प्रेरितो कै काम 3 - सिरमौरी नौवाँ नियम

लोंगड़े भिखारी कै ठीक कौरणा

¹ पतरस औरौ यूहन्ना दोफारी कै ती बौजै प्रार्थना कै सौमय मन्दिर दै जांदै लागै रौवै थिए।

² औरौ लोगै ऐकी आदमी कै नी लौआ थिया जू जन्म शै लोंगड़ा थिया, जैसीखै सैजै हर दूस मन्‍दिर कै तैसी दवारो पांदी जिथकौ नांव सुन्दर फाटक औसौ, बौठाल़े दैंव थिए, कै सै मन्दिरो दै जाणौवाल़ै कैईंदै भीख मांगो।

³ जोबै तैणै पतरस औरौ यूहन्ना कै मन्दिर दै जांदै बैई दैखै, तौ तिनु कैईंदै भीख मांगै।

⁴ पतरसे यूहन्ना कै साथै सीधु तैसकै ढौबौ दैखैयो बौल़ौ, “अमारै ढौबौ दैख!”

⁵ औरौ सै तिनु कैईंदै किछै पाणौ कै उमीद राखैयौ तिनकै ढौबौ दैखदा लागा।

⁶ तोबै पतरसे बौल़ौ, “चांदी औरौ सूनु तौ मुंआगै ना आथी पौरौ जू मुंआगै औसौ; सैजौ हांव ताखै दियु; नासरत गांव कै यीशु मसीह कै नांव शै ऊबा बिज़ औरौ हांडदा फिरदा लाग।”

⁷ तोबै पतरसे तैसका सोंवा हाथ थाम्बैयौ कै तैसी टिपा; औरौ तौलोंई तैसकै लातो औरौ घुंडू दै तागत आए गौए।

⁸ सै उछल़ैयो खौड़ा हौए गौआ औरौ चालदा फिरदा लागा औरौ चालदा औरौ उछल़ैयो-कुदिंदा औरौ पौरमेशवर कै बौड़ाए कौरदै बैई तिनकै साथै मन्दिर कै आँगणो दा हौटा।

⁹ सौबी लोगै तैसी हांडदा फिरदा औरौ पौरमेशवर कै बौड़ाए कौरदै बैई दैखा।

¹⁰ औरौ तैसीकै पौछेयाणै पोऊवा कै ऐजा सैजाई लोंगड़ा भिखारी औसौ, जू मन्दिर कै सुन्दर फाटक पांदी बौठेयौ भीख मांगैया कौरौ थिया; औरौ तियौं घोटना शै जू तैसकै साथी हौए रोए थी; तिथु दैखैयो सैजै लोग बैजाए हैरान औरौ चकित हौए गौवै।

सुलैमान कै ओसारे पांदी पतरस का सौंदेश

¹¹ जोबै तैसी आदमीए पतरस औरौ यूहन्ना कै पाकड़ै राए थिए, तौ सौबै लोग बैजाए हैरान हुवे। औरौ तैसी ओसारे दै जू राजा सुलैमान का औसौ, तिनकै धोरे दौड़ैयौ ओऊवे।

¹² ऐजौ दैखैयो पतरसे लोगौ कै बौल़ौ, “ओए रै इस्राएल देश कै लोगौ, तुऐं ऐसी आदमी कै दैखैयो किथु हैरान हौए रौवै, औरौ अमारै ढौबौ किथु हैरानी शै दैख लो जैशैखै मानौ आमुए ही आपणी अनौखी शौकतै या भोक्‍ती लैई ऐसीकै हांडणौ फिरणौ कै लायक बाणै राए।

¹³ अब्राहम, इसहाक औरौ याकूब का पौरमेशवर, अमारै पुराणिया कै पौरमेशवरे आपणै सेवक यीशु की महिमा कौरे, पौरौ तुऐं तैसी मारणौ कारिए यहूदी नेताओं कै हाथौ दा थोम्बाए दिया, औरौ जोबै राज्यपाल पिलातुसे तैसी छोड़े दैणौ का विचार कौरा, तोबै तुऐं तैसकै सामणै यीशु कै बैज्जती कौरे।

¹⁴ तुऐं यीशु कै ना अपनैई, जू पवित्र औरौ धरमी थिया। औरौ तुऐं चोऊ कै ऐकी हथयारै खै तुऔं कारिए छोड़े दिया जांव।

¹⁵ औरौ तुऐं तैसी जू लोगौ कै सौदा कै जिन्दगी दैंव मारै दिया, जैसी पौरमेशवरे मौरेयौंदे मुंजीदा जियुंदा कौरे दिया; औरौ इयौं बातौ कै आमु गवाह औसौ।

¹⁶ औरौ मसीह यीशु पांदी बिशवाश कौरणौ कै दवारा ऐजा आदमी बिल्कुल ठीक हौए गौआ, औरौ तुऐं जाणौए कै ऐजा कैशणा अपंग थिया औरौ तुंआरी आखी कै सामणै मसीह यीशु कै नांव दै बिशवाश कौरणौ की बौजैह शै ऐसी चंगाए भैट रौए।”

¹⁷ “औरौ ऐबै ओए रै भाईयों हांव जाणुए कै तुऐं औरौ तुंआरै नेताए यीशु कै अणजाणै दा मारै दिया, जिथुकै तुऔं पोता ना थी कै सै मसीह थिया।

¹⁸ पौरौ जिनु बातौ कै सौब पौरमेशवर कै बातौ बौताणौवाल़ै कै दवारा औगौड़ियौ ही पौरमेशवरे बौल़ै राए थियु, कै तैसका मसीह दुख झैलदा औरौ मारा जांदा, औरौ तैणै तिनु साचौ कौरेयौ दिखोऊ।

¹⁹ औरौ पाप कौरणा छोड़े दैंव, औरौ पौरमेशवर कै ढौबौ पाछु आव कै तोंवारै पाप माफ कौरे जांव जिथलैई तुऔं पांदी पौरमेशवर कै ढौबौशा आत्मिक शौकतै का सौमय आन्दा।

²⁰ औरौ सै यीशु कै छाड़दा, जू सैजा मसीह औसौ जैसी तैणै तुऔं कारिए औगौड़ियौ शै चोणे राए।

²¹ यीशु का स्वर्ग दा तैसी सौमय तौड़ी रौणा जौरुरी औसौ जोबै पौरमेशवर तिनु सौबी चीज़ौ कै नौवाँ बाणै दैन्दा जू तैणै बाणै रैई। बौहुत सौमय आगै पौरमेशवरे लोगौ कै बौताणौ कारिए पवित्र पौरमेशवर कै बातौ बौताणौवाल़ै कै दवारा ऐशै कौरणौ का वादा कौरा।

²² जैशैखै मूसाए बौल़ौ, ‘प्रभु पौरमेशवर तोंवारै भाईयों मुंजी तुऔं कारिए मुं जैशणा ऐक पौरमेशवर कै बातौ बौताणौवाल़ा भैजदा जू किछै सै तुऔं बौल़ौ तैसकी शोणेया।’

²³ पौरौ हर आदमी जू तैसी पौरमेशवर कै बातौ बौताणौवाल़ै कै ना शुणौ, सै पौरमेशवर कै लोगौ मुंजीदा नाश हौए जांदा।

²⁴ औरौ शमूएल शै लोयो तैसकै बाद वाल़ौ तौड़ी जैतरै पौरमेशवर कै बातौ बौताणौवाल़ै बातौ बौतैई तिनु सौबीए इनु दूसौ का सौंदेश दैय राए।

²⁵ तुऐं सौबीए पौरमेशवर कै बातौ बौताणौवाल़ै कै संतान औरौ तियौं कौरारो कै हकदार औसौ, जू पौरमेशवरे तोंवारै पुराणिया शै बानै, जोबै तैणै अब्राहम कै बौल़ौ, ‘तैरै वंश कै दवारा दुनिया कै सारै कुड़बे आर्शीवाद पांदै।’

²⁶ पौरमेशवरे आपणै सेवक कै मौरेयौंदे मुंजीदा बिज़ाल़ैयौ सौबिदा औगौड़ियौ तोंवारै धोरे भैजा, कै तुऐं आर्शीवाद पांव, ताकि तुऔं मुंजीदै हरेक पाप कै जिन्दगी शै फिरैयौ पौरमेशवर कै ढौबौ आणौ दै मौदद कौरौ।”