कुलुस्सियों 1 - सिरमौरी नौवाँ नियमशुभकामनाएँ 1 हांव पौलुस जू पौरमेशवर की इछा कै दवारा मसीह यीशु का चोणेयौंदा चैला औसौ, औरौ साथी बिशवाशी भाई तीमुथियुस कै ढौबौशै ऐजै चिट्टी लैख लोए। 2 ऐजै चिट्टी मसीह दै तिनु पवित्र औरौ भोरोशे लायक भाईयों खै नांव औसौ जू कुलुस्से शहर दै रौंव। अमारा पिता पौरमेशवर तुऔं अनुग्रह औरौ शान्तै दैंदा रौंव। 3 जोबै आमै तुऔं कारिए प्रार्थना कौरु तोबै आमै आपणै प्रभु यीशु मसीह कै पिता यानी पौरमेशवर का धन्यवाद कौरु। 4 जिथुकै आमुए शौणै राए कै तुऐं लोग मसीह यीशु पांदी बिशवाश कौरौए, औरौ सौबी पवित्र लोगौ आरी प्यार राखौ। 5 जिथुकै तुऐं ऐजौ तियौं आशा की बौजैह शै कौरौ जू तुऔं कारिए स्वर्ग दै राखै राए, जिथकै बारै मुंजी तुऐं शौणै राए जोबै आगली बैई लोगै तुऔं यीशु मसीह कै बारै मुंजी सुसमाचार शुणौऊवा जू पौरमेशवर का साचा सौंदेश औसौ। 6 ऐजा सुसमाचार पूरै दुनिया दा फोयलै रौआ औरौ कैई लोग बिशवाशी बौणै रौवै। इथलैई हर जौगैह जिन्दगी बौदल़दै लाग रौए, ठीक तैशैखैई जैशैकै तुऐं आगलै बैई सुसमाचार खै शौणै राए थिया औरौ इयौं सौचाई खै सौमझै राए कै पौरमेशवर तिनु लोगौ कै पापौ खै माफ कौरौ जू मसीह दा भोरोशा राखौ। 7 सुसमाचार की शिक्षा तुऐं अमारै प्रिय सहयोगी भाई इपफ्रास शै शैखै राए जू आमु कारिए मसीह का बिशवाश लायक सेवक औसौ। 8 तैणै आमु तोंवारै तैसी प्यार कै बारै मुंजी बौतौऊ जू तुऐं ओकी लोगौ आरी कौरौ, जू पवित्र आत्माए तुऔं दैय राए। आत्मिक बोढ़ोतरी कारिए प्रार्थना 9 इथकारिए जैसी दूसौ दो ऊबु आमुए ऐजौ शौणै राए आमै बै तुऔं कारिए लगातार प्रार्थना औरौ बिन्ती कौरु; कै पौरमेशवर कै आत्मा तुऔं ज्ञान औरौ सौमझ दैंव ताकि तुऐं तैसकै इछा कै पूरी तरह शै सौमझै सौकौ। 10 औरौ आमै ऐजै प्रार्थना कौरु कै तुऐं ऐशैखै आपणै जिन्दगी जियौं जैशै प्रभु चांव, औरौ तुऐं प्रभु कै सौबी बातौ दा खुश कौरे सौकौ। तुऐं लगातार हर भान्त कै भले काम कौरदै रौंव, औरौ पौरमेशवर कै बारै मुंजी लगातार जादा शै जादा जाणदै रौंव। 11 आमै प्रार्थना कौरु कै पौरमेशवर आपणी अनौखी शौकतै कै हिसाब शै तुऔं जादा ताकतवर बौणादा रौंव ताकि तुऐं सब्र औरौ खुशी शै आपणै दुखो कै सैहन कौरे सौकौ। 12 औरौ पिता पौरमेशवर का धन्यवाद कौरदै रौंव जैणै तुऔं ऐसी लायक बाणै राए कै तुऐं तैसी विरासत दै शामिल हौंव जू तैणै पेयाशै कै राज्य दै आपणै पवित्र लोगौ कारिए तैयार कौरे राए। 13 जिथुकै पौरमेशवरे आमु शैतान की शौकतै शै छुड़ायो आपणै प्यारे बैटै कै राज्य दै आमु लौयौ आए रौआ। 14 पौरमेशवरे आपणै बैटै कै बलिदान कै दवारा आमु कै शैतान की शौकतै शै छुटकारा दैय राए यानी अमारै पापौ कै माफ कौरे राए। मसीह दा मैल जोल 15 कुणिए बै पौरमेशवर कै ना दैखै सौकौ, पौरौ जोबै तैसका बैटा ऐक आदमी कै रुप दा ओऊवा तौ तैणै पौरमेशवर खै लोगौ कै सामणै प्रगट कौरे दिया; औरौ सौबी चीज़ौ कै बाणणौ दा आगै सै बजूद दा थिया औरौ पूरी दुनिया पांदी तैसका औधिकार सौबिदा बौड़ा औसौ। 16 जिथुकै ऐजा सैजाई मसीह थिया जैणै सौब ठुँ बाणणौ मुंजी पौरमेशवर कै साथै काम कौरा, चाहै स्वर्ग की चीज़ौ हौंव, या धोरती की चीज़ौ हौंव, दैखैयोंदी या अणदेखी हौंव, औरौ राजाओं, प्रभुताएं, प्रधानताएं, औरौ औधिकार, सौबै चीज़ौ तैसकै दवारा औरौ तैसीकै आदर दैणौ कारिए बाणै रैई। 17 औरौ मसीह ही सौब चीज़ौ कै बाणणौ शै आगै दा ही मौजूद थिया, औरौ सौब चीज़ौ तैसदी ऐक साथै काम कौरौ। 18 मसीह कलीसिया कै अगुवाई तैशै कौरौ, जैशै ऐकी आदमी कु मुंड तैसकै शोरीर कै काबू कौरौ, सैजाई शुरुआत औसौ, औरौ मौरेयौंदे मुंजीदा जिंदा हौणौवाल़ौ मुंजीदा आगला औसौ, कै सौबी बातौ दा प्रधान ठौहरौ। 19 जिथुकै पिता पौरमेशवर कै खुशी इदै औसौ कै तैसकै सारै परिपूर्णता मसीह दै मौजूद रौ। 20 पौरमेशवरे आपणै बैटै कै भैजणौ का फोयसला कौरा जैणै आपणा लोऊ बोऊंवा औरौ क्रूसो पांदी मौरे गौआ, पौरमेशवरे ऐशै आपणै औरौ सौबी चीज़ौ कै बीच मुंजी मैल मिलाप कौरवाणौ कारिए कौरौ। ऐशैखैई, तैणै आपणै औरौ तिनु सौबी कै बीच मुंजी शान्तै बाणै जू स्वर्ग औरौ धोरती पांदी रौंव। 21 इदै आगै तुऐं पौरमेशवर शै बैजाए दूर थिए। तुऐं पौरमेशवर कै दुशमन थिए जिथुकै तोंवारै सोंच बुरै थै। 22 पौरौ पौरमेशवरे आपणै बैटै मसीह कै आदमी बाणैयौ औरौ तैसीकै क्रूस पांदी मौरणौ कै दवारा तोंवारा बै मैल-मिलाप कौरौऊवा, ताकि तुऔं आपणै सामणै पवित्र औरौ बिना कलंक औरौ निर्दोष बाणैयौ शामिल कौरौ। 23 पौरौ तुऔं बिशवाश दै ऐक नीयुं कै जैशणै मोजबूत बौणैयौंदो रौणौ चैंई औरौ तियौं आशा खै जू तुऔं कैई औसौ कौलोंई नी छोड़णे चैंई जिथुकै आमु तैसी सुसमाचार पांदी बिशवाश कौरु जिथका प्रचार धोरती कै सौबी जौगैह दा कौरे राए औरौ हांव पौलुस तैसी सुसमाचार का सेवक बौणा। कलीसिया कारिए मैहनत 24 ऐबै हांव तुऔं कलीसिया कै लोगौ कारिए जू दुख सैहन कौरु तिथकै बौजैह शै खुशी औसौ। औरौ मोऐं लगातार आपणै शोरीर दै दुखो कै सैहन कौरे लोए जैशै मसीहे सैहन कौरे राए थिए औरौ ऐजै दुख मोऐं मसीह कै कलीसिया कारिए झैलै लोए, जू तैसका शोरीर औसौ। 25 पौरमेशवरे मुखै इथकारिए चोणे राए ताकि हांव तैसकै सौंदेश कै तुऔं पूरी तरह सौमझाए सौकु औरौ इयौंई बौजैह शै हांव कलीसिया का सेवक बौणै गौआ। 26 यानी तैसी भैद कै जू सदियो औरौ बीतीयौंदी पीढ़ियौ शै छिपैयौंदा रौंव, पौरौ ऐबै पौरमेशवरे तिनु आपणै पवित्र लोगौ पांदी प्रगट कौरे राए। 27 जिथुकै पौरमेशवर चांव थिया कै तैसकै लोग ऐजौ जाणै पांव कै मसीह का धन औरौ महिमा तुऔं बैगानै यहूदी लोगौ कारिए बै औसौ। औरौ भैद ऐजा औसौ कै मसीह तुऔं दा रौंव जू तुऔं तैसकै महिमा कै आशा मुंजी शामिल हौणौ कै इजाज़त दैंव। 28 आमै हरेक आदमी कै मसीह कै बारै मुंजी बौतौऊं औरौ पौरमेशवरे जू पूरा ज्ञान आमु दैय राए सौबी कै चैतावणी दियु औरौ सौबी कै शिक्षा दियु, ताकि आमु ऐजौ पाकौ कौरे सौकु कै सौबवे मसीह दा ऐक सिध्द बिशवाशी हौए सौकौ जोबै सै पौरमेशवर कै सामणै खौड़ै रौंदै। 29 औरौ ऐजौ पूरु कौरणौ कारिए हांव कड़ी मैहनत औरौ संघर्ष कौरु, तियौं अनौखी शौकतै कै इस्तैमाल कौरदै बैई जू मसीह दैंव औरौ जू मैरै भीतरै काम कौरौ। |
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
Beyond Translation