प्रेरितो कै काम 6 - सिरमौरी नौवाँ नियम

सात सुनांव सेवको का चुनाव

¹ तिनु दूसौ दै जोबै चैलै कै गिनती बौहितै बौढ़ गौए, तोबै इब्रानी भाषा बौलणोवाल़ै यूनानी भाषा बौलणोवाल़ै यहूदी बिशवाशी कै खिलाफ हौए गौवै, कै हर दूस कै पौयसै औरौ खाणौ कै सेवकाई दै अमारै विधवाओं कै दैख रैख ना कौरे जांव।

² तोबै तिनु बारौ चोणेयौंदे चैलै यरूशलेम शहर कै सौब चैलै कै आपणै धोरे बौएदैयौ बौल़ौ, “ऐजौ ठीक ना आथी कै आमुए पौरमेशवर कै वचन कै प्रचार ना कौरेयौ खयाणो पियाणौ कै सेवा दै लागै रौंऊ।

³ इथकारिए ओए रै बिशवाशी भाईयों, आपी मुंजीदै सात इजतदार मर्दो कै जू पवित्र आत्मा औरौ बुध्दि शै भौरेयौंदे हौंव, जिनकै बारै मुंजी सौबै जोणे जाणौ हौलै, चोणे पाव, कै आमु तिनु ऐसी कामौ कै जुमैवारै सौंपै सौकु।

⁴ पौरौ आमुए तौ प्रार्थना औरौ वचनो का प्रचार औरौ शिक्षा दैणौ दै लागैयौंदे रौंदै।”

⁵ ऐजै बात सौबी मण्‍डली कै आछी लागै औरौ तिनुऐ स्तिफनुस नांव का ऐक मर्द कै जू पवित्र आत्मा लैई भौरेयौंदा थिया, औरौ फिलिप्‍पुस औरौ प्रुखुरुस औरौ नीकानोर औरौ तीमोन औरौ परमिनास औरौ अन्‍ताकिया शहर कै रौणौवाल़ै नीकुलाउस खै जू यहूदी कै गुट शै आए गौआ थिया, चोणे पाए।

⁶ औरौ तिनु चोणेयौंदे चैलै कै सामणै लोऊवे औरौ तिनुऐ प्रार्थना कौरेयौ तैसी कामौ खै कौरणौ कारिए तिनुखै चुणै।

⁷ औरौ पौरमेशवर का वचन फौयल़दा गौआ औरौ यरूशलेम शहर दै चैलै कै गिनती बैजाए बौढ़दै गौए औरौ बौड़ी संख्या दै यहूदी पुरोहिते बै यीशु मसीह पांदी बिशवाश कौरणौ कै ऐसी सौंदेश कै मानै पोऊवा।

स्तिफनुस की गिरफ्तारी

⁸ स्तिफनुस अनुग्रह औरौ अनौखी शौकतै दा भोरेयौ लोगौ मुंजी बौड़ै-बौड़ै काम औरौ निशान दिखाया कौरौ थिया।

⁹ पौरौ किछै लोग स्तिफनुस कै खिलाफ हौए गौवै, सै तियौं यहूदी सभा-घोरो कै सदस्य थिए, जिथु गुलामी शै आज़ाद हौणौ बौल़ौ थिए, सैजै लोग कुरेन औरौ सिकन्‍दरिया शहरो शै औरौ किलिकिया औरौ एशिया प्रदेशो शै बै थिए। सैजै लोग स्तिफनुस कै साथै बैहसबाजी कौरदै लागै।

¹⁰ पौरौ स्‍तिफनुसे जू किछै बै बौल़ौ सै तिथका जोवाब ना दैय सौकी जिथुकै पवित्र आत्माए तैसी बौड़ै बुध्‍दिमानी कै साथै बौलणौ दै मौदद कौरे।

¹¹ इथपांदी गुलामी शै आज़ाद हौणौवाल़ै लोगै कैई लोगौ खै स्तिफनुस कै बारै मुंजी झूठ बौलणौ कारिए उकसोऊवे औरौ सै बौलदै लागै आमुए ऐसी मूसा कै कानून औरौ पौरमेशवर कै खिलाफ नेंदैया की बातौ बौलदै बैई शौणै राए।

¹² औरौ तिनुऐ स्तिफनुस कै खिलाफ लोगौ औरौ बुड़ेईको औरौ यहूदी शास्त्री कै उकसाए औरौ तिनुऐ आयौ स्तिफनुस कै थाम्बैयौ महासभा कै धोरे निया।

¹³ औरौ तिनुऐ तिथै झूठै गवाह खौड़ै कौरे, जिनुवै स्तिफनुस पांदी इलजाम लोऊवा कै ऐजा आदमी ऐसी पवित्र ठाँव औरौ मूसा कै कानून कै खिलाफ बौलणौ ना छोड़ो।

¹⁴ जिथुखै आमुए ऐसी ऐजौ बौलदै बैई शौणै राए कै ऐजा नासरत गांव का यीशु ऐसी मंदिर कै ढाल़ै दैंदा, औरौ तिनु भौवारो खै बौदलै दैंदा जू मूसाए आमु कै दैय राए।

¹⁵ तोबै सौबी लोगै जू महासभा दै बौठै रौवै थिए, तैसकै ढौबौ टकटकी लायौ दैखौ औरौ तैसका मुँह स्‍वर्गदूत कै मुँह जैशणा चौमकेयौंदा दैखा।