कुलुस्सियों 3 - सिरमौरी नौवाँ नियमपवित्र जीवन कै नियम 1 जैशै पौरमेशवरे मसीह कै मौरेयौंदे मुंजीदा जियुंदी कौरा तैशैखैई तुऔं बै जियुंदी कौरे राए, इथकारिए तिनु चीज़ौ कै खोज़ दै लागैयौंदे रौंव जू स्वर्ग दी राखै रैई जिथै मसीह पौरमेशवर कै धोरे सौबिदा आदर वाल़ै जौगैह पांदी बौठै रौआ। 2 धोरती पांदी कै चीज़ौ पांदी ध्यान नै लाव पौरौ लगातार स्वर्ग की चीज़ौ कै बारै मुंजी सुंचदै रौंव। 3 जिथुकै तुऐं तौ आपणै पाप कै स्वभाव दै मौरे गौवै औरौ तोंवारा नौवाँ जीवन मसीह कै साथै पौरमेशवर दा छिपैयौंदा औसौ। 4 मसीह जू तुऔं नोऐं जिन्दगी दैंव, जोबै सै इयौं धोरती पांदी औटेयौ पाछु आन्दा, तोबै तुऐं बै तैसकै साथै आन्दै औरौ तैसकै महिमा दै शामिल हौए जांदै। 5 इथकारिए आपणै बुरै कामौ कै कौरणा बन्द कौरौ जू तोंवारै पापी स्वभाव शै जोड़े रौवै। जैशै गौलत सौमबंध, अशुध्दता, बुरै कामना, बुरै इछा। लालचै नै बौणैया जू कै मूर्तिपूजा कौरणौ कै बराबर औसौ। 6 जू लोग इनु बुरै कामौ कै कौरौए पौरमेशवर जौरुर तिनु सख्त सौजा दैंदा। 7 तुऐं बै आगै इयौं इछा कै हिसाब शै जियौं थिए, जोबै तुऐं इनु बुरै कामौ दै जिन्दगी बितांव थिए। 8 पौरौ ऐबै तुऔं बै इनु सौबै कामौ कै यानी गुस्सा, रुशणौ, बैरभाव, नेंदैया औरौ गाल़ी दैणी बन्द कौरे दैणी चैंई। 9 ऐकी दुजैआरी झूठु नी बौलेया, जिथुकै तुऐं आपणै पुराणै पाप वाल़ै स्वभाव कै छोड़े दियै। 10 औरौ ऐबै तुऐं नौवें स्वभाव कै बाम्बै पाए पौरमेशवर इथका बाणणौवाल़ा औसौ औरौ ऐसी स्वभाव कै जादा शै जादा आपणै रुप दा बाणै लौआ ताकि आपणै बारै मुंजी पूरा ज्ञान दैय सौकौ। 11 ऐसी बौजैह शै ऐक यूनान देश कै रौणौवाल़ै लोगौ कै बीच कुणजाई भैदभाव ना आथी औरौ ना यहूदी लोगौ मुंजी, ना खतना कौरणौवाल़ौ मुंजी, ना बिना खतना कौरवाणौवाल़ै लोगौ मुंजी, ना विदेशी लोगौ मुंजी, ना असभ्य लोगौ मुंजी, ना दास औरौ ना गुलामो मुंजी कुणजाई भैदभाव औसौ, पौरौ मसीह ही सौबै ठुँ औसौ औरौ सै आपणै सौबी लोगौ मुंजी रौंव। मसीही जीवन 12 पौरमेशवरे तुऔं आपणै पवित्र लोग हौणौ कारिए चोणे राए औरौ सै तुऔंआरी प्यार कौरौ इथकारिए बौड़ै दया औरौ भोलाए, दीनता औरौ नम्रता औरौ सैहन शीलता धारण कौरौ। 13 औरौ जै कोसी आदमी कै कोसी पांदी दोष दैणौ कै बौजैह हौंव तौ ऐकी दूजै कै सैहन कौरौ औरौ ऐकी दूजै कै पाप माफ कौरौ, जैशै प्रभुए तोंवारै पाप माफ कौरे राए, तैशैखैई तुऐं बै कौरौ। 14 औरौ सौबीदै बौड़ै बात ऐजै औसौ कै तुऔं ऐकी दुजैआरी प्यार कौरणा चैंई ऐशै कौरेयौ तुऐं पूरी तरह शै एकजुट हौए जांदै। 15 औरौ सैजै शान्तै जू मसीह दैंव तियौं आपणै दिल दै राज कौरणौ दैव जिथुकै तुऐं सौबै ऐकैई शोरीर कै अंग औसौ। इथकारिए तुऔं ऐकी दुजैआरी शान्तै शै रौणौ कारिए बौएदै राए। औरौ सौदा पौरमेशवर का धन्यवाद कौरदै रौव। 16 मसीह कै वचन कै आपणै मनो दा जादा शै जादा बौसणौ दैव; औरौ सिध्द ज्ञान कै साथै ऐकी दूजै कै शिखाव, औरौ चैतावणी दैव औरौ आपणै-आपणै मन दा धन्यवाद कै साथै पौरमेशवर कारिए भजन औरौ स्तुतिगान औरौ आत्मिक गीत गाओ। 17 जू किछै तुऐं बौल़ौए या कौरौए सैजौ सौबै प्रभु यीशु मसीह कै नांव लैई कौरेया कौरौ, औरौ तैसकै दवारा पौरमेशवर पिता का धन्यवाद कौरौ। मसीही परिवार कारिए नियम 18 ओए रै घोरवाल़ियो आपणै-आपणै घोरवाल़ै कै अधीन रौव, जिथुकै मसीह कै पौछौड़ियौ हांडणौ वाल़ै कारिए ऐजौ सोही औसौ। 19 ओए रै घोरवाल़ै, आपणै-आपणै घोरवाल़ी आरी प्यार कौरौ, औरौ तिनु आरी नम्रता शै बर्ताव कौरौ। 20 ओए रै नानड़िया वाल़ौ सौबी बातौ दै आपणै-आपणै माँ बापू कै आज्ञा का पालन कौरौ, जिथुकै प्रभु इथलैई खुश हौंव। 21 ओए रै नानड़िया वाल़ौ, आपणै नानड़िया कै बार बार डांटैयौ ना खिजाव, कोदी ऐशै नै हौंव कै सै सैजा काम कौरणा बन्द कौरे दैंव जू पौरमेशवर कै खुश कौरौ। 22 ओए रै गुलामो जू इयौं दुनिया पांदी तोंवारै मालिक औसौ, सौबी बातौ दै तिनकै आज्ञा का पालन कौरौ आदमी कै खुश कौरणौवाल़ौ कै जैशणै दिखाणौ कारिए नी पौरौ मन कै सौचाई औरौ पौरमेशवर कै डौर शै कौरौ। 23 औरौ जू किछै तुऐं कौरौए तिथु पूरै मन शै कौरौ ऐजौ सौमझेयौ कै आदमी कारिए नी पौरौ प्रभु कारिए कौरौए। 24 याद राखौ कै प्रभु मसीह तुऔं इनाम दैंदा जू ऐजा औसौ कै सै तुऔं तिनु आशीषौ मुंजी दा तोंवारा हिस्सा दैंदा जैसी तैणै आपणै सौबी लोगौ कै दैणौ कारिए तैयार कौरे राए। तुऐं जैसी मालिक कै सेवा कौरे लोए सै मसीह औसौ। 25 जिथुकै जू कुणिए बुराई कौरदा रौंव, पौरमेशवर तैसी सौजा दैंदा। पौरमेशवर कोसी का भैदभाव ना कौरौ। |
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
Beyond Translation