गलातियौं 1 - सिरमौरी नौवाँ नियमपौलुस कै ढौबौशा स्वागत 1 मोऐं पौलुसे, तुऔं ऐजै चिट्ठी लैखै लौए। हांव ऐक चोणेयौंदा चैला औसौ। मुखै ना आदमी कै ढौबौशा, औरौ ना कोसी आदमीए चोणे राए, पौरौ मुखै यीशु मसीह औरौ पौरमेशवर पिता कै दवारा चोणे राए, जैणै यीशु मसीह खै मौरेयौंदे मुंजीदा जियुंदी कौरा। 2 हांव औरौ मैरै साथै इथै जिशैक बिशवाशी भाईटु औसौ, गलातिया प्रदेश कै सौबी कलीसियाओं खै बिशवाशियौं कै नमशकार बुलू। 3 हांव प्रार्थना कौरु कै अमारै पिता पौरमेशवर औरौ अमारै प्रभु यीशु मसीह तुऔं अनुग्रह औरौ शान्तै दैंव। 4 अमारै पौरमेशवर औरौ पिता की इछा कै हिसाब शै मसीह यीशुए आपी खै अमारै पापौ की बौजैह शै बलिदान कौरे राए ताकि सै आमु तिनु बुरी शोकतियौ शै आज़ाद कौरौ जू ऐलो दुनिया दी काम कौरौ। 5 हांव प्रार्थना कौरु कै लोग सौदा-सौदा तौड़ी पौरमेशवर कै महिमा कौरौ। सिरफ ऐकैई सुसमाचार 6 हांव हैरान औसौ, कै पौरमेशवरे तुऔं खै अनुग्रह दै रौणौ कारिए बौएदै राए औरौ तोबै बै तुऐं ऐतरै तावल़ै बौदलैयौ औकै शिक्षा कै मानै पाए। 7 सिरफ ऐकैई साचा सुसमाचार औसौ पौरौ किछै लोग मसीह कै बारै मुंजी सुसमाचार कै बिगाड़णा चांव औरौ तिनु लोगै तुऔं बैहकाए राए। 8 पौरौ जै आमु मुंजीदै या स्वर्ग शै धैनै आएयौंदे स्वर्गदूतौ मुंजीदै कुणिए बै तैसी सुसमाचार खै सिवाए जू आमुए तुऔं खै शुणाए राए, कोसी औकै शिक्षा का प्रचार कौरौ औरौ तिथकै सुसमाचार हौणौ का दावा कौरौ, तौ पौरमेशवर तिनु शराप दैंदा। 9 जैशैखै आमुए आगै बौल़ै राए, तैशैखैई ऐबै हांव हौजौ बुलू, कै तैसी सुसमाचार खै छोड़ेयौ जू तुऐं अपनाए राए, पौरौ जै कोसी औकै शिक्षा का प्रचार कौरौ औरौ तिथकै सुसमाचार हौणौ का दावा कौरौ, तौ पौरमेशवर तिनु शराप दैंदा। 10 साफ सीधै बात ऐजै औसौ कै मोऐं लोगौ कै खुश कौरणौ कै कौचिश ना कौरे लैई, पौरौ पौरमेशवर कै खुश कौरणा चोऊं। जै हांव इबी तौड़ी बै आदमी खै खुश कौरदा रौंदा तौ मसीह का दास नै हौंदा। पौलुस कैशैखै चोणेयौंदा चैला बौणा 11 ओए रै बिशवाशी भाईयों, हांव तुऔं लोगौ खै ऐजौ बौताणौ चोऊं कै जू सुसमाचार मोऐं शुणाए राए, सै लोगौ कै ढौबौशा ना आथी। 12 जिथुखै मुखै ऐजौ पुराणिया शै ना भैटी रैई, औरौ ना कोसी धार्मिक शिक्षकै मुखै शिखाए रैई, पौरौ आपी यीशु मसीहे सैजौ मुं पांदी प्रगट कौरे राए। 13-14 भाईयों, तुऐं जाणौए कै जोबै मोऐं यहूदी धरम का पालन कौरे लौआ थिया, तौ कैशै जियुं थिया। मैरै बौहितै सारै साथी जू मैरै ही उमर कै थिए, सैजै बै यहूदी धरम का पालन कौरौ थिए, पौरौ हांव तिनु सौबिदा बैजाए औगौड़ियौ थिया, जिथुकै हांव आपणै पुराणिया कै भोवार का पूरै दिल शै पालन कौरु थिया। तैसी सौमय हांव यीशु कै लोगौ कै जू पौरमेशवर कै आराधना कौरौ थिए, सोतोऊं थिया, मोऐं तिनु सौबी खै नाश कौरणौ कै कौचिश कौरे। 15-16 पौरमेशवर कै जोबै इछा हौए कै मुं पांदी आपणै बैटै कै प्रगट कौरौ कै हांव बैगानै यहूदी लोगौ मुंजी तैसका सुसमाचार शुणौऊं, तैणै मैरै पौयदा हौणौ दै आगैई मुखै चोणे राए औरौ आपणै अनुग्रह की बौजैह शै ही तैणै मुखै सेवा कौरणौ कारिए बौएदै राए। जोबै यीशुए आपी खै मुं पांदी प्रगट कौरा, तोबै हांव सलाह लोणो कारिए कोसी कै धोरे ना हुटी। 17 औरौ जू मुं दै आगै चोणेयौंदे चैलै थिए, तिनुआरी भैटिणौ कारिए हांव यरूशलेम शहर खै तिनकै धोरे ना हुटी। पौरौ हांव तावल़ा अरब देश कै हौटा औरौ तिथैदा औटेयौ दमिश्क शहर खै पाछु औऊवा। 18 तोबै ती सालो कै बाद हांव चोणेयौंदे चैलै, पतरस (कैफा) आरी भैटिणौ कारिए यरूशलेम शहर खै हौटा, औरौ तैसकै धोरे पोंद्रो दूसौ तौड़ी रौआ। 19 तैसी सौमय हांव सिरफ यीशु मसीह कै भाई याकूब आरी भैटिया जू ऐक चोणेयौंदा चैला थिया। 20 पौरमेशवर जाणौए कै जू मोऐं तुऔं खै लैखै लौ, सैजौ पूरी तरह शै साचौ औसौ। 21 इथकै बाद हांव सीरिया प्रदेश औरौ किलिकिया प्रदेशो दा ओऊवा। 22 पौरौ मसीह बिशवाशी लोग जू यहूदिया प्रदेश दै रौंव, मुखै कौलोंई ना भैटी रैई थी। 23 पौरौ तिनुऐ बार-बार शुणु, कै ऐक सौमय जू अमारा सौताणौवाल़ा थिया, ऐबै यीशु मसीह दा तैसी बिशवाश का प्रचार कौरौ, जिथु सै नाश कौरणौ कै कौचिश कौरौ थिया। 24 इथकारिए पौरमेशवरे मैरै साथै जू कौरौ तिथ कारिए तिनुऐ लगातार पौरमेशवर कै महिमा कौरे। |
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
Beyond Translation