इफिसियों 3 - सिरमौरी नौवाँ नियमबैगानै यहूदी लोगौ कै सुसमाचार 1 जिथुकै पौरमेशवरे तुऔं बैगानै यहूदी लोगौ कै खातिर ऐजौ सौबै कौरौ, हांव पौलुस, तुऔं कारिए प्रार्थना कौरु। हांव ज़ेलो दा औसौ जिथुकै हांव तुऔं कारिए मसीह यीशु कै सेवा कौरु। 2 निशोंक हौयौ तुऐं जाणौए कै, मुखै तुऔं कै सुसमाचार प्रचार कौरणौ कै जुमैवारै पौरमेशवर कै अनुग्रह शै भैटी रौए। 3 यानी जैशै मोऐं थोड़ै शब्दो दै तुऔं आगै लैखै राए, पौरमेशवरे खुद मुखै तियौं छिपैयौंदे योजना कै दिखाए राए। 4 जैशै तुऐं चिट्ठी पोढ़लै, तौ तुऔं ऐजौ बै पौता चाल जांदा कै हांव सौथी कै मसीह कै भैद कै बारै मुंजी कैतरै आछै शै सौमझु। 5 पुराणै सौमय दा, पौरमेशवरे लोगौ कै ऐजा भैद ना दिखैई, पौरौ ऐबै तैणै पवित्र आत्मा कै दवारा आपणै पवित्र चोणेयौंदे चैलै औरौ पौरमेशवर कै बातौ बौताणौवाल़ै कैई इथका खुलासा कौरा। 6 औरौ भैद ऐजा औसौ कै यीशु मसीह कै साथै अमारै सौमबंध की बौजैह शै सुसमाचार कै दवारा यहूदी लोगौ कै जैशणै बैगानै यहूदी लोग बै तिनु आशीषौ कै पांदै, औरौ जू ऐकी शोरीर का हिस्सा औसौ औरौ पौरमेशवर कै कौरेयौंदे वादै दै बै भागीदार औसौ। 7 औरौ पौरमेशवरे मुखै ऐई मुंजी आपणा अनुग्रह औरौ बौड़ी शौकतै शै, सुसमाचार बौताणौ का सौभाग्य दैय राए। भैद का मकसद 8 हांव पौरमेशवर कै सौबी लोगौ मुंजी सौबिदा बौड़ा नालायक औसौ। अनुग्रह कै दवारा मुखै ऐजा सौभाग्य भैटी रौआ कै हांव बैगानै यहूदी लोगौ कै मसीह कै असीम आशीष कै बारै मुंजी सुसमाचार शुणौऊं। ऐजै आशीष जू आमु मसीह कै ढौबौशै भैटौ, सै आदमी की सौमझ शै बायरै औसौ। 9 औरौ मुखै इयौं राज़ौ कै योजना खै सौबी कै सौमझाणौ कारिए बै चोणे राए थिया। पौरमेशवर, जू सारी दुनिया का बाणणौवाल़ा औसौ, तैणै शुरु शै ही इयौं योजना कै गुप्त राखै राए थै। 10 ताकि ऐबै कलीसिया कै दवारा, पौरमेशवर का सान्त-भान्त का ज्ञान तिनु प्रधानों औरौ औधिकारियो पांदी जू स्वर्ग कै ठाँव दै औसौ, प्रगट कोरी सौकौ। 11 पौरमेशवरे दुनिया बाणणौ दै आगै इथकै योजना बाणै, जियौं तैणै अमारै प्रभु मसीह यीशु कै दवारा पोरे कौरे। 12 मसीह कै साथै अमारै जुड़णौ कै बौजैह शै औरौ तैसी पांदी अमारै बिशवाश की बौजैह शै, ऐबै आमु पौरमेशवर कै सामणै हिम्मत औरौ आत्मविशवास शै आए सौकु। 13 इथकारिए हांव बिन्ती कौरु कै जू कौल़ेश तोंवारै खातिर मुखै हौए रौवै, तिथकै बौजैह शै निराश नी हौणौ चैंई ऐजौ सौबै तोंवारै ही फायदै कारिए औसौ। इफिसियों कै लोगौ कै खातिर प्रार्थना 14 इथकारिए हांव, पौलुस, तोंवारै खातिर पिता पौरमेशवर शै प्रार्थना कौरु। 15 सै सैजाई औसौ जू बिशवाशियौं कै पूरै परिवार का पिता औसौ जू स्वर्ग दा औसौ औरौ जू धोरती पांदी औसौ। 16 हांव प्रार्थना कौरु कै, पौरमेशवर आपणी महिमा कै कौलोंई खत्म ना हौणौवाल़ै धन शै तुऔं ऐजा दाण दैंव, कै तुऐं तैसकै आत्मा शै आपणै भीतरै अनौखी शौकतै पायौ मोजबूत हौए जांव। 17 ताकि तैसी पांदी बिशवाश कौरणौ कै दवारा मसीह तोंवारै भीतरै हमैशा कारिए बौसै जांव। औरौ हांव प्रार्थना कौरु कै पौरमेशवर कै प्यार दै तुऐं मोजबूत हौयौ औरौ औड़ेयौंदे रौयौ, 18 सौबी पवित्र लोगौ कै साथै इयौं बातौ कै आछी कौरेयौ सौमझणौ कै शौकतै पांव कै मसीह कै प्यार कै चौड़ाए, औरौ लौम्बाए, औरौ ऊंचाई, औरौ गैहराए किशैक जादा औसौ। 19 हांव प्रार्थना कौरु कै, तुऐं मसीह कै ऐसी प्यार कै जाणै सौकौ, जू आदमी कै सौमझ शै बायरै औसौ, ताकि तोंवारा स्वभाव पौरमेशवर कै स्वभाव कै जैशणा बौणै जांव। 20 पौरमेशवर कै महिमा हौंव! सै ऐशणा शौकतीशाली पौरमेशवर औसौ, जू अमारी बिन्ती औरौ सुंचणौ-सौमझणौ शै कैंई जादा कौर सौकौ। सै आपणै अनौखी शौकतै शै आमुदा काम कौरौ। 21 तैसकै महिमा कलीसिया दै, औरौ मसीह यीशु दै पीढ़ी शै पीढ़ी तौड़ी हमैशा-हमैशा हौंदी रौंव। आमीन। |
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
Beyond Translation