कुलुस्सियों 4 - सिरमौरी नौवाँ नियम

मसीह दा अनुग्रह

¹ ओए रै मालिको, आपणै-आपणै दासो कै साथै न्याय औरौ ऐक जैशणा बर्ताव कौरौ, ऐजौ सौमझेयौ कै स्वर्ग दा बै तोंवारा ऐक मालिक औसौ।

² लगातार प्रार्थना कौरदै रौव, औरौ जोबै तुऐं प्रार्थना कौरौ तौ चौकश रौव औरौ सौदा पौरमेशवर का धन्यवाद कौरदै रौव।

³ औरौ इथकै साथ ही साथ आमु कारिए बै प्रार्थना कौरदै रौव कै पौरमेशवर आमु कै वचन शुणणौ कारिए बाट खोले दैंव कै आमु मसीह कै तैसी भैद का बखान कौरे सौकु। हांव ऐबै कोयदखाने दा औसौ जिथुकै मोऐं ऐसी सौंदेश का प्रचार कौरे राए।

⁴ औरौ प्रार्थना कौरौ कै हांव मसीह कै भैद कै खौलेयौ बौताए सौकु।

⁵ हर मोके का आछै शै इस्तैमाल कौरौ ऐजौ दिखाणौ कारिए कै तुऐं बिशवाशी औसौ औरौ जू लोग यीशु पांदी बिशवाश ना कौरौ तिनकै साथै बुध्‍दिमानी शै बर्ताव कौरौ।

⁶ तुंआरी बातौ सौदा नम्रता कै साथै औरौ मन कै भाणो वाल़ी हौंव औरौ जै तुऐं ऐशै कौरलै तौ तुऐं शिखै पांदै कै लोगौ कै कैशै बुध्दिमानी कै साथै जोवाब दैणा, जोबै कुणिए तुऔं कैईंदु सुसमाचार कै बारै मुंजी पूछौ।

आखरी नमशकार

⁷ प्यारे बिशवाशी भाई औरौ बिशवाश लायक सेवक तुखिकुस जू प्रभु दा मैरा साथी औसौ, मैरी सौबै बातौ तुऔं बौताए दैंदा।

⁸ तैसी मोऐं इथकारिए तोंवारै धोरे छाड़ै राए कै तुऔं पौता चालै जांव कै अमारै साथै का हौंदौ लागै रौ, औरौ सै तुऔं बिशवाश दै मजबूत कौरौ।

⁹ तैसकै साथै उनेसिमुस खै बै छाड़ै राए जू बिशवाश लायक औरौ प्यारा बिशवाशी भाई औसौ औरौ सै तोंवारै नोगर पौरैशा औसौ, सै तुऔं कैंई इथै की सौबै बातौ बौताए दैंदा।

¹⁰ अरिस्‍तर्खुस जू मैरै साथै कोयदखाने दा औसौ, औरौ मरकुस जू बरनबास का चचेरा भाई लागौ। ऐजै तुऔं लोगौ खै नमशकार कौरौ। (हांव जाणुए कै तुऔं कै आगैई मरकुस कै बारै मुंजी बौताए राए कै जै सै तोंवारै धोरे आंव तौ तैसीआरी आछै शै बर्ताव कौरेया)।

¹¹ यीशु जैसी लोग यूस्‍तुस बै बौल़ौए तुऔं नमशकार बौल़ौ। खतना कौराणौ वाल़ै बिशवाशियौं मुंजीदै सिरफ ऐजै तीन मर्द ही पौरमेशवर कै राज्य कारिए मैरै सहयोगी औसौ औरौ इनुवे मुखै बैजाए तसल्ली दैय राए।

¹² इपफ्रास जू तोंवारै नोगर पौरैशा औसौ औरौ मसीह यीशु का दास औसौ, तुऔं खै नमशकार कौरौ। सै सौदा तुऔं कारिए बौड़ी लगन शै प्रार्थना कौरदा रौंव, ताकि पौरमेशवर तुऔं कै मोजबूत औरौ सिध्द बाणौ औरौ तुऐं पूरै बिशवाश कै साथै पौरमेशवर कै इछा कै पूरै कौरदै रौंव।

¹³ हांव तैसका गवाह औसौ कै सै तुऔं कारिए औरौ लौदीकिया नोगर कै लोगौ औरौ हियरापुलिस शहर कै लोगौ कारिए बौड़ी लगन शै प्रार्थना कौरदा रौंव।

¹⁴ प्यारे वैध लूका औरौ देमास तुऔं नमशकार बौल़ौ।

¹⁵ लौदीकिया नोगर कै बिशवाशी भाईटु कै औरौ नुमफास औरौ तैसकै घोर कि कलीसिया कै नमशकार बौलेया।

¹⁶ औरौ जोबै ऐजै चिट्टी तोंवारै इथै पौढ़ पांव तौ ऐशै कौरेया कै ऐजै चिट्ठी लौदीकिया नोगर कै कलीसिया दै बै पोढ़ेया, औरौ तुऐं बै इयौं चिट्टी कै पोढ़ेया जू मोऐं लौदीकिया कै बिशवाशियौं कारिए लैखै राए।

¹⁷ औरौ अरखिप्पुस खै बौलेया, “कै जू सेवा प्रभु दै ताखै सौंपै राए सैजै कामकै पूरै कौरेयौ खत्म कौरेया।”

¹⁸ मोऐं पौलुसे तुऔं नमशकार कौरणौ कारिए चिट्ठी कै ऐसी हिस्से कै आपणी लिखाए दो लैखै लो। याद राखौ कै हांव कोयदखाने दा औसौ औरौ मुं कारिए प्रार्थना कौरदै रौव। पौरमेशवर का अनुग्रह तुऔं पांदी हौंदा रौंव। आमीन