इब्रानियों 2 - सिरमौरी नौवाँ नियम

मोक्ति कै अनदैखी कौरणौ खै खिलाफ चैतावणी

¹ इथकारिए आमु आपणै दवारा शोणेयौंदी सौचाई खै बैजाए ध्यान शै पालन कौरणा चैंई, ऐशै नै हौंव कै बैहकेयौ तिनुदै दूर हौटै जोऊं।

² जिथुकै पौरमेशवर का कानून जू स्‍वर्गदूतौ कै दवारा दैय राए थिया, सौदा साचा साबित हौए रौआ औरौ लोगौ खै मूसा कै कानून कै कुणजै बै आज्ञा टाल़नो पांदी सौजा भैटौ थै।

³ इथकारिए निशोंक हौयौ आमु बै सौजा भैटदै जै आमै इयौं महान मोक्ति कै नी मानु। सौबीदु आगै प्रभु यीशु मसीहे आपी ऐसी उध्दार कै बारै मुंजी बौतौऊ, औरौ जिनु चैलै तैसी शौणै राए थिया, तिनुऐ आमु पांदी प्रकट कौरौ कै ऐजौ साचौ औसौ।

⁴ पौरमेशवरे बै अनौखै कामौ, औरौ बौड़ै-बौड़ै निशानो, औरौ कैईंयौं भान्त कै चौमत्कार लैई औरौ पवित्र आत्मा लैईबा लोगौ खै वरदान दैयौ इथु साबित कौरौ, ठीक तैशैखैई जैशै सै चांव थिया।

⁵ पौरमेशवरे तियौं आणौवाल़ै दुनिया खै, जिथकै बारै मुंजी आमुए बौल़ै लो, स्‍वर्गदूतौ कै अधीन नी, पौरौ प्रभु यीशु कै अधीन कौरे राए।

⁶ पवित्र शास्त्र दै कौथी, ऐजै गवाही दैय राए, “आदमी का औसौ, कै तू तैसी याद कौरे? या लोग का औसौ कै पौरमेशवर तिनकै फिकर कौरौ या तिनकै दैखभाल कौरौ? सैजै लोग आदमी दै जादा हौजौ किछै ना आथी?

⁷ तोऐं यीशु खै स्‍वर्गदूतौ शै कम शौकतीशाली कौरा औरौ तोऐं तैसी ऐकी राजा कै जैशणा महिमा औरौ आदर दिया औरौ आपणी सौबै चीज़ौ तैसकै अधीन कौरे दी।

⁸ तोऐं तैसी सौबै चीज़ौ पांदी औधिकार दिया।” इथकारिए जोबै कै पौरमेशवरे सौब ठुँ आदमी कै अधीन कौरे राए, तौ तैणै किछै ना राख रैई, जू आदमी कै अधीन नै हौं। पौरौ आमै दैख सौकु कै ऐलो तौड़ी बै सौब ठुँ आदमियों कै अधीन ना आथी।

⁹ पौरौ साचौ ऐजौ औसौ कै दैणिक सौमय कारिए, यीशु का दर्जा स्‍वर्गदूतौ कै तुलना दा कम कौरे राए। ताकि पौरमेशवर कै अनुग्रह शै यीशु मसीह सौबी लोगौ कै खातिर मौरे जांव। औरौ जिथुकै यीशुए दुख सोऊवा औरौ मौरे गौआ, पौरमेशवरे तैसी महिमा औरौ आदर दिया।

¹⁰ पौरमेशवरे इनु सौबी चीज़ौ खै बाणी औरौ सौबै चीज़ौ खै आपी कारिए संभाल़ेयौ राखी। इयौं बौजैह शै, कै बैजाए लोगौ खै आपणी महिमा दै साझा कौरौ, पौरमेशवरे ऐजा फोयसला लौआ कै ऐजौ सोही हौंदौ कै प्रभु यीशु दुख सैयौ सिध्द बौणै जांव जू चाल-चलन दा साफ औसौ। जिथुकै यीशु ही औसौ जू तिनु उध्दार कै ढौबौ लौए जांव।

¹¹ जिथुकै जू लोगौ खै तिनकै पापौ शै शुध्द कौरौ औरौ जू पवित्र लोग आपणै पापौ शै शुध्द कौरे जांव सौबै ऐकैई पिता कै संतान औसौ, यानी पौरमेशवर तिनका पिता औसौ, इयौं बौजैह शै यीशु तिनु भाईटु बौलणौ शै ना शर्मावं।

¹² इथकै बारै मुंजी पौरमेशवर शै मसीह बौल़ौ, “जू भले काम तुऐं मैरै खातिर कौरे राए, सैजै काम हांव आपणै लोगौ खै बौतांदा, जोबै सै आराधना कै खातिर कौठै हौंदै तोबै हांव तैरै महिमा कौरदा।”

¹³ औरौ तोबै सै हौजौ बौलदा, “हांव तैसी पांदी भोरोशा राखु।” औरौ सै हौजौ ऐजौ बै बौल़ौ, “इथै हांव तिनु लोगौ कै साथै औसौ जिनु पौरमेशवरे मुखै दैय राए, सैजै नानड़िया कै जैशणै औसौ।”

¹⁴ जिथुकै जिनु पौरमेशवरे नानड़िया बौलेयौ बौएदै राए, तिनका ऐक आदमी कै जैशणा शोरीर थिया। औरौ यीशुए आपी अमारै जैशणा आदमी का शोरीर धारण कौरा ताकि सै आपणी मौत लैई मौत पांदी औधिकार राखणौवाल़ै शैतान खै नाश कौरौ।

¹⁵ औरौ ऐशैखैई प्रभु यीशुए तिनु सौबी खै आज़ाद कौरे दियै, जू हर सौमय गुलामो कै जैशणै रौंव थिए जिथुकै सै मौरणौ दै डौरौ थिए।

¹⁶ जिथुकै ऐजौ साफ औसौ कै सै स्‍वर्गदूतौ कै मौदद कौरणौ कै नी, पौरौ अब्राहम कै वंशज कै मौदद कौरदा आए रौआ थिया।

¹⁷ इयौं बौजैह शै यीशु कारिए ऐजौ जौरुरी थियु, कै सै हर बातौ दा आमु जैशणा बौणै जांव, ताकि पौरमेशवर कै धोरे अमारा दयालु औरौ बिशवाश लायक महायहूदी पुरोहित बौणै सौकौ। तोबै सै ऐशणा बलिदान चौढ़ाए सौकौ थिया, जिथलैई लोगौ कै पाप दूर हौए जांदै।

¹⁸ जिथुकै यीशु कै परीक्षा हौए औरौ तैणै आपी दुख झैला। इथकारिए ऐबै सै तिनु लोगौ कै मौदद कौरे सौकौ, जू परीक्षा दै पौड़ेयौंदे औसौ।