प्रेरितो कै काम 4 - सिरमौरी नौवाँ नियम

पतरस औरौ यूहना की गिरफ्तारी

¹ जोबै पतरस औरौ यूहन्ना लोगौ शै ऐजौ बौल़ै लोव थियु, तौ मुख्य यहूदी पुरोहित औरौ मन्दिर कै ठोगड़े औरौ सदूकी लोग तिनकै धोरे आए।

² सैजै बैजाए गुस्से हुवे जिथुकै पतरस औरौ यूहन्ना यीशु कै बारै मुंजी शिखांव थिए औरौ लोगौ खै शिखांव थिए कै जू लोग मौरे गौवै पौरमेशवर तिनु औटेयौ जियुंदी कौरे दैंदा, जैशै तैणै यीशु खै मौरेयौंदे मुंजीदा जियुंदी कौरे दिया।

³ औरौ तिनुऐ तिनु गिरफ्तार कौरेयौ ओकी दूसौ तौड़ी कोयदखाने दै राखै जिथुकै बैल़खौ हौए गौ थियु।

⁴ पौरौ सौंदेश कै शुणणौवाल़ै मुंजीदै बौहितै यीशु पांदी बिशवाश कौरा, औरौ तिनकै गिनती कुल मिलायौ पाँची हजार आदमी कै लमसम थै जू यीशु पांदी बिशवाश कौरणौवाल़ै थिए।

पतरस औरौ यूहना : यहूदी सभा कै सामणै

⁵ दूजै दूसै तिनकै नेता, बुड़ेईक औरौ यहूदी शास्त्री यरूशलेम शहर दै कौठै हुवे।

⁶ सैजै लोग जू सभा मुंजी शामिल थिए, तिनुमुंजी महायहूदी पुरोहित हन्ना औरौ कैफा औरौ यूहन्ना औरौ सिकन्‍दर औरौ जैतरै महायहूदी पुरोहित कै कुड़बे कै थिए, सौबै यरूशलेम शहर दै कौठै हुवे।

⁷ औरौ पतरस औरौ यूहन्ना कै बीच मुंजी खौड़ै कौरेयौ पूछदै लागै, “ऐसी आदमी कै ठीक कौरणौ कारिए कुणै तुऔं अनौखी शौकतै औरौ औधिकार दैय राए?”

⁸ तोबै पतरसे पवित्र आत्मा लैई भोरेयो तिनु बौल़ौ,

⁹ “ओए रै लोगौ कै ठोगड़े औरौ बुड़ेईक, आमुए ऐक कमजोर आदमी का भला कौरे राए, औरौ ऐलो आमु कैईंदै जांच-पड़ताल कौरे लोए, कै सै कैशै ठीक हौआ।

¹⁰ तौ तुऐं सौबै औरौ सारै इस्राएल देश कै लोग जाणै पाव कै ऐजौ नासरत गांव का यीशु मसीह कै नांव लैई कौरौ। तैसी यीशु कै तुऐं लोगै क्रूसो पांदी चौढ़ाए दिया थिया, पौरौ पौरमेशवरे तैसी मौरेयौंदे मुंजीदा दुजाल़ियो जियुंदी कौरा। ऐलो तैसकै नांव कै दवारा ऐजा आदमी तोंवारै सामणै आछा भोला खौड़ा औसौ।

¹¹ मसीह यीशु ही सैजा पाथर औसौ, जैसी तुऐं मिस्रिए फेरकाए दिया थिया, औरौ सैजाई पाथर चट्टान बौणै गौआ।

¹² यीशु कै सिवाए कोसी ओकी कै दवारा उध्दार ना आथी जिथु स्वर्ग कै धैनै आदमी मुंजीदा ओका कुणजाई बै नांव ना दैय रैई, जैसकै दवारा आमै उध्दार पाए सौकु।”

यीशु कै नांव कारिए चैलो कै धमकी

¹³ जोबै तिनुऐ पतरस औरौ यूहन्ना कै हिम्मत दैखै, औरौ ऐजौ जाणौ कै ऐजै अनपढ़ औरौ सीधै साधे आदमी औसौ तौ हैरान हुवे; तोबै तिनुऐ जाणै पोऊँ, कै ऐजै यीशु कै साथै रौवै थिए।

¹⁴ पौरौ तैसी आदमी कै ठीक हौणौ कै बौजैह शै, जू पतरस औरौ यूहन्ना कै साथी खौड़ा थिया, यहूदी लोगौ कै ठोगड़े औरौ बुड़ेईक तिनकै खिलाफ किछै बै ना बौल़ै सौकी।

¹⁵ पौरौ तिनु महासभा कै बायरै जाणौ की आज्ञा दैयौ सै आपी मुंजी बौलदै लागै,

¹⁶ “आमुए इनु आदमी कै साथै का कौरु?” जिथु यरूशलेम शहर कै सौबै रौणौवाल़ै लोग इनु कै जाणौए, कै इनु कै दवारा ऐक मशहूर निशान दिखाए राए; औरौ आमुए ऐसी निशान कै भाजै बै ना सौकु।

¹⁷ इयौं बातौ का समाचार हौजौ जादा ना फोयलै जांव, आमु इनु झिड़कोऊगे, कै सै ऐसी नांव शै हौजौ कोसी बै आदमी आरी बातौ नी कौरेया।

¹⁸ तोबै पतरस औरौ यूहन्ना खै बौइदै औरौ झिड़कायो ऐजौ बौल़ौ, “यीशु कै नांव शै किछै बै बौलेया नी औरौ ना शिखाया।”

¹⁹ पौरौ पतरस औरौ यूहन्नाए तिनुकै जोवाब दिया, “तुऐं ही न्याय कौरौ, का ऐजौ पौरमेशवर कै नेड़िक आछौ औसौ, कै आमुए पौरमेशवर कै बात शै बोढ़यो तुंआरी बात मानु?

²⁰ जिथुखै ऐजौ तौ आमु शै हौए ना सौकौ, कै जू आमुए दैखै औरौ शौणै राए, सैजौ ना बुलू।”

²¹ तोबै तिनुऐ तिनुकै धोमकायो छोड़े दिए, जिथुकै लोगौ की बौजैह शै तिनु सौजा दैणौ कै किछै बै बौजैह ना भैटी, इथकारिए कै जू घोटना हौए रोए थी तिथकै बौजैह शै सौबै लोग पौरमेशवर की बौड़ाए कौरौ थिए।

²² जिथुकै जू आदमी, अनौखै निशान शै ठीक हौए रौआ थिया, सै चाल़ीश सालो दा जादा उमरे का थिया।

चैलो की प्रार्थना

²³ पतरस औरौ यूहन्ना रिहा हौणौ कै बाद आपणै साथियो कै धोरे ओऊवे, औरौ जू किछै मुख्य यहूदी पुरोहित औरौ बुड़ेईके तिनुकै बौल़ै राए थियु, तिनुकै शुणाए दियु।

²⁴ ऐजौ शोणेयो, तिनुऐ ऐक मन हौयौ कै जोर शै पौरमेशवर कै बौल़ौ, “ओए रै प्रभु, तू सैजाई औसौ जैणै स्वर्ग औरौ धोरती औरौ समुन्द्रो औरौ जू किछै तिथमुंजी औसौ बौणाए राए।

²⁵ तुऐं पवित्र आत्मा कै दवारा आपणै सेवक अमारै पुराणिया राजा दाऊद कै दवारा बौल़ौ, ‘बैगानै यहूदी लोगै किथु रोल़ा पाड़ा? औरौ देशो-देशो कै लोगै किथु बैकार बातौ सूची?

²⁶ प्रभु औरौ तैसकै मसीह कै खिलाफ धोरती कै राजा खौड़ै होवे, औरौ राज्यपाल ऐकी साथी कौठै होवे।’

²⁷ जिथुकै सौथी कै तैरै पवित्र सेवक यीशु, जैसका तुऐं अभिषेक कौरे राए तैसकै खिलाफ दै बैगानै यहूदी लोगौ औरौ इस्राएल देश कै लोगौ कै साथी मिलैयौ राजा हेरोदेस औरौ पुन्‍तियुस पिलातुस राज्यपाल बै ऐसी नोगरो दै कौठै हौए रौवै,

²⁸ कै तिनुऐ सैजौई कौरौ जू तैरै शौकतै औरौ इछाएं आगैई तय कौरे दियु थियु कै ऐशै हौणौ चैंई।

²⁹ ऐबै ओए रै प्रभु, तिनकी धोमकियो कै शुण, औरौ आपणै दासो कै ऐजा वरदान दै कै तैरा वचन बौड़ै हिम्मत शै शुणांव।

³⁰ औरौ ठीक कौरणौ कारिए तू आपणा हाथ औगौड़ियौ कौर कै चौमत्कारी निशान औरौ अनौखै काम तैरै पवित्र सेवक यीशु कै नांव लैई कौरे जांव।”

³¹ जोबै तिनुऐ प्रार्थना कौरे पाए, तौ सैजै जौगैह जिथै सै कौठै थिए हिंजल़ी गौए, औरौ सैजै सौबै पवित्र आत्मा दै भोरै गौवै, औरौ पौरमेशवर का वचन हिम्मत लैई शुणादै रौवै।

बिशवासियौं का सहयोगी

³² बिशवाश कौरणौवाल़ौ कै मण्‍डली ऐक चित औरौ ऐकी मनो कै थी, इथै तौड़ी कै कुणिए बै आपणै जायदात कै आपणै नी बौल़ौ थिए, पौरौ सौबै ठुँ साझे को थियु।

³³ चोणेयौंदे चैलै बौड़ै अनौखी शौकतै लैई यीशु कै जियुंदी हौणौ कै औटेयौ गवाही दैंव थिए औरौ तिनु सौबी पांदी बौड़ा अनुग्रह थिया।

³⁴ तिनुमुंजी कुणिए बै गरीब नी थी, जिथुकै जिनुकैईं जमीन या घोर थिए, सै तिनी कै बिक-बिकैयो, बिकयौंदे चीज़ौ कै रुपीये लायो तिनु चोणेयौंदे चैलै खै दैय दैंव थिए।

³⁵ औरौ जैशै कोसी कै जौरुरत हौंव थी, तिथकै हिसाब शै सौबी खै बांडै दैया कौरौ थिए।

³⁶ यूसुफ नांव का ऐक आदमी थिया। जू लेवी गोत्र का थिया औरौ तैसका जन्म साइप्रस टापू दा हौए रौआ थिया। जैसकौ नांव चोणेयौंदे चैलै बरनबास यानी शान्तै का बैटा राखै राए थियु।

³⁷ तैसकै किछै जमीन थी, जियौं तैणै बिकी औरौ दामो कै रुपये लायौ खै चोणेयौंदे चैलै कै दैय दियै।