प्रेरितो कै काम 5 - सिरमौरी नौवाँ नियम

पवित्र आत्मा शै झूठ बौलणौ

¹ हनन्‍याह नांव का ऐक आदमी, औरौ तैसकै घोरवाल़ी सफीराए आपणी किछै जायदात बैकै।

² औरौ तिथकै दामो पौरैशौ किछै आपी कारिए राखै दियु; औरौ ऐजै बात तैसकै घोरवाल़ी बै जाणौ थी, औरौ तिथका ऐक हिस्सा लायौ चोणेयौंदे चैलै कै दैय दिया।

³ पौरौ पतरसे बौल़ौ, “ओए रै हनन्‍याह! शैतानै तैरै मनो दै पवित्र आत्मा शै झूठु बौलणौ कै बात पाए राए, औरौ तुऐं आपणै बिकेयोंदे जायदात कै दामो का ऐक हिस्सा आपी कैंई राखै राए?

⁴ का बिकणौ दै आगै सैजै जायदात तैरै ना थी? औरौ जोबै बैकै गौए तौ तिथका दाम का तैरै कब्जे दै ना थी? तैरै मनो दा ऐशणै बुरै काम का विचार कुकै दा ओऊवा? तुऐं आदमी कैई नी, पौरौ पौरमेशवर कैंई झूठु बौल़ै राए।”

⁵ ऐजै बात शोणेयो हनन्‍याह जोमीनो पांदी उदा रिड़ा; औरौ तैसकै मौत हौए गौए औरौ सौबी शुणणौवाल़ै लोगौ पांदी बौड़ा डौर छाए गौआ।

⁶ तोबै जवान आयौ तैसकै ओर्थी बाणी औरौ बायरै नियौ दफनाए दिया।

⁷ लमसम तीन घांटे बाद तैसकै घोरवाल़ी जू किछै हौए रौव थियु ना जाणैयौ, भीतरै आए।

⁸ तोबै पतरसे तियौं बौल़ौ, “मुंकैई बौल का तुऐं दुए तियौं जायदात कै ऐतरै मुंजी बैकै राए थी?” तियैं बौल़ौ, “हां, ऐतरै मुंजी बैकै राए थै।”

⁹ पतरसे तियौं बौल़ौ, “ऐजै का बात औसौ, कै तुऐं दुईनै प्रभु कै पवित्र आत्मा की परीक्षा कारिए ऐकी साथै राजी हौए रौवै? दैख, तैरै घोरवाल़ै कै दफनाणो वाल़ै दवारो पांदी ही खौड़ै औसौ, औरौ ताखै बै बायरै लोय जांदै।”

¹⁰ तोबै सै तौलोंई तैसकै लातो पांदी रिड़ै गौए औरौ तियौंकै मौत हौए गौए औरौ जवाने भीतरै आयौ तियौंखै मोरयोंदी दैखै, औरौ बायरै नियौ तियांरै घोरवाल़ै आरी दफनाए दी।

¹¹ औरौ सारी कलीसिया जू यरूशलेम शहर दी थी, औरौ इनु बातौ कै सौबी शुणणोवाल़ो पांदी, बौड़ा डौर छाए गौआ।

चोणेयौंदे चैलै कै दवारा निशान औरौ चौमत्कार

¹² चोणेयौंदे चैलै कै दवारा बैजाए चौमत्कारी निशान औरौ अनौखै काम लोगौ कै बीच दिखाए जांव थिए, औरौ सौबै मसीह कै बिशवाशी ऐक मन हौयौ राजा सुलैमान कै ओसारे दै कौठै हौया कौरौ थिए।

¹³ पौरौ जिनुवै इबी तौड़ी यीशु पांदी बिशवाश ना कौरे रैई थी तिनुमुंजी दै कोसी कै ऐजै हिम्मत ना हौंव थी कै, तिनुमुंजी जायौ भैटियो; पौरौ तोबै बै लोग तिनकै तारीफ कौरौ थिए।

¹⁴ प्रभु दै बिशवाश कौरणौवाल़ै लोगौ कै गिनती बौढ़दै गौए औरौ भौरिशै मर्द औरौ बैटमाणिशौ का ऐक बौड़ा गुट बौणै गौआ।

¹⁵ जू किछै चोणेयौंदे चैलै कौरे लो थियु, तिथकै बौजैह शै लोग बीमारों कै शोड़कै पुंडे लाए लायौ खै, टाटो औरौ बिछाणै पांदी लिटाए दैंव थिए, कै जोबै पतरस आंव, तौ तैसकै छांव ही तिनुमुंजी दै कोसी पांदी पौड़ै जांव।

¹⁶ औरौ यरूशलेम शहर कै आंडे-पांडे कै नोगरो पौरैशै बै भौरिशै लोग बीमारों औरौ दुष्टआत्माओं कै सोताएयौंदे कै लाए-लायौ खै चोणेयौंदे चैलै कै धोरे कौठै हौंव थिए, औरौ सै सौबै ठीक हौए जांव थिए।

चोणेयौंदे चैलै कै कोयदी दै पाणै

¹⁷ तोबै महायहूदी पुरोहित औरौ तैसकै सौबै साथी जू सदूकी लोगौ कै गुट कै थिए, सै चोणेयौंदे चैलै शै रिशान्दै लागै। इथकारिए तिनुऐ किछै काम कौरणौ का फोयसला कौरा।

¹⁸ औरौ चोणेयौंदे चैलै कै थोम्बायो कोयदखाने दै बोन्‍द कौर दिए।

¹⁹ पौरौ राती कै प्रभु कै ऐकी स्‍वर्गदूतै कोयदखाने कै दवार खौलेयौ तिनु बायरै लायौ बौल़ौ,

²⁰ “जाव मन्दिर दै खौड़ै हौयौ, लोगौ कै ऐसी नौवें सौदा कै जिन्दगी कै बारै मुंजी बौतांव।”

²¹ चोणेयौंदे चैलै ऐजौ शोणेयो झीशींदै मन्दिर दै हौटै औरौ जैशै तिनुकै स्‍वर्गदूतै बौताए राए थियु तैशैकैई उपदैश दैणा शुरु कौरा। पौरौ महायहूदी पुरोहित औरौ तैसकै साथीए आयौ महासभा कौ औरौ इस्राएल देश कै लोगौ कै सौबै बुड़ेईक कै कौठै कौरे औरौ कोयदखाने दा सौंदेश भैजा, कै तिनु लाव।

²² पौरौ मन्दिर कै रोखवाल़ै तिथै पोंचैयो तिनु कोयदखाने दै ना पैई औरौ पाछु जायौ बोतोऊं,

²³ “आमु कोयदखाने कै बौड़ै चौकशी लैई बोन्‍द कौरेयौ औरौ रोखवाल़ै कै बायरै दवारो पांदी खौड़ै हौएयौंदै दैखै; पौरौ जोबै खोलो तौ भीतरै कुणिए ना भैटी।”

²⁴ जोबै मन्दिर कै रोखवाल़ै का ठोगड़ा औरौ मुख्य यहूदी पुरोहिते ऐजै खबर शौणै, तौ तिनकै बारै मुंजी बौड़ै पौरैशानी दै पौड़ै गौवै कै इथका का अणजाम हौंदा।

²⁵ ऐतरै दै कोसीए आयौ बौल़ौ, “दैखौ, जिनु तुऐं बोन्‍द राख राए थिए, तिनु आदमीए मन्दिर दै खौड़ै हौयौ लोगौ कै उपदैश दैय लौवै।”

^26-27 ऐजौ शोणेयो मन्दिर कै रोखवाल़ो का ठोगड़ा तिनकै साथै मंदिर दा हौटा औरौ तिथै जायौ चोणेयौंदे चैलै कै महासभा कै धोरे लियोऊवे, पौरौ जबरदस्ती कौरेयौ नी, जिथुकै सै लोगौ दै डौरौ थिए कै लोग पाथर मारै मारैयौ तिनुकै मारै दैंदै। जोबै तिनुऐ चैलै कै महासभा कै सामणै पैश कौरे, तोबै महायहूदी पुरोहिते तिनुवांदो पूछु,

²⁸ “का आमुए तुऔं सख्त आदैश ना दैय रैई थी कै तुऐं ऐसी नांव शै उपदैश नी कौरेया? हौजौ बै तुऐं सारै यरूशलेम शहर कै आपणै उपदैश शै भोरै दिया औरौ तैसी आदमी कै लोऊ का इलजाम जबरदस्ती आमु पांदी लाणा चांव।”

²⁹ पतरस औरौ औकै चोणेयौंदे चैलै जोवाब दिया, “आदमियों कै आज्ञा दी बौढ़ेयौ पौरमेशवर कै आज्ञा का मानणा ही अमारा फर्ज औसौ।

³⁰ अमारै पुराणियो कै पौरमेशवरे यीशु कै मौरेयौंदे मुंजीदा जियुंदी कौरे दिया, जैसीकै तुऐं क्रूसो पांदी किलो लायौ औरौ लोटकायो मारै दिया।

³¹ तैसीखैईं पौरमेशवरे राजा औरौ उध्दार कौरणौवाल़ा ठोहराएयो, आपणै सोऐं हाथौ कै सौबी दै बौड़ै ठाँव पांदी बौठाल़े दिया ताकि सै इस्राएल देश कै लोगौ कै आपणै बुरै सोंच विचारो औरौ बुरै बाटो शै पौरमेशवर कै ढौबौ फिरो औरौ तैसकै दवारा तिनुकै आपणै पापौ कै माफी दै।

³² औरौ आमै इनु बातौ कै गवाह औसौ, औरौ तैशैकैई पवित्र आत्मा बै, जैसी पौरमेशवरे तिनु दैय राए जू तैसकी आज्ञा मानौ।”

³³ ऐजौ शोणेयो सभा कै सदस्य गुस्से हुवे औरौ चोणेयौंदे चैलै कै मारणा चांव थिए।

³⁴ पौरौ गमलीएल नांव कै ऐकी फरीसी आदमीए जू यहूदी शास्त्र का ज्ञानी औरौ सौबी लोगौ मुंजी माना गिनेयोंदा थिया, महासभा दै खौड़ै हौयौ चोणेयौंदे चैलै कै दैणिक सौमय कारिए बायरै भैज दैणौ कै आज्ञा दी।

³⁵ तोबै तैणै महासभा कै सदस्य खै बौल़ौ, ओए रै इस्राएल देश कै लोगौ, जू किछै तुऐं इनु आदमी शै कौरणा चांव, सोंचै सौमझेयौ कै कौरेया।

³⁶ जिथुखै इनु दूसौ दै औगौड़ियौ थियूदास ऐजा दावा कौरौ थिया कै हांव बै किछै औसौ औरौ कुणिए चार शौ लोग तैसकै चैलै बौणै गौवै। पौरौ सै मौरे गौआ, औरौ जैतरै लोग तैसी मानौ थिए, सौबै लोग बैखरै गौवै औरौ तिनका नामोनिशान बै ना रोई।

³⁷ तिथकै बाद आबादी कै गिनती कै दूसै गलील जिले का रौणौवाल़ा यहूदा ओऊवा, औरौ किछै लोग आपणै ढौबौ कौर दियै, औरौ सै बै मौरे गौआ, औरौ जैतरै लोग तैसीकै मानौ थिए, सौबै बैखरै गौवै।

³⁸ इथकारिए ऐबै मैरी सलाह ऐजै औसौ, कै इनु आदमियों दै दूर ही रौया औरौ इनु कै जाणौ दैव, जिथुखै जै ऐजै योजना या काम आदमी कै ढौबौशा औसौ तौ आपी ही मिट जांदा।

³⁹ पौरौ जै पौरमेशवर कै ढौबौशा हौला, तौ तुऐं तिनु कौलोंई बै मिटाए ना सौकदै; कोदी ऐशैकै नी हौंव, कै तुऐं पौरमेशवर शै बै लोड़णौवाल़ै ठौहरौ।

⁴⁰ तोबै तिनुऐ तैसकै बात मान पाए; औरौ चोणेयौंदे चैलै कै बोयदयो पिटौऊवे; औरौ तिनु ऐजै आज्ञा दै कै सै ऐलो शै यीशु कै नांव शै किछै नी बौलेया औरौ हौजौ तिनु छोड़े दिए।

⁴¹ सै इयौं बातौ लैई खुशी हौयौ महासभा कै सामणै दै आगु हौटै, कै आमु यीशु कै खातिर बैजत हौणौ कै लायक तौ ठौहरै।

⁴² इथकै बाद चोणेयौंदे चैलै हर दूस मन्दिरो दै औरौ घोरो-घोरो दै जायौ लगातार उपदैश शिखांदै औरौ सुसमाचार का प्रचार कौरौ थिए कै यीशु ही मसीह औसौ।