इब्रानियों 13 - सिरमौरी नौवाँ नियम

मसीह जीवन जीणो कै नियम

¹ ऐकी दूजै कै फिकर कौरदै रौव जैशै प्रभु कै चैलै खै कौरणी चैंई।

² अज़नबियौ कै बै मैहमान नवाज़ी दिखाणै याद राखैया। जिथुकै इथलैई कैतरै आदमीए अणजाणै दा स्‍वर्गदूतौ का आदर सत्कार कौरा।

³ कैदियों खै ऐशणै याद कौरौ, कै मानौ तिनकै साथै तुऐं बै कैद औसौ; औरौ जू सोताएयौंदे लोग औसौ, तिनकै साथै तुऐं बै आपणै शोरीर दो ऐशै महसूस कौरौ जैशै तुऐं बै पीड़ो सौय लोई।

⁴ बैयाव कै सौबी कै दवारा आदर कौरा जाणा चैंई, औरौ हमैशा घोरवाल़ा औरौ घोरवाल़ी ऐकी दुजैआरी भरोसेमंद रौंव। औरौ बैयाव बिछाणा साफ रौंव, जिथुकै पौरमेशवर गौलत काम कौरणौवाल़ै औरौ बैटमाणिशौ कै बैटमाणिशौ कै साथै गौलत काम का न्याय कौरदा।

⁵ आपणै जीवन कै धन कै लालच शै आज़ाद राखौ। औरौ जू तुऔं कैई औसौ, तिथमुंजी खुशी रौंव; जिथुकै पौरमेशवरे आपी बौल़ै राए, “हांव ताखै कौलोंई बै ना छोड़दा, औरौ ना कौलोंई बै ताखै त्यागदा।”

⁶ इथकारिए आमै हिम्मत कै साथै, बुलू, “प्रभु मैरा मौददगार औसौ; हांव ना डौरदा; कै कुणिए बै आदमी मैरै साथै का, कौरे सौकौ।”

⁷ जू तोंवारै अगुवे थिए, औरौ जिनुवै तुऔं पौरमेशवर का वचन शुणौऊवा, तिनु याद राखौ औरौ ध्यान शै दैखौ कै तिनुऐ कैशै आपणा जीवन जिया औरौ इथै तौड़ी कै सै मोरदै दम तौड़ी बिशवाश लायक रौवै, पौरमेशवर पांदी तैशणा ही भोरोशा राखौ जैशणा तिनुऐ दिखाए राए थिया।

⁸ यीशु मसीह दोतियो औरौ ऐलो औरौ हमैशा ऐक जैशणा औसौ। सै कौलोंई ना बौदलौ।

⁹ औरौ इथकारिए आमु इनु सौबै नुई औरौ जौई-जौई शिक्षाओं कै तरह नी कौरणौ चैंई जू तुऔं गौलत बाटौ ढौबौ लोय जांव, जिथुकै तोंवारै मन खै पौरमेशवर कै अनुग्रह लैई मोजबूत हौणौ चैंई, ना कि खाणौ की चीज़ौ कै नियमौ कै मानणौ कै दवारा, जिथलैई काम राखणौवाल़ै खै किछै फायदा ना हौंव।

¹⁰ सैजै पुरोहित जू यहूदी भोवारो कै हिसाब शै पौरमेशवर कै सेवा कौरौ, तिनु यीशु कै कौरेयौंदे बलिदान शै कुणजाई फायदा ना भैटौ।

¹¹ आगलै कौरार कै हिसाब शै, महायहूदी पुरोहित हर साल पशु का लोऊ पाप बल़ि कारिए सौबीदै पवित्र ठाँव दा पापौ कै माफी कारिए लौए जांव थिया, पौरौ पशु कै शोरीरो कै आदमी कै डैरै शै बायरै कौथी दूरकै जोल़ाए जांव थिए।

¹² इथकारिए यीशुए बै लोगौ खै आपणै ही लोऊ लैई पवित्र कौरणौ कारिए यरूशलेम कै बायरै दुख उठौऊवा औरौ मौरे गौआ।

¹³ इथकारिए आव आमै बलिदान कै नियम कै छोड़ेयौ यीशु पांदी बिशवाश कौरु औरौ डैरै कै बायरै जोऊं, जिथै लोग ना रौंव जैशै तैणै नेंदैया सैहन कौरे, तैशै ही आमु बै नेंदैया सैहन कौरु।

¹⁴ जिथुखै ऐजी दुनिया अमारा सौदा का घोर ना आथी यानी कै आमै आणौवाल़ै नगर कै खोज़ दै औसौ।

¹⁵ इथकारिए आओ आमै आपणै ओठो लैई पौरमेशवर कै स्तुति कौरदै रौंव। ऐजौ तैसखै खातिर अमारा बलिदान औसौ, यानी तिनु ओठो का फोल़ जू तैसकै नांव कै मानौ औरौ पौरमेशवर कै खातिर हमैशा चौढ़ाया कौरौ।

¹⁶ पौरौ भोलाए कौरणै औरौ जू किछै तुंवागै औसौ तिथु जौरुरतमंद कै दैणौ चैंई। जिथुकै पौरमेशवर ऐशणै बलिदानों लैई खुश हौंव।

प्रार्थना कै बिन्ती

¹⁷ आपणै अगुवो कै आज्ञा मानौ; औरौ तिनकै अधीन रौव, तुंआरी आत्माओं कै रोखवाल़ी कौरणै तिनका काम औसौ। तिनु तोंवारै बारै मुंजी पौरमेशवर खै लैखा दैणा पौड़दा कै सै ऐजा काम खुशी लैई कौरौ, औरौ ऐसी काम कै उदासी शै ना कौरौ, तोबै तुऔं कुणजाई फायदा ना भैटदा।

¹⁸ अमारै खातिर प्रार्थना कौरदै रौव, जिथुकै आमै निशोंक हौयौ जाणुए, कै अमारा विवेक शुध्द औसौ, औरौ आमै जू बै काम कौरो तिनु सौबी कामौ दा पौरमेशवर का आदर कौरणा चांव।

¹⁹ प्रार्थना कौरणौ कारिए हांव तुऔं हौजौ बै हौंसला दियु, ताकि हांव तावल़ा तोंवारै धोरे औटेयौ आए सौकु।

आर्शीवाद

^20-21 औरौ ऐबै शान्तै का पौरमेशवर, जैणै अमारै प्रभु यीशु खै मौरेयौंदे मुंजीदा औटेयौ लियोऊवा, तुऔं तिनु सौबी चीज़ौ लैई भरपूर कौरौ जिथकी तुऔं तैसकै इछा पोरे कौरणौ कारिए जौरुरत औसौ। यीशु मसीह कै शौकतै कै दवारा तैणै तुऔं मुंजी सैजौ सौबै पौयदा कौरे राए जू तैसी खुशी कौरौ। यीशु हमैशा कै कौरार कै दवारा भेड़ो का महान रोखवाल़ा बौणै गौआ, तैणै आपणी मौत शै आपणै भेड़ो कै झुंड कै साथै कौरार कै स्थापना कौरे जू हमैशा कारिए बौणैयौंदे रौंदी। आमीन।

²² ओए रै बिशवाशी भाईयों, हांव तुऔं कैईंदै बिन्ती कौरु, कै ऐसी सौंदेश कै धीरज शै शुणौ जू मोऐं तुऔं हौंसला दैणौ कारिए लैख राए। जिथुकै मोऐं तुऔं बैजाए विस्तार शै लैख राए।

²³ तुऐं ऐजौ जाणै पाव कै तीमुथियुस अमारा बिशवाशी भाई कोयदखाने पौरैशा बायरै आए गौआ औरौ जै सै तावल़ा आए गौआ, तौ हांव तैसकै साथै तुऔंआरी भैटिंदा।

²⁴ आपणै सौबी अगुवो औरौ सौबै पवित्र लोगौ खै नमशकार बौल़ौ, इटली देश कै बिशवाशी तुऔं कै नमशकार बौल़ौ।

²⁵ तुऔं सौबी पांदी पौरमेशवर का अनुग्रह हौंदा रौंव।