इफिसियों 6 - सिरमौरी नौवाँ नियम

माँ-बापू औरौ नानड़िया

^1-3 पवित्र शास्त्र बौल़ौ: “आपणै माँ बापू का आदर कौरौ, तोबै तैरै साथै आछौ हौंदौ, औरौ धोरती पांदी तैरा जीवन लांबा हौंदा। ऐजै आगलै आज्ञा औसौ जियौं पौरमेशवरे ऐक वादै कै साथै दैय राए। इथकारिए ओए रै नानड़िया तुऐं जू प्रभु पांदी बिशवाश कौरौ, तोंवारै खातिर ऐजौ ठीक औसौ कै तुऐं आपणै माँ बापू कै आज्ञा मानौ।”

⁴ ओए रै बापूओं, आपणै नानड़िया कै खिज़ाया नी पौरौ तिनुकै प्रभु कै शिक्षा, औरौ चैतावणी दैंदै बैई, तिनका पालन-पोषण कौरौ।

मालिक औरौ सेवक

⁵ ओए रै दासो, जू लोग इयौं दुनिया कै हिसाब शै तोंवारै मालिक औसौ, चौकशाए शै तिनका आदर औरौ इज्जत कौरौ। सिरफ दिखावा ना कौरौ। तुऔं मुंजी सौबी कै डौरेयौ औरौ काम्बलेबा जैशै मसीह कि, तैशैखैई मालिक कि बै आज्ञा मानणी चैंई।

⁶ तुऔं आपणै मालिको कै आज्ञा का पालन कौरणा चैंई, सिरफ तोबै नी जोबै सै तुऔं दैखौए, पौरौ तुऐं मसीह कै सेवक औसौ, इथकारिए तुऔं आपणै पूरै मन शै सैजौई कौरणौ चैंई जू पौरमेशवर चांव कै तुऐं कौरौ।

⁷ औरौ तुऐं खुशी शै आपणी सेवा कै काम कौरदै रौव, मानौ तुऐं आदमी कै नी, पौरौ प्रभु कै सेवा कौरौ।

⁸ जिथकै तुऐं जाणौए, कै जू कुणिए जैशणा आछा काम कौरला, चाहै सेवक हौंव, चाहै आज़ाद आदमी, तौ प्रभु शै तिथका प्रतिफल पांदा।

⁹ ऐशैखैई ओए रै मालिक, तुऐं बै तिनु धमकियां नी दैंव पौरौ आपणै दास कै प्रति आछै बौणौ। जिथुकै तुऐं जाणौए, कै तिनका औरौ तोंवारा दुईनै का मालिक स्वर्ग दा औसौ, औरौ सै कोसी का पक्ष ना कौरौ।

आत्मिक युध्द कै हथियार

¹⁰ आखिर दै प्रभु कै शौकतीशाली आत्मिक शौकतै शै मोजबूत बौणौ।

^11-13 आमुए आदमी कै खिलाफ युध्द ना लौड़ै लैई। पौरौ आमु प्रधानों औरौ औधिकारियो कै खिलाफ औरौ इनारै कै शौकतै शै औरौ आत्मिक दुनिया कै शौकतै कै खिलाफ लौड़ै रौवै। इथकारिए सौबै हथियार धारण कौरे पांव जू पौरमेशवर दैंव। ताकि जोबै सैजौ बुरु दूस आलो, तौ तुऐं शैतान कै चालौ शै बौचै सौकौ। औरौ जोबै ऐजी लोड़ाए खत्म हौए जाली, तोबै बै तुऐं मोजबूती कै साथै खौड़ै रौए सौकौ।

¹⁴ पौरमेशवर कै सच कै आपणै कमर दै बेल्ट कै जैशणै बानै पाव, औरौ धार्मिकता कै कवच कै जैशणा बाम्बै पाव।

¹⁵ ऐक सैनिक कै जैशणै जू आपणै बूट लायौ लौड़णौ कारिए तैयार औसौ तैशैखैई तुऔं दुष्ट कै साथै लौड़ाई कै तैयार रौणौ चैंई औरौ पौरमेशवर कै साथै शान्तै कै बारै मुंजी जू सुसमाचार औसौ, तिथ पांदी भोरोशा कौरणा चैंई।

¹⁶ इनु सौबी कै अलावा, मसीह पांदी मजबूत बिशवाश राखैयौ मजबूत ढाल़ कै जैशणै औड़ेयौंदे रौव ताकि तुऐं तैसी दुष्ट शैतान कै सौबै बौल़ैयौंदे बाणौ कै हिशोए सौकौ।

¹⁷ उध्दार यानी पौरमेशवर कै बौचाणौ वाल़ै शौकतै कै टोप साए बाम्बै पांव। पवित्र आत्मा कै तलवार जू पौरमेशवर का वचन औसौ तैसी उंढा कौरौ।

¹⁸ औरौ हर सौमय औरौ हर प्रकार शै आमु तैशै ही प्रार्थना कौरणै चैंई जैशै पवित्र आत्मा आमु अगुवाई कौरौ, इथकारिए जागदै रौव औरौ सौबी पौरमेशवर कै लोगौ कारिए हमैशा बिन्ती कौरदै रौव।

¹⁹ औरौ तुऐं मुं कारिए बै प्रार्थना कौरौ, ताकि बौलदै बैई मुखै शब्द दियै जांव औरौ हांव निडर हौयौ तैसी सुसमाचार का भैद बौताए सौकु।

²⁰ इथकारिए हांव जंजीरो दा जोकड़ेयौंदा ऐक राजदूत कै जैशणा सेवा कौरु। प्रार्थना कौरौ कै, जैशैकै मुखै बौलणौ चैंई, तैशैखैई निडरता कै साथै सुसमाचार का प्रचार कौरे सौकु।

आखरी नमशकार

²¹ प्रभु कै संगति दा प्यारा साथी औरौ बिशवाश लायक सेवक तुखिकुस तुऔं लोगौ कै ऐजौ सौबै बौताए दैंदा, ताकि तुऐं बै जाणै पाव कै हांव कैशणा औसौ औरौ मोऐं का कौरे लो।

²² तैसी मोऐं तोंवारै धोरे इथकारिए भैजै राए, कै तुऐं अमारी दशा जाणौ, औरौ सै तोंवारै मनो का हौंसला बोड़ाव।

²³ हांव अमारै पिता पौरमेशवर शै औरौ प्रभु यीशु मसीह शै प्रार्थना कौरु कै सै तुऔं बिशवाशियौं कै शान्तै दैंव। सै ऐशै कौरौ कै तुऐं ऐकी दुजैआरी प्यार कौरौ औरौ मसीह पांदी सौदा बिशवाश कौरदै रौंव।

²⁴ पौरमेशवर तिनु सौबी कै आपणा अनुग्रह दिखांव जू अमारै प्रभु यीशु मसीह आरी प्यार कौरौ, सैजा प्यार जू कौलोंई खत्म ना हौंव।