इब्रानियों 11 - सिरमौरी नौवाँ नियम

बिशवाश कै जौहदा

¹ जू लोग पौरमेशवर पांदी भोरोशा राखौ तिनु निशोंक हौयौ सैजौ ही भैटदौ जिथकै आमै आशा राखु औरौ ऐजा भोरोशा राखणा चैंई कै जू चीज़ौ आमै दैख ना सौकु सैजी सौथीखै औसौ।

² अमारै पुराणिया का ऐशणा बिशवाश थिया। सिरफ इयौं बौजैह शै पौरमेशवर तिनुदा खुशी थिया।

³ बिशवाश लैई आमै जाणै जांदै, कै सारी दुनिया कै रचना पौरमेशवर कै वचन लैई हौए रौए। इथकारिए आमै जू बै दैख राए सै तिनु चीज़ौ लैई ना बौणै रैई जिनु दैख ना सौकौ।

⁴ बिशवाश लैई आदम कै बैटै हाबिलै आपणै बौड़ै भाई कैन दा बड़िया बलिदान पौरमेशवर कारिए चौढ़ौऊवा; औरौ बलिदान कै दवारा गवाही दैय कै हाबिल ऐक धरमी आदमी थिया। जिथुकै पौरमेशवर तैसकै बलिदान शै खुशी थिया; औरौ हाबिलै आपणी मौत कै बाद बै, आमु शिखाए लो कै बिशवाश कैशणा हौणा चैंई।

⁵ बिशवाश लैई हनोक नांव कै ऐक आदमी खै पौरमेशवरे तैसी स्वर्ग दा ऊबा निया, जौल़ौ सै जियुंदी थिया। इयौं बौजैह शै कोसी कै बै तैसका मौरेयौंदा शोरीर ना भैटी, स्वर्गो दा ऊबा निणो दा आगै हनोकै पौरमेशवर खै खुशी कौरा, जैशैखै पवित्र शास्त्र दो लैखै राए।

⁶ औरौ सिरफ पौरमेशवर पांदी बिशवाश कौरेयौ ही आमै तैसी खुश कौरे सौकु जिथुकै पौरमेशवर कै धोरे आणौवाल़ै खै बिशवाश कौरणा चैंई, कै सै औसौए औरौ सै तिनु लोगौ खै इनाम दैंदा जू सौचाई लैई तैसीकै जूऔंए।

⁷ बिशवाश लैई ही नूह खै जोबै पौरमेशवर तैसी ऐक बाढ़ कै बारै मुंजी चैतावणी दैय जू तैणै इबी ना दैखै रैई थी, तोबै बै तैणै चैतावणी पायौ पौरमेशवर आरी बैजाए डौर कै साथै आपणै परिवार कै बौचाणौ कारिए जहाज बाणौ, नूह कै बिशवाश शै औकै लोग जिनुवै बिशवाश ना कौरी, दोषी ठौहरै। औरौ नूह आपणै बिशवाश लैई ही पौरमेशवर की नज़र दा धरमी बौणा

⁸ बिशवाश लैई अब्राहम जोबै पौरमेशवरे तैसी ऐकी जौगैह पांदी जाणौ कारिए बौईदा तौ आज्ञा मानैयौ ऐशणै जौगैह दा हौटा जू पौरमेशवर तैसी आपणै जायदात कै रुप दा दैणा चांव थिया औरौ ऐजौ ना जाणौ थिया, कै हांव कुकै जांदा; तोबै बै हौटै गौआ।

⁹ तैसी देश दा जिथका वादा पौरमेशवरे अब्राहम शै कौरे राए थिया, अब्राहम ऐक पराए कै जैशणा तोम्बूओं दा रौंव थिया। तैसकै साथै, तैसका बैटा इसहाक औरौ पौता याकूब बै तोम्बू दै रौंव थिए, जिनु पौरमेशवर कै ढौबौशा ऐजाई वादा भैटी रौआ थिया।

¹⁰ जिथुकै तैणै तैसी ऐशणै शहर दै रौणौ का जू सौदा बौणेयौंदा रौंदा, तिथका इंतजार कौरे लौआ थिया, जिथका रोचणौवाल़ा औरौ बाणणौवाल़ा पौरमेशवर औसौ।

¹¹ बिशवाश लैई साराए बूढ़ैयौ बै होल़किणु कै शौकतै पाए; जिथुकै अब्राहम जाणौ थिया कै पौरमेशवर सैजौ कौरदा जिथका तैणै वादा कौरे राए थिया।

¹² जोबै अब्राहम नानड़िया पौयदा कौरणौ कारिए बैजाए बूढ़ा थिया, तौ तैसकै गौयण कै तारै औरौ समुन्द्र कै किनारे कै रेत कै जैशणै, अणगिणत वंश पौयदा हौवे।

¹³ ऐजै सौबै लोग जिनुवै पौरमेशवर पांदी भोरोशा कौरा, तिनु चीज़ौ कै पाए बिना मौरे गौवै जिथका वादा पौरमेशवरे कौरे राए थिया, पौरौ तिनुऐ इनु बातौ खै दूर कै भविष्‍य दी आन्दै बैई दैखी औरौ खुशी हौवे। तिनुऐ ऐजै बात सौमझै पाए कै आमु इयौं धोरती पांदी अजनबी औरौ प्रदेशी औसौ।

¹⁴ सैजै लोग जू इयौं दुनिया पांदी अजनबी औरौ प्रदेशी औसौ, सै खौलेयौ बौल़ौ, कै तिनुऐ ऐशणै देश खै पाणौ कारिए इंतजार कौरे लौआ जू तिनका औसौ।

¹⁵ जै सै तैसी देश कै बारै मुंजी सुंचदै जिथै दै सै आए रौवै थिए तौ तिनु पाछु जाणौ का मौका थिया।

¹⁶ पौरौ तिनुऐ ऐक बौड़ै देश कै आशा कौरे, जिथका मतलब औसौ स्वर्ग जाणौ खै, इथकारिए पौरमेशवर तिनका पौरमेशवर बौल़ै जाणौ शै खुशी थिया, जिथुकै तैणै तिनु कारिए ऐक नगर तैयार कौरे राए।

^17-18 जैशैखै तुऐं जाणौए कै पौरमेशवरे अब्राहम खै बौल़ै राए थियु, “तैरै खास बैटै इसहाक लैई, तैरा वंश गिणा जांदा,” तोबै बै पौरमेशवरे तैसकै परीक्षा लौए कै सै ऐसी बैटै कै बलिदान कौरे सौकदा कै ना। पौरौ तैसी पौरमेशवर कै ऐसी वादै पांदी ऐतरा बिशवाश थिया कै सै आपणै बैटै कै बै बलिदान चौढ़ाणौ कारिए तैयार हौए गौआ।

¹⁹ जिथुकै तैणै मानै पौऊ, कै पौरमेशवर शौकतीशाली औसौ, कै इसहाक खै मौरेयौंदे मुंजीदा जियुंदी कौरदा औरौ ऐक तरह शै अब्राहमै बै इसहाक खै मौरेयौंदे मुंजीदा जियुंदी पोऊवा।

²⁰ बिशवाश लैई इसहाकै आपणै दौ बैटै कै याकूब औरौ एसाव खै वादा कौरीयौंदी आशीषौ कै बारै मुंजी आशीष दै।

²¹ बिशवाश लैई याकूबे मौरदै बैई यूसुफ कै दु बैटै खै बारी-बारी शै आशीष दै, औरौ आपणै लाठी कै साहारै झोकैयौ तैणै पौरमेशवर कै आराधना कौरे।

²² बिशवाश लैई यूसुफे, जोबै सै मौरणौवाल़ा थिया, निशोंक हौयौ बौल़ौ कै इस्राएल देश कै लोग मिस्र देश दै निकल़दै, औरौ इथै तौड़ी कै तैणै तिनु आज्ञा दै कै जोबै तुऐं मिस्र देश शै जांव, तौ मैरै मौरणौ कै बाद मैरी हाड़की खै आपणै साथै कनान देश दी लौए जाया।

²³ जोबै मिस्र देश कै राजाए ऐजी आज्ञा दै कै जन्म हौंदै ही सारै इस्राएली भैईयै खै मारै दैया, तोबै बै बिशवाश कै बौजैह शै मूसा कै माँ-बापूए तैसीकै तीन मीनै तौड़ी छिपायो राखा; जिथुकै तिनुऐ दैखौ, कै ऐजा साधारण बालक ना आथी, औरौ सै राजा कै आज्ञा टाल़नो शै ना डौरी।

²⁴ मिस्र देश कै राजा कै बैटीए मूसा खै पालै राए थिया। जोबै मूसा बौड़ा हौए गौआ थिया, तौ बिशवाश लैई ही सै ना चांव थिया कै लोग तैसी राजकुमारी का बैटा बौल़ौ।

²⁵ तैणै पौरमेशवर कै लोगौ कै साथै आपी पांदी आणौवाल़ै अत्याचार का चुनाव कौरा, बजाय इथकै कै दैणिक सौमय कारिए पाप कै सुख का आनन्द लोऊँ।

²⁶ मूसा जाणौ थिया कै मिस्र देश कै भौण्ड़ार कै तुलना दै मसीह कारिए दुख सैहणा जादा कीमती औसौ, जिथुकै ऐशै कौरणौ शै पौरमेशवर तैसी स्वर्ग दा इनाम दैंदा।

²⁷ बिशवाश लैई राजा कै गुस्से दा ना डौरेयौ तैणै मिस्र देश खै छोड़ दियु, जिथुकै सै सौमझै गौआ थिया कै ऐजौ मानणौ तैशणौ थियु जैशै तैणै पौरमेशवर खै दैखै राए थिया, जू दैखियौं ना।

²⁸ बिशवाश लैई मूसाए इस्राएली लोगौ कै दवारो कै दैवल़ी पांदी मेम्ने कौ लोऊ छिड़कियौ फसह कौ तैयार मौनाणौ कै आज्ञा दै औरौ खून छिड़कौणौ कै विधि मानै, कै आगली संतानो कै नाश कौरणौवाल़ा दूत, इस्राएल कै आगली संतान कै छुए बै नी सौकौ।

²⁹ बिशवाश लैई इस्राएल कै लोग लाल समुन्द्र कै पाईलै ढौबौ ऐशै हौटै गौवै, जैशै शुकै माटी पांदी शै; औरौ जोबै मिस्री लोगै ऐशैखैई कौरणौ चोऊं तौ सौबै डोबै गौवै जिथुकै समुन्द्र पौलटे गौ औरौ तिनु डुबोए दियै।

³⁰ औरौ ऐक बैई होजो जोबै इस्राएल कै लोगै पौरमेशवर पांदी बिशवाश कौरा, तोबै सै सात दूसौ तौड़ी यरीहो शहर कै दीवार कै चोऊ ढौबौ घुमै। तोबै दीवार ढौल़ै गौए जैशै पौरमेशवरे बौल़ै राए थियु कै सै ढौल़ै जांदै।

³¹ बिशवाश लैई राहाब वेश्याए आज्ञा तौड़णोवाल़ै लोगौ कै साथै नाश ना होई, तियैं तिनु इस्राएली भैदी का स्वागत कौरा जू चुपी यरीहो शहर खै दैखदै आए रौवै थिए।

³² मुखै हौजौ बौलणौ कै जौरुरत ना आथी। जिथुकै सौमय ना आथी कै गिदोन का औरौ बाराक औरौ शिमशोन का औरौ यिफतह का औरौ दाऊद औरौ शमूएल का औरौ पौरमेशवर कै बातौ बौताणौवाल़ै लोगौ कै बारै मुंजी बात कौरु।

³³ इनुवे बिशवाश लैई, राज्‍य जीतै, धरम कै काम कौरे; वादै कौरीयौंदी चीज़ौ पाई, औरौ शेर तिनु खाए ना सोकी,

³⁴ आग तिनु ना जौल़ाई ना सोकी; तलवार तिनु मारी ना सोकी। ऐक बार कमजोर हौणौ कै बाद तिनु औटेयौ मोजबूत बाणै गौवै, सै लौड़ाई दै वीर साबित हौवे; तिनुऐ आपणै दुशमनो कै सैनाओं खै दूर भगाए दियै।

³⁵ किछै बैटमाणिशै आपणै मौरेयौंदे लोगौ खै औटेयौ जियुंदी पाए; कैतरै तौ मार खाय-खायौ मौरे गौवै; पौरौ तिनुऐ आज़ाद हौणौ शै इन्कार कौरे दियु जिथुकै सै बिशवाश ना छोड़णा चांव थिए। सै जाणौ थिए कै जोबै सै औटेयौ मौरेयौंदे मुंजीदै जियुंदी हौंदै तोबै सै पौरमेशवर कै साथै हमैशा कारिए जियुंदी रौंदै।

³⁶ किछै लोगौ खै तौ ठाटा; औरौ कौड़ै का सामणा कौरणा पौड़ा औरौ किछै कै शांगुल़ी दै बांनैयौ कोयदखाने दै पाए दियै।

³⁷ तिनुमुंजी दै किछै बिशवाशी खै पथराव कौरेयौ मारै दियै, तिनु आरै लैई चिरेयौ दौ फांकौ कौरे दियै, तिनु तलवार लैई काटैयौ मारै दियै, सै गरीब थिए, औरौ तिनु दुख औरौ कौल़ेश सैहणै पौड़ै औरौ तिनुआरी बुरा बर्ताव कौरा। तिनु भेड़-बाकरी कै खोलड़ै कै लुस्कै बाम्बणै पौड़ै औरौ उंडै पुंडे भौटकै।

³⁸ औरौ जोंगलो, औरौ धारौ, औरौ औड़ार दै, औरौ धोरती कै दरारों दै भौटकै। दुनिया इनु बिशवाशी लोगौ कै लायक ना थी।

³⁹ बिशवाश लैई इनु सौबी कै बारै मुंजी पौरमेशवर इनुदा खुशी थिया, तोबै बै तिनु लोगौ कै वादै कौरेयौंदी सैजी चीज़ौ ना भैटी जिथका वादा पौरमेशवरे कौरे राए थिया।

⁴⁰ जिथुकै पौरमेशवर कैई ना सिरफ तिनु कारिए, पौरौ अमारै खातिर बै ऐक बौड़ै योजना औसौ। पौरमेशवर चांव थिया कै सै अमारै साथै मिलैयौ सिध्द बौणै जांव।