इफिसियों 5 - सिरमौरी नौवाँ नियमप्यार दै चालौ 1 तुऐं पौरमेशवर कै प्यारे नानड़िया औसौ, इथकारिए तोंवारा बर्ताव तैसकै स्वभाव कै जैशणा हौंव। 2 औरौ प्यार दै चालौ जैशै मसीहे बै तुऔंआरी प्यार कौरा; मसीह कै उदारण कै पौछौड़ियौ चालदै रौव, औरौ ओकीआरी प्यार शै भौरेयौंदा जीवन जियौ, जैणै तुंआरी प्यार कौरा औरौ तोंवारै पापौ कै उठाणौ कारिए आपी कै बलिदान कौरेयौ दैय दिया। औरौ पौरमेशवर खुश इथलैई थिया, जिथुकै सैजा बलिदान तैसी कारिए खुशबूदार इत्र कै जैशणा थिया। 3 जैशै पवित्र लोगौ कै लायक औसौ, तैशैखै तुऔं दै व्यभिचार, औरौ कोसी भान्त कै अशुध्द काम या लालच कै चौर्चा बै ना हौंव। 4 औरौ ना अश्लील बातौ, ना मूर्ख बातौ औरौ ना गौंदै ठाटै हौंव, जिथुकै ऐजी बातो तुऔं कारिए ठीक ना आथी पौरौ तुऔं पौरमेशवर कै धन्यवाद ही दैणा चैंई। 5 जिथुकै तुऐं ऐजौ आछै शै जाणौ कै कुणजाई गौलत सौमबंध बाणणौवाल़ा, या अशुध्द आदमी, औरौ लालची आदमी ऐक मूर्तिपूजक कै जैशणा औसौ, जू लोग इयौं दुनिया कै चीज़ौ कै आराधना कौरौ। ऐशणै काम कौरणौवाल़ै लोग कौलोंई बै मसीह औरौ पौरमेशवर कै राज्य कै औधिकारी ना हौंदै। 6 कुणिए बै तुऔं कै ऐजा सुझाव दैयौ धौखा ना दैंव कै पौरमेशवर सौथी कै तिनु लोगौ कै सौजा ना दैंदा जू ऐशै पाप कौरौ। 7 इथकारिए इनु पाप वाल़ै काम कौरणौ कारिए दुनिया कै लोगौ कै साथै शामिल ना हौंव। पेयाशै दै चालौ 8 जिथुकै आगै तुऐं आपी इनारै दै रौंव थिए, पौरौ जौल़ौ दै ऊबै तुऐं प्रभु कै लोग बौणै रौवै, तुऐं पेयाशै दै औसौ। इथकारिए पेयाशै दै रौणौवाल़ै लोगौ कै जैशणै हांडो। 9 जिथुकै जै कुणिए आदमी पेयाशै दा औसौ, तौ तैसका बर्ताव आछा औरौ धार्मिक हौंव, औरौ तैसी पांदी भोरोशा कौरे सौकौ। 10 ऐजौ शिखणौ कै कौचिश कौरौ, कै पौरमेशवर कै का खुश कौरौ? 11 इथकारिए इनु पाप वाल़ै कामौ कै कौरणौ मुंजी तिनकै साथै शामिल ना हौंव। पौरौ इनु पाप वाल़ै कामौ कै पेयाशै दै लाव। 12 जिथुकै अबिशवाशी लोगौ कै छिपैयौंदे कामौ कै चौर्चा बै शर्म कै बात औसौ। 13 जोबै कियौंई चीज़ौ पांदी पेयाशो चौमकौ तौ कुणिए बै दैख सौकौ कै सैजी चीज़ कैशणै औसौ, जिथुकै जोबै पेयाशो कियौंई चीज़ कै दिखांव तौ सैजी चीज़ आपी पेयाशो बौणै जांव। 14 इयौं बौजैह शै लोग बौल़ौए, “ओए रै सुतणोवाल़ै बिज़ो औरौ मौरेयौंदे मुंजीदै जियुंदी हौव; तौ मसीह आपणौ पेयाशो तुऔं पांदी चोमकांदा।” बुध्दि दै चालौ 15 इथकारिए ध्यान शै दैखौ, कै आपणै स्वभाव कै बारै मुंजी खास कौरेयौ चौकश रौंव; निर्बुध्दि कै जैशणै नी पौरौ बुध्दिमान कै जैशणै हांडो। 16 औरौ सौबै मोके का इस्तैमाल जू तुऔं कैई औसौ, भोलाए कौरणौ कारिए कौरौ, जिथुकै दूस बुरै औसौ 17 इयौं बौजैह शै निर्बुध्दि ना हौंव पौरौ ऐजौ जाणणौ कै कौचिश कौरेयौ सौमझौ कै प्रभु तुऔं शै का कौरवाणा चांव औरौ सैजौ कौरौ। 18 औरौ सूर पैयौ माचैयौ नै, जिथुकै ऐजौ लोगौ कै शर्मनाक औरौ बेकाबू तरीकै शै बर्ताव कौरणौ कै बौजैह बौणौ, पौरौ पवित्र आत्मा कै तुऔं आपणी शौकतै शै भौरणौ दौ। 19 जै तुऐं पवित्र आत्मा कै काबू दै हौंव, तौ तुऐं ऐशै कौरदै: जोबै तुऐं कौठै हौलै, तौ तुऐं स्तुति औरौ भजन कौरलै, औरौ औकै गीत जू पवित्र आत्मा आमु दैंव, औरौ आपणै-आपणै मन दै प्रभु कै सामणै गांदे औरौ स्तुति कौरदै। 20 औरौ जू किछै अमारै प्रभु यीशु मसीहे कौरे राए तिथकै बौजैह शै सौदा अमारै पौरमेशवर पिता कै सौबै बातौ कारिए धन्यवाद कौरदै रौव। 21 औरौ मसीह कै प्रति खुशी शै औरौ भोक्ती राखणौ कै बौजैह शै, तुऐं ऐकी दूजै कै अधीन रौव। घोरवाल़ै औरौ घोरवाल़ी कै आदैश 22 घोरवाल़ी, आपणै घोरवाल़ै कै ऐशै अधीन रौव जैशै तुऐं प्रभु कै अधीन रौंव। 23 जिथुकै घोरवाल़ा तौ घोरवाल़ी को मुंड औसौ; औरौ मसीह कलीसिया का उध्दार कौरणौवाल़ा औरौ मुंड औसौ, औरौ कलीसिया तैसका आपणा शोरीर औसौ। 24 जैशै कलीसिया मसीह कै अधीन औसौ, तैशैखैई घोरवाल़ियां बै सौबी बातौ दी आपणै-आपणै घोरवाल़ै कै अधीन रौंव। 25 ओए रै घोरवाल़ै, आपणै-आपणै घोरवाल़ी आरी प्यार राखौ, जैशै मसीहे बै कलीसिया आरी प्यार कौरेयौ आपणा जीवन कलीसिया कारिए दैय दिया। 26 ताकि सै कलीसिया कै पौरमेशवर कै वचन औरौ पाणी शै धौयौ शुध्द कौरेयौ पवित्र बाणै सौकौ। 27 सै आपणै लोगौ कारिए मौरे गौआ ताकि सै आपणै सौबै लोगौ कै सिध्द बाणै सौकौ औरौ तिनु सौबी कै आपणै हाजिर दै लाए सौकौ, जिनुमुंजी कुणजाई दोष औरौ बुरी बातौ ना हौंदी; पौरौ सै पवित्र औरौ सिध्द हौंदै। 28 ऐशैखैई, घोरवाल़ा आपणै-आपणै घोरवाल़ी आरी आपणै शोरीर कै जैशणा प्यार राखौ, जू आपणै घोरवाल़ी आरी प्यार राखौ, सै आपी आरी प्यार राखौ। 29 जिथुकै कोसीए बै कौलोंई आपणै शोरीर शै बैर ना राखी पौरौ तिथका पालन पोषण कौरा, जैशै मसीह कलीसिया कै दैखभाल कौरौ, तैशैखैई ऐक आदमी खुद कै दैखभाल कौरौ। 30 इथकारिए कै आमु सौबै मसीह कै शोरीर कै अंगो कै जैशणै औसौ। 31 जैशैकै पवित्र शास्त्र बौल़ौ, “कै मर्द माँ-बापू कै छोड़ेयौ आपणै घोरवाल़ी आरी मिलैयौंदा रौंदा, औरौ सै दुईनै ऐक शोरीर हौंदै।” 32 ऐजा भैद तौ बौड़ा औसौ; ऐजी ऐक कीमती औरौ गंभीर शिक्षा औसौ पौरौ मोऐं सौथीखै मसीह औरौ कलीसिया कै बीच कै सौमबंध कै बारै मुंजी बात कौरे लौए। 33 पौरौ ऐजौ तुऔं पांदी बै लागू हौंव तुऔं मुंजीदै सौबै आपणी घोरवाल़ी आरी आपणै जैशणा प्यार राखौ, औरौ घोरवाल़ी बै आपणै घोरवाल़ै का आदर कौरौ। |
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
Beyond Translation