इफिसियों 4 - सिरमौरी नौवाँ नियममसीह कै शोरीर दै एकता 1 इथकारिए हांव जू प्रभु यीशु मसीह कै सेवा कौरणौ की बौजैह शै कोयदखाने दा औसौ, तुऔं कैईंदै बिन्ती कौरु कै तियौं बुलाहट कै साथै जिथलैई पौरमेशवरे तुऔं आपणै संतान हौणौ कारिए बौएदै राए, तिथकै लायक जीवन जियौ। 2 औरौ पूरै दीनता, औरौ नम्रता कै साथै, औरौ धीरज धोरेयौ ओकी कै बर्ताव कै सैहन कौरौ, 3 औरौ ऐसी कामौ दै आपणै सौबीदै आछै कौचिश कौरौ ताकि तुऐं हमैशा मैल-मिलाप दै बौणैयौंदे रौंव, जिथुकै तुऔं पौरमेशवर कै आत्मा कै दवारा ऐक कौरे राए। 4 आमै सौबै बिशवाशी ऐक शोरीर कै अंगो कै जैशणै औसौ, औरौ आमु सौबी कै ऐकैई पवित्र आत्मा भैटी रौआ। ऐशैखैई तुऔं ऐकैई आशा दैय राए थै, जोबै तुऐं पौरमेशवर कै लोग हौणौ कारिए बौएदै राए थिए। 5 सिरफ ऐकैई प्रभु औसौ, यानी यीशु मसीह। आमै सौबै ऐकैई शिक्षा पांदी बिशवाश कौरु औरौ आमु सौबी कै ऐकैई बपतिस्मा भैटी रौआ। 6 औरौ ऐकैई पौरमेशवर औसौ जू सौबी लोगौ का पिता औसौ, सै आमु सौबी पांदी राज कौरौ, सै आमु सौबी कै दवारा काम कौरौ औरौ सै आमु सौबी पांदी दया कौरौ। आत्मिक वरदान 7 पौरौ मसीहे आमु मुंजीदै हरेक आदमी कै तैसकै काम कौरणौ कारिए जौई-जौई खास वरदान दैय राए। औरौ ऐजौ जैसी हिसाब शै तैणै दैणौ चोऊ, तैसी हिसाब शै दैय दियु। 8 इथकारिए मसीह कै बारै मुंजी पवित्र शास्त्र बौल़ौ, “सै ऊंचे पांदी चौढ़ा, औरौ तैणै आपणै साथै कैई दुशमनो कै नियै, औरौ आदमी खै आशीषौ दी।” 9 जोबै पवित्र शास्त्र बौल़ौ, “सै ऊंचे पांदी चौढ़ा,” तौ इथका मतलब ऐजा औसौ कै मसीह आगै पताल़ो तौड़ी बै हौटै रौआ थिया। 10 मसीह जू धैनै ओऊवा, औरौ सै सैजाई औसौ जू सारै गौयण दा ऊबा चौढ़ै गौआ। तैणै ऐशै इथकारिए कौरौ ताकि हर जौगैह मोजूद हौए सौकौ। 11 ऐजा मसीह थिया जैणै ऐजी जुमैवारी कलीसिया कै दी: तैणै कोसी कै चोणेयौंदे चैलै बाणणौ कारिए चुणै औरौ कोसी कै पौरमेशवर का सौंदेश बौताणौ कारिए औरौ कोसी कै सुसमाचार शुणाणौ कारिए, औरौ कोसी कै बिशवाशियौं कै रौखवाल़ै कौरणौ औरौ शिखाणौ कारिए चुणै। 12 तिनकै जुमैवारै ऐजै औसौ कै सै बिशवाशियौं कै पौरमेशवर का काम कौरणौ कारिए तैयार कौरौ औरौ मसीह का शोरीर जू बिशवाशियौं कै मंडली औसौ सै मोजबूती शै बौढ़दै जांव। 13 ऐजौ तांव तौड़ी जारी रौंदौ जांव तौड़ी कै आमै आपणै बिशवाश औरौ पौरमेशवर कै बैटै कै बारै मुंजी आपणी सौमझ दै एकजुट ना हौए जोऊं। तांव तौड़ी आमै मोजबूत हौए जांदै, जैशैकै मसीह औसौ, औरौ आमु पूरी तरह शै तैसकै जैशणै हौए जांदै। 14 ऐबै आमु नानड़िया कै जैशणै नी हौणौ चैंई। ऐबै आमै तिनु किश्तीयों कै जैशणै ना आथी जिनु फालो औगौड़ियौ-पौछौड़ियौ ढकियावं औरौ हावा उंडै पुंडे घुमाव। इथका मतलब ऐजा औसौ कै आमु धोकैबाज लोगौ कै तिनु झूठी शिक्षाओं दै नी फोशणौ चैंई, जू साची जाणियौ। 15 बल्कि, प्यार शै साचौ बौलेयौ, आमु सौबी बातौ दै मोजबूत औरौ मसीह कै जैशणै हौए जांव, जू आपणै शोरीर यानी कलीसिया को मुंड औसौ। 16 जैशैखै ऐकी आदमी का शोरीर तैसकै जोड़ो कै दवारा ऐक साथी जोड़ेयौंदा रौंव, तैशैखैई मसीह आमु सौबी कै जू तैसी पांदी बिशवाश कौरो, आपणै शोरीर कै अंगो कै जैशणै जोड़ो। औरौ जोबै शोरीर कै सौबै अंग ठीक तरह शै काम कौरौ तौ शोरीर बौढ़ौ औरौ मोजबूत हौंव; तैशैखैई, जोबै आमु मुंजीदै सौबै तैसी काम कै कौरो जू मसीहे आमु दैय राए तौ आमै मोजबूत बोणदै औरौ पाकै हौंदै औरौ ऐकी दूजै शै हौजौ जादा प्यार कौरदै। मसीह दा नौवाँ जीवन 17 इथकारिए हांव तैसी औधिकार कै साथै जू प्रभुए मुखै दैय राए, हांव तुऔं ऐजौ बौतौऊं कै जैशै अबिशवाशी लोग आपणै मन कै बुरै विचारो कै साथै जीवन जियौं, तुऐं तैशणा जीवन ना जियौं। 18 जिथुकै सै ना समझ औरौ अज्ञानी औसौ औरौ जू जीवन पौरमेशवर दैंव सै तैसी जीवन कै ना अपनांव औरौ पौरमेशवर कै बारै दो शुणणौ शै इन्कार कौरणौ कै बौजैह शै सैजा जीवन जू पौरमेशवर दैंव, तिनुमुंजी ना आथी। 19 जिथुकै तिनु ऐबै शर्म ना आंव, इथकारिए तिनुऐ बुरै काम कौरणौ कारिए आपी कै बौदलै राए। सै सौब तरह शै बुरै काम कौरणौ कै कौचिश कौरौ, औरौ सै हौजौ जादा कौरणा चांव। 20 पौरौ ऐजौ सैजौ ना आथी जू तुऐं मसीह कै शिक्षाओं शै शिखै राए। 21 पौरौ मुखै पाको औसौ कै जोबै तुऐं यीशु मसीह कै बारै मुंजी शुणु, तौ तुऐं तैसीयादी साची शिक्षाए शिखी। 22 तोंवारै शिक्षकै तुऔं तैसी तरीकै कै छौड़णौ कै शिक्षा दै, जिथकै हिसाब शै तुऐं बर्ताव कौरौ थिए। तोंवारै बुरी इछाएं तुऔं बैहकाए औरौ तोंवारै जीवन कै बौदलै दियै। 23 पौरौ, पवित्र आत्मा कै तोंवारै विचारो औरौ बर्ताव कै नौवाँ कौरणौ दौ। 24 औरौ पौरमेशवरे तुऔं ऐक नौवाँ चरित्र दैय राए जू तैसकै आपणै चरित्र कै जैशणा औसौ। इथकारिए ऐसी नौवें चरित्र कै हिसाब शै बर्ताव कौरौ। सौथी कै धरमी औरौ पवित्र बौणौ। आत्मा कै दुखी नी कौरो 25 ऐसी बौजैह शै झूठ बौलणौ छोड़ेयौ, हरेक आपणै साथी बिशवाशी शै साचौ बौल़ौ, जिथुकै आमै सौबै ऐकी शोरीर कै अंग औसौ। 26 जै तुऐं गुस्से हौए जांव, तौ ध्यान राखैया कै तुऐं पाप ना कौरौ। बैल़खै हौणौ दै आगै तुऐं गुस्सा कौरणा बंद कौरे दौ। 27 औरौ ना ही शैतान कै तुऔं ललचाणो का मौका दौ। 28 चोरे कौरणौवाल़ा औटेयौ चोरे ना कौरौ; यानी तैसी आपणै हाथौ लैई ईमानदारी शै काम कौरणा चैंई, ताकि गरीब लोगौ कै मौदद कौरणौ कारिए तैसीकैईं काफी मौदद हौंव। 29 कुणजै गौंदी बात तोंवारै मुं पौरैशी ना निकल़ी चैंई, जू किछै बै तुऐं बौल़ौ सैजौ आछौ औरौ मौददगार हौणौ चैंई, ताकि तोंवारै बातौ तिनु लोगौ का हौंसला बौढ़ाव जू तिनु बातौ कै शुणौए। 30 पौरमेशवर कै पवित्र आत्मा खै आपणै जीवन जिणौ कै तरीकै शै दुखी ना कौरौ। पवित्र आत्मा ऐक छाप कै जैशणी औसौ, जू ऐजौ दिखांव कै तुऐं पौरमेशवर कै औसौ। 31 सौबै भान्त खै कड़वाहट औरौ प्रकोप औरौ गुस्सा औरौ कलह, औरौ सौबै बैरभाव औरौ नेंदैया तक आपणै जीवन शै दूर कौरौ। 32 ऐकी दूजै पांदी दयालु औरौ करूणामय बौणौ, औरौ जैशै पौरमेशवर मसीह दै तोंवारै पाप माफ कौरे, ऐशैखैई तुऐं बै ऐकी दूजै कै पाप माफ कौरौ। |
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
Beyond Translation