इफिसियों 2 - सिरमौरी नौवाँ नियममौत शै जीवन कै ढौबौ 1 आगै तुऔं कैई पौरमेशवर कै ढौबौशा नौवाँ जीवन नी थी; आपणै बुरै काम औरौ पापौ की बौजैह शै तुऐं मौरेयौंदे लोगौ कै जैशणै थिए। 2 तैसी सौमय तुऐं इयौं दुनिया कै लोगौ कै तरीको कै पौछौड़ियौ चालौ थिए औरौ तुऐं शैतान कै आज्ञा कै मानौ थिए यानी तैसी प्रधान का जू आकाश दा दुष्टआत्माओं पांदी राज कौरौ, जू ऐबै बै तिनु लोगौ कै मनो दा काम कौरौ जू पौरमेशवर कै आज्ञा ना मानौ। 3 आमै बै आगै तिनु जैशणै जियुं थिए, औरौ आपणै पापी स्वभाव कै इछाओं कै पूरी कौरु थिए, औरौ जू बै अमारी बुरी इछाएं औरौ विचार आमुखै बौल़ौ आमै सैजौई कौरु, औरौ बाकी सौबी कै जैशणै, आमै बै स्वाभाविक रुप शै बुरै थिए औरौ जू पौरमेशवर कै सौजा कै अधीन औसौ। 4 पौरौ पौरमेशवर बैजाए दयालु औसौ; आपणै तैसी बौड़ै प्यार की बौजैह शै तैणै आमुआरी प्यार कौरा, 5 जोबै आमै पापौ की बौजैह शै मौरेयौंदे कै जैशणै थिए, तौ तैणै आमु सौदा कै जिन्दगी दैय राए औरौ तैणै मसीह कै मौरेयौंदे मुंजीदा जियुंदी कौरा; औरौ पौरमेशवर कै अनुग्रह लैई अमारा उध्दार हौए रौआ, 6 जिथुकै तैणै आमु मसीह यीशु कै साथै मौरेयौंदे मुंजीदै जियुंदी कौरे राए, तैणै मसीह कै साथै अमारै सौमबंध की बौजैह शै स्वर्ग दा आमु मसीह कै साथै ऐक ठाँव दैय राए। 7 पौरमेशवर ऐजौ इथकारिए कौरौ ताकि सै भविष्य दै सौबी कै बौताए सौकौ कै अमारै प्रति सै तैसी काम की बौजैह शै जू मसीह यीशुए अमारै खातिर कौरे राए महान अनुग्रह कै साथै पैश ओऊवा,। 8 जिथुकै जोबै तुऐं बिशवाश कौरौ तौ पौरमेशवरे आपणै अनुग्रह ही शै तुऔं बौचाए राए, तुऐं आपणै उध्दार कै ना कमाए रैई, पौरौ ऐजा पौरमेशवर का दान औसौ। 9 औरौ ऐजा तोंवारै दवारा कौरेयौंदे कियौंई बै आछै काम की बौजैह शै नी औरौ इथकारिए तुऔं कैई घमण्ड कौरणौ कै कुणजै बौजैह ना आथी। 10 जिथुकै आमै पौरमेशवर कै बाणैयोंदै औसौ, औरौ मसीह यीशु दै आमु कै नौवें लोगौ कै रुप दै इथकारिए बाणै राए, ताकि आमै तिनु भले काम कै कोरयो जीवन बीतांव जिनु कामौ कै पौरमेशवरे औगौड़ियौ शै आमु कारिए तैयार कौरे राए। मसीह दै ऐक 11 इयौं बौजैह शै, तुऐं जू बैगानै यहूदी पौयदा हौए रौवै थिए, याद कौरौ कै तुऐं आगै कैशणै थिए। यहूदी लोगै तुऔं ऐजौ बौलेयौ बैकार जाणौ कै तुऐं खतना ना कौरांव। पौरौ तिनका ऐजा भौवार सिरफ तिनकै शोरीर पांदी हौंव ना कै तिनकै मन दा। 12 तुऐं लोग तैसी सौमय मसीह कै ना जाणौ थिए औरौ तुऐं पौरमेशवर कै चोणेयौंदे लोग इस्राएल देश कै जैशणै नागरिक कै रुप दै शामिल नै थी, पौरमेशवरे आपणै वायदै कै हिसाब शै जू कौरार यदूदी लोगौ आरी कौरे राए थै, तुऐं तिथकै बै भागीदार नै थी। औरौ तुऐं ऐसी दुनिया दै बिना आशा कै औरौ बिना ईशवर कै रौंव थिए। 13 ऐक सौमय थिया जोबै तुऐं पौरमेशवर शै दूर थिए, पौरौ ऐबै मसीह यीशु दै तुऐं तैसकै लोऊ कै दवारा नेड़िक लाए गौवै। 14 जिथुकै मसीहे अमारै बीच शान्तै बाणै राए कै बीतै सौमय दो, ऐजौ ऐशै थियु जैशै ऐक दीवारे यहूदी लोगौ औरौ बैगानै यहूदी लोगौ कै जौई कौरे राए थिए, सै ऐकी दूजै शै नफरत कौरौ थिए। पौरौ ऐबै मसीहे तियौं दीवार कै ढाल़ै राए औरौ दो झुंडो कै ऐक कौरे राए। 15 आपणै मौत कै दवारा, तैणै मूसा कै कानून कै ऐजै सौबै नियम औरौ विधियों कै खत्म कौरे राए, ताकि सै यहूदी लोगौ औरौ बैगानै यहूदी लोगौ कै जौड़ेयौ तिनुमुंजी शान्तै बाणै सौकौ औरौ ऐशैखै ऐक नौवाँ झुंड बौण सौकौ। 16 क्रूस पांदी आपणै मौत कै दवारा, मसीहे दो झुंडो कै ऐक कौरे राए, औरौ तिनका मिलाप पौरमेशवर शै कौरवाए राए, ताकि यहूदी लोगौ औरौ बैगानै यहूदी लोगौ कै बीच नफरत मिटै जांव। 17 औरौ मसीहे आयौ खै बैगानै यहूदी लोगौ कै जू पौरमेशवर शै दूर थिए, औरौ यहूदी लोगौ कै जू तैसकै नेड़िक थिए, दु खै मैल-मिलाप का सुसमाचार शुणौऊवा। 18 मसीह की बौजैह शै, आमै सौबै ऐकैई पवित्र आत्मा कै दवारा पिता कै धोरे आए सौकु। मसीह अमारा कुणै का पाथर 19 इथकारिए बैगानै यहूदी लोग ऐबै प्रदेशी औरौ मुसाफिर ना रोई, पौरौ तुऐं पौरमेशवर कै पवित्र लोगौ कै साथै स्वदेशी औरौ पौरमेशवर कै परिवार कै हौए गौवै। 20 ऐक साथै आमै तैसकै घोरो कै जैशणै औसौ, जू कै चोणेयौंदे चैलै औरौ पौरमेशवर कै बातौ बौताणौवाल़ै की नीयुं पांदी बौणैयौंदो औसौ, जिथकै कुणै का पाथर मसीह यीशु आपी औसौ। 21 मसीह सैजा औसौ जू पूरै घोरो कै ऐक साथै जौड़ेयौ राखौ। तैणै पौरमेशवर कारिए ऐक पवित्र मन्दिर बौणाणौ कारिए, आपणै सौबी लोगौ कै ऐक साथै जोड़े लौवै। 22 ओए रै बैगानै बिशवाशी जिथुकै तुऐं मसीह कै साथै एकजुट औसौ, इथकारिए तुऔं बै पौरमेशवर कै ओकी लोगौ कै साथै जोड़े लौवै। ताकि तुऐं ऐशणा घोर बौणै जांव जिथै पौरमेशवर का आत्मा रौंव। |
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
Beyond Translation