गलातियौं 2 - सिरमौरी नौवाँ नियम

ओकी चोणेयौंदे चैलै कै दवारा पौलुस कै मान्यता

¹ चौदह सालो कै बाद हांव बरनबास कै साथै यरूशलेम शहर खै हौटा, औरौ तीतुस खै बै साथै निया।

² औरौ हांव तिथै हौटा जिथुकै पौरमेशवरे मुखै जाणौ खै बौल़ौ, औरौ जोबै हांव तिथै थिया तौ अगुवो आरी ऐक-ऐक कौरेयौ भैटिया औरौ तिनु तैसी सुसमाचार कै बारै मुंजी बौतौऊ जू मोऐं बैगानै यहूदी लोगौ कै बीच मुंजी प्रचार कौरे राए थिया तिथै मोऐं एकान्त दै जायौ अगुवो खै सौमझाए दियै, ताकि ऐशै ना हौंव, कै जू मोऐं पाछै कौरे राए थियु तिथका किछै नतीजा निकल़ौ।

^3-5 तिथै किछै लोग थिए जू आपणै बौचाए जाणौ कारिए सिरफ यीशु पांदी भोरोशा ना कौरौ पौरौ मूसा कै कानून पांदी बै कौरौए। सैजै लोग जासूसो कै जैशणै औसौ जू चांव कै अमारै जिणौ कै तरीकै कै बारै मुंजी जाणौ जिथुकै मसीहे आमु आज़ाद कौरे राए। सौथीखै सै आमु लैई मूसा का कानून का पालन कौरवायौ खै आमु गुलाम बाणणा चांव। पौरौ आमुए ऐक पल कै खातिर बै तिनु झूठ कै ना अपनैई ताकि तुऐं सुसमाचार कै सौचाई पांदी बौणैयौंदे रौए सौकौ। तिनुऐ बौल़ौ कै मैरा साथी तीतुस ऐक यूनानी औसौ, इथकारिए तैसका खतना हौणा चैंई। पौरौ आखिर दै, अगुवे तैसी खतना कौरवाणौ कारिए मजबूर ना कौरी।

⁶ तोबै यरूशलेम शहर कै कलीसिया कै तिनु अगुवे मैरै शिक्षा दै किछै बै मिलावट ना कौरी, मुखै इयौं बातौ लैई किछै फर्क ना पौड़ौ कै सैजै अगुवे किशैक रुतबे वाल़ै मानै जांव थिए, जिथुकै पौरमेशवर बायरौ का रुप दैखैयो न्याय ना कौरौ।

⁷ इथकै अलावा अगुवे जोबै दैखौ कै पौरमेशवरे मुखै औधिकार दैय राए कै जैशै यहूदी लोगौ कारिए सुसमाचार प्रचार कौरणौ का काम पतरस खै सौंपै राए, तैशैखैई बैगानै यहूदी लोगौ कारिए मुखै सुसमाचार का प्रचार कौरणा सौंपै राए।

⁸ जिथुखै पौरमेशवर, जैणै पतरस खै यहूदी लोगौ कै बीच मुंजी ऐक चोणेयौंदा चैला हौणौ कारिए चोणे राए, तैणै ही मुखै बै बैगानै यहूदी लोगौ कै बीच मुंजी चोणेयौंदा चैला हौणौ कारिए चोणे राए।

⁹ जू आदमी कलीसिया कै अगुवे सौमझै जांव थिए याकूब, पतरस (कैफा) औरौ यूहन्ना तिनुऐ दया का सैजा वरदान पौछेयाणा जू मुखै भैटी रौआ। तिनुऐ मुखै औरौ बरनबास खै आपणै साथी सौमझेयौ आमु संगति का सोंवा हाथ दिया। सै इयौं बातौ दै शामिल होवे कै आमु बैगानै यहूदी लोगौ कै धोरे जोऊं औरौ सै यहूदी लोगौ कै धोरे।

¹⁰ तिनुऐ आमु कैईंदै सिरफ ऐजी बिन्ती कौरे, कै आमु यरूशलेम शहर दै गरीब बिशवाशियौं कै मौदद कौरु औरौ ऐजौ सैजौ थियु जू हांव कौरणा चोऊं थिया।

अन्‍ताकिया शहर दा पौलुस दवारा पतरस का विरोध

¹¹ जोबै ऐक दूस पतरस अन्‍ताकिया शहर दा ओऊवा, तौ मोऐं लोगौ खै सामणै तैसी फिटका, जिथुखै सै सोही काम ना कौरौ थिया।

¹² पतरस बैगानै यहूदी लोगौ कै साथै खाणौ खाया कौरौ थिया कै जांव तौड़ी कै यरूशलेम शहर दै याकूब कै भैजैयौंदे किछै बिशवाशी अन्‍ताकिया शहर दै ना आई। तैणै तिनु लोगौ खै डौर शै ऐशै कौरौ जू चांव थिए कै बैगानै यहूदी लोगौ का बै खतना हौणा चैंई।

¹³ औरौ तैसकै साथै अन्‍ताकिया शहर दै किछै बिश‍वाशीयै बै ढोंग कौरा, इथै तौड़ी कै बरनबास बै तिनुदा डौरौ थिया औरौ बैगानै यहूदी लोगौ कै साथै भैटिणौ बंद कौरे दियु।

¹⁴ पौरौ जोबै मोऐं दैखौ, कै सैजै सौथीखै तियौं सौचाई का पालन ना कौरौ जू सुसमाचार बौतांव, तौ मोऐं जौल़ौ ऐकी दूसै पतरस अन्‍ताकिया शहर खै ओऊवा, तौ लोगौ कै सामणै तैसी फिटका, कै तू ऐक यहूदी हौयौ बै, बैगानै यहूदी लोगौ खै भोवार का पालन कौरे औरौ यहूदियों कै भोवार का पालन ना कौरे।

बिशवाश औरौ काम

¹⁵ आमै जू जन्म कै यहूदी औसौ, औरौ सैजै नी जिनु यहूदी बैगानै पापी बौल़ौ।

¹⁶ तोबै बै आमु यहूदी बिशवाशी जाणुए कै मूसा कै कानून का पालन कौरेयौ कुणजाई बै आदमी पौरमेशवर कै नज़र दा धरमी ना ठोहरदा। पौरौ सिरफ यीशु मसीह पांदी बिशवाश कौरणौ कै दवारा धरमी ठोहराए जांव। इथकारिए आमुए आपी बै यीशु मसीह पांदी बिशवाश कौरा, कै आमै मूसा कै कानून कै कामौ लैई नी पौरौ यीशु मसीह पांदी बिशवाश कौरणौ शै धरमी ठोहरदै; जिथुकै मूसा कै कानून का पालन कौरणौ शै कुणिए बै आदमी धरमी ना ठोहरदा।

¹⁷ जिथुकै मूसा कै कानून का पालन कौरेयौ कुणिए बै धरमी साबित ना हौए सौकौ किछै यहूदी लोग सुंचौ कै आमुए पाप कौरे राए, जिथुकै आमै मूसा कै कानून का पालन कौरणौ कै बजाय, धरमी साबित कौरे जाणौ कारिए मसीह पांदी भोरोशा कौरु। इथका मतलब ऐजा ना आथी कै मसीह आमु पापी बाणौ। ना! कौलोंई नी!

¹⁸ हांव जिनु मूसा कै कानून का पालन कौरणौ कै भाजै रौआ थिया, जै औटेयौ पाछु तिनु मूसा कै कानून का पालन कौरणौ कारिए मानै जोऊं, तौ हांव सौथीखै ऐक पापी औसौ।

¹⁹ जोबै मोऐं मूसा कै कानून का पालन कौरणौ कै कौचिश कौरे, तौ मूसा कै कानूनै मुखै दोषी ठैहरोऊवा। इथकारिए मानौ कै हांव मूसा कै कानून कारिए मौरे गौआ ताकि हांव पौरमेशवर कारिए जी सौकु।

²⁰ हांव मानौ मसीह कै साथै क्रूसो पांदी मौरे गौआ। ऐबै हांव जियुंदी ना रोई, पौरौ मसीह मुं दा जियुंदी औसौ। औरौ हांव शोरीरो दा ऐबै जू जियुंदी औसौ तौ सिरफ पौरमेशवर कै बैटै पांदी बिशवाश कौरणौ कै दवारा जियुंदी औसौ, जैणै मुंआरी प्यार कौरा औरौ मुं कारिए आपणै जान दैय दी।

²¹ हांव इयौं बातौ शै भाजै ना सौकु कै पौरमेशवर आपणै अनुग्रह कै बौजैह शै आमु बौचांवे। जिथुकै जै मूसा कै कानून कै दवारा कोसी आदमी का धरमी बौणणा आसान हौंदा, तौ मसीह खै मौरणौ नी पौड़दौ थियु।