इफिसियों 1 - सिरमौरी नौवाँ नियमस्वागत 1 मोऐं पौलुसे इयौं चिट्ठी कै लैखै लोए। हांव पौरमेशवर कै इछा कै हिसाब शै यीशु मसीह का चोणेयौंदा चैला औसौ। मोऐं ऐजै चिट्ठी इफिसुस शहर दै रौणौवाल़ै पौरमेशवर कै लोगौ कै लैखै लौए, जू मसीह यीशु कै प्रति वफादार औसौ। 2 हांव प्रार्थना कौरु कै अमारै पौरमेशवर पिता औरौ प्रभु यीशु मसीह कै ढौबौशै तुऔं अनुग्रह औरौ शान्तै भैटिया कौरौ। मसीह दा छुटकारा 3 अमारै पौरमेशवर औरौ प्रभु यीशु मसीह कै पिता कै बौड़ाए हौंव। तैणै आमु स्वर्ग शै हर भान्त कै आत्मिक आशीष दैय राए जिथुकै आमै मसीह कै साथै ऐक हौए गौवै। 4 पौरमेशवरे दुनिया कै बाणणौ दै औगौड़ियौ ही आमु आपणै पवित्र लोग हौणौ कारिए चोणे राए जिथुकै आमै मसीह कै साथै ऐक औसौ; ताकि आमै तैसकै सामणै पवित्र औरौ निर्दोष बौणै सौकु। 5 जिथुकै पौरमेशवर आमुआरी प्यार कौरौ, इथकारिए तैणै बैजाए आगै ऐजा फोयसला कौरा कै सै आमु आपणै संतान बाणदा जिथुकै आमै यीशु मसीह कै साथै ऐक औसौ पौरमेशवरे ऐशै आपणै ही इछा औरौ खुशी कै हिसाब शै कौरे राए। 6 इथकारिए आमै पौरमेशवर कै महान अनुग्रह कारिए तैसकै बौड़ाए कौरु, जू तैणै आमु ऐई मुंजी दैय राए जिथुकै आमै तैसकै प्यारे बैटै कै साथै ऐक औसौ। 7 मसीह कै लोऊ बोवाणो कै दवारा पौरमेशवरे आमु बौचाए राए यानी अमारै पापौ कै माफ कौरे राए। पौरमेशवर का अनुग्रह बैजाए बौड़ा औसौ जू तैणै आमु दैय राए। 8 ऐजा अनुग्रह पौरमेशवरे सारै ज्ञान औरौ सौमझ कै साथै आमु पांदी भरपूरी शै कौरे राए। 9 पौरमेशवरे सैजौई कौरौ, जू तैणै ठाणै राए थियु, औरौ तियौं मैसौ कै योजना कै बारै मुंजी बौतौऊ जियौं तैणै आगै दी ही मसीह कै दवारा पूरा कौरणौ का फोयसला कौरे राए थिया। 10 औरौ पौरमेशवर कै योजना ऐजै औसौ कै सोही सौमय पांदी, जू किछै स्वर्ग औरौ धोरती पांदी औसौ, तिनु सौबी कै मसीह कै औधिकार तौड़ी कौरदा। 11 पौरमेशवरे आमु यहूदी लोगौ कै मसीह कै साथै ऐक हौणौ की बौजैह शै आपणै लोग बाणणौ कारिए चोणे राए जिथुकै शुरु शै ही तैसकै ऐजै योजना थै। औरौ सै ऐजौ सौबै ठुँ आपणी इछा कै हिसाब शै कौरौ। 12 आमै यहूदी आगलै लोग औसौ जिनुवै मसीह पांदी आशा राखै, औरौ आमु इथकारिए चोणे राए थिए ताकि आमु लोगौ कै दवारा पौरमेशवर कै महानता कै बौड़ाए हौंव। 13 तुऐं साचा सौंदेश शौणै राए, जू इथकै बारै मुंजी बौतांव, कै मसीह पौरमेशवरे कैशै तुऔं मोक्ति दैय राए जोबै तुऐं मसीह पांदी बिशवाश कौरे राए थिया, तौ पौरमेशवरे आपणै कौरेयौंदे वादै कै हिसाब शै पवित्र आत्मा तुऔं दैय राए, ऐजौ दिखाणौ कारिए कै तुऐं पौरमेशवर कै औसौ। 14 पवित्र आत्मा बै ऐक बयाने कै जैशणी औसौ जू इयौं बात कै साबित कौरौ पौरमेशवर आमु विरासत दैंदा जू दैणौ का वादा तैणै कौरे राए औरौ जिनुकै तैणै आपणै लोग हौणौ कारिए मोल लोए राए, ताकि तैसकै महिमा कै बौड़ाए हौंव। आत्मिक ज्ञान कारिए प्रार्थना 15 पौरमेशवरे जू किछै कौरे राए तिथकी बौजैह शै, हांव बै प्रभु यीशु पांदी तोंवारै बिशवाश औरौ पौरमेशवर कै पवित्र लोगौ कै प्रति तोंवारै प्यार कै बारै मुंजी शोणेयो, 16 हांव सौदा तुऔं कारिए पौरमेशवर का धन्यवाद कौरु, औरौ आपणी प्रार्थनाओं दै तुऔं याद कौरु। 17 हांव प्रार्थना कौरु कै पौरमेशवर अमारै प्रभु यीशु मसीह का महिमामय पिता तुऔं बुध्दि, आत्मा औरौ ज्ञान दैंव ताकि तुऐं तैसी जाणै सौकौ। 18 हांव ऐजै बै प्रार्थना कौरु कै सै तोंवारै मन कि आखी कै खोले दैंव औरौ तुऐं पेयाशै कै दैखी सौकौ ताकि तुऐं तियौं आशा कै सौमझै सौकौ जिथ कारिए तुऔं बौएदै राए; औरौ तुऐं जाणै सौकौ कै सैजी आशीषै कैतरी महान औरौ महिमामय औसौ, जिथका वादा पौरमेशवरे आपणै लोगौ आरी कौरे राए। 19 हांव चोऊं कै तुऐं तैसी महान औरौ पराक्रमी शौकतै कै बारै मुंजी जाणै सौकौ, जू पौरमेशवर कै धोरे आमु कारिए औसौ, जू मसीह पांदी बिशवाश कौरौ। ऐजी सैजी अनौखी शौकतै औसौ। 20 जू तैणै मसीह कै बारै मुंजी कौरे रैई, कै तैसीकै मौरेयौंदे मुंजीदा जियुंदी कौरेयौ स्वर्ग कै ठाँव दा आपणै सोऐं ढौबौ बौठालेयो। 21 सौबै भान्त कै प्रधानता, औरौ औधिकार, औरौ शौकतै, औरौ प्रभुता कै, औरौ तैसका पद सौबी औधिकारी कै पद दा बौड़ा औसौ, जू ना सिरफ ऐसी दुनिया दा, पौरौ आणौवाल़ै दुनिया दा बै रौंदा। 22 पौरमेशवरे सौबी चीज़ौ कै मसीह कै औधिकार कै अधीन कौरे राए। पौरमेशवरे तैसीकै कलीसिया पांदी ठोगड़े कै रुप दा चोणे राए। 23 कलीसिया मसीह का शोरीर औसौ, मसीह अमारै बीच आपणै पूरै शौकतै का इस्तैमाल तैशैखै कौरौ जैशै सै आपणै शौकतै का इस्तैमाल सारै ब्रह्मांड दा कौरौ। |
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
Beyond Translation