प्रेरितो कै काम 9 - सिरमौरी नौवाँ नियमशाऊल का मन बोदल़ना 1 एसी बीच मुंजी शाऊल प्रभु यीशु कै चैलै खै धमकाणौ औरौ मारणौ कै धमकी दैंव थिया औरौ सै महायहूदी पुरोहित कै धोरे हौटा। 2 औरौ तैसीयादी दमिश्क शहर कै यहूदी सभा-घोरो कै नांव पांदी चिट्ठियां मांगी, कै कुणिए बै मर्द या बैटमाणिश जू मसीह कै गुट कै लोग औसौ तिनु बांनैयौ यरूशलेम शहर दै लियांव। 3 पौरौ शाऊल औरौ तैसकै साथी हांडदै-हांडदै दमिश्क शहर कै नेड़िक पोऊंचे, तौ एकदम गौयण शै तैसकै चोऊ ढौबौ पेयाशो चौमकौ, 4 औरौ सै जोमीनो पांदी उदा रिड़ा, औरौ पौरमेशवर कै ऐजी आवाज़ शौणै, “ओए रै शाऊल, ओए रै शाऊल, तू मुखै किथु सोताए?” 5 शाऊले पूछु, “ओए रै प्रभु तू कुण औसौ?” तैणै बौल़ौ, “हांव यीशु औसौ; जैसी तू सोताए। 6 पौरौ ऐबै बिज़यो नगर दा जा, औरौ जू ताखै कौरणौ औसौ, सै ताखै बौताए जालो।” 7 जू आदमी शाऊल कै साथी थिए, सैजै चुपी हौए गौवै, जिथुकै शोब्द तौ शुणौ थिए, पौरौ कोसी खै दैखौ ना थिए। 8 तोबै शाऊल जोमीनो पौरैशा बिज़ा, पौरौ जोबै आखी खुली तौ तैसकै किछै ना दैखी, औरौ सैजै तैसका हाथ पाकड़ेयो तैसी दमिश्क शहर दै लोय गौवै। 9 औरौ ती दूसौ तौड़ी तैसकै दैखी ना, औरौ ना किछै खैई औरौ ना किछै पी। शाऊल का बपतिस्मा 10 दमिश्क शहर दा हनन्याह नांव का ऐक चैला थिया, तैसीखै प्रभु यीशुए दर्शन दो बौल़ौ, “ओए रै हनन्याह!” तैणै बौल़ौ, “हां प्रभु।” 11 तोबै प्रभुए तैसी बौल़ौ, “बिज़यो, ‘सीधी’ नांव कै गल़ी दा जा, औरौ यहूदा कै घोरो दा शाऊल नांव कै ऐक आदमी कै बारै मुंजी पूछै पा; जू तरसुस शहर का रौणौवाल़ा औसौ जिथुकै तैणै प्रार्थना कौरे लोए, 12 औरौ तैणै दर्शन दो दैखौ कै हनन्याह नांव कै ऐक आदमीए आयौ, तैसी पांदी हाथ राखा कै सै दुजाल़ियो दैखदा लागौ।” 13 हनन्याहए जोवाब दिया, “ओए रै प्रभु मोऐं ऐसी आदमी कै बारै मुंजी बौहितै लोगौ शै शौणै राए कै ऐणै यरूशलेम शहर दै तैरै पवित्र लोगौ कै साथै बैजाए बुरु कौरे राए। 14 औरौ इथै बै ऐसीकै मुख्य यहूदी पुरोहितो कै ढौबौशा औधिकार भैटी रौआ कै जू लोग तांव पांदी बिशवाश कौरौ, तिनु सौबी खै बांनैयौ यरूशलेम शहर दै लोए जांव।” 15 पौरौ प्रभुए तैसीखै बौल़ौ, “तू आगु जा, जिथुकै तैसी तौ मोऐं बैगानै यहूदी औरौ राजाओं औरौ इस्राएल देश कै लोगौ कै सामणै मैरै बारै मुंजी प्रचार कौरणै औरौ आपणी सेवा कौरणौ कारिए चोणे राए। 16 औरौ हांव तैसीखै बौतांदा, कै लोगौ खै मैरै बारै मुंजी प्रचार कौरणौ कै बौजैह शै तैसी कैशणा-कैशणा दुख झैल़णा पौड़दा।” 17 तोबै हनन्याह बिज़यो तैसी घोरे ओऊवा, जिथै शाऊल रौकै रौआ थिया औरौ तैसी पांदी आपणा हाथ राखैयौ बौल़ौ, “ओए रै भाई शाऊल, तैसी प्रभु यीशुए मुखै भैजै राए जू ताखै तैसी बाटो पुंडा जिथैदा तू ओऊवा तैरै दैखिया, ताकि तू दुजाल़ियो दैखै सौकै औरौ पवित्र आत्मा लैई भोरै जाए।” 18 औरौ तौलोंई तैसकी आखी पौरैशै छिलके जैशणै छुटै औरौ सै दैखदा लागा औरौ बिज़यो बपतिस्मा लौआ; 19 तोबै तैणै खाणौ खायौ ताकत पाए औरौ सै कैई दूसौ तौड़ी तिनु चैलो कै साथी रौआ जू दमिश्क शहर दै थिए। शाऊले यीशु मसीह का प्रचार कौरा 20 औरौ सै तौलोंई दमिश्क शहर कै यहूदी सभा-घोरो दा यीशु का प्रचार कौरदा लागा कै यीशु ही पौरमेशवर का बैटा औसौ। 21 औरौ सौबै शुणणौवाल़ै लोग हैरान हौयौ बौलदै लागै, “का ऐजा सैजाई आदमी ना आथी, जू यरूशलेम शहर दै तिनु जू यीशु मसीह कै बिशवाशी थिए तिनुखै नाश कौरौ थिया औरौ इथै बै इथकारिए आए रौआ थिया, कै तिनु बांनैयौ मुख्य यहूदी पुरोहितो कै धोरे लोय जांव?” 22 पौरौ शाऊल हौजौ बै जादा ताकतवर हौंदा लागा औरौ इयौं बातौ का सबूत दैय दैयौ यकीन दिलांदा लागा कै यीशु ही मसीह औसौ, औरौ दमिश्क शहर कै रौणौवाल़ै यहूदी लोगौ का मुँह बोन्द कौरदा रौआ। 23 जोबै शाऊल खै दमिश्क शहर दै रौंदै बैई बौहितै दूस बीतै गौवै, तौ यहूदी लोगै मिलैयौ तैसीखै मारणौ कै साजिश बाणै। 24 पौरौ तिनकी साजिश शाऊल कै पोता लागै गोए: सै तौ तैसी मारणौ कारिए रात दूस नगर कै फाटको कै धोरे ताको दै लागै रौवै थिए। 25 पौरौ राती खै शाऊल कै चैलै तैसीखै ऐक बौड़ै शैकड़ै दा बोठाल़ेयो ऐक पाथरो कै ऊंचे दीवार शै धैनै उतारे दिया जू दीवार पूरै शहर कै घेरो थै ऐशैखैई सै दमिश्क नगर शै बौचेयौ निकल़ै गौआ। यरूशलेम शहर दा शाऊल 26 शाऊल यरूशलेम शहर दा पोंचैयो चैलै कै साथी भैटिणौ कै कौचिश कौरे पौरौ सौबै तैसदै डौरौ थिए, जिथुकै तिनुखै बिशवाश नी हौंव थिया, कै सै बै चैला औसौ। 27 पौरौ बरनबासे तैसी आपणै साथै चोणेयौंदे चैलै कै धोरे नियौ तिनु बौल़ौ, कै ऐणै कैशैकै दमिश्क नगर दा बाटो पुंडा प्रभु यीशु कै दैखा औरौ प्रभुए ऐसीआरी बातौ कौरी; औरौ हौजौ दमिश्क शहर दै ऐणै कैशणै हिम्मत शै यीशु कै नांव का प्रचार कौरा। 28 चोणेयौंदे चैलै बरनबास कै बातौ पांदी यकीन कौरा इथकारिए शाऊल तिनकै साथी यरूशलेम शहर दा आन्दा-जांदा रौआ। 29 औरौ निडर हौयौ प्रभु कै नांव का प्रचार कौरौ थिया औरौ यूनानी भाषा बौलणोवाल़ै यहूदी लोगौ कै साथी बातौ औरौ बैहसबाजी कौरौ थिया; इथकारिए सै तैसी मारणौ की कौचिश कौरदै लागै। 30 तोबै बाकी चैलै खै इयौं बातौ कै बारै मुंजी पोता चाला तौ तिनिए शाऊल खै कैसरिया शहर दा निया, औरौ तिथै तैसी कारिए जहाज शै तरसुस शहर खै जाणौ का जूगाड़ कौरा, जू तैसका आपणा शहर थिया। 31 ऐशैकैई सारै यहूदिया प्रदेश औरौ गलील जिले औरौ सामरिया प्रदेश दा कलीसिया कै लोगौ कै चैन भैटा औरौ तिनकी बोढ़ोतरी हौंदै लागै; औरौ सै प्रभु कै डौर औरौ पवित्र आत्मा कै मौदद लैई बौहितै लोगै प्रभु यीशु पांदी बिशवाश कौरा। ऐनियास का ठीक हौणा 32 तोबै ऐशै हौं कै पतरस सौबी जौगैह दा जांदा लागा औरौ तिनु पवित्र लोगौ कै धोरे बै भैटिणौ ओऊवा जू लुदा नगर दै रौंव थिए। 33 तिथै तैसी ऐनियास नांव का ऐक आदमी भैटा, जू ओधरंग का बीमार थिया, जू आठी सालो दा उंडा पाली पांदी पौड़ेयौंदा थिया। 34 पतरसे तैसी बौल़ौ, “ओए रै ऐनियास! यीशु मसीह ताखै ठीक कौरौ। बिज़, आपणा बिछाणा टिप।” तोबै सै तौलोंई ऊबा बिज़ा औरौ खौड़ा हौआ। 35 लुदा औरौ शारोन नगर कै सौबै रौणौवाल़ै लोगै तैसी दैखा औरौ प्रभु यीशु पांदी बिशवाश कौरा। दोरकास कै जीवनदान 36 याफा नगर दा तबीता नांव कै ऐक बिशवाशनी बैटमाणिश थै, यूनानी भाषा दो तियौंको नांव दोरकास थियु। सै बौहितै भोल़ै-भोल़ै काम औरौ गरीब लोगौ कै मौदद कौरौ थै। 37 जोबै पतरस लुदा नगर दा थिया तैसी सौमय सै बीमार हौयौ मौरे गौए औरौ तिनुऐ तियौं पाणी लैई नौहवायों उपले कमरे दै राखै दै। 38 लुदा नगर याफा नगर कै नेड़िक थिया, चैलै ऐजौ शोणेयो कै पतरस तिथै औसौ, दो आदमी भैजैयो तैसी कैईंदै बिन्तै कौरे कै, “अमारै धोरे आणौ दै देर नी कौर।” 39 तोबै पतरस बिज़यो तिनकै साथी हौटै गौआ औरौ जोबै सै पोऊंचा तौ सै तैसीखै उपले कोमरै दै लोए गौवै औरौ सौबै विधवाएं रुंदै बैई तैसकै धोरे आयौ खोड़ी हौए गोई औरौ जू कूर्ते औरौ खोटणो दोरकासे तिनकै साथी रौंदै बैई बाणै राए थिए, दिखांदी लागी। 40 तोबै पतरसे सौबी खै बायरै कौरे दियै, औरौ घुंडू नियुड़ायो प्रार्थना कौरे; औरौ लाश कै ढौबौ दैखैयो बौल़ौ, “ओए रै तबीता, ऊबै बिज़।” तोबै तियैं आपणी आखी खोले दी; औरौ पतरस खै दैखैयो ऊबै बिजै। 41 तैणै हाथ दैयौ तियौं ऊबै बिजाल़ै, औरौ पवित्र लोगौ औरौ विधवाओं खै बौएदैयौ तियौं जियुंदी औरौ जागेयौंदे दिखाए दै। 42 ऐजै बात सौबै याफा नगर दै फोयलै गौए औरौ बौहितै लोगै प्रभु यीशु पांदी बिशवाश कौरा। 43 औरौ पतरस याफा नगर दा शमौन नांव का कुणजाई चामड़े का धान्धा कौरणौवाल़ै आदमी कै इथै बौहितै दूसौ तौड़ी रौआ। |
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
Beyond Translation