प्रेरितो कै काम 27 - सिरमौरी नौवाँ नियम

पौलुस कै रोम देशो खै भैजणा

¹ जोबै फेस्तुस राज्यपाल दवारा ऐजौ पाको हौए गौ कै आमै जहाजो खै दवारा इटली देश कै जांदै, तौ तिनुऐ पौलुस औरौ किछै ओकी कोयदी खै बै यूलियुस नांव कै सूबेदार खै हाथौ दै सौंपै दिए। जू महाराजा औगुस्‍तस कै सैनिक गुट का ऐक सूबेदार थिया।

² अद्रमुतियुम शहर को ऐक जहाज जू एशिया प्रदेश कै जाणौ पांदी थियु, तिथ जहाज पांदी आमुए आपणी समुन्द्री यात्रा शुरु कौरे औरौ अमारै साथै अरिस्‍तर्खुस नांव का ऐक आदमी बै थिया जू मकिदुनिया प्रदेश दा थिस्‍सलुनीके शहर का रौणौवाल़ा थिया।

³ दूजै दूसै आमै सैदा नगर पौंचै गौवै औरौ यूलियुसे पौलुस पांदी दया कौरेयौ कै तैसी दोस्तो कै इथै जाणौ दिया कै तिनु कैईंदी जौरुरी चीज़ौ लियांव।

⁴ तिथैशै आमुए दुजाल़ियो यात्रा शुरु कौरे, औरौ बागूर बैरवें बौणौ की बौजैह शै आमै साइप्रस टापू की आड़ शै हौयौ होटै;

⁵ औरौ किलिकिया औरौ पंफूलिया प्रदेश कै किनारे समुन्द्र मुंजी हौयौ मूरा शहर दै पौऊंचै जू कै लूसिया प्रदेश दो औसौ।

⁶ तिथै सूबेदार खै सिकन्‍दरिया शहर का ऐक जहाज इटली देश जांदी बैई भैटौ, औरौ तैणै आमुखै तैसी जहाजो पांदी बौठाल़े दियै।

⁷ जोबै आमै बौहितै दूसौ तौड़ी सुलै-सुलै बौएयौ मुशकिल शै कनिदूस नगर कै सामणै पोऊंचे, तौ इथकारिए कै बागूर आमुखै आगै बौड़णौ नी दैंव थी, आमै सलमोने कै सामणै शै हौयौ खै क्रेते टापू कै आड़ दै चालै;

⁸ औरौ तिथकै किनारे-किनारे मुशकिल शै बौएयौ खै “शुभ लंगरबारी” नांव कै ऐकी जौगैह पौऊंचै, जिथैदौ लसया नगर नेड़िक थियु।

पौलुस कै सलाह नज़र अंदाज

⁹ जोबै बौहितै दूस बीतै गौवै, औरौ पाणी कै यात्रा दै जोखिम इथकारिए हौंव थिए जिथुकै पापौ शै माफी मांगणौ कै दूसौ का तैयार खत्म हौए गौआ थिया औरौ ऐजाई सैजा मौसम औसौ जौल़ौ समुन्द्र दै बौहितै तूफान आंव। इथकारिए, पौलुसे तिनु सौबी खै बौल़ौ,

¹⁰ “ओए रै दोस्तो, मैरै ऐशैखै जाणियौ कै इयौं यात्रा दै मुसीबत औरौ बौहिता नुकसान, ना सिरफ माल औरौ जहाजो का पौरौ अमारै प्राणो का बै हौणौवाल़ा औसौ।”

¹¹ पौरौ सूबेदारे कप्तान औरौ जहाजो कै मालिक कै बात खै पौलुस की बातौ शै बोढ़यो खै मानी।

¹² शुभ लंगरबारी नांव का बन्दरगाह जाड़ै काटणौ कारिए आछौ ना थी; इथकारिए बौहितै का विचार हौआ कै तिथैशै आगु बौढ़ेयौ कैशैकैई हौए सौकौ तौ फीनिक्स बन्दरगाह पोंचैयो खै जाड़ो काटुगै। ऐजा तौ क्रेते टापू कै किनारे का ऐक बन्दरगाह औसौ, जिथका दवार दक्षिण-पश्‍चिम औरौ उतर-पश्‍चिम दिशा दा औसौ।

समुन्द्र दा तूफान

¹³ जोबै दक्षिण बागूर सुलै-सुलै बोहन्दै लागै, तौ तिनुऐ सुंचौ कै तिनकी योजना पूरी कौरणौ कारिए आछा सौमय औसौ, इथकारिए लंगर टिपयौ खै औरौ क्रेते टापू कै किनारे-किनारे समुन्द्र तट कै नेड़िक जांदै लागै।

¹⁴ पौरौ बिस्तौड़ी जोमीनो कै ढौबौशौ ऐक बोड़ो तूफान ओऊ, जिथुकै “यूरकुलीन” बौल़ौ।

¹⁵ जोबै तूफान जहाजो पांदी लागौ, तोबै जहाज बागूर कै सामणै ठौहरै ना सौकी, इथकारिए आमै जहाजो खै बागुरो कै बोवाव दो छोड़ दियु, औरौ ऐशैखैई बौएयौ हौटै गौ।

¹⁶ तोबै कौदा नांव का ऐक नानड़ा शा टापू कै आड़ दै बोहन्दै-बोहन्दै पौऊंचै औरौ आमै मुशकिल शै जहाज कि जीवनरक्षक किश्‍ती खै काबू दै कौरी।

¹⁷ तोबै जहाजो कै कर्मचारीए जीवनरक्षक किश्‍ती खै ठीक कौरेयौ जहाजो खै धैनै दो लोयो ऊपौर तौड़ी पागोई लैई कोशियो बानै दियु। औरौ सुरतिस खाड़ी कै चोरबालू पांदी ओटकणो कै डौरौ शै तिनुऐ लंगर खै दैणिक धैनै ओतरेयो जहाजो खै बागुरी कै बोवाव कै साथै-साथै बौणौ कारिए छोड़ी दियु।

¹⁸ औरौ जोबै आमुए तूफानों लैई बौहितै झिज़कुल़ै औरौ धाकै खाए, तौ दूजै दूसै सै जहाजो का माल फेरकांदै लागै;

¹⁹ औरौ तिजै दूसै तिनुऐ आपणै हाथौ लैई जहाजो को साज़-समान बै फेरकाए दियु।

²⁰ औरौ जोबै बौहितै दूसौ तौड़ी ना तौ सुरज ना तारै दैखी औरौ बौड़ा तूफान चालै रौआ थिया, तौ आखिर दी अमारै बौचणौ कै सौबै उमीद खत्म हौए गौए।

²¹ जोबै सै बौहितै दूसौ तौड़ी भूखै रौवै, तौ पौलुसे तिनकै बीच मुंजी खौड़ै हौयौ बुलू, “ओए रै दोस्तो, चैंई थियु कै तुऐं मैरै बात मानैयौ, क्रेते टापू दै आगुई नी बौढ़दै औरौ ना ऐजै मुसीबत आन्दै, औरौ ना ऐजा नुकसान हौंदा।

²² पौरौ ऐबै हांव तुऔं खै सौमझौऊं कै हिम्मत राखौ, जिथुखै तुऔं मुंजीदै कोसी कै बै मौत का खतरा ना आथी, पौरौ सिरफ जहाजो ही का नुकसान हौंदा।

²³ जिथुकै पौरमेशवर जैसका हांव औसौ, औरौ जैसकी हांव आराधना कौरु, तैसकै स्‍वर्गदूतै बियाल़ियो रातै मैरै धोरे आयौ खै बुलू,

²⁴ ‘ओए रै पौलुस, डौरेया नी! ताखै महाराजा (कैसर) कै सामणै खौड़ौ हौणौ जौरुरी औसौ। औरौ पौरमेशवरे सौबी खै जीवनदान दैय राखा, जिनुवै तैरै साथै यात्रा कौरे लोए।’

²⁵ इथकारिए ओए रै, दोस्तो हिम्मत राखौ; जिथुकै हांव पौरमेशवर पांदी बिशवाश कौरु, कै जैशैखै मुखै बौल़ै राखौ तैशैखैई हौंदौ।

²⁶ पौरौ आमु कोसी टापू पांदी जायौ टिकणु पौड़दौ।”

जहाजो को टूटणो

²⁷ जोबै चौदहवें रात आए, औरौ आमै अद्रिया समुन्द्र दै भौटकै रौवै थिए, तौ आधी रात कै नेड़िक जहाजो कै कर्मचारीए अनुमान लायौ जाणौ कै आमै कोसी देशो कै नेड़िक पौंचै रौवै।

²⁸ तिनुऐ पाणी कै गहराई सैंतीस मीटर डुंगै पाए औरौ दैणिक औगौड़ियौ बौढ़ेयौ खै हौजौ पाणी की गहराई नापी, तौ सत्ताइस मीटर डुंगु थियु।

²⁹ तोबै पथरीले जौगैह शै टकराणै कै डौरे शै तिनुऐ जहाजो खै पौछौड़ियौ चार लंगर पाए, औरौ झीश हौणौ कै दुआ कौरदै रौवै।

³⁰ पौरौ जोबै जहाजो कै कर्मचारी जहाजो पांदी दै भागणौ चांव थिए, औरौ तिनुऐ जहाजो कै सामणै कै ढौबौशै लंगर पाणौ कै भानै जीवनरक्षक किश्‍ती समुन्द्र दै उतारे दै;

³¹ तौ पौलुसे सूबेदार औरौ सैनिकौ खै बौल़ौ, “जै जहाजो कै कर्मचारी जहाज पांदी ना रौलै, तौ तुऐं बै ना बौचै सौकदै।”

³² तोबै सैनिके पागोई काटैयौ जीवनरक्षक किश्‍ती गिराए दै।

³³ जोबै झीश हौणौ पांदी थी, तौ पौलुसे ऐजौ बौलेयौ, खै सौबी खै खाणौ-खाणौ कारिए बिन्ती कौरे, “ऐलो चोऊदो दूस हुवे कै तुऐं फिकर कौर-कौरेयौ भूखै रौवै, औरौ किछै खाणौ नी खैई।

³⁴ इथकारिए हांव तुऔं सौमझौऊं कै किछै खाए पाव, जिथलैई तोंवारा बौचांव हौं; जिथुकै तुऔं मुंजीदा कोसी कै मुंडो का ऐक बाल़ बै ना झोड़दा।”

³⁵ औरौ ऐजौ बौलेयौ तैणै रोटै कोरयो सौबी खै सामणै पौरमेशवर का धन्यवाद कौरा औरौ तौड़ेयो खांदा लागा।

³⁶ इथलैई तिनु हिम्मत भैटी औरौ खाणौ खांदै लागै।

³⁷ आमै सौबै जोणे जहाजो पांदी दो सौ छिहतर आदमी थिए।

³⁸ जोबै सै खाणौ खायौ खै छौकै गौवै, तौ गियुँ खै समुन्द्र दै फैरकायो जहाजो खै हल्कौ कौरदै लागै।

³⁹ जोबै दूस निकल़ु, तौ तिनुऐ तैसी देश खै ना पोछैयाणी, पौरौ ऐक खाड़ी दैखी जिथका किनारा चकौर थिया, औरौ विचार कौरा कै जै हौए सौकौ तौ इथी पांदी जहाजो कै टिकोऊंबै।

⁴⁰ तोबै तिनुऐ लंगर खौलेयौ खै समुन्द्र दो छोड़े दियु औरौ तैसी सौमय तिरपाल की पागोई कै गांठी ढीले कौरे दी, औरौ बागुरो कै सामणै आगला पाला चौढ़ाएयौ किनारे कै ढौबौ चालै।

⁴¹ पौरौ दौ समुन्द्र कै भैटिणौ कै जौगैह पोड़ेयो खै तिनुऐ जहाजो खै टिकोऊ औरौ तिथका आगला भाग तौ मजबूत हौए गौआ, औरौ हिंजल़ी ना सौकी; पौरौ पौछौड़ियौ का भाग बागुरी कै जोरो लैई टुटदा लागा।

⁴² तोबै सैनिकौ का ऐजा विचार हौआ कै कोयदीयों खै मार दियुंगै; ऐशै नी हौं कै कुणिए गोता या बाउऐ दैयौ भागी जांव।

⁴³ पौरौ सूबेदारे पौलुसो खै बौचाणौ कै इछा शै तिनु ऐसी विचार शै रौकै, औरौ ऐशै बुलू, कै जू गोता या बाउऐ जाणौ सैजै आगै फाल़ मारैयौ किनारे पांदी निकल़ै जाव।

⁴⁴ औरौ बाकी लोग फाटै पांदी, औरौ कुणिए जहाजो कै ओकी चीज़ौ कै साहारै निकल़ै जाव, औरौ ऐशैखैई सौबै जोणे ठीक ढंग शै पौंचै गौवै।