इब्रानियों 3 - सिरमौरी नौवाँ नियम

मूसा बिशवाश लायक दास: मसीह बिशवाश लायक बैटा

¹ इथकारिए, ओए रै बिशवाशी भाईयों तुऔं जू स्वर्ग दै तैसकै साथै शामिल हौणौ कारिए बौएदै राए, मसीह यीशु पांदी ध्यान दैव, सै अमारै खातिर पौरमेशवर का चोणेयौंदा चैला औरौ महायहूदी पुरोहित औसौ।

² यीशु पौरमेशवर कै प्रति ईमानदार थिया, जैणै तैसी ऐजा काम कौरणौ कै खातिर चोणे राए थिया, ठीक तैशैखैई, मूसाए बै ईमानदारी कै साथै सैजौ सौबै ठुँ कौरौ जू पौरमेशवरे तैसी कौरणौ कारिए दैय राए थियु।

³ जैशैखै घोर बाणणौवाल़ै आदमी खै घौरौ पुंडा जादा आदर भैटौ, तैशैखैई यीशु मूसा कै तुलना दा जादा आदर कै लायक औसौ।

⁴ जिथुकै हरेक घौरौ का कुणिए ना कुणिए बाणणौवाल़ा हौंव, पौरौ जैणै सौबै ठुँ बाणै राए सै पौरमेशवर औसौ।

⁵ मूसा तौ पौरमेशवर कै सौबै लोगौ कै खातिर सेवक कै जैशणा ईमानदार रौआ, जू काम मूसाए कौरे, सैजै सिरफ तिनु बातौ कै साची उदारण थिए, जू पौरमेशवर आणौवाल़ै सौमय दौ बौलदा।

⁶ पौरौ मसीह, बैटै कै रुप दा आपणै लोगौ मुंजी ईमानदार औसौ औरौ सैजै लोग आमै औसौ, आमै तैसका परिवार औसौ, जै आमै आपणी उमीद पांदी धीरज औरौ गर्व राखणा जारी राखु, तौ आमै पौरमेशवर कै लोग औसौ।

बिशवाश ना हौणौ कै प्रति चैतावणी

⁷ इथकारिए जैशै पौरमेशवर आपणै आत्मा कै दवारा बौल़ौ, जै ऐलो तुऐं पौरमेशवर कै आवाज़ शुणौ,

⁸ तौ तैसकी आज्ञा मानणौ शै मोना नै कौरौ, जैशै तोंवारै पुराणियाए कौरौ, जिनुवै रेगिस्थान दौ परीक्षा कै सौमय पौरमेशवर कै खिलाफ विद्रोह कौरा।

⁹ तिथै तोंवारै पुराणियाए मैरै परीक्षा कौरे औरौ मुखै पोरखा, जोबै कै तिनुऐ चाल़ीश सालो तौड़ी मैरै चौमत्कार कै काम दैख राए थिए।

¹⁰ इथकारिए हांव तैसी सौमय खै लोगौ दा गुस्से रौआ, औरौ मोऐं बौल़ौ तिनुऐ मुखै औपनेई ना औरौ मोऐं जू कौरणौ कै आज्ञा दैय राए थै, सै तिथु कौरणौ कै भाजै गौवै।

¹¹ तोबै मोऐं गुस्से दै आयौ शौं खाए, सै मैरै विशांव कै ठाँव दै जाए ना सौकदै।

¹² ओए रै बिशवाशी भाईयों चौकश रौंव, कै तुऔं मुंजीदा ऐशणा बुरा औरौ अबिशवाशी मन नी हौंव, जू जीवन दैणौवाल़ै पौरमेशवर का पीछा कौरणौ शै मौना कौरे दैंव।

¹³ पौरौ जांव तौड़ी सैजौ मौकै कौ दूस, जिथु पवित्र शास्त्र दौ “ऐलौ कौ दूस” बौल़ौ, तोंवारै सामणै औसौ, रौज ऐकी दूजै खै हिम्मत दैंदै रौव। ऐशै ना हौं कै तुऔं मुंजीदै कुणिए पाप कै बैहकावै दै आयौ ढीठ नी बौणै जांव।

¹⁴ जिथुकै जै आमै तैशैखैई बिशवाश कै साथै आखरी तौड़ी मोजबूत बौणैयौंदे रोऊंबे, तौ जैशणा बिशवाश आमुदा शुरुआत शै थिया, तोबै आमै मसीह कै सहयोगी बौणै जांदै।

¹⁵ जैशैकै पवित्र शास्त्र दो लैखै राव, “जै ऐलो तुऐं पौरमेशवर कै आवाज़ शुणौ, तौ तैसकी आज्ञा मानणौ शै मोना नै कौरौ, जैशै तोंवारै पुराणियाए परीक्षा कै सौमय पौरमेशवर कै खिलाफ विद्रोह कौरे राए थिया।”

¹⁶ भला कुणजै लोग पौरमेशवर कै आवाज़ शोणेयो तैसकै खिलाफ हुवे? सैजै इस्राएल देश कै लोग औसौ जिनुखै मूसाए अगुवाई कौरेयौ मिस्र देश शै बायरै लियोऊवे।

¹⁷ औरौ कौणै पौरमेशवर खै चाल़ीश सालो तौड़ी गुस्सा दियौऊवा? ऐजै इस्राएल देश कै लोग थिए जिनुवै रेगिस्थान दा पाप कौरा औरौ मौरे गौवै।

¹⁸ औरौ जोबै पौरमेशवरे सख्ताई शै घोषणा कौरे कै, सैजै कौलोंई बै तियौं जोमीनो पांदी जाए ना सौकदै जिथै हांव तिनु विशांव दैंदा, तौ तैणै निशोंक हौयौ तिनु लोगौ कै बारै मुंजी बौल़ै लौ जिनुवै आज्ञा ना मानी।

¹⁹ आमु पौता चालै गौआ कै बिना बिश‍वाश की बौजैह शै सैजै विशांव कै ठाँव दै जाए ना सौकौ।