँव दा जाणौ का वादा ऐबै बै औसौए, तौ आमु बैजाए चौकश रौणौ चैंई; औरौ तुऔं मुंजीदै कोसी खै बै तैसी विशांव कै ठाँव पांदी जाणौ का मौका ना छोड़णा चैंई।

² जिथुकै जैशै आमुए यीशु मसीह कै बारै मुंजी सुसमाचार शुणा, तैशैखैई इस्राएल देश कै लोगै बै विशांव कै ठाँव दा जाणौ का सुसमाचार शुणा। पौरौ तिनुऐ इथपांदी बिशवाश ना कौरी। इथकारिए सैजा सौंदेश तिनु कारिए बैकार थिया।

³ इथकारिए आमै लोग जू तियौं बातौ पांदी बिशवाश कौरु जू पौरमेशवरे बौल़ै राए, विशांव कै ठाँव दै प्रवेश कौरदै; औरौ ओकी कै बारै मुंजी पौरमेशवरे बौल़ौ, “मोऐं आपणै गुस्से दै शौं खाए, कै सै मैरै विशांव दै ना जांदै।” पौरौ आमै जाणुए कै ऐजा विशांव का ठाँव दुनिया कै बाणणौ कै सौमय शै ही थिया।

⁴ जिथुकै सातवें दूसौ कै बारै मुंजी पौरमेशवरे पवित्र शास्त्र दो ऐशैखै बौल़ै राए, “पौरमेशवरे सातवें दूसै आपणै सौबै कामौ खै निपटायौ विशांव कौरा।”

⁵ औरौ पवित्र शास्त्र दो ऐजौ बै पौढुए कै तैणै बाद मै बौल़ौ, “सैजै मैरै विशांव कै ठाँव दै जाए ना पांदै।”

⁶ पौरौ लोगौ खै तैसी विशांव ठाँव दै जाणौ का मौका ऐबै बै औसौए। इस्राएल देश कै सैजै लोग जिनुमुंजी आगलै बैई सुसमाचार कै घोषणा कौरे राए थै, सै प्रवेश कौरणौ दै नाकामयाब हुवे जिथुकै तिनुऐ पौरमेशवर कै आज्ञा ना मानी।

⁷ इथकारिए पौरमेशवरे आपणै विशांव कै ठाँव पांदी भैजणौ कारिए ओका सौमय तय कौरा, औरौ सैजा सौमय ऐलो औसौ। कैईंयौं सालो कै बाद तैणै दाऊदो लैई इनु वचन कै घोषणा कौरवाए, जू ऐलो कै सौमय शै हज़ारो साल आगैई बौल़ै राए थिए: “जै ऐलो तुऐं पौरमेशवर कै आवाज़ शुणौ, तौ तैसकै आवाज़ शुणणौ शै मोना नै कौरौ।”

⁸ आमै ऐजौ बै जाणुए कै पौरमेशवरे जैसी विशांव कै ठाँव का वादा कौरे राए, सैजा कनान देश ना आथी, जिथमुंजी जाणौ कारिए यहोशूए अमारै पुराणिया कै अगुवाई कौरे। जिथुकै जै ऐजा कनान देश हौंदा तौ पौरमेशवर बाद मै ऐक औकै विशांव कै बारै मुंजी चौर्चा नी कौरदा।

⁹ इथकारिए पौरमेशवर कै लोगौ कारिए ऐबै बै ऐक ठाँव तैयार औसौ, जिथै सै पूरी तरह शै विशांव कौरे सौकौ। सै तैशैखैई विशांव कौरौ जैशै पौरमेशवरे सातवें दूसै विशांव कौरा।

¹⁰ जिथुकै पौरमेशवरे आपणा काम खत्म कौरणौ कै बाद विशांव कौरा, औरौ ऐजौ तिनु सौबी कारिए बै ऐशैखैई औसौ जू पौरमेशवर कै धोरे विशांव कौरदै जांव। सै आपणा काम खत्म कौरणौ कै बाद विशांव कौरदै।

¹¹ इथकारिए आमु तैसी विशांव कै ठाँव दै जाणौ कारिए कड़ी मैहनत कौरणी चैंई, कोसी बै आदमी खै तिनु लोगौ कै उदारण कै नकल नी कौरणै चैंई, जिनुवै पौरमेशवर कै आज्ञा मानणौ शै मोना कौरे दियु। तोबैई आमै तैसी विशांव कै ठाँव दै जांदै।

¹² जिथुकै पौरमेशवर का वचन जियुंदी औरौ काम कौरणौवाल़ा औसौ, सै कियौंई दौ धार वाल़ी तलवार दा बै जादा पौईना औसौ। सै प्राण औरौ आत्मा खै, गांठ औरौ मैंजै कै जौई कौरौ औरौ अमारै मन की इछाओं औरौ विचारो खै पौरखै पांव।

¹³ औरौ दुनिया कै कुणजै चीज़ पौरमेशवर शै छिपै ना रैई, जू किछै बै आमुए आपणै जीवन दौ कौरे राए, आमु तैसी हर काम का हिसाब दैणा पौड़दा, जिथुकै तैसकै सामणै सौबै चीज़ौ खोल़ेयौंदी औरौ प्रकट औसौ।

अमारा बौड़ा महायहूदी पुरोहित

¹⁴ अमारा महान महायहूदी पुरोहित यीशु जू स्वर्ग खै हौटा, सै पौरमेशवर का बैटा औसौ। सै अमारा सौबिदा बौड़ा महायहूदी पुरोहित औसौ। इथकारिए आओ आमु तैसी बिशवाश खै थाम्बैयौ मोजबूती शै बौणैयौंदे रौंऊ जैसी बिशवाश खै आमुए सौबी कै सामणै अपनाए राए थिया।

¹⁵ जिथुकै ऐजा महायहूदी पुरोहित, जू यीशु मसीह औसौ, अमारी हरेक कमजोरी खै सौमझौ; यानी यीशुए अमारी जैशणी हर भान्त की परीक्षा का सामणा कौरा, पौरौ तैणै कुणजाई बै पाप ना कौरी।

¹⁶ इथकारिए आओ, आमु हिम्मत कै साथै पौरमेशवर कै धोरे ओऊं, जू अनुग्रह लैई भौरेयौंदा औसौ तोबै पौरमेशवर आमु दया औरौ अनुग्रह दिखांदा औरौ जोबै आमु जौरुरत हौलै तोबै सै अमारै मौदद कौरदा।