कुलुस्सियों 2 - सिरमौरी नौवाँ नियम1 हांव चोऊं कै तुऐं जाणै पाव, कै जू लौदीकिया नोगर दै औसौ, औरौ तिनु सौबै लोगौ कारिए जिनुवारी हांव ना भैटी रैई, हांव कैतरै मैहनत कौरु। 2 हांव मैहनत इथकारिए कौरु कै जिथुकै हांव तुऔं बिशवाश दै मजबूत कौरणा चोऊं औरौ तुऐं सौबै ऐकी दूजै कै साथै प्यार दै बौणैयौंदे रौव औरौ पौरमेशवर पिता कै भैद कै जाणै सौकौ जू तुऔं कै आछी सौमझ दैंव ऐजा भैद मसीह कै बारै मुंजी औसौ। 3 जिथुकै सै सैजाई औसौ जू पौरमेशवर कै बुध्दि औरौ ज्ञान कै पौछेयाण कौरांव जू कै तैसी खजाने कै जैशणा औसौ जू छिपैयौंदा औसौ। 4 हांव ऐजौ इथकारिए बुलू कै कुणिए आदमै तुऔं झूठी शिक्षाओं पांदी बिशवाश कौरणौ कारिए राजी कौरेयौ धौखा नै दैंव 5 हांव तुऔं दा दूर औसौ तोबै बै तोंवारै बारै मुंजी सुंचदा रोऊं, औरौ हांव खुशी औसौ कै तुऐं एकता दै तैशै जी रौवै जैशै तुऔं जीणु चैंई, औरौ ऐजौ बै कै मसीह दै तोंवारै बिशवाश मजबूत औसौ। मसीह दै बौणैयौंदे रौव 6 इथकारिए जैशै तुऐं मसीह यीशु कै प्रभु कौरेयौ ग्रहण कौरे राए, तैशैखैई लगातार तैसीआरी चालदै रौव। 7 जैशै ऐक डाल़ जोमीनो दा जोड़ पाकड़ो औरौ ऐक घोर नीयुं पांदी मजबूत रौंव, तैशैखैई तुऐं आपणै बिशवाश दै मजबूत हौंदै रौंव औरौ लगातार तैसीआरी बौढ़दै जाव जैशै तुऔं कै शिखाए राए औरौ जादा सै जादा धन्यवाद कौरदै रौव। 8 चौकश रौव कै कुणिए तुऔं तैसी बैकार कै ज्ञान औरौ झूठै धौखै कै दवारा फशाए नी दैंव जू आदमी कै भौवारो औरौ दुनिया की दैएयौंदी शिक्षा कै हिसाब शै औसौ, पौरौ मसीह कै हिसाब शै ना आथी। 9 इथकारिए इनु लोगौ कै धौखै दै नी आव जिथुकै जोबै मसीह आदमै बौणा तोबै बै सै पूरी तरह शै पौरमेशवर थिया। 10 मसीह हरेक शौकतै औरौ औधिकार पांदी प्रधान औसौ इथकारिए जै तुऐं मसीह दै जोड़ेयौंदे औसौ तौ तुऔं कोसी बै चीज़ कै कमी ना आथी। 11 जोबै तुऐं मसीह पांदी बिशवाश कौरा तौ तोंवारा खतना आदमी कै दवारा ना होई जैशै यहूदी लोग कौरौ पौरौ मसीह कै दवारा सैजा खतना हौए रौआ जू तोंवारै पाप कौरणौवाल़ै स्वभाव कै हटायो दूर कौरौ। 12 जोबै तुऔं बपतिस्मा दिया तोबै मसीह कै जैशणै तोंवारै पाप कौरणौ कै स्वभाव कै दबाए दिए औरौ तैशैखैई तुऔं नौवें स्वभाव कै साथै जियुंदी कौरे दिए जैशैकै मसीह कै जियुंदी कौरे राए थिया। ऐशै इथकारिए हौंव जिथुकै तुऐं बिशवाश कौरे राए, कै पौरमेशवरे आपणै शौकतै कै दवारा मसीह कै मौरणौ कै बाद औटेयौ जियुंदी कौरे दिया। 13 औरौ पौरमेशवरे तुऔं बै, जू आपणै पापौ औरौ खतना कै जैशणै बुरै स्वभाव दै पौड़ेयौंदे थिए, तैणै तुऔं मसीह कै साथै जियुंदी कौरे औरौ तोंवारै सौबै पापौ कै माफ कौरे। 14 औरौ ऐजौ ऐशै थियु जैशै पौरमेशवरे अमारै पापौ कै लैख किताब पौरैशै मिटाए दिए जिथमुंजी अमारै खिलाफ आरोप लैखै राए थिए; औरौ मसीह कै क्रूस पांदी चौढ़ाए जाणौ शै तैणै तिनु लेखो कै मिटाए दिए। 15 औरौ पौरमेशवरे मसीह कै क्रूस पांदी मौरणौ कै दवारा दुनिया कै औधिकारो औरौ प्रधानताओं कै हरायो तिनु सौबी कै सामणै बैज्जत कौरे औरौ तिनु पांदी जीतेयो तिनका खुलैआम तमाशा बाणा। 16 इथकारिए कोसी खै बै तुऔं धौखा ना दैणौ दैंव, औरौ खाणौ पिणौ की चीज़ौ या तैयार या नौवाँ चांद कै या विशांव कै दूस कै बारै मुंजी कोसी कै बै तोंवारा न्याय नै कौरणौ दैंव। 17 जिथुकै ऐजै सौबै कानून सिरफ ऐक छाया कै जैशणै औसौ। पौरौ मूल चीज़ौ मसीह की औसौ। 18-19 सै शोरीर का मुंड औसौ। ऐजौ तैसकै दवारा हौंव कै शोरीर कै सौबी अंगो कै दैखभाल हौंव औरौ तिनु ऐक साथै राखी। तौ ऐजौ तैशैखै बौढ़ौ जैशै पौरमेशवर चांव कै ऐजौ बौढ़ौ। कोसी लैई बै आपणै बैज्जती नै कौरांव औरौ स्वर्गदूतौ कै आराधना कौरेयौ बैकार नै बौणौ। ऐशणै लोग दर्शनों दै शामिल हौंव, जू तिनु तिनकै मानसिक सोंच की बौजैह शै मूर्ख तरीकै शै घमण्ड शै भोरै दैंव। तिनुऐ मसीह कै छोड़े दिया। मसीह कै साथै जीणु औरौ मौरणौ 20 जिथुकै तोंवारा पाप वाल़ा स्वभाव मसीह कै साथै मौरे गौआ इथकारिए ऐबै तुऔं दुनिया की शिक्षा कै मानणौ कै जौरुरत ना आथी। तौ हौजौ बै तुऐं किथु दुनिया कै जैशणै जिन्दगी बितांव जैशैकै दुनियाए ऐबै बै तुऔं आपणै वश दै कौरे राए? 21 जैशै सै ऐशणै नियम कै बाणौ इयौं चीज़ौ कै नै छोंयाँ, या ऐशणी चीज़ौ कै ना खाया, औरौ ऐशणी चीज़ौ कै हाथ नी लाया। 22 औरौ ऐजी सौबै चीज़ौ कोसी कै काम ना आन्दी जिथुकै ऐजी सौबै बातौ आदमी की आज्ञाओं औरौ शिक्षाओं खै हिसाब शै औसौ। 23 इनु नियमौ दै आपणै इछा कै हिसाब शै बाणैयोंदै भोक्ती कै भौवार, औरौ झूठी दीनता, औरौ आपणै शोरीर कै साथै कठोर बर्ताव कौरणा ही ऐक ज्ञानी हौणौ का ढोंग कौरौ, पौरौ हकीकत दै ऐजै नियम लोगौ कै तिनकी बुरै इछावं कै काबू कौरणौ दै मौदद ना कौरौ। |
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
Beyond Translation