गलातियौं 3 - सिरमौरी नौवाँ नियम

बिशवाश कै दवारा धार्मिकता

¹ ओए रै नासमझ, गलातिया शहर कै बिशवाशियौं, मोऐं तौ स्पष्ट रुप शै औरौ आछी तरह शै तुऔं सौमझाए राए थिए, कै यीशु मसीह तुऔं कारिए क्रूसो पांदी किथु मौरा, तौ तोबै तुऐं तैसी कैईंदै दूर कैशै हौटै गौवै? कोसीए तुऔं धौखा दैय दिया।

² हांव तुऔं कैईंदा ऐक सवाल पूछणा चोऊं का तुऔं पवित्र आत्मा मूसा कै कानून का पालन कौरणौ लैई भैटौ, ना! बिल्कुल नी! तुऔं पवित्र आत्मा भैटा जिथुकै तुऐं तैसी सौंदेश पांदी बिशवाश कौरा जू तुऐं मसीह कै बारै मुंजी शुणा।

³ का तुऐं इशैक नासमझ औसौ? कि तुऐं जू काम पवित्र आत्मा कै दवारा मसीह कै साथै आपणै नोऐं जिन्दगी कै शुरुआत कौरी, का यौं जिन्दगी ऐबै आदमी कै कामौ कै दवारा खत्म कौरणै चांव?

⁴ बिशवाशी बौणणौ कै बाद तुऐं बैजाए दुख उठाए। हांव सौथीखै आशा कौरु कै ऐजै दुख बैकार ना आथी।

⁵ जू तुऔं भरपूरी शै आत्मा दान कौरौ औरौ तुऔं दै चौमत्कार कै काम कौरौ, का ऐजौ इयौं बौजैह शै औसौ कै तुऐं मूसा कै कानून का पालन कौरौ या ऐजौ इयौं बौजैह शै औसौ कै तुऐं मसीह का सुसमाचार शुणा?

⁶ “अब्राहम कै दैखौ, जैणै पौरमेशवर पांदी बिशवाश कौरा, औरौ तैसीकै बिशवाश कै दवारा पौरमेशवरे तैसी धरमी आदमी मुंजी गिणा।”

⁷ तुऔं ऐजौ सौमझणौ चैंई कै जू लोग अब्राहम कै जैशणै पौरमेशवर पांदी बिशवाश कौरौ, सैजैई अब्राहम कै साची सन्‍तान औसौ।

⁸ पवित्र शास्त्र दौ बैजाए सौमय आगै ऐजौ लैखै राए थियु, कै पौरमेशवर बैगानै यहूदी लोगौ खै बिशवाश कै आधार पांदी धरमी साबित कौरदा, ऐजौ हौणौ दै आगै पौरमेशवरे अब्राहम खै ऐजा आछा सौंदेश बौताए दिया थिया, “कै तैरै दवारा, हांव इयौं दुनिया कै सौबी लोगौ खै आशीष दैंदा।”

⁹ पौरमेशवर तिनु सौबी खै आशीष दैंदा जू तैसी पांदी बिशवाश कौरौ, तैशैखैई जैशै तैणै अब्राहम खै आशीष दै।

मूसा कै कानून दवारा शराप

¹⁰ पौरौ मूसा कै कानून दौ लैखै राए कै जू कुणिए बै सौबी नियमौ खै ना मानौ सैजै पौरमेशवर कै शराप कै खिलाफ औसौ। इथकारिए तिनु सौबी लोगौ पांदी शराप आए गौआ जू इनु कानून का पालन कौरेयौ पौरमेशवर कै सामणै धरमी बौणणौ कै कौचिश कौरौ। जिथुकै कुणिए बै तिनु कानूनो कै पूरी तरह शै हर सौमय पालन ना कौरे सौकौ।

¹¹ पौरौ ऐजै बात साची औसौ, कै कोसी खै बै मूसा कै कानून का पालन कौरेयौ धरमी साबित ना कौरे सौकौ। जिथुकै पवित्र शास्त्र दौ लैखै राव, धरमी आदमी बिशवाश लैई जियुंदा रौंदा।

¹² मूसा कै कानून कै नियमौ का पालन कौरेयौ जीणु औरौ पौरमेशवर पांदी भोरोशा कौरेयौ जीणु ऐक जैशणौ ना आथी; जैशैकै पवित्र शास्त्र दु लैखै राए, जू मूसा कै कानून कै सौबी बातौ का पालन कौरला, तैसी मूसा कै कानून कै दवारा ही जिन्दगी भैटदै।

¹³ मसीह अमारै बौजैह शै क्रूसो पांदी मौरा तौ तैणै शराप खै आपी पांदी लोयो आमु मूसा कै कानून कै शराप शै बौचाए राए। जिथुकै पवित्र शास्त्र दो लैखै राए कै, “शरापित औसौ सै जू क्रूसो पांदी मारै दिया जाला।”

¹⁴ मसीहे ऐशै इथकारिए कौरौ ताकि बैगानै यहूदी लोगौ खै सैजी आशीषौ भैटौ जिथका वादा पौरमेशवरे अब्राहम कै साथै मसीह यीशु कै दवारा कौरे राए थिया औरौ मसीह दै बिशवाश कै दवारा, आमुए पौरमेशवर का पवित्र आत्मा पाए राए जिथका तैणै आमु दैणौ का वादा कौरे राए।

पाकै प्रतिज्ञा

¹⁵ ओए रै बिशवाशी भाईयों, मोऐं रौज कै जीवन शै उदारण दैय लौआ, जोबै दो लोग आपी मुंजी कौरार बानौ, तौ ना कुणिए तियौं टाल़ै सौकौ औरौ ना तिंदु किछै जोड़े सौकौ।

¹⁶ ऐशैखैई पौरमेशवरे अब्राहम शै वादा कौरे राए कै हर कुणिए तैरै ऐक वंशज कै दवारा आशीष पांदा; पवित्र शास्त्र ऐजौ ना बौल़ौ, औरौ तैरै वंशो कै खातिर औरौ जू बौहितौ कै बारै मुंजी बौल़ै राए, पौरौ जू ऐकी कै बारै दौ बौल़ै राए “तैरै वंश खै” औरौ सै मसीह औसौ।

¹⁷ जू मोऐं बौल़ै लौ तिथका मतलब ऐजा औसौ कै पौरमेशवरे अब्राहम कै साथै ऐक कौरार बानै राए थै यानी तियौं पूरै कौरणौ कै प्रतिज्ञा बै कौरे राए थै। कौरार बानणो कै चार शौ तीस सालो बाद देएयोंदे मूसा कै कानून ना तौ पौरमेशवर कै कौरार कै मिटाए सौकौ। औरौ ना ही पौरमेशवर कै प्रतिज्ञा कै बैकार बाणै सौकौ।

¹⁸ जिथुकै पौरमेशवर आमु आपणै आशीष इथकारिए ना दैंव जिथुकै आमु मूसा कै कानून का पालन कौरु थिए, पौरौ सै इथकारिए दैंव जिथुकै तैणै इथका वादा कौरे राए थिया। तैशैखैई, पौरमेशवरे ऐजौ अब्राहम खै दियु जिथुकै तैणै तैसीआरी इथका वादा कौरे राए थिया।

¹⁹ तौ तोबै मूसा कै कानून किथु दैय राए? सै तौ अपराधौ कै बौजैह शै बाद दै दैय राए, पौरमेशवरे कानून कै रचना ऐशैखै कौरे राए थै कै ऐजौ तैसी सौमय तौड़ी लागू रौंदौ जांव तौड़ी कै अब्राहम कै वंश, मसीह नी आला; ऐजौ तैसी वंश कै बारै मुंजी थियु जिथका पौरमेशवरे वादा कौरे राए थिया। पौरमेशवरे आपणै कानून कै स्‍वर्गदूतौ कै दवारा मूसा कै दियै। मूसा ही पौरमेशवर औरौ लोगौ कै बीच मुंजी बीचोलिया थिया।

²⁰ जोबै दो लोगौ कै बिज़ सौमझौता हौंव, तोबै बिचोलिया कै जौरुरत हौंव। पौरौ जोबै पौरमेशवरे अब्राहम आरी वादा कौरा तौ तैणै कोसी बिचोलिया का इस्तैमाल ना कौरी, जिथुकै पौरमेशवर ऐक औसौ।

मूसा कै कानून का मकसद

²¹ का इथका मतलब ऐजा औसौ कै मूसा कै कानून प्रतिज्ञाओ कै खिलाफ औसौ? ना! बिल्कुल नी! जिथुकै जै मूसा कै कानून आमु सौदा कै जिन्दगी दैय सौकौ, तौ आमु इथका पालन कौरेयौ पौरमेशवर कै साथै सोही हौए सौकु थिए।

²² पौरौ पवित्र शास्त्र आमु बौतांव कै, पूरी दुनिया पाप कै अधीन औसौ। इथकारिए जू कुणिए यीशु मसीह पांदी बिशवाश कौरौ, पौरमेशवर का वादा तिनु लोगौ कै ही भैटदा।

²³ पौरौ इदा आगै मसीह ओऊवा औरौ आमु तैसी पांदी बिशवाश कौरे सौकु, मसीह कै आणौ दै औगौड़ियौ, आमु यहूदियों कै कैद दै राखै राए थिए औरौ मूसा कै कानून अमारै रोखवाल़ी कौरौ थिए।

²⁴ इथकारिए मसीह कै आणौ तौड़ी मूसा कै कानून अमारै मौदद कौरणौ कारिए औरौ अमारै दैखभाल कौरणौ कारिए दैय राए थिए, ताकि यीशु मसीह दै बिशवाश कौरणौ कै दवारा पौरमेशवर कै सामणै धरमी साबित हौंव।

²⁵ पौरौ ऐबै जोबै कै आमुए मसीह पांदी आपणा बिशवाश राखै राए, तौ ऐबै अमारी मौदद कौरणौ कारिए औरौ अमारा मार्गदर्शन कौरणौ कारिए मूसा कै कानून कै जौरुरत ना आथी।

^26-27 जोबै तुऐं मसीह कै नांव लैई बपतिस्मा लौआ, तौ तुऐं मसीह कै स्‍वभाव कै मानौ बाम्बै पाए। इथकारिए, जोबै तुऐं यीशु मसीह पांदी बिशवाश कौरा, तोबै तुऐं सौबै पौरमेशवर कै ओलाद बौणै गौवै।

²⁸ मसीह दै ऐक यहूदी या बैगानै यहूदी लोग या ऐक दास या ऐक आज़ाद आदमी कै बीच मुंजी कुणजाई अंतर ना आथी। इथमुंजी कुणजाई भैदभाव ना आथी कै तुऐं ऐक मर्द औसौ या बैटमाणिश औसौ। आमै सौबै मसीह यीशु दै ऐक जैशणै औसौ।

²⁹ जिथुकै तुऐं मसीह कै साथै एकजुट औसौ, ऐबै तुऐं अब्राहम कै परिवार का हिस्सा औसौ औरौ तुऐं पौरमेशवर कै दवारा वादा कौरेयौंदी आशीष दै वारिस बौणै गौवै।