गलातियौं 4 - सिरमौरी नौवाँ नियममसीह दा पौरमेशवर का आज़ाद बैटा 1 हांव ऐशैकै सौमझौऊं कै बैटा आपणै बापू कै जायदात का मालिक हौंदा, पौरौ जांव तौड़ी सै नानड़ा औसौ, तौ सै ऐक गुलाम कै जैशणा औसौ। तैसका इबी तौड़ी ऐसी पांदी औधिकार ना आथी हालांकि सै तैसी सौबै ठुँ का मालिक बौणदा जू तैसकै बापू कु औसौ। 2 जांव तौड़ी कै पिता कै दवारा तय कौरेयौंदा सौमय पूरा ना हौंव, तांव तौड़ी सैजा बैटा माँ बापू औरौ दैखभाल कौरणौवाल़ै कै औधिकार कै अधीन रौंव। 3 तैशैखैई पौरमेशवर कै जाणणौ दै आगै, तौ आमुए गुलाम कै जैशणा ऐसी दुनिया कै किछै धार्मिक नियमौ का पालन कौरे लौआ थिया। 4 जोबै सोही सौमय ओऊवा तौ पौरमेशवरे आपी आपणै बैटै खै ऐसी दुनिया दा भैजा, औरौ ऐक बैटमाणिशै तैसी जन्म दिया, औरौ सै यहूदी पौयदा हौयौ, मूसा कै कानून कै अधीन इथकारिए रौआ, 5 ताकि सै आमु आज़ाद कौरे सौकौ, जू मूसा कै कानून कै अधीन रौंव थिए। औरौ तैणै आमु आपणै ही नानड़िया कै रुप दै गोद लौए राए। 6 जिथुकै आमु पौरमेशवर कै संतान औसौ, इथकारिए तैणै आपणै बैटै कै आत्मा खै अमारै दिल दै भैजै राए, जू आत्मा पौरमेशवर खै, “ओए रै अब्बा, ओए रै पिता” बौलेयौ पुकारौ। 7 इथकारिए ऐबै आमु दास ना आथी, पौरौ आमु पौरमेशवर कै नानड़िया बौणै गौवै, तौ सै आमु सैजौ सौबै ठुँ दैंदा जू किछै तैसीकैईं तैसकै नानड़िया कै खातिर औसौ। कलीसिया कारिए पौलुस कै फिकर 8 जोबै तुऐं पौरमेशवर खै ना जाणौ थिए, तौ तैसी सौमय तुऐं तैसकै दास थिए, जू सौथीखै ईशवर आथी ही ना। 9 पौरौ ऐबै तौ तुऐं पौरमेशवर कै जाणौए, यानी पौरमेशवर तुऔं खै जाणौए, तौ तोबै तुऐं कमजोर औरौ निकमी आदि शिक्षाओं कै दास बौणणौ कारिए किथु पाछु जांदै लागै रौवै, का तुऔं औटेयौ तिनका ही दास बौणणौ कै लालसा औसौ? 10 तुऐं किछै खास दूसौ या मीनौ या मौसमो या सालो का पालन कौरेयौ पौरमेशवर कै ढौबौ जाणौ कै कौचिश कौरे लौए। 11 जू किछै तुऐं कौरे लौ तिथकै बौजैह शै मौखै डौर औसौ, कोदी ऐशै ना हौंव कै जू-जू मैहनत मोऐं तुऔं कारिए कौरे राए सै बैकार हौए जांव। 12 ओए रै बिशवाशी भाईयों हांव तुऔं कैईंदै बिन्ती कौरु, मैरै भाईयों, आपी खै मूसा कै कानून शै आज़ाद कौरौ जैशै मोऐं कौरे राए, जिथुकै हांव मूसा कै कानून लैई तैशैखैई आज़ाद औसौ जैशै तुऐं हौए गौवै। तुऐं मैरी आछै शै दैखभाल कौरे। 13 तुऔं याद हौल़ौ कै जोबै हांव बीमारी कै बौजैह शै आगलै बैई तोंवारै धोरे सुसमाचार का प्रचार कौरदा ओऊवा। 14 औरौ मैरी बीमारीए तुऔं कारिए बैजाए पौरैशानै पौयदा कौरे। पौरौ तुऐं मुखै जलील ना कौरी औरौ तुऐं मुखै बायरै बै ना घाड़ी। पौरौ तुऐं मैरा ऐशणा स्वागत कौरा, मानौ हांव पौरमेशवर का स्वर्गदूत या आपी यीशु मसीह औसौ। 15 तैसी सौमय तुऐं बैजाए खुश थिए। तोंवारै सैजी खुशी ऐबै कुकै औसौ? हांव सौथीखै ऐजौ बौल़ै सौकु कै तुऐं मैरै खातिर किछै बै कौरणौ कारिए तैयार थिए; जै हौए सौकदौ तौ तुऐं आपणी आखी बै घाड़ैबा मुखै दैय दैंदै। 16 तौ का तुऔं कैई साचौ बौलणौ कै बौजैह शै हांव तोंवारा दुशमन हौए गौआ। 17 झूठै शिक्षक तुऔं आपणै ढौबौ कौरणौ कै खुशी थिए। तिनका मकसद तोंवारै भोलाए का ना आथी तिनका मतलब तौ तुऔं मुंवादा जौई कौरणा औसौ ताकि तुऐं तिनकै चैलै बौणै जांव। 18 हमैशा ही आछै मकसद कारिए खुशी हौणौ आछौ औसौ औरौ सिरफ तैसी सौमय नी, जोबै हांव तोंवारै बीच मुंजी मौजूद रोऊं। 19 मैरै प्यारे नानड़िया, जैशैखै ऐक बैटमाणिश होल़किणु कै सौमय पीड़ो महसूस कौरौ, तैशैखैई मोऐं एकबेई औटेयौ तोंवारै खातिर पीड़ो झैलू। हांव ऐसी पीड़ा दा तांव तौड़ी रौंदा जांव तौड़ी तुऐं मसीह दै मोजबूत ना हौए जांव। 20 हांव चोऊं कै ऐबै तोंवारै साथै रोऊं ताकि हांव तुऔंआरी प्यार शै बात कौरे सौकु, जिथुकै हांव तुंआरी बौजैह शै बैजाए पौरैशान औसौ। सारा औरौ हाजिरा का उदारण 21 औरौ तुऐं जू मूसा कै कानून कै अधीन हौणा चांव! मैरै बात शुणौ! हांव तुऔं बौतांदा कै पवित्र शास्त्र दौ, मूसा कै कानून कै किताब दो का लैखै राए। 22 तिंदु ऐजौ लैखै राए कै, अब्राहम कै दो बैटै थिए; हाजिरा नांव कै ऐक बैटमाणिश जू कै तैसकै घोरवाल़ी कै दासी थी, तैसकै ऐक बैटै कै जन्म दिया, औरौ तैसकै घोरवाल़ी साराए दूजै बैटै कै जन्म दिया। 23 अब्राहम का बैटा, जू तियौं दासी बैटमाणिशौ पौरैशा पौयदा हौए रौआ थिया, सै सिरफ आदमियों कै यौजना लैई पौयदा हौए रौआ थिया। पौरौ अब्राहम कै ओका बैटा तैसकै घोरवाल़ी सारा पौरैशा पौयदा हौए रौआ थिया, तैसका जन्म पौरमेशवर कै वादै खै पूरा कौरणौ कै खातिर हौए रौआ थिया। 24 इनु दुईनै बैटमाणिशौ कै तुलना दु कौरार लैई कौरे जांव। सैजी कौरार जू पौरमेशवरे इस्राएल कै लोगौ कै साथै सीनै पाहाड़ पांदी बानी सैजी कौरार हाजिरा कै जैशणी थी। सैजी कौरार लोगौ खै दासो कै जैशणै बाणै दैंव। 25 हाजिरा सीनै पाहाड़ कै, दरशांव जू अरब देश दौ औसौ। सै ऐलो कै यरूशलेम शहर कै जैशणी औसौ जियौंकै लोग मूसा कै कानून का पालन कौरणौ कै दवारा गुलाम औसौ। 26 पौरौ सारा यरूशलेम शहर कै दरशांव, जू स्वर्ग दौ औसौ। सै आज़ाद बैटमाणिश औसौ औरौ तियौंकै नानड़िया बै आज़ाद औसौ। सैजै नानड़िया आमै सौबै बिशवाशी औसौ, जिनकै माँ सारा औसौ। 27 जिथुकै पवित्र शास्त्र बौल़ौए, “ओए रै शोनै बैटमाणिश, तुऐं जियैं कौलोंई बै नानड़िया कै जन्म ना दी, खुश हौ; तुऐं जियैं कौलोंई बै नानड़िया खै जन्म दैणौ कै पीड़ो कै महसूस ना कौरी, खुशी लैई लैलया औरौ जयजयकार कौर! जिथुकै छोड़ेयौंदे कै संतान बैयाव कौरेयौंदे कै सन्तान शै बै जादा औसौ।” 28 ओए रै बिशवाशी भाईयों तुऐं इसहाक कै जैशणै औसौ, जिथुकै तुऐं अब्राहम कै साथै पौरमेशवर कै वादै कै हिसाब की बौजैह शै पौयदा हौए रौवै थिए। 29 तैसी सौमय जैशै इश्माएल जू आदमी कै योजना कै हिसाब शै पौयदा हौआ, तैणै इसहाक कै सौतोऊवा थिया, जू आत्मा कै वादै कै हिसाब शै पौयदा हौआ, तैशैखैई ऐबै तुऔं खै तिनु लोगै सोताए लौवै, जू चांव कै तुऐं मूसा कै कानून का पालन कौरौ। 30 तिथ बारै मुंजी पवित्र शास्त्र का बौल़ौ? गुलाम बैटमाणिश औरौ तैसकै बैटै कैईंदा छुटकारा पाए पा। जिथुकै दासी कै बैटै का आज़ाद घोरवाल़ी कै बैटै कै साथै बापू कै जायदात का हकदार ना हौंदा। 31 इथकारिए ओए रै मैरै बिशवाशी भाईयों, आमै दासी बैटमाणिश यानी मूसा कै कानून कै नानड़िया ना आथी, पौरौ बिशवाश कौरणौ कै बौजैह शै आज़ाद बैटमाणिश कै नानड़िया औसौ। |
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
Beyond Translation